1 Bitrus 3 - Kutsingken Ira Rimam ti Saen Kyag

Usom ti Som na Arom ti Anda yi Fengo Rimam

¹ Ani awaribaen ama, ni fxen abaen-ni nyinyang, ikyaen ti asiti ariki uwae-ba a ku nae-ba risu riben te ira Rimam be, risu ti nae riben-ni u ndeye ti u shir ba kafe ba uwog Rimam, si-yi ti a na ri kang ira te ba titawe be,

² ikyaen ti, aba nung risu ti nae riben-ni ti utob tinyang-ni.

³ Kindab ti kyae-ni ā si-yi ana rimenn ijwe be, pangma risu ti paen, ti atsen ti ajwo, ti iken atong na zinariya, ko fengo atupwa ti si, ti iticwun.

⁴ Amaa, kindab ti kyae-ni ā si ana riyaen utob, ti si rinyang ti ku fwa-wu fwa be. Ayi ā si utob ti ku kab ira nyinyang, u si-wu kusung ti ku ri fa ri fa be. Ayine si iken ti Rimam ku nung wu ti rurob timambe

⁵ Ayine si itso ti anda ti kute ti som usom ti sisaen ku kyae ijwe-ba. Aba site uwaetsi uwog Rimam, ku nae risu riben te abaen-ba.

⁶ Pangma ti Saraya nde, u nae risu riben na Ibrahim u ku kunn wu baa, itsekuru-wu. Ani ama si anyisu-wu, asiti ani a ku nde iken ti tinyang u ku kyen-ni ikyenricwu iken iki be.

⁷ Ani abaen anda ama, ni som usom te awa-ni yi fengo ti tatso baa ani na nungye ti aba na namsisi. Ni nda ba rurob ti pang atang, ikyaen ti, aba te ni ti ku ci rifunn rinyangwae Rimam tetso, ti si unyang, ikyaen ti ayi ā byangkyi-yi Rimam ti jwam-ni be.

⁸ Ira ti ricwunnkyi si ti ira ti kab-ni ā ru ba uwog kinjo. Ni sae atso te ayibrisi, ni ye ure ti si ana ameinja tetso, ti ni si te utob tinyang tetso, ti ni som usom ti risu ti nae riben tetso.

⁹ Ni pae-ni ripab ira titibi be, ni txunmbeb-ni atso be. Ni wae itinyang na ande, nee si iken ti nde Rimam kunn ni ba, awu u wae itinyang na ni ama.

¹⁰ Pangma ti a bae uwae Kutsingken Rimam baa, “Unde ti a ku sha unyang ti rikob, u nung usir ti tinyang yang-yi, awu ā jwin ira ti ri-wu nyinyang, ti ira tikong ā tso-yi unju-wu be.

¹¹ Awu ā kafe isim ta ikentitibi, u nde iken ti tinyang. Awu ā sha kujimshwur, u rwae putswa wu.

¹² Ayib Itsekuru ta risu ande ti som usom ti sisaen, atong-wu mbub tita ti wu fxen ītijwam-ba. Amaa, awu ku kafe ayib urwa tu ande ti ku nde ikentitibi.”

¹³ Aye ti u nde ni itibi asiti utob-ni a tsi ti ni u nde iken ti pang atang.

¹⁴ Amaa ko asiti ani a ku ngwa rikaen ikyaen usom ti pang atang, ti itinyang si ana-ni. Ni kyen-ni ikyenricwu-ba be, u ndembeb-ni utob be.

¹⁵ Amaa, uwae riyaen utob-ni, ni sa Kristi ti si Itsekuru tsi baa, awu na saen kyag. Ni tsi ti ujwin ko kiye titini, ikyaen ti, asiti unde iki a rang ni ira risu iken ti ani sa uwae tsi risu-yi, ani u ndetu ti ni u ri ru ye risu-ni.

¹⁶ Ni nde iken skuu ti risu ti nae riben, ti utob tinyang, ikyaen ti, kiye ti ande a ku txunmbeb kujwo wande-ni, rukwae u wae ba ikyaen wande ti tinyang-ni ti ani ku ande ikyaen Kristi.

¹⁷ Ayi nyangskeb ti unde ā ngwa rikaen ikyaen wande ti tinyang, asiti ayi a si iken ti Rimam ku sha, ti ti wu ngwa rikaen ikyaen ikentitibi ti ti nde.

¹⁸ Kristi ti risu-wu ngwa rikaen risu ande titibi. Awu ti si unde ti kubenti cwu ricwu ikyaen ande ti shanum kubenti, ti wu na pu ti ba uwog Rimam. A wen wu yi rimenn ijwe, yi Kusung a ye wu nwunn wu ti unyang.

¹⁹ Uwae Kusung awu nwunn ru ka tsag ira Rimam te asung ande ti ta uwae pursuna.

²⁰ Ti kucang uwae kiye Nuhu, ande bane fxen-ba ira Nuhu be, ko ti Rimam ye utob te ba kiye ti Nuhu ku skam kuyae. Ande itsongta ti ta uwae kuyae atang amam ti nwangru uwae ambyi.

²¹ Ambyi yine ku tatso ijwe ti jwo na batisma ti ku sa ba itinwangru. Ayi si-yi ti ambyi yine u jwo ru ajib ijwe-ti be, ayi si ikyaen ti ati ku jwam Rimam ti utob tinyang. Ati nwangru ikyaen itinwunn Yesu Kristi uwae iticwu.

²² Tine awu tso pu wu yi apupwen u ka som kujwo rici Rimam. Atom Rimam meme, ti iken ti tsitsi ti site kuko apupwen, ti riben, a pu faesi wu kujwo.