Luke 9 - Karen Geko1 ဒေါ် ယေရှု ကာ့ ဘလုန်းအခီးအပရာ တစ်ဆူးသာ့နု့နူဘုန်ဖင်လောင်တာပရော်တာပရောက်ာ် ဒုန်း ပရာတဟယ် လော်နူမကိုက်က ခလူးဆွားတာဆူတာနာ့ ဒေါ်မာထမိုင်းဇိန်တာဆွေ့တာဆား တဟယ် ကနူးနခူးလော်။ 2 ဘုန်နူဘွေဘလိုင်လေဝေသူးဒုန်းအကမာဘွေတာ ဖိတ်တာမာဒေါ်မာတမိုက်တာဆွေ့ဆား တဟယ် နူလော်။ 3 ဘွေယေရှုနဲဝေသူးဒုန်း " သူးဇာ့ဘာဆွားယုတာတမူးတမူးကာ" ဘောနထောင့်၊ ရှာခူး၊ တာအယ်တာအွန်း ၊ ရှာအယ်တာအွန်း၊ ရူး၊ စဒုန်းခလေတဟယ်မယ်ဇာ့ဆွားယူးကာ 4 အော်သင်ဒုန်းအကကာ့ ကလုန်နာ တူးဒုန်း နာဇာ့ဆွာထောင်ဝိန် ငါးဝိန်ကူးခိန်ကာ။ 5 ပရာဒုန်း အသာ့ဇာ့အော်ဒုန်းကကာ့ ကလုန်သူးဒုန်းသင်၊ ဝိန်တဟယ်နူထူးမယ်သူးဆွားထောင် ဘုန်းနူဒေါ် ပူရွန်းလာတိုက်ကေးဟယ် ဖူဒုန်းတာဖင်သနဲအဝေး သူး" နူလော်။ 6 အခီးအပရာတတယ်နူဆွားထောင် ဒေါ်လေဟော သရားဘွေဟွားဘွေငေါ့ ဒေါ်မာတမိုက် ပရာဆားတဟယ် အတာဆွေ့တာဆား ဒုန်း ဒုန်း အကရွန်တဟယ် အော်နူလော်။ 7 စဟွာ ဟေရုဒ် နာဟူးဘာ ဘွေ ယေရှု အရီအကေး တဟယ် နူခိန်တာကူး တာကိုက်ဘာအော်နူလော်။ပရာတဟယ်နဲဒုန်းပရာဘလုန်းတာစရာယောဟန်ထောင်ပရာ့ဇိန်နူလော်။ 8 ပရာကူးရူတတယ် နူမယ်နဲဒုန်း 'ဧလိယ' ဇိန်လောင်ဇာ့မွက်မယ် ဝီးထောင်ပရာ့ဇိန်တပရာ ပရာဒူလော်။ 9 နဲမယ် ဟေရုဒ် နူ " ခေးပိုက်ထောင် ဒွန့် ဘုန်ယောဟန် ကောကော့ဟုန်း ၊ တာရီ တာကေး ဘွေးထောင်ဒုန်း ခေးနကူးကူးဟုန်း ပရာမာထောင်တာရီ တဟယ်မယ် ပါးပရာ" နဲဘုန်အသာ့အော်ဒုန်း အကလေအုတ် ဆူဘွေနူလော်။ 10 အခီးအပရာ မာတာဖေါ့ဇိန်တူးဒေါ်ဆိန့်ဇိန်နူးမူး ယေရှု ဒုန်းတာဒုန်း အဝေသူးမာဘာတဟယ် နူလော်။ ဘုန်နူဘွေကာ့လေမူး အခီးအပရာ ဒုန်းဗက်ဇဲဒ ဒုန်းကူးနူးလော်။ အဝေသူး အောတောင်းဘုန်းကလဲ ငါးကလောင်နူလော်။ 11 ပရာတဟယ် နူကွားလတ်ဘွေဒုန်း အကဆွားဇွတ်းဘွေ အခူစား ဘွေဘာ ရှူအဝေးသူးခလိုက်နူလော်။ ယေရှု နူဟောသရားဒေါ်နဲမူးဘွေ တာရီတာကေးဒေါ် မာထမိုက် ပရာတာဆားအော် တဟယ် နူလော်။ 12 တူးမုန်းထုန်မုန်းကလာ့ခိန်နူဘွေခီးပရာတစ်ဆူး သာ့နု့နူလေဒုန်းဘွေ အော်ဘုန်နဲမူးဘွေဒုန်း " ပရာတဟယ်ယိုးပါကဘာဘလိုတာတာ အယ်တာအွန်းဒေါ်တာ အော်ထုန်အော်ရောင်လဲနူလော်။ ကေးပယိုးကလောင်မယ်သူးလူလုန်းမိုက်ခေါဒေါ်တာတမီးဇာ့အော်အလဲ" နူလော်။ 13 ဘွေ ယေရှု နူနဲ ဝေသူးဒုန်း " ဖင်အဝေသူးဒေါ်တာအယ်တစ်မူးမူးကာ" ဒေါ်မကိုက်ဘွေဖင်လောင် ငေါ့နူ ဒေါ်ခီးပရာတဟယ်နဲ ဇိန်မူး' "ဒုန်းပအော်နူအော်မုန့် ငိုင်းခလော့ဒေါ်တာ့နုဘောလော်၊ ပါကဖင်အယ်ပရာယိုးဘလုန်မယ်ပါက ဘာပရီးသားကူးရူ နူလော်" 14 ဒုန်းပရာတဘ လုန်အကားနူ ပရာပခူးအော်ငိုင်းထော်ရှယ်နူလော်။ ယေရှုလား အခီးပရာတဟယ်ဒုန်း " လားလောင်ပရာငိုင်ဆူး ဒေါ်နောင်းလော်တစ်ဘလုန် တစ်ဘလုန်" နူလော်။ 15 အခီးအပရာ တဟယ်နူးမာဇွတ်မကိုက်ဘွေတာဖင်လောင်ငေါ့ နူဒေါ်။ ပရာတဟယ်မယ်နောင်းဇွတ်မကိုက် နူလော်။ 16 ဘွေဖိတ်မုန့်ငိုင်းခလော့ ဒေါ်တာ့ နု့ဘောနူဘုန် အုတ်ထောင်ဒုန်းမော့ ခူသဘားထော်ထောင် ယူးဘွေ အဘူးအယောင်း နူလော်။ ဘုန်နူဘွေ ဘုန်းဖာ့ ခူးကေး မုန့်တဟယ် နူဒေါ်ဖင် အခီး အပရာ တဟယ်မကိုက် အဝေသူးကဖင်အယ်ပရာ တဟယ်နူလော်။ 17 ပရာတဟယ် အယ်ဘာကုတ်ဘုန်ထူဇိန်တာအယ် အလောင်ဖရီတဟယ် နူးတစ်ဆူးနု့ ဒေါင်းလော်။ 18 ဘွေယေရှု သဘားတောင့် တပရားလော်ဘုန်နူ အခီးအပရာတာ မာဖော့ တဟယ်တူးလေဒေါ် ဘွေလွိုင်းဝေသူးဒုန်း "ပရာတဟယ်နဲခေးရီကေး သရားမီ" နူလော်။ 19 အဝေသူးတဟယ်ူနူနဲဇိန်ဘွေဒုန်း " ပရာတဟယ်နဲနာမယ် ပရာဘလုန်းတာစရာ ယောဟန်၊ ဧလိယ၊ ဝီးဒုန်းအမူးထောင်ဇိန်တပရာ ပရာ" နူလော်။ 20 ဒေါ်ဘွေလွိုင်းဇိန်ဝေသူး " သူတဟယ်သူး ကကာ့ခေးဒေါ်ပါ့ပရာ" ပေတရုနဲဇိန်ဘွေဒုန်း "ဘွေနူမွေး မေရှိယ ဒုန်းဖားဘွေဘလိုင်လော် ဘွေနူလော်" ။ 21 ဘွေမှာလောင် အဝေသူးတဟယ် ဒုန်းတာရီတာကေး တဟယ်နူဇာ့ဘာဆိန့်နူပရာ ကူးရူ တပရားကိုးနူလော်။ 22 ဘွေထူလောင်မှာလောင် အခီးအပရာ တဟယ်ဒုန်း " ပရာပခူး အနက်တာသဘားအခူအနက် ဒေါ်ပရာသိုက် မောရှေ လိုင်တဟယ်နူ က ခက်ဖလိန်း ပရာဖေါ့ခူး" ယိုးပရာလော်။ အဝေသူးတဟယ်နူ ကလန်းကေးဝေ ဒေါ်ကမာသူးဝေလော်။ နဲမယ် ဘာ့သု့သားခိန်နူ အဝေကသရိုက် ဆုန်းထုန်ဇိန်နူလော်" နူမယ်ဘွေတာမှာလောင်နူလော်။ 23 ဘုန်အခိန် ဘွေနဲပရာလောနူးတဟယ်ဒုန်း " ဇာ့မွက်မယ်းမယ် ပရာဒုန်းအသနူးဖီးထောင်ခေးခီးခေးပရာတဟယ်နူ ဘာလားကေးတာ ဖိတ်ဒုကူးဟာ့ နူလော်။ သူးဘာယောင်းတောင်း သူးကရူရူဘုန် သူးဘာဆွားကိုက်ထောင် ပွန့်နီပွန့်နာ" နူလော်။ 24 ပရာဒုန်းအာရကိတ်ဟော့ အသာ့နူ ကဘာလားကေးတာဖိတ်ဒူနဲနူကူးလောလော်။ နဲမယ်ပရာဒုန်း အလန်းလောင်အသာ့သမူးဒုန်းဘွေနုခူးတဟယ်နူ တာကမာကွားအသာ့သမူး နူလော်။ 25 သူးတဟယ်နူ သူးကနူးတာဟယ်ခူတဒဲဘာနူမယ် သူးတာအော်မူး ကကေးဒေါ်သူးသာ့ကရှုံမယ် တာအဘူးယောင်းဇာ့အော် တမီကိုး။ 26 ပရာဒုန်းအသရာ့ဒုန်းဘွေ အခူစား တဟယ်နူ ' ပရာ့ဖော့ခူးယိုးပရာနူ' လောင်ဒေါ်ဖော့ တာပရော်တာပရောက်ဒေါ်၊ သာ့ဆောင်းဆူးတဟယ်နူခိန် အကသာရာ့ဇိန်မူးသူး နူလော်။ 27 ခေးကဆိန့်ဘီသူးလော် ပရာဒုန်းအအော် ဆုန်းထုန်ပယိုးတဟယ် နူအဇာ့အုတ်ဆူဘာဘွေ မော့ခူ ဒေါ်သဘား ထောင်ဘာမူးနူဇာ့မွက်အကသူးမူးကိုး နူမယ်ဘွေ အတာဘရွီးနူလော်။ 28 ဒေါ်ဘွေပရွီးဘုန်တာတဟယ်နူ အနော်ရှော့သားခိန်နူ ဘွေကာ့မွန်း ပေတရု ယောဟန်ဒေါ်ယာကုပ် တဟယ် မကိုက် အကလေ သဘားဒုန်းခေါဘလော့ခူ နူလော်။ 29 ဘုန်းဘွေသဘား ခိန်နူ အနဲစက လိတ်ထောင် ဒေါ်အဆူဒုန်းရပေါ့ ရခါးဒေါ်ဘူး ပရောင်နူလော်။ 30 မောရှေ ဒေါ် ဧလိယနူ ဘရွီးဘာဘွေတုန်း သတူကလာလဲလော်။ 31 ဘွေခီးပရာတဟယ် ဒေါ်ဘွေနူ ပရွီးတာရီတာကေး တဟယ်မယ် ဘွေကအော်ဒေါ်တာလာကပေါ်ပရော်တာ ပရောက်ဒေါ် က ခေါင်သူးဘာအနဲဒုန်း ယေရုရှလင် ဝိန်ကူး တရီ တဟယ်နူလော်။ 32 ပေတရု ဒေါ် အငေါ်ပရာတာမာဖော့ တဟယ်နူ မီးသခူးနူးလော် ။ အဝေသူး မီးသရိုက် ခိန်နူအုတ်ဆူမူးတွေ အော်ဒေါ်အလာကပေါ်တာ ပရော်တာပရောက် နူလော်။ အအုတ်ဆူဘာဘွေ ဒေါ် ပရာဒုန်း အပရွီးဘာဘွေသာ့နု့ နူလော်။ 33 မောရှေ ဒေါ်ဧလိယဆွား ထောင်ဘုန်အခိန် ပေတရုနဲမူးဘွေဒုန်း "ဘွေ့ကေးယိုးကလောင်းအကလဲရောင့် ဒုန်းကအော်ယု့နဲခူးလော်လားကပရောင် နာနုခူးဒေးတမာ၊ ဧလိယနခူးတမာ၊ မောရှေနခူးတမာတကင်" နူလော်။ နဲမယ် အနဲ တာတဟယ်နူ အနဲတာသရား အဇာ့သိုက်ဇိန် အနဲနူလော်။ 34 ပေတရု ဆိန့်တာရီကနူခိန် ဒူအူးတခလော့နူ ဟော့ဘု့ဝေသူးဒေါ်ခဲအူဘာဝေသူးလော်။ အဝေသူး သဘိုက်သပရုတ်ဒုန်း မော့ခူအူဒေါ်ဒူအူးအော်ဘု့အော်တဟယ်နူလော်။ 35 ဘုန်းအခိန်မော့ခူဒူအူးကားတာငေါ့ ပရီထောင်ဒုန်း " ကယောင်ယိုးပရာနူမယ် မွေးခေးဖော့ခူး ဒုန်းခေးဘာလော့ နူလော်၊ နာဒိန်းဆော့ အငေါ့ကာ။" 36 တာငေါ့ပရီ ကနူဘုန်ပေတကရု ၊ ယေဟန်ဒေါ် ယာကုပ်တဟယ် အုတ်ဆူဘာထဲဘွေအော်တပရာ့ ပယ်လော်။ အဝေသူး အုတ်ဆူတာရီတာကေးတဟယ်နူ ဇာ့ဆိတ်ဘာယောင်း တပရာကိုးဒေါ် အော်မသွန်တောင်းတာ တဟယ်နူလော်။ 37 မာ့တနုန်ပယ်နူ ဘွေဒေါ်အပရာ သာ့သူးအော်ဒုန်းခေါနားဒေါ် ဇိန်လောင်ခိန်ဒေါ်အုတ်ဆူ ပရာတဟယ်နူလော်။ 38 ဒုန်းပရာဖာကားနူ ပရာအော်တပရာ "ဘွေ၊ ခေါင့်သဒေါဘုန်လား အော်မောင်ဇိန်ခေးဖော့မကိုက် ကအော်မောင်နူ တတကင် အဝေမယ် ခေးဖော့ အော်တပရာ့လော်နူလော်။ အဝေငါး 39 တာဆူတာနာ့ ဒုန်းဝေဒေါ် အသာဟွာ့ဒေါ်ကာ့ကရီးနူလော်၊ အဟွာ့ တဒေးပရာဘုန်း အခါသဘော့ တောင်နူလော်။ တာဆူတာနတ်နူ မာဆုန်းရေမာဆားဝေဘုန်းကလယ် ဆွားထောင်ကေးမူး နူလော်။ 40 ခေးကွီးရီဘာ နခီးနပရာတဟယ်ဒုန်း အကခလူး ဆွားကေးတာ ဆူတာနာ့ယို ဘာရဆားနူမယ် အဝေသူးမာဇာ့ဒါ" ကိုးနူလော်။ 41 ဘွေနူ နဲအပရာတဟယ်ဒုန်း " သူးတဟယ်သူးကော ကော့ဆွေ့ဆောင့်ဘုန် သူးတာယုတာ နာအော်ဆီမယ် ခေးကအော်ဘလုန် သူးကိုက်ထောင်များမား" ။ ဘွေနဲမူးဝေဒုန်း " လေကာ့ဟော့နဖော့ခူးဒုန်းခေးအော်ယိုး" နူလော်။ 42 သုန်လေယူးပရာဇာ့ ဖော့ခိန်တာဆူတာဆာနာ့နူ လေနူးဒုန်းအဝေကူးဒေါ် အဟွာ့တဒုန်းပရာ ဒူလော်။ ဘွေဖင်လော်အငေါ့ ဒေါ်တာဆူတာနာ့ အော်ရောင်နူလော်။ ဘွေမာ တမိုက်နူးပရာတာဆားဘုန်ဘလိုင်ဇိန်ဒုန်းအဖားအော် နူလော်။ 43 ပရာတဟယ်ဒုန်း အုတ်ဆူဘာ ယေရှု မာတာ လော်တတယ် နူဒေါ်အတာတမွတ်တမောင်းနူဇာ့ကာဒွန်ဇောင့် ဝေသူးနူလော်။ 44 ပရာတဟယ်တမွတ်တမောင်းဒုန်း ဘွေမာတာ တဟယ်ဒုန်း " တာဒုန်းခေးနဲ တာရီတာကေးတဟယ်နူ နာဒိန်းဒေါ်နသူ့ဘီဘီကာ။ ' ပရာလူဟယ်ခူဖော့' ယိုးပရာနူ ကဘာတာတာဖင် လောင်ဝေဒုန်း အဒူဒါးစဓိန်းကူး နူလော်" 45 နဲမယ် ပရာတာမာဖော့ဟယ်နူ ဘွေနဲတာရီတာကေးတဟယ် အနာဇာ့ပူ။ တာရီတာကေးအလုန်း ဘွေးတဟယ် လားဟွန်ကေးနူလော်။ အဝေသူး တဟယ်ဇာ့နာပူတာရီတာကေးတဟယ် မသောမယ် ကလွိုက်ဇိန်ဘလယ်နူခူးသာဘိုက် နူလော်။ 46 အခီးအပရာ တဟယ်နူ ပရွီးအော်ရောက်ဒုန်း အဝေသူးကား ပါးဒူကဒွန်မယ် မလောတပရာ နူလော်။ 47 ယေရှု့ သိုက်ငှားဒုန့် အဝေသူးအတာနသု့ ပရွီးအော်အာ့တဟယ်နူလော်။ ပရာဇာ့ဖော့တပရာ အော်ဆုန်းထုန်ဒုန်း ဘွေကထိတ် နူလော်။ 48 ဘုန်နူ ဘွေနဲ အခီးပရာတဟယ်တုန်း " စေးနခူးပရာအုတ်ဆီ ပရာ့ဇာ့ဖော့ တပရာ မယ်သူ့တာအုတ်ဆူခေး နူလော်။ ပရာဒုန်းအအုတ်ဆူခေးတဟယ်နူမယ် ပရာတုန်းအအော် ဟွီးပရာဒုန်း အဘလိုင်လော်ခေး နူလော်။ 49 ယောဟန် နူ " ယေရှု ပအုတ်ဆူပရာဒုန်း အခလူးဆွားတာဆူတာနာ့ ဒုန်းပရာတဟယ်လော် ဒုန်းနမီအကူး "ဆိန့်ဇိန်နူးဘွေ နူလော်။ 50 ယေရှုနဲ့ " ဇာ့မာသခုန်းအဝေကာ ၊ ပရာဒုန်း အဇာ့ထောဒါးသူးတဟယ်နူ မွေးပရာဒုန်း အအော် ဒေါ်သူးတဘိုင်း နူလော်။ 51 ဘွေဇာ့လားမူးကဇိန်ထောင်မော့ခူနူးမူ အဝေနူလားလောင် အသာ့ဒုန်း ကေလေဒုန်း ဝိန်ယေရုရှလင် နူလော်။ 52 ဘွေအလိုင်လေရုကူး အပရာဒုန်း ရှာမရိဒုန်းမကိုက် ကလေမာတာဒုန်း ဘွေအနူးခူး နူလော်။ 53 မသောမယ် ပရာအအော် ယေရုရှလင် ခလိုက်ကူးတဟယ်နူ အသာ့ဇာ့အော်ဒုန်းကအော်ပုန်းအုတ်ဆူဘွေ နူလော်။ 54 ဘုန်းအခိန်နူ ယာကုပ်ဒေါ် ယောဟန် အုတ်ဆူဘာ တာရီတာကေး တဟယ်နူဒေါ် နဲဘွေဒုန်း "ဘွေဝိုး ဘာကာလား မီအော်နုန်းမော့ ခူလောင် အယ်ကေးဒုန်းဖောင်း တဟယ်ယိုးဒါ" နူလော်။ 55 ဘွေအုတ်ဘာ့ဇိန်ကာချုန်းဒေါ်နဲ " သူးတဟယ်နူ သူးဇာ့သိုက်ဇိန်သူးနဲ ပရာဖော့ခူး နူဇာ့မွက်အကလောင်မာကေး ပရာအော်တဟယ်၊ မွေတုန်းအက လောင်မာဘလွတ်တာ နူခူး" နူလော်။ 56 အဝေသူးတဟယ်နူ ဆွားထောင်ဒေါ် လေမူး ဒုန်းဒုန်းကရွန်း နူလော်။ 57 ဘုန်းအလေဇွတ်ခလိုက် ခိန်နူ ပရာတပရာနူ နဲဘွေဒုန်း ခေးကလေ ဘလုန် နူလော်။ 58 ယေရှု နူ " ထွီမြုန်အော်ဒေါ်အကူး ၊ ထူအော်ဒေါ် အသွီး နူလော်။ မွေးမွေး ပရာဖော့ခူး ယိုးနူ အော်နာ့ခေါင်ပေါင့် သစ်ထူလော်" အဝေဆိိန့်နူလော်။ 59 ဘွေနူ နကာ့လေ ပရာတပရာဒုန်း အကလေဘလုန်နာ ခိန် ပရာယိုးပရာနူကနဲ " ဘွေ အော်ဟွီးခေးတပလော့ဖော့ကာ, ဘလိုင်လေခေးဒုန်း ခေးကလေဘူးလောင်း ရူးကူးခေးဖား" ကာဆိန့်သိုက်ငှား နူလော်။ 60 ယေရှု ဖင်လောင်ငေါ့ဒုန်း " နာကနဟွား မာငေါ့ဘွေခိန်ရီကေး ခိန်နူ ပရာသူးတ ဟယ်နူ ပရာဒုန်း အကသူးတဟယ် အကအုတ်ယူ့ရောင်တော့တာ" တဟယ် နူလော်" 61 ပရာကူးရွန်တပရာ နူမယ်" ဘွေ ၊ ဖင်ခေး ကလေဘလုန်နာဒေါ် ဆွားဇွတ်နာ။ မယ်ဖင်ခေးခွက်ဒုန်း ခေးကဇိန်သင်ကူးဒေါ် ခေးကဇိန်ဘွေရောက်တာလဲ တဟယ်တကင် " ကွီးဘွေဒေါ် ဆိန့်သိုက်ငှား ဘွေ နူလော်။ 62 ဘွေဒူ" ပရာနုန်း အယောင်းကလုန်ထွန်းခူး ဒေါ်အုတ်ဇိန်ဘလယ်ကချုန်းတဟယ် နူဇာ့နူးလောင် ဒုန်းဘွေအတာဖိတ်တာမာကူး" နူမယ်ဘွေအတာ ပရွီးတဟယ် နူလော်။ |
This translation of the Karen, Geko Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.