1 Bitrus 1 - Kutsingken Ira Rimam ti Saen Kyag

¹ Ame Bitrus, atom Yesu Kristi, ti bae kutsingken wune ba ku na ni, ani ande ti Rimam ti shag kyife uten ti Pontus ti Galatiya, ti Kapadokiya, ti Asiya, ti Bitiniya, uwog ti ani si rikyen atang.

² Rimam Itse nungye pu wu ani ti kucang, u tsab ni ikyaen ti wu na kyaenyang utob-ni, u nda ni nae risu riben uwog Yesu Kristi, yi fengo na Kusung-wu, ikyaen ti anying Yesu Kristi na u jwosaen utob-ni. Rimam ā nda ni itinyang ti kujimshwur ko fufa ru yi uwe uwe.

Iken ti Ande na Rimam ku Sa Uwae Tsi Atang

³ Ti nde fxaefa na Rimam ti si Ite na Itsekuru-ti Yesu Kristi, ikyaen ti, uwae ayibrisi-wu ti kuko, awu nda ti unyang tishe yi uwae itinwunn na Yesu Kristi uwae iticwu. Ayine nda ti sa uwae tsi

⁴ baa, ati na u ci rifunn tiyang. Rifunn yine ku ndembeb-yi mbeb be, ku pù-yi rukwēn be, ku fwá mbeb-yi mbeb be. Ayi tsi apupwen ikyaen-ni,

⁵ ani ande ti Rimam, uwae kuko-wu, ku kyir ni, ikyaen uwae kinjo ti ani site yi, se kiye ti awu Rimam u tatso ti itinwangru ti awu myae tsi, ti awu u tatso ande usir ti ricwunnkyi.

⁶ Ni tsen utob uwae ayine, ko ti ani ta uwae rikaen ti tso tso uwae kiye ti kpang tine.

⁷ Ayine si ikyaen ti a u tatso paenine baa uwae kinjo-ni na si kubenti. Zinariya ti si iken ti ku ndembembeb, a ku myae yi te urwa. Ti mbwe-yi ama a ku myae uwae kinjo-ni, ti nyangskeb zinariya. Ricwunnkyi-yi, uwae kinjo-ni u shir na ni ititeb, ti rurob ti riyinn, kiye ti Yesu Kristi u ba tso risu-wu.

⁸ Ko ti ani saeji-ni awu ti ayib be, ani ye ure te wu. Tine ama, ko ti ani ku sae-ni awu ti ayib be, ani ru kubenti uwog-wu u munn ti utob titsen ti si-yi ti ti ri be, u kam ashwu.

⁹ Ricwunnkyi-yi, ani u tu iken ti ani sa uwae tsi risu-yi, ti si itinwangru unyang-ni.

¹⁰ Ira risu itinwangru yine, ande ti ku ya iskin ira Rimam kute ri baa, itinyang Rimam u tu ni. Aba nùng putsa, u rang ira risu-yi kyig kyig kyig.

¹¹ Aba kwab, u ku sha ti a u nung kiye wu, ti usir wu, ti fengo ti ayi u nde, ikyaen ti, Kusung Kristi ri te pu wu aba rikaen ti Kristi u ngwa, ti riyinn ti u putsa isim-yi.

¹² Kusung Rimam ri yae ira yine te ba baa, wande-ba na si-yi ti aba na ku nde na risu-ba be. Ayi na si ikyaen-ni. Ayi si sí iken ti a ya iski-yi te ni tine, nee Rimam tom Kusung ti Saen Kyag si ba u nda ande tsag Ira ti tinyang te ni. Ayine si iken ti atom Rimam ti apupwen ti risu-ba sha ti aten ayib ti a u nung.

Ni Som Usom ti Sisaen

¹³ Ikyaen yine, ni kyae utob-ni tsi nyinyang ikyaen wande, ti ni som ti ujwin. Ni sa uwae-ni meme tsi risu itinyang ti a u nda ni, kiye ti Yesu Kristi u kafe ba tso risu-wu.

¹⁴ Ti ani si pu ni anyisu Rimam ti ku nae risu riben ne, ni ya ijaen iken ti ani ku nde kiye ti ni ta uwae kufub ta.

¹⁵ Amaa, pangma ti Rimam ti kunn ni si Rimam ti sisaen, ni som usom ti sisaen uwae meme iken ti ani ku nde.

¹⁶ Ikyaen ti, a bae uwae Kutsingken Rimam baa, “Ni som usom ti sisaen, ikyaen ti, ame si Rimam ti sisaen.”

¹⁷ Rimam ku pwen rikwen, u ku kag-wu unde kag be, ama ku pwen unde titini rikwen pang ti kujwo wande ti awu nde. Ti ani ku kunn wu baa, “Itse”, ni nde meme iken-ni uwae ikyenricwu Rimam, kiye ti ani si rikyen utense ike.

¹⁸ Ani nung pu ni baa, iken ti a sa jaeb mbe ni uwae usom ti ukaen ti ani paembe uwog abitsekam-ni, ayi si-yi iken iki pangma azurfa ko zinariya, ti rinyang-yi ku pu ru ru be.

¹⁹ Ayi si anying na Kristi ti bom kujaeb timambe. Kristi ti si umbae mbawen ti tsaen fufxer u si-wu ti ajib be ti a sa anying-wu jaeb mbe ni atang.

²⁰ Rimam tsab wu tsi ikyaen wande yine ti ti a mam-ba utense khika be. Awu tso risu-wu uwae kiye ti ricwunnkyi wune, ikyaen-ni,

²¹ ani ande ti awu nda ni ru kubenti uwog Rimam, ti kunn nwunn wu uwae iticwu, u nda wu riyinn, mbwe ti kubenti-ni ti uwaetsi-ni ā ta uwog Rimam.

²² Tine ani nae pu ni risu riben te ira Rimam ti kubenti, u jwosaen pu ni utob-ni, u site ure ti kubenti na ameinja. Ikyaen yine, ni ye ure te atso ti utob-ni meme,

²³ ikyaen ti, a mbae pu ba ani ti tishe, ti si-yi itimbae na rimenn ijwe be, amaa, ana Kusung ti ku cwu-wu cwu be. Unyang-ni tishe ruye yi ira Rimam ti site unyang ti tsi kukunn.

²⁴ Pangma ti a bae uwae kutsingken baa, “Meme ande si pangma irum kutur. Meme rinyang-ba si pangma ajwug irum, Irum ku myae jwoo, u waen ru.

²⁵ Amaa ira na Itsekuru-ti Rimam u tsi kukunn ru fife yi uwe.” Ayine ti si Ira Tinyang ti a ya iski yi na ni.