Luke 12 - Karen Geko

¹ ဘွေယေရှုကထိတ် ခွိုက်က်ရိန်နူ ပရာအော်ဒုန်းအထော်တဟယ် လေတွန်းလေတော့ဘာရောင့် ဘုန်ယီးဘာရောဝ့် နူလော် ဘွေနဲအပရာတဟယ်ဒုန်း “အုတ်ဒေါ့ယု့ ပရာဖာရိရှဲတဟယ် အတာသွတ်တာဟွားတာငေါ့ တဟယ်နူကာ။ တာတဟယ်ယိုးနူ မကိုက်ကသုန်ပရာတဟယ်ဒုန်း ခလိုက်ကမာနူလော်။

² ကအုတ်ဆူအလားဟွတ်တာ၊ ဒေါ်အမာဘီမာဘူ့ တာတဟယ်နူ သူးကသိုက်ငှားဘာလော်။

³ တာပရွီဒုန်းအအော်ကေးခု့ကေနာကား တဟယ်နူ သူးကသိုက်ငှားတာမကိုက်မုန်းရှိက် လောင်ကား တာပရွီးနူလော်။ သူးထုန်းဘူးကဒပ်ဒေါ် သူးပရွီးဒယော့ မသောနူမယ် သူးငေါ့ကပရီမကိုက် သူအော်ဒုန်းသင်ခူဒေါ် သူးကာ့ကရီးငေါ့ နူလော်။ နူမယ်ဘွေ ဖင်သနဲထောင်တာပရွီး နူလော်။

⁴ “ငေါ်ပရာဇာ့သဘိုက်ပရာတဟယ်နူကာ၊ အဝေသူးတဟယ်နူ အမာသူးနာဒါမသောမယ်၊ အဇာ့မာဒါတာကူးရွန် တမီးကိုး၊

⁵ သူးနဲခူး၊ ဘွေကအော် တပရာလော်နူလော်။ ဘွေနူမယ် ပရာဒုန်း အဖိတ်ဇိန်သူးသာ့ သမူးဒါဒေါ် ဇာ့ကာခူနူ အသုန် သူးတုန်းငရဲအုန်းကူးဒါနူလော်။ ဘွေနူမယ်ပရာဒုန်းသူးဘာသဘိုက်အော်နူလော်။

⁶ တာဆားထူဖရိုက်ဒေါ် ရူးနု့ဘာလော်။ မသော်မယ် ဘွေနူ အဇာ့သားပိန်ထူ ဖရိုက်တဘားစာဘကိုး။

⁷ သူးကောကော့ခူ ကူးလွန်အော်ဘွေ့ဘောနူ အတွက်နဲယူ့နူလော်။ အခူစားသူးဇာ့သဘိုက်ကာ၊ သူးနူ သူးငူဒူ ပရီဒူဒေါ် ထူဖရိုက်တဟယ်နူလော်။"

⁸ ”သူးတဟယ်နူ သူးကနဲ ပရာတဟယ်ဒုန်းပါမယ်ဘွေ အခီးအပရာတဟယ်နူလော်၊ ဒေါ် ‘ပရာဖော့ခူး’ နူဒုန်းမော့ခူကလူတဟယ် အလားမောက်နူ ကနဲဒုန်းအဝေသူးမယ် ခေးခီးခေး ပရာတဟယ် နူလော်။

⁹ နဲမယ် သူးတဟယ်နူဒုန်း အလားကေးခေးနူဒုန်းဘွေအမော့ခူကလူအလားမောက်နူ အဝေကဘာတာလားကေးအဝေသူးနူလော်။

¹⁰ ပရာဒုန်း အပရွီးထော ‘ပရာဖော့ခူး’နူ တာဘလိုင်ဝေ ဒါမသော်မယ်၊ အကပရွီးကမာသာ့ဆောင်းဆူးမယ် အဇာ့နူးဘာတာဘလိုဝ်ဘလွတ်။

¹¹ ပရာတဟယ်နူ အကကာ့လေသူးဒုန်း ယုဒတာအော်ဘလုန်အလဲ၊ ပရာခူပရာနက် အလားမောက် ခိန်နူ သူ့ကဘာပရွီးကမားနူဇာ့သဘိုက်ကာ၊

¹² တဘလောဖော့နူ ဘွေအသာ့ဆောင်းဆူးနူ ကသွတ်သူးဒုန်း သူးကဘာနဲ ကမားကမား” တဟယ်နူလော်။

¹³ ပရာပူဒူအကားနူ ပရာအော်တပရာ လွိုက်ဘွေဒုန်း “ဘွေ၊ဆိန့်နူးပါ့ခေးဝေးခူးဒုန်း ပါဖားကသူးဘုန်နူ အဖင်ဘက်ဆော့ပါ တာကရုတ်တာကရူတဟယ်ဆော့၊ နူလော်။

¹⁴ ဘုန်နူ ဘွေနဲဇိန်ဝေဒုန်း “နာဒေါ်နာဝေးအဘုန်ဇုန်ခေးကဖင်ဘတ်တာကရုတ်တာကရူနူးခူး ပါးဖင်ခေးအခွက်ပရာ” နူလော်။

¹⁵ ဘုန်နူ ဘွေနဲထိုက်သားမူး ပရာတဟယ်နူဒုန်း သူးဇာ့သားဂွေးသာဒေါ့ကာ၊ တာဇု့တာလဲဒုန်း အအော်ဒေါ်သူးတကူးနူအဇာ့မာကွားကိုက်တောင်သူးကိုး နူမယ်ဘွေအတာ ပရွီးနူလော်။

¹⁶ ယေရှု ပရွီးဘာ ပရာတဟယ်ဒေါ် ငေါ့စာပရီးတတော်နူလော်၊ ငေါ့စာပရီးကူးနူ “ပရာဒူယောင်းတပရာ အနောဝ်းဒုန်းကူးနူ နူးဘာ ဘုတ်ဟူး သာအော်ကေးနူလော်။

¹⁷ အဝေနူ “ခေးကဘာမာကမား၊ ခေးကလားရောက်ဘုတ်ဟူးနဲခူး အကလဲဇာ့နဲဘေကိုး” နဲလောင်အနဲနူလော်

¹⁸ ဘုန်ခိန်နူ “ခေးကဘာမာကမားနူမယ် ခေးသိုက်ဟုန်း ဘုတ်ဖောင်းယူတကူးနူ ကပရပ်ကေးဘုတ်၊ ကပရောင်ဇိန်ဘုတ်ဖောင်းဒုန်းအဒူ တမာလော်၊ ဘုန်ကလားနူးဘုတ်ဟူးဒေါ် တာကူးရူတဟယ်နူလော်။

¹⁹ ဘုန်နူ၊ အနဲလောင်ဇိန်အနဲဒုန်း "ခေးလားရောဝ့် တာလဲဒုန်းအရောက်တဟယ်ဒုန်းအားနိန်အားလားကူးဟုန်း၊ ခေးကအော်သာ့အော်ယ၊ အယ်၊အွန်း၊ ကအော်ဒုန်းတာသနောင့်သဆူးကူးနူလော်” အဝေနုသု့တာနူလော်။

²⁰ နဲမယ် ဘွေနဲဝေဒုန်း “နာနူနဘလွတ်၊ ယိုးဟာ့ယိုးနူနာကသူလော်၊ အခူစား တာဒုန်းနလားရောဝ့် တာဇု့းတာလဲ၊ တာဒူတာထူးတဟယ် ကတူးပါးပရာအစဓိန်းကူး”။

²¹ “ပရာဒုန်းအလားရောင့် တာဇု့တာလဲ တဟယ်နူဒုန်းဘွေအလောက်မောက်နူတွားတာပေါင်းတာဆားနူလော်။ မယ်ဘွေအတာသွတ်တာပေါဝ်နူလော်။

²² ဘွေယေရှုနဲ အခီးပရာတဟယ်ဒုန်း “သူးဇာ့သတိုက်ဒုန်းးသူးကအော်မူးနခူးကာ၊ဇာ့အော်ဒေါ်တာကူးတာကိုက်ဒုန်းကအယ် ကအွန်းနဲခူးကာ၊

²³ သာ့သမူး ငူဒူဒေါ် တာအယ်တာအွန်းလော်။

²⁴ အုတ်စဝါး တဟယ်နူကာ၊ အဝေသူးတဟယ်နူ၊ ဇာ့လူးတာ၊ ဇာ့ရိုင်းတာ ဇာ့လားရောင့်ဘာတာဇာ့အော်၊ နဲမယ် ဘွေနူ အုတ်ဒေါ် ကရူယူးအဝေသူးနူလော်။ သူတဟယ် နူသူးလောဒူပရီဒေါ် ထူတဟယ်နူလော်။

²⁵ သူးကအော်မူးဒုန်း ဘာဘယုန်ရှောဘော်ဒေါ် သူးသာ့ ကထူးဒါး။

²⁶ တာ ဖိတ်တာမာဒုန်း အဆီအဇာ့တဟယ်ယိုးနူ သူးမာဇာ့ကိုက်ထောင်မယ်၊ သူးကကူးကကိုက်ဒုန်း တာရီကူးရူတဟယ် နဲခူးမာရား

²⁷ အုတ် ဖိုးမြုန်ဖိုးမြောက်တဟယ်နူ။ အဝေသူးတဟယ်ဇာ့မာသပရားဒုန်း ကကူးကဟော့ဘာ၊ နဲမယ် တာဒုန်းခေးကနဲသူးတဟယ်နူမယ် ပရာတာ သိုက်ငှားဒူ ‘ရှောလမုန်’ စဟွာနူမယ် ကလားကရူလားကရားကိုက်တောင် ဖိုးတဟော် တာကူးတာဟော့ကိုး။

²⁸ ဘွေမာဖုတ်ဒါ တာဒုန်းအကိုက်တောင်ဒုန်းဆုန့်တုန်ကူးတဟယ်နူလော်။ ယိုးတနူအကအော်ဒုန်ဆုန့်တုန်ကူးဒေါ် အနော်တနုန်တာကတ ဟွေးကေးဒုန်းမီမာကားတဟယ် ဘွေမာဖုတ်ဝေသူးနူ သူးနခူးဘွေကဖင်လောင်တာ ဒူဒေါ်အနူတဟယ်လော်။ သူးတာယူးတာ နာကဘာအော် တကီနူလော်။

²⁹ သူးတဟယ် သူးဇာ့ကူးဇာ့ကိုက်ဒုန်း သူးကအယ်ဘာအွန်းဘာနဲခူးကာ

³⁰ ပရာဒုန်း အတာယူးဘွေဇာ့အော်တဟယ်နူ ကကူးကကိုက် ဘာဒုန်းတာယိုးတဟယ် နဲခူးလော်။ သူးဖားဘွေနူ သိုက်ငှားသူးတာလိုဘာ တဟယ်နူလော်။

³¹ နဲမယ်တာဒုန်းသူးကဘာမာ ရူးကူးတမီနူ မာဘွေတာနူလော်။ သူမွေးမာဘွေတာမာဒေါ် တာဆူရီကဘာသူးနူလော်။ နူမယ်ဘွေအတာထုတ် လောင်မှာလောင်နူလော်။

³² ယေရှုနူ “ခီးပရာတဟယ် သူးဇာ့သဘိုက်ကာ၊ ဖားဘွေကလားသူးဒုန်းအတာဖိတ်တာမာကူးနူလော်။

³³ ဆားကေးလော နတာဇု့တာလဲဒေါ် ဖဝ်ပါ့ဆော့ပရာအော်ပေါဝ်းအော် ဆားတဟယ်နူ။ အော်ယူးဆော့ စခူးဒုန်းအမွေး တာဇု့တာလဲဒုန်း အဇာ့ပြားဇောင့်နူလော်။ သူးလားရောင့်သူးတာ ငူဒူပရီဒူဒုန်းမော့ခူတဟယ်နူ တာဘလာအယ်ဟူဇာ့ဒါ၊ တာလုန်နဲတာရာ့မားကေးဇာ့းဒါ နူလော်။

³⁴ သူးသာ့ဖလုန်နူ အကသုန်ဘူးဒုန်း မောခူအ တာလုန်းတာဘွေး အလဲနူလော်။

³⁵ ဘွေယေရှု မှာလောင်အပရာတဟယ်ဒုန်း “တွေ့လောဝ်ယာယာသူးမီဒုန်း တဟယ်နူကာ။

³⁶ အော်ပုန်းဟော့ သူးဘွေမကိုက်၊ ခူးခီးပရာဇွတ်တဟယ်အော်ဝီး အဘွေလေအုတ် တာဖလော ဒေါ် ကဇိန်တပရာနူ။ ဘွေပရာနူ ကဇိန်ကလောက်ကဒန့် ဒေါ် ဘောထောဝ် ခါးယိုးကာ”

³⁷ အဘွေနူ ကအုတ်ဆူဘာ အဇွတ်ပရာ အော်ပုန်းဟော့ဝေ ဒုန်း တာသနောဝ့်ကူး နူလော်။ ဘွေဖဝ်လေင်ာအဝေသူး တာအုန်းလော် တမီနူမယ်ဇွတ်ဒုန်း အအော်ဘုတ်အဘွေ တဟယ်နူ အဘွေကဖဝ်နောဝ်းအဝေသူးဒုန်းတာအယ်အကလဲနောင်းတဟယ်နူလော်။

³⁸ ဇွတ်ဒုန်း အအော်ပုတ် အဘွေဒုန်း အကလောဝ် မုန်းစကုတ်နာခိန်မရီ၊ မုန်းလင်းခိန်မရီဇာ့သိုက်ဒေါ် အော်ပုတ်တဟယ်နူကဘာ တာဆူရီနူလော်။

³⁹ သင်ဘွေ နူမွေးသိုက်ငှားလောဝ်ယာ ပရာအယ်ဟူတာဒေါ်ဇာ့မွေး ပရာကအယ်ဟူးနူးတာ။

⁴⁰ အခူစား မာလောင်ယာတာကာ။ သူးတဟယ်နူ ‘ပရာဖေါ့ခူး’ ယိုးပရာနူ အကလောင် အခိန်မကလောင်ဇာ့မွက်သူးကသိုက်ငှား" နူလော်။

⁴¹ ပေတရု နဲယေရှုဒုန်း “တာရီတာကေးတဟယ်နူမယ် ပါနုခူးဧါဇာ့မွေးမယ် ပရာကူးရူနူးခူးဧါ" နူလော်။

⁴² ဘုန်းအခိန် ဘွေနူ "ပရာရောဝ့်ဒေါ်အဇုတ်အစူမယ်ဝါးပရာ”။ ဘွေတပရာ နသူးဒုန်း အကလားထောဝ် အပရာကား တာမာ အခူအနာ့တပရာ မကိုက်အကအုတ်ကရူ အငေါ် ပရာဇာ့ဒုန့်တာအယ် တာအွန်းဒေါ် တာဖိတ်တာမာလူးခူနူလော်။

⁴³ အဝေသူးတဟယ်ဒုန်းအဘွေတူးဇိန်ခိန်နူ ပရာဒုန်း အမာလုန်းမာဘွေး တာမာတဟယ်နူ ကဘာတာဆူရီလော်။

⁴⁴ ဘွေနူ ကလားထောင် ပရာဒုန်း အသာ့ဇုတ်ဒေါ်အော်နူ ဒေါ် တာမာခူနက် လောဝ်တီးလောဝ်ရှိုက် နူလော်။

⁴⁵ မသောနူမယ်ဇွတ်ငါးပရာနူ ကနသူးဒေါ်အဘွေ ကတူးဇိန်ယောင်း နူဒေါ် ကတိန်းကပုန်ဇွတ်ကူးရူးတဟယ်ဘုန် အယ်အွန်းဒေါ်မူဘလွတ်ခိန်နူ

⁴⁶ အဘွေ နူပရာ တူးဇိန်ခိန်နူ တာကလားဆွား ထောင်ကေးဒုန်းအတာမားကူးနူလော်။ ဘုန်နူဇွတ်ဒုန်းအမာတာဇာ့ဇုတ်စွန်နူ တာကစွီထောင် ဖလောက် ကေးဒုန်းခေါကွဝ် ဒေါ် တာက ဖဝ်အတာကမာနူလော်။

⁴⁷ ဇွတ်ဒုန်း အသိုက်ငှားအဘွေတာသနု့ မသောမယ် ဇာ့မာဇု့နူ ကနူးဘာ တာနဖလိမ်းနကိန်တဟယ်နူလော်။

⁴⁸ မသောမယ်ဇွတ်ဒုန်းအဇာ့သိုက်ငှား အဘွေအတာ သနူးဒေါ် မာကမာတာ တာနုဖလိန်း တဟယ်နူ အဇာ့ဘာနဖလိမ်းဒုန်းအဆား။ နဲမယ် မကိုက်ဘွေ သအော့် ဒေါ်မာကွားသူးကနူ သူးတဟယ်မယ် သူးဘာ မာရောဝ့် ဘွေအတာဖိတ်တာ မာဒုန်းသူးဘာမာတဟယ်နူလော်။ ဘွေတာသာ့အော်သူ့ မွက်အော်အာ့ များနူမယ်သူး တဟယ်နူ သူးမာရောဝ့်ဆော့ဘွေ အတာမာကာ။

⁴⁹ ခေးနူဇာ့မွက်ဒုန်းခေး ကဆောင်းဘလောဝ်းဟယ်ခူဒေါ်လောဝ်ခေါဝ် နဲမယ်ခါးယိုးနူ သာ့အော်ဒုန်း ကဆောင်းဘလောဝ်းယူးဒေါ်မီလော်။

⁵⁰ ခေးနူ ခေးကအုတ်ဆူဘာ တာပေါဝ်းတာဆား အတာမာအုတ်ခေးနူလော်။ သလာ့မွန်းခိန်ကဘလွန်နူ ခေးကကုန်းဘာခေါဝ်ဘာမူးနူလော်။

⁵¹ သူးနသု့မယ် ခေးလောဝ်ဒုန်းဟယ်ခူယိုးမယ် ခေးလောဝ်ယူးတာအော်သာ့ အော်ယ နူလော်ဧါးဇာ့မွက်ကယိုးနူခေးလောဝ်မကိုက် ခေးကလားထောင်ဘွေ အတာမာဖေါ့ နဲခူးနူလော်။

⁵² ပရာသဝ်ဖော့ အော် ငိုဝ်းပရာနူလော်၊ အအော်သာ့နု တစ်ဘိုင်းဒေါ်သာ့သူးတစ်ဘိုင်း ကအော်သားထုန်ရောဝ့်နူလော်။

⁵³ မူးဖားဒေါ်ဖေါ့မူဖေါ့ခူး ပရာ့ဒေါ်ဒေ တပရာဒေါ် တပရာအကအော်သ ထုန်ရောဝ့်တူဟယ်လော်။

⁵⁴ ဘုန်နူ ဘွေနဲ ပရာတဟယ်ဒုန်း “သူးတဟယ်နူ သူးကအုတ်ဆူ မော့ခူအော့ဒုန်း အကချုန်းဒေါ် သူးနဲရောဝ့်တုန်း ဆွိုက်ကလောဝ် ကေးနူလော်။

⁵⁵ ရူးယူကလေမယ် သူးကနဲရောဝ့်ဒုန်း “ကတူဂဲစားကူးခိန်” နူလော်။

⁵⁶ ဝီးဘလာစရာဘလာတဟယ် သူနဲဇောင့် မော့ခူရယူတာမာနဲတဟယ်နူဒေါ် သူးဇာ့သိုက်ငှားတာဒုန်းအဖီး ထောဝ်ယိုးမာရား။

⁵⁷ သူးနာဇပူဒုန်း သူးကဘာမာအူးမာရောဝ့်တာ တဟယ်မာရား။

⁵⁸ ပရာကစွီနာဒုန်း တာမူးတရားအခိန်နူ နဇာ့တူးလေမွန်းတာစရောဝ်အလဲနူ ပရွီးဒူးပရွီးဒွါဇိန်တာကာ။ မာဇာ့မာကနူမယ် နကတူဒုန့်တာစရောဝ်အလဲ နူလော်။ ဘုန်နူ ပရာစရောဝ်တာ ခူနာ့ ကဖဝ်လောင်ငေါ့ဒုန်း ခူနာ့စဓိန်းကူးဒေါ် နကတူးဒုန်း တာကတိအကလဲနူလော်။

⁵⁹ တာဒုန်းနဖိတ်ခယ် နဖဝ်ဇိန်ဇာ့နူးတူးသာရေးဇာ့မွက်တာကဘလိုဝ် လွတ်နာကိုး” နဲကနူလော်။