1 Bitrus 2 - Kutsingken Ira Rimam ti Saen Kyag

Ande Rimam ā Si Ande ti Saen Kyag

¹ Ikyaen yine, ni sa ruye risu-ni uwae meme ira titibi, rifen ti yer, kukyaefa, kufur ti fur, kutsinn ti tsinn, kutsag ti tsag,

² Pangma anyisu ibyaen ti ku sha ti a nyam abyaen iya-ba, ani ama ni sha abyaen Kusung ti Sisaen ti ni nyam. Yi fengo wune ani u ser ben, u tu itinwangru.

³ Ani mbwa mam pu ni itinyang Itsekuru-ti.

⁴ Ni ba uwog-wu, awu ti si kutxom ti site unyang ti ande ti utense pyipyir, amaa, uwog Rimam, Rimam tsab wu, awu si kutxom ti ku jaen ayib ti tinyang.

⁵ Ani ama si pangma atxom ti site unyang ti a ku nde wande te yi u ku mbye kusog atang ikyaen Rimam. Ani u si akwen ti sisaen ana Rimam ti ku yerwen iken ti pang atang na awu Rimam, ruye uwog Yesu Kristi ti nwangru ti.

⁶ Ikyaen ti, a bae uwae Kutsingken Rimam baa, “Nung, ame ku sim kutxom yi uten Siyon, ti si kutxom ukub kusog. Awu si kutxom ti tinyang ti a tsabsa, ti site aser timambe. Unde ti a ru kubenti uwog-wu, awu u tu-wu rikwae ti wae ama be.”

⁷ Ara, ani ande ti ru kubenti ku nung itinyang kutxom wune, amaa, uwog ande ti ru-ba kubenti be, ayi si pangma ti a bae uwae Kutsingken Rimam baa, “Kutxom ti ande ti ku mbye kusog sae ru ru, awu ti kafe kutxom na ukub kusog wu.”

⁸ A bae kyi baa, “Kutxom ti u kyen kufxen, ti kutxú na iraen ti raen.” Aba ku kyen kufxen ikyaen ti, aba ru-ba kubenti uwae ira yi be. Ayine si iken ti Rimam myae tsi ikyaen-ba.

⁹ Amaa, ani si kumbub ande ti Rimam tsab tsi, anyisu ukwe ti si akwen Rimam, kumbukwen ti sisaen, ande ti si ana Rimam. Awu tsab ni tsi ti ni na ya iski wande-wu ti tinyang uwog ande, ikyaen ti, ayi si awu Rimam ti kunn ni ruye uwae kufub ba uwog ti sisaen-wu ti ku fur ayib.

¹⁰ Kute ani si-ni iken iki be, amaa, tine ani si pu ni ande Rimam. Kute ani tu-ni ayibrisi Rimam be, amaa, tine ani tu pu ni.

Ati ā Si Apyi Rimam

¹¹ Ame ku ri te ni ande ti ure-m, ani ti si rikyen utense ike, u si-ni ande ti uten be, ni nwaen ru risu-ni uwae ijaen rimenn ijwe ti ku mbub rika te unyang-ni.

¹² Usom ti som-ni kutampwa ande ti apxin ā sisaen, ikyaen ti kiye ti aba a ku ri ira titibi risu-ni baa, ani na si ande titibi, aba u sae kujwo wande-ni ti tinyang, ama u teb Rimam usir itiba-wu.

¹³ Yi rinyi na Itsekuru-ti, ni nae risu riben na abikwe, ko awu a si ukwe tiyang, ko tikiyib,

¹⁴ ko aba a si gomna gomna ti ukwe tiyang tom ba ru ba ikyaen ti a na ba byinn ande ti ku kpag risu kimbab, ti a na teb ande ti ku nde iken ti kpang atang.

¹⁵ Iken ti Rimam ku sha si ti, ni na cwunnkyi unju ande ti kuskwab yi fengo na kujwo wande-ni ti tinyang.

¹⁶ Ni som pangma ande ti som usom ti risu-ba! Ni nda-ni usom ti risu-ni ayine ti ā kafe iken ti burkyi ikentitibi be, amaa, ni som usom pangma apyi Rimam.

¹⁷ Ni nda ande meme kuko. Ni ye ure te ande na Rimam meme. Ni kyen Rimam ti ni nda ukwe tiyang kuko.

Usom ti Som na Apyi ti Itsekuru-ba

¹⁸ Ani apyi, ni nae risu riben na ande ti kununn-ni ti ni nda ba kuko ti pang atang. Ayi si-yi nyang aba itsekuru ti ye su ni nyinyang amam be, amaa, fa te aba titibi ama.

¹⁹ Asiti unde a ku ngwa rikaen risu ira ti si-yi unju-wu be ikyaen ikyenricwu Rimam, ayi si iken ti tinyang.

²⁰ Kujwofwa imi ti ta atang asiti a byinn ni kimbab ikyaen riraen ti ani raen? Amaa, asiti ani a ku ngwa rikaen ikyaen kujwo wande ti tinyang ti ani ku nde, ni ye utob. Ayine si iken ti ku tsen Rimam utob.

²¹ Ayi si ikyaen yine nee a kunn ni ba. Kristi ti risu-wu ngwa itso rikaen yine ikyaen-ni, u ceb rifab nae ni ti ni na putsa.

²² Awu nde ji-wu ikentitibi be. Awu wer-wu rifen usir iki be.

²³ Kiye ti a txun wu asu, awu mbub-wu unju u txun ba ama be. Kiye ti a nda wu rikaen, awu ye-wu ripab-yi be, u sa uwae-wu tsi uwog Rimam, awu ti ku pwen rikwen ti kubenti.

²⁴ Awu ti risu-wu su ikentitibi-ti tso yi risu kutuku ti cice ikyaen ti uwae ikentitibi ti ti nde, ati ā si rukom, ama uwae iken ti kubenti ti ti nde, ati ā tsi user. Ikyaen abang rikaen ti awu ngwa, ani nwangru pu ni.

²⁵ Tikucang, ani si pangma iwentam ti jwe bibyinn. Amaa, tine, ani kafe ba pu ni uwog Itsekuru-ni ti ku shi ni shi, awu ti ku nungkyi unyang-ni.