Luke 8 - Karen Geko

¹ ဇာ့ကရာလိန်းဒေါ်ဘွေယေရှုနူ ဆွားဘာဝိန်ဒုံး တဟယ်ဒေါ်ဘာဆွားဆိန့် ဘွေအတာဖိတ်တာမာ ဒေါ်တာသဗွန်သဘါးဒေါ်ဘာ ဆွားသွန့်ပေါင် ဒေါထွန်လောင်တာနူလော် ။အဝေပရာမာတာဖေါ့ တဆူးသနူ့နူမယ် လေဇွတ်လော ဘွေ ယေရှုအနော်နူလော်။

² ဘုန်မယ် မာထာမိုက်တာဆွေ့တာဆားဒေါ် တာဇာ့ရောက်ဇာ့ဒါနတ်နု့ဒူး ဒေါင့်ကလုန် မာဂဒလဒုံးဖေါ့ အပမွန်တဟယ်နူမယ်လေဘလုံဇွတ်လောဒေါ် 'မာရိ'ပွန်မွန်တပရာနူပါလော်။

³ ဟေရုဒ်အပရာ အခူအနာ့ တပရာနူ 'ခုဇ' အမားဟောဟန္ခ၊ ရှုရှန္ခဒေါ် အခိုးရိုပမွန် အော်အပ်တဟယ်နူ အဝေသူး အရူးဒေါ်အနက် ဘူ အယ်ဘူအိုးယူးဘွေ ယေရှုဒေါ် အငေါ် တဟယ်နူလော်။

⁴ ဝိန်လောနူ့ပယာပူဒူ တဟယ်နူလေဇွတ်လောဘွေ ယေရှုအနော်နူလော် ဘွေယေရှုတုပ်နူးမွန်း ပယာပူဒူတဟယ်ငေါ့စပရိဒေါ် သွန့်ပေါင်တလုပ် ပရာတဟယ်နူ တုန်းခလိုက်ခလောနူလော်။

⁵ ပရာမာဆုန့်နာ တပရာနူအော်တုန်း ဆုန့်နာကူးဒေါ်လေဟိုက်တာ ဖလုံအဆွီးလော်ပရာစနာ တပရာဟိုက်လောင်တာဖလုံ ဆွီးတဟယ်နူ လာမားတူးလောဒုန်း ခလိုက်ကူးနူလော်။ တာဖလုံဆွီး ယိုးကွန်းနူပရာဘားလိုင် ဒေါ်ခါးဘာဒေါ်ထူဖေါ့ ကကူးအယ်လောနူလော်။

⁶ တာဖလုံဆွီးခိုးရို တဟယ်နူလောင်တိုက်ဒုန်း လုန့်ဟယ်ခူဒေါ် အမုန်းဖေါ့ ကိုက်ထောင်နူလော်နဲမယ် ဆူးဇာ့လိမ်အနဲခူးဒေါ်အော်တာပါလောတာသ ဒေါ်အမုန်းလောင်ပလှဲလော့်နူကော်။

⁷ တာဖလုံ ဆွီးတဟယ်နူအော်ဒုန်း နားသာခိုက်ကားဒေါ် အမုန့်ကိုက်ထောင် ဘာနူလော်။

⁸ တာဖလုံဆွီး အခိုးရိုတဟယ်နူ လောင်ဒုန်း ဟယ်ခူ အရောက်နူဒေါ်အမုန်းကိုက်ထောင်ဒေါ် အသံအော်အပ်ထောင်ဒူအဆတရာနူလော်" ဆိန့်ဘုန်ရုန်းပြမွန်းခလိုက်ဒေါ် နာဒိန်းတာဇောင့်တဟယ်နာဟူးဒေါ် ဖိတ်နူးဆော့တာမာလောင် မူးကနူလော်။

⁹ အငေါ်ပရာဇာ့တဟယ် ထုပ်လွိုက်ဘွေယေရှုဒုန်းငေါ့စပရီ အသာနူးနဲတာကမားတဟယ်နူလော်။

¹⁰ ဘုန်နူမယ် ဘွေယေရှုဆိန့်အပရာမာတာဖေါ့ တာရီတာကေး ဘွေတာဖိတ်တာမာ တဟယ်နူလော်။ဒေါ် ပရာခိုးရိုတဟယ်အနဲခူးအနဲဟော့ဘာဒေါ်ငေါ့စပရိ နူလော်။ပရာယိုး တဟယ်နူ အုတ်ဆူဘား မယ်ဇာ့သိုက်ငှါးကိုး ဘွေဆိန့်ဒေါ်မာလောင်မွန်း ကနူလော်။

¹¹ ဘွေဆိန့်ဟွန်တာပဆွီး ကဒါးဟားမယ်တာဖလုံ ဆွီးနူမယ်မွတ် ဖါးဘွေဒူတာ ဟွားတာငေါ့နူလော်။

¹² တာဖလုံဆွီးတုန်း အလောင် နာကူးနူမယ် ဘွေတာဟွားတာငေါ့ဒုန်း ပရာနာဒိန်း တဟယ်အနခူးနူလော် မာကနူဒေါ် တာကင်းကာနတ်နူ လေနူဒုန်း အဝေသူး အသန့်ကူးနူလော်။

¹³ တာဖလုံဆွီးဒုန်း အလောင်ဒုန့်ဟယ်အလော်တဟယ် နူမယ်မွတ်ပရာတဟယ် ဒုန်းအနာက ဟူးတာဒေါ် သနောက်သဆူးတာပလောတာ သနူလော်နဲ့မယ် အရွှီအထွာဇာ့လောင်လပ်ကိုး အဝေသူးဒေါ်အုတ်ဆူတာကူးတာ ကိုက်ခိန်နူ ဘလိုင်ကေးတလုပ်ဘွေတာ ဟွားတာငေါ့တာဟယ် နူလော်။

¹⁴ တာဖလုံဆွီးဒုန်း အလောင်ဂက်ခိုက်ကားနဲတာကူးနူမယ် နာဟူးဘားဘွေဇာဟွားငေါ့နဲမယ် တာဒူယောင့်မာဒုံလုံးဘွေးတာပျော်တာပြား တာလိုးထိုက်သားကွားထိုင်သာားတာ အခူစားဘွေတာ ဟွားတာငေါ့ယိုးတဟယ် နူမာကိုက်ဒေါ်ကဒူထောင်ထူးထောင် နုခုးနူ မာဇာ့ကိုက်ထောင် ဘယ်နူလော်။

¹⁵ တာဖလုံးဆွီးဒုန်း အလောင်ဘာဟယ်ခူယာရောက်တဟယ်နူ ဘွေတာဟွားတာငေါ့ တဟယ်နာဟူးဘာဘုန် ဖိတ်ကလုန်ဒေါ်အော်လားနူးဒုန်းတာသူရူးသရောက် တာဆောင် လောင်သဒေါ်အကားဒွန်ခိန်နူအဖိုးအသာတဟယ်ကရောက်ဇိန်မွန်းနူလော်။

¹⁶ ကျူးလောင်ဘုန်မီထုံးဘုန် ကလောဘု မာဒေါ်ဒေါင်းခူးမာဒေါ်လာ့လောင်မာကလှက်မီးလောင်လားမာ ဖိတ်ဒေါ်လာ့ထာလုန်း ခါလှယ်ပရာဒုန်းအလေနူးသင်ကူးတဟယ် ကအုတ်ဆူမွန်းတာလီးတာခါးနူလော်။

¹⁷ ကွားဒေါ်ဆိန့်အုတ်ဆူကိုက်ထောင်ကလှက်ဇာ့အော်ပရာဆိန့်သိုက် ကလှက်လာ့ဟွန့် အကလှက်ဆိန့်အော်။

¹⁸ နာသု့ဘီဒေါ်နာဒိန်းဆော့ကာ ပရာတဟယ် သနူးအုတ်ဆူဝေဒေါ်လေနူလော် နဲမယ်တမီးအတာဇာ့အော် အိတ်ဒေါ် အတာအော်တဟယ်နူက ရှုန်လောနူလော်။

¹⁹ ဘွေ ယေရှု အမု့ဒေါ်အပွန့်တဟယ် သနူးအုတ်ဆူဝေဒေါ်လေနူလော်။နဲမယ် ပရာပူဒူအော်အပ်ဒူဒေါ်ကလေဒုန်းဘွေယေရှုအော်နူလေဆိန့်ဒါကိုးနူလော်။

²⁰ ပရာတပရာနူ လေဒုန်းဘွေယေရှုအော်ဒေါ် "ဘွေနာမူးဒေါ်နပွန်းတဟယ် သနူး အုတ်ဆူနာဒေါ် အော်ဘုန်းနာတုန်းကဒါ့ကွား ငှါးနူလော်လေဆိန့်နူးဘွေကနူလော်။

²¹ ဘုန်နူမယ်ဘွေ ယေရှုနဲ မွန်းပရာအနာဒိန်းဘွေဟွားဘွေငေါ့ လေဒေါ်မာဇွတ်တဟယ်နူ အဝေသူးနူမွတ်ဘွေအပွန်းဒေါ်အမူးတဟယ်နူလော်။ အဆိန့်ဒေါ်မှာလောင်ကနူလော်။

²² ဘာတနုန်နူ ယေရှုဒေါ်အငေါ်ပရာဇာ့တဟယ် ထောင်ဒုန်းရိုကူးဒေါ်အနဲမူအပရာတဟယ် "ဝါးလေရိုဒေါ်လေဇါတ်ဘုန်းကွီးယိုးကွီးယိုးကာအဝေနဲ အငေါ်ပရာဇာ့ကနူလော်။

²³ အဝေသူးတဟယ်နူ ကူးရာ့ဆူးဒေါ်လေအခိန်နူ ဘွေယေရှု နူ မီးနူးခလူးဒုန်းရိုးခူနူလော်။ဇာ့နာသု့ဒေါ် ရူးယူဒူတမော့ကလေဒေါ်ရူးယူတူးလေဒေါ်ဖလိန်းဘာရိုဒေါ်အုတ်ဆူဘာတာပေါင်းတာဆားဒုန်းရိုဘာလောင်ပရူးတကင်ခိန်နူလော်။

²⁴ အခူစားအဝေသူးတဟယ်နူ ထူသရိုက်ဘွေဒေါ်အုံ့ဘွေအုံ့ဘွေ ပါကလောင်ပရုံးဆူးလားကဲယိုးကာ့ကွိုင်းကနူဒေါ်ဘွေယေရှု အော်တုန်းလမီး ကူးဒေါ်ဆွားသရိုက်ထုန်ဒေါ်လာ့မွန်း ရူးယူဒူတဟယ် အော်ပရယ်ဒေါ် ဘုန်နူအခိန် နူရူးယူတဟယ် နာဒိန်းဘွေငေါ့ဒေါ် လောင်ကြာ့ကြေမွန်းနူလော်။

²⁵ ဘုန်မယ်ယေရှုလွိုက် မွန်းအငေါ်ပရာဇာ့ သူးတာယူးတာနာဇာ့အော် ခါးမာရား လွိုက်မွန်းကနူလော် ဘုန်းနူအခိန်နူအဝေသူးနဲခုထွားထောင် တာတမွတ်တမောင်းဒေါ်ဟွာ့လောင်ရိုင်းလော နူလော် ပရာယိုးပရာယိုးပရာမယ်ကမားဆူးဒေါ်ရူးယူနာဒိန်းခါးဝေငေါ့မာရား လေနဲရောက်မွန်းကနူလော်။

²⁶ ဘွေယေရှုဒေါ် အငေါ့ပဇာ့တဟယ် အော်တုန်းဂါလိလဲ ဆူးခွီးကဒီဒေါ်ထောင်နူခလီးတဘာကူးဒေါ်လေတူး ဂါရစဝိန် အကဒီ ဆူးဖရီးတော့နူလော်။

²⁷ ဘွေယေရှုအော်ဒုန်း ခလီးကူးဒေါ်ဆွားလောင်တိုက် အခိန်နူ ဘုန်းဝိန်နူတဝိန် အကူးနူပရာတပရာအုတ်ဆူ အဝေနူလော်ပရာတပရာနူ အဝေမယ် တာဆူတာနတ်ဒေါက်အဝေနူလော် အဆိန့်ကူးဆိန်ဟော့ နူစဒုံးခေါင် အဝေအော်ဒုန်းလွန့်ခူ အဆိန့်အယ်ဆိန့် အိုးတမှီတမှီ ဆွားလေဆွားဇိန်ဘုန်းလွန်ခူနူလော်။

²⁸ ပရာတပရာနူ အုတ်ဆူဘွေဒေါ် ကာ့ကရီးးဘုန် ဒေါကလိပ်လောင် ဒုန်းဘွေအလောင်းမှောက်နူလော်။မော့ခူဘွေဒူ အဖေါ့ခူးယေရှု ခေးမာဘာနာသရား မာဒေါ့မာလောင်မာခေးမှာဘွေ အဝေကာ့ကရီးးမွန်း ကနူဒေါ် ခေးကွီး စိန်ဇာ့ဘာနာနူလော်။

²⁹ အဝေးကာ့ကရီးဒေါ်ဆိန့် ကနူဘုန်ဘွေယေရှု ခလွန်းကင်မွန်းနတ်ဒုန်း အအော်အဝေနက်လော် တဟယ်ဒေါ် တာကေးကာနတ်တဟယ် မာနွားအဝေးနူလော် ဒေါ် အဝေခေါင်ဘာတာပေါင်တဆား ဒေါနတ်မွိန်း အဝေဒေါပရာတဟယ် ကီးကလုန် ဝေဒေါ်ထားလဒ် ပူနူလော်နဲမယ်အဝေ မာတွန့်ကေးဒါနူလော် ဘိုအဝေဆွားအော်ဒုန်း တာသွန်တာလောင် အကလှက်ခူလော်။

³⁰ ဘွေယေရှု လွိုက်ထောင်မွန်းဝေနာမှီမယ် ကမားနူလော် ခေးမှီမယ် လေဂေါင်အဝေနဲကနူလော်။ဘုန်းအဝေ ဆိတ်သိုက်ငါးဘွေအခိန်နူ တာနတ်တဟယ်ဒေါင့်အော် မွန်းဝေနူလော်။

³¹ ပရာယိုးပရာနူဘွေးလဆွားထောင်ကေး နတ်ကင်းကာအော်ဝေကူး နူတဟယ်ဒေါ် အကွီးသဇာ့ဘာဘွေ ဇာ့သုန်ပါဒုန်းတာကူးလောင်ယုန်အကလဲငှားမာကာ။

³² ဘုန်နူအခိန်နူ ထောက်တပူအယ်အဆာ ဘုန်းခေါလော်တဒ နူလော်နတ်ကေးကာ တဟယ်ကွီး ခေါက်သဒေါဘွေ လားလေနူနော်ဒုန်း ထောင်အကူးနူလော် ဒေါ်ဘွေယေရှုမုန်လေ မွန်းနူလော်။

³³ ဘုန်ဒေါ်နတ်ကေးကာတဟယ်နူ အော်ဒုန်းပရာယိုးပရာ အကူးဒေါ်လေနူး အော်ဒုန်းထောက်ကူး နူဒေါ်ထောက်တဟယ်နူ ဖိန်လောင်တိုက်ဒုန်းဆူးခွီးဒေါ်သူး လော့နူလော်။

³⁴ ဒေါ်ပရာအုတ်ပုန်းယု့ထောက်တဟယ်နူ အုပ်ဆူဒေါ်သိုင်ငှါးဒေါ် ကွိုင်လေဆိတ်မွန်းတာရီတာကင်း တာဟယ်တူးလေဒုန်းခူးကူးဝိန်ကူးနူလော်။

³⁵ ပရာလောနူးတဟယ် သနူးအုတ် ဆူဒေါ်သိုက်ငှါးလေလော မွန်းဒုန်းဘွေယေရှု အော်နူလော်ဘုန်းနူအခိန်နူ တာနတ်ကေးကာဒေါင့် အဝေနူတပရာနူ ကူးဟော့ဇိန်နူးစဒုံးဒေါ် နောင်းလောင်အော်ဘွေကဒီနူလော် ။ဒေါ်ပရာတဟယ်အုတ် ဆူဒေါ်ထွားထောင်တာတမွတ်တမောင်းဒုန်းအဝေသူး နဲခူးဒေါ်ဟွမွန်းနူလော်။

³⁶ ဘုန်နူမယ်ပရာအုတ်ဆူအဝေတဟယ်နူ တနတ်ဒေါက်အော်ဝေ အတာဆား တဟယ်ထာမိုက်ကင်း တဟယ်နူ ဆွားဒေါ်ဆိတ် နူးရောက်နူလော်။

³⁷ ပရာလောနူးတဟယ်နူ သဘိုက်ဒေါ် လာ့ဆွားထောင်ကင်မူးဘွေယေရှုဒုန် း'ဂါရစ' ဝိန် အကူးတဟယ်နူလော် ။ဒေါ်ဘွေယေရှုဒေါင့် ထောင်မူးရိုးဒေါ် ဆွားထောင်မွန်းဒုန်းအကူးရူနူလော်။

³⁸ နတ်ကေးကာဆွားထောင် ကေးဒုန်းနူတပရာနူ နဲ့မွန်းဘွေခေးကလေဆွန့်နာနော်ဘွေနဲ ဇိန်မွန်းဝေလေဇွတ်မာခေးမာဇိန်ဘလှယ်နာနော်ဒေါ်ဇိန်ဆိတ်သိုက်ငါးတရီတာကင်းယိုး တဟယ်ယိုးကာ။

³⁹ ဘွေနူအရောက်ဒုန်းနာလူးခူများမားနူဇိန်ဒုန်းနာသင်ဒေါ် ဇိန်ဆိတ်သိုက်ငှားလောဆော့ပရာအပ်ပရာကာဘုန်နူမယ် ပရာနူပရာဆွား ဒဆူးဒဂက် ဒေါ်ဆွားဆိတ် သိုင်ငှားမွန်းဘွေအရီအကင်း တဟယ်ဒုန်းပရာအားပရာအကားနူလော်။

⁴⁰ ပရာလောနူ တဟယ်နူ အော်ဝှီး ဘွေယေရှုကတူးဇိန်ဒေါ် ဘွေတူးကျေအခိန်နူ အဝေသူး စူအခလိုက်ဒေါ် သနှောက်သဆူးနူလော်။

⁴¹ ယုဒအဆွီး ပရာအုတ်ယု့ တာအော်ဗလုံအသင်တရာနူ လေဒုန်းဘွေလမောက်ဒေါ် ဒေါကလိမ့်နောင်းလောင်နူလော်။ အဝေမီမယ် 'ယာဣရု' အ​ဝေနူကပ်လေဘွေယေရှုဒုန်း အသင်နူလော်။

⁴² ဘာသရာနဲမယ် အဝေအဖေါ့အော် တဆူးနု့နိန်အော်တပရာ အော်အကာသူးဘယ်လော်။ အခူစားအဝေနူ 'ယာဣရု'အဖေါ့မွန် အအော်တပရာ လောနူလော် ဘွေယေရှုကလေဒုန်းသင်နူမာ အနူခူးနူပရာအော်ဒီးဒေါင်း ဘွေထောင်ခလိုက်လော်နူလော်။

⁴³ ဘုန်ူးပရာပူဒူ အကားနူ ပမွန်း အသွီလောင်တဆူးနု့နိန်အော်တပရာလော်။အဝေနူခွေအနဲဒုန်းတာသူစရာအော်မသော်မယ် ပရာခွေထမိုက်နူးအတာဆားဇာ့အော်ဒေါ် အရူးအထားလောနူလော်။

⁴⁴ အဝေလေထွန်းဒါဒုန်းဘွေယေရှု အကဒီဒေါ်လေတော့ ဘာဘွေစဒုံးရိုင်းဒေါ် အတာဆားထာမိုက်ကင်းနူလော်။

⁴⁵ ဘွေယေရှုလွိုက်မွန်းပါးပရာတော့ဘာခေးပရာဘုန်းနူအခိန်နူပရာအော်အပ်အော်ဘွေးဒေါ်ပေတရုနဲ့မွန်းဘွေပရာအော်အပ်မျာ့ယိုးကသိုက်ကမား။

⁴⁶ ဘုန်ဒေါ်ဘွေဆိန့်ထောင်မွန်းပရာတော့ဘာခေးအော်တပရာတာပရော်တာပရောက်အော်​ဒုန်းခေးလော်ယိုးဆွားထောင်ဘွေနဲ့မွန်းကနူဒေါ်။

⁴⁷ ပမွန်တာပရာနူအဝေအော်ဟွတ်ဆိန့်ဒါဘယ်ဒေါ်အဝေလေမွန်းဒုန်းဘွေယေရှုအလောက်မှောက်နူဒေါ်လေဒေါကလိမ့်လော်ခါလာမိုင့်၊ဘုန်ဝေဆိန့်သိုက်ငှား လောမွန်းပရာလမှောက်နူလော်။

⁴⁸ ဘွေယေရှုနဲမွန်း ပမွန်နူပယာ ခါးယိုးနာအော်မှောင် ဇိန်ယိုးနူမွက်နာတာယူတာနာအော်ဒေါဖါဘွေဒူဖီနာတာအော်သအော်ယနူလော်။

⁴⁹ ဘွေယေရှုဆိန့်ဘိုနူယဣရုအသင်နူပရာတူးလေတပရာဘွေနာဖေါ့မွန်သူးဟုန်းမာဒီးဒေါင်းမှာဘွေယေရှုမှာအဝေနဲကနူဒေါ်။

⁵⁰ ဘွေယေရှုနာဟူးတာပဆွီးကနူဒေါ်သဣရုဘာယိုမာအော်ဒေါ်တာယူးတာနာကာနာဖေါ့မွန်ကအော်မှောင်ကျေလော်ဘွေဆိန့်အဝေကနူလော်။

⁵¹ ဘွေယေရှုလေနူးတုန်း၊သဣရုအသင်ကူး၊ပေတရု ယောဟန် ယာကုပ် ဒေါ်ပမွန်ဖေါ့အမုအဖါးပရာခိုးရိုတဟယ်ဆိန့်လါ့လေနူကိုးနူလော်။

⁵² ပရာတဟယ်နူ ပမွန်​ဖော့ တပရာသူးဒေါ်ငူး ယူးနူလော်နဲမယ်ပမွန်ဖေါ့ယိုးပရာအဆိန့်သူးကိုးနာ့ဝေမီးနူးနူလော်အဝေနဲကနူလော်။

⁵³ ပရာတဟယ်နူ အုတ်ဒေါ်ငါ့ဒေါ့ယု့ဘွေနူလော် ဘသရားနူမယ် အဝေသူးတဟယ်နူသိုက်ငှါး ဘာပမွန်ဖေါ့ နူတပရာအသူးနူလော်။

⁵⁴ ဘွေယေရှု ဖိတ်ပရာသူးတပရာ အစဒိန်းဒေါ်ပဇာ့ဖေ့ါဆွားသရိုက်အဝေ ဆိန့်မွန်းကနူလော်။

⁵⁵ ပမွန်ဖေါ့ တပရာအသမူးအော်ထောင် ဘုန်နောင်းလောင်နူလော်ဘွေယေရှုနဲမွန်း ဖီအယ်ပဇာ့ဖေါ့ယိုးပရာတာအယ် တမီမီကာမှာလောင်ကနူလော်။

⁵⁶ အမူးအဖါးတဟယ်အုတ်ဆူဒေါ် ထွားထောင်တာတမွတ်တမောင်းအဝေသူးနဲခူးနူလော်နဲ့မယ် ဘွေယေရှုဆိန့်မွန်း တာထွားထောင်ယိုးတဟယ်နူဆိန့်နူးမှာ ပရာကူးရူမာဝေ မာလောင်ကနူလော်။