Luke 3 - Kanan1 ရောမဘုရင်ကြီး တိဗေရိကာ့ နန်းသက် တစ်ဆယ့်ငါးနှစ် မာပ်အာမ်ငါးကာ အချိန်နယ် ပုန္တိပိလတ်ကော ယုဒပြည်ကာ့ တုန်းဟန်ဆုံး အုပ်ချုပ်သောကားဟီမ် ထာမာ့။ ဟေရုဒ်အန္တိပa ကော ဂါလိလဲပြည်လည် အုပ်ချုပ်သောကားဟီမ် ထာကယ်အယ် ဟီမ်ငါနရှီ ဖိလိပ္ပုကော ဣတုရဲ နောက် တရာခေါနိတ် ပြည်လည် အုပ်ချုပ်သောကားဟီမ် ထာမာ့။ လုသာနိရီး အဘိလင်ပြည်လည် အုပ်ချုပ်သောကားဟီမ် ထာမာ့။ 2 အန္နနောက် ကယာဖလာပ်ကော် တုန်းဟန်ဆုံး ပုရောဟိတ် ထာကယ်အယ်လင်းငါးကာ့ အချိန်နယ် ဘုရားရှင်ငါ နှုတ်ကပါတ်တော်ကော် တီတ်ဆာလာပ် အပေါ်ကာကာ့ ပေါက်ခါသာတုန်းငါး ငါကားကာ့ ဇာခရိကာဆာ ယောဟန်ပါအာ ထုတ်အီမာ့။ 3 အင်းသယ် ယောဟန်ငေါ် ဂျော်ဒန်မြစ်တိုင်းတိုင်း ဟာညာပ်ကယ်အယ် တီတ်ဆာလာပ်သယ် ဟီမ်နာပ်ကာ့ ဒုစရိုက်အပြစ်ဖူမ်နယ် ခွင့်လွှတ်သောကား ခံနောမူကွန်နယ် နောင်တသံဝေဂ လူကဲ့အယ် ဝေးငဟူပ်ကာမင်္ဂလာb လာဟီးတီမ် အကြောင်းဖူမ်နယ် လိုက်သောကဲ့အယ် ဟောပြောလီမာ့။ 4 ယောဟန်ငါအကြောင်းနယ် ပရောဖက် ဟေရှာယကျမ်းစာပါအာ ရေးလောပေးရီကာကော် “တီတ်ဆာလာပ် အပေါ်ကာကာ့ ပေါက်ခါသာတုန်းငါး တီတ်ဆာဟော်ဝါကော ဟာညာပ်ကယ်အယ် ရမ်းညာပ်ကာကော် အရှင်ကြွလိကားလမ်းနယ် အရာမ်သင့် ထာကွန်နယ် ပြာန်နောဟီးလိတ်။ အရှင်ငါ လမ်းနယ် ရာမ်းစီမ်းနိတ်။ 5 တောင်ကြားချိုင့်ဝှမ်းတိုင်းနယ် ကာဖို့လောကဲ့အယ် တောင်ကုန်း၊ တောင်တန်းတိုင်းနယ် ညီလောစီမ်းနိတ်။ ကျိက်ကား လမ်းတိုင်းနယ် ရာမ်းစီမ်းကဲ့အယ် ကြမ်းနောကား လမ်းတိုင်းနယ် ပီစ်ကွန်းနယ် ပြာန်နောဟီးလိတ်။ 6 အင်းမာနောက်သယ် ဘုရားရှင်ငါ သာပ်လီကားကာ ကယ်တင်ရှင်နယ် တီတ်ဆာတိုင်း ယူပ်မူဟီးမုကား” ငေါကဲ့အယ် ထာမာ့။ 7 အင်းမာနောက်သယ် ယောဟန်ငေါ် ဟီမ်ပါအာ ဝေးငဟူပ်ကာမင်္ဂလာ ခံနောတီမ် ထုတ်ချီးရီကာ တီတ်ဆာဖူမ်နယ် “အဆိပ်ပြင်းနောကား ကဖူးဆိုးလောညယ် အကလန်ငါကာ တီတ်ဆာဖူမ် ၊ နီမ်ပါအာ ထုတ်အီကိုက်ပန်းငါ ဘုရားရှင် အပြစ်အီပါအာအယ် ရှောင်နောမူကွန်နယ် နီမ်နယ် ဟင်သတိအီပေးရီကာသယ်။ 8 နီမ်ငါ အပြစ်ဒုစရိုက်ပါအာ နောင်တသံဝေဂ လူဝါပ် ငေါကားလည် သက်သေပြလောတီမ် မဟာမဟာ အောမ်ဟီးလိတ်။ နီမ်နောက်နီမ် အာဗြဟံငါ မျိုးဆက်ဖူမ် ထာမာ့ငေါကဲ့အယ် ငေါကဲ့လင်းဟီးရာ့။ မဟာအောမ်ကယ်လိုးငေါနော ဘုရားရှင်ငေါ် အင်းကာ သလောင်ရှီဖူမ်နယ် အာဗြဟံငါ မျိုးဆက်ဖူမ် ထာကွန်နယ် ဖန်ဆင်းနောရင်နာ့။ 9 ရာ့အချိန်ငါ ဘုရားရှင်ငေါ် နောင်တသံဝေဂ အလူကာတီတ်ဆာလာပ်သယ် ပြင်းနောတင်းငါးကာ အပြစ်ဒဏ်အီတီမ် အရာမ်သင့် ငါကဲ့အယ် လင်းမာ့။ အင်းသယ် နောင်တသံဝေဂ အလူရယ် အကလန်ငါအလုပ်သယ် အောမ်ငါးတီတ်ဆာလာပ်ကော ဘုရားရှင်ငါ အပြစ်အီကားလည် ခံနောထော်ကယ်အယ် ဝမ်နား သက်ဆာမ်ငါ ခံနောထော်ပ်ကား” ရယ် ငေါမာ့ 10 အင်းမာချိန်နယ် တီတ်ဆာလာပ်ကော ယောဟန်နယ် “အင်းညယ်ငေါက်သော် အလေကော် မညယ်အောမ်သင့်နောသယ်” ငေါကဲ့အယ် စီမ်ညူဟီးမာ့။ 11 ယောဟန်ရီ “နီမ်ပါအာ ဆာမ်ဆူန် ကယ်တူးငါကားကာ့ဟီမ်ငေါ ဆာမ်ဆူန်အပေါ်ကာဟီမ်နယ် တူဝါ့ အီထော်ပ်ကား။ နီမ်ပါအာ ရောက်တီမ်၊ အူတီမ်ငါဝမ်းနော အပေါ်ကာ ဟီမ်နာပ်ခနန်း မိုင်နောကဲ့အယ် အီထော်ပ်ကား” ငေါကဲ့အယ် ဖြေလောဟာမ်းမာ့။ 12 ကြအာအခွန်ကောက်သောကားကာ့ဟီမ်နာပ်ရီး ယောဟန်ပါအာ ဝေးငဟူပ်ကာမင်္ဂလာ ခံနောတီမ် ထုတ်ချီးရီကယ်အယ် ဟီမ်နာပ်ကော “ဆရာ အလေရီ မညယ်အောမ်သင့်နောသယ်” ငေါကဲ့အယ် စီမ်ညူဟီးစန်းနော 13 ယောဟန်ငေါ် ဟီမ်နာပ်သယ် “နီမ်ငေါ အခွန်ဖူမ်နယ် ရောမအစိုးရ သတ်မှတ်သောပေးကားထက် ပိုလောကဲ့အယ် တီတ်ဆာလာပ်ပါအာအယ် ကောက်သောဟီးရာပ်” ငေါကဲ့အယ် ငေါ့မာ။ 14 အင်းမာနောက်သယ် ကြအာစစ်သားဖူမ်ရီ ဟီမ်နယ် “အလေရီ မညယ်အောမ်သင့်နောသယ်” ငေါကဲ့အယ် စီမ်ညူစန်းနော ယောဟန်ငေါ် “နီမ်ရီး တီတ်ဆာလာပ်ပါအာမာ့ ဖူးလည် အလူကာလည် လူကွန်းနယ် စိမ်ဟီရာ့။ ဟင်နယ်ဟာမ်း မမှန်မကန် စွပ်စွဲလောဟီးရာ့။ နီမ်လူကား လုပ်အားခ နဲ့အယ်ဟာ တင်းတိမ်နော်ဟီလိတ်” ငေါကဲ့အယ် ဖြေလောဟာမ်းမာ့။ 15 တီတ်ဆာလာပ် အားလုံးငေါ အမာပ်စာပ်ရယ် ကယ်တင်ရှင် မေရှိယ လီကိုက်ပန်း ငေါကားလည် မျှော်လင့်နောတင်းကဲ့အယ် ထက်ချီးကားသယ်မာ့ တီတ်ဆာအများစုကော ယောဟန်ငေါ် ကယ်တင်ရှင် မေရှိယ ထာ့ကားသာ ငေါကဲ့အယ် တွေးလောဟီးရီမာ့။ 16 အင်းသယ် ယောဟန်ငေါ် ဟီမ်နာပ်သယ် “ငါကော တီတ်ဆာလာပ်သယ် ဝေးနောက်ချာ ဝေးငဟူပ်ကာမင်္ဂလာ အီရင်ငါး ထာမာ့။ အင်းညယ်ငေါရီး ငါကာထက်သယ် ကြီးမြတ်သောကားဟီမ် လီကဲ့အယ် လင်းမန်း။ ငါကော ဟီမ်ငါ ဟတ်တီမ်း ဆယ်လည် ဖြုတ်သောကဲ့အယ် အီတီမ်ဟာမ်း ထိုက်တန်နို။ cဟီမ်ငေါ ငဟူပ်ကာမင်္ဂလာလည် ဉာဏ်အလင်းတော်နောက် ဝမ်ဖူမ်နောက် အောမ်ကဲ့အယ် အိကား။ 17 ဟီမ်ငါ သလာန်းနယ် ရှင်းနောတီမ် ဟီမ်ငါထော်ပါအာ ငါကားကာ့ ဟီမ်ငါ ကောက်ဆွနောက် အန်တူတူနောက် အန်လော့သယ် ခွဲလော့ကာ။ အန်တူတူဖူမ်နယ် ကတောမ်းနား သိမ်းနောပေးကဲ့အယ် အန်လော့သယ်ကော် တိုက်မာဟာမ်း အမက်ခါကားကာ့ ဝမ်နားစာန်းငါမ်ကား” ငေါကဲ့အယ် ငေါမာ့။ 18 ယောဟန်ငေါ် နည်းလမ်းဖူမ်နည်းကြီစ်နောက် တီတ်ဆာလာပ်သယ် နောင်တသံဝေဂ လူစီမ်းကွန်းနယ် မင်္ဂလာသတင်းကလန်နယ် ဟောလီမာ့။ 19 အင်းညယ်ငေါဝမ်ရီ အုပ်ချုပ်သောကားဟီမ် ထာကာကာ့ ဟေရုဒ်ကော ဟီမ်ငါနရှီကာအိက် ဟေရောဒိလည် လက်ထပ်တီကာ အကြောင်းနောက် ဟီမ်အောမ်မီကားကာ တခြားအကလန်ငါကာ့ဖူမ်ဟနန်း ယောဟန်ငေါ် အပြစ်တင်နီမာ့။ 20 အင်းသယ် အုပ်ချုပ်သောကားဟီမ် ဟေရုဒ်ကော ယောဟန်နယ် ထောင်ငါး စာန်းကဲ့အယ် ဟီမ်ကျူးလွန်နီကာ အပြစ်ဖူမ် နည်းကြီစ်ဖူမ်ပါအာ ရာကာပ်ဝါ အပြစ်ကြအာ ပေါင်းနောဟာမ်းမာ့။ 21 ယောဟန် ထောင်ငါးစာန်းငါး အခံနော်ထော်ကြီစ်ရယ် ယောဟန်ငေါ် တီတ်ဆာဖူမ် နဲကားယိုတုန်နယ် ဝေးငဟူပ်ကာမင်္ဂလာ အောမ်ကဲ့အယ် အီရီစီးကဲ့အယ် ကိုယ်တော်ယေရှုရီး ဝေးငဟူပ်ကာကာ့ မင်္ဂလာခံယူလောကဲ့ ဆုစိမ်ကဲ့အယ် လင်းငါးအချိန်နယ် ဟမောက်ကော် ဟင်းလင်းပွင့်နောကဲ့အယ် 22 ဉာဏ်အလင်းတော်ကော် တကူးကူးနူစ်နူပုံစံညယ် ကိုယ်တော်ကာစုတ်အား ဆာပ်လီမာ့။ ရွှေမြို့တော်ပါအာမာ့ ဘုရားရှင်ငေါ် “နာန်ငေါ ငါမူမ်းငါးကာ ငါကာဆာ ထာမာ့။ ငါကော နာန်နယ် တအား နှစ်သက်သောမာ့” ငေါကဲ့အယ် ငေါရီမာ့။ 23 ကိုယ်တော်ယေရှုကော အမှုတော်လည် စားလောကဲ့အယ် အောမ်ငါးကာ့ အချိန်နယ် ဟီမ်ငေါ သက်တော် သုံးဆယ်ငါမာ့။ တီတ်ဆာလာပ်ကာအမြင်နာကော် ဟီမ်ငေါ ယောသပ်ကာ့ ဆာထာကယ်အယ် ယောသပ်ကော ဧလိ ကာ့ ဆာထာမာ့။ 24 မဿတ်ကော လေဝိ ကာဆာ၊ လေဝိကော မေလခိ ကာဆာ၊ မေလခိကော ယန္န ကာဆာ၊ ယန္နကော ယောသပ်ကာ ဆာ၊ 25 မတ္တသိ ကာဆာ၊ မတ္တသိကော အာမုတ် ကာဆာ၊ အာမုတ်ကော နာဟုံ ငါဆာ၊ နာဟုံငေါ ဧသလိ ကာဆာ၊ ဧသလိကော နဂ္ဂဲ ကာဆာ၊ 26 နဂ္ဂဲကော မာအတ် ကာဆာ၊ မာအတ်ကော မတ္တသိ ကာဆာ၊ မတ္တသိကော ရှေမိ ကာဆာ၊ ရှေမိကော ယောသခ် ကာဆာ၊ ယောသခ် ကော ယုဒ ကာဆာ၊ 27 ယောဟန္န ကာဆာ၊ ယောဟန္န ကော ရေသ ကာဆာ၊ ရေသကော ဇေရုဗဗေလ ကာဆာ၊ ဇေရုဗဗေလကော ရှာလသေလ ကာဆာ၊ ရှာလသေလကော နေရိ ကာဆာ၊ 28 မေလခိ ကာဆာ၊ မေလခိကော အဒ္ဒိကာဆာ၊ အဒ္ဒိကော ကောသံ ငါဆာ၊ ကောသံငေါ် ဧလမောဒံ ငါဆာ၊ ဧလမောဒံငေါ် ဧရ ကာဆာ၊ 29 ယောရှု ကာဆာ၊ ယောရှုကော ဧလျေဇာ ကာဆာ၊ ဧလျေဇာကော ယောရိမ် ငါဆာ၊ ယောရိမ်ငေါ် မဿတ် ကာဆာ၊ မဿတ်ကော လေဝိ ကာဆာ၊ 30 ရှိမောင် ငါဆာ၊ ရှိမောင်ငေါ် ယုဒ ကာဆာ၊ ယုဒကော ယောသပ်ကာ ဆာ၊ ယောသပ်ကော ယောနန် ငါဆာ၊ ယောနန်ငေါ် ဧလျာကိမ် ငါဆာ၊ 31 မေလေကာ့ ဆာ၊ မေလေကော မဲနန် ငါဆာ၊ မဲနန်ငေါ် မတ္တသ ကာဆာ၊ မတ္တသ ကော နာသန် ငါဆာ၊ နသန်ငေါ ဒါဝိဒ်ကာဆာ၊ 32 ယေရှဲ ကာဆာ၊ ယေရှဲကော ဩဗက် ကာဆာ၊ ဩဗက်ကော ဗောဇ ကာဆာ၊ ဗောဇကော စာလမုန် ငါဆာ၊ စာလမုန်ငေါ် နာရှုန် ငါဆာ၊ 33 အမိနဒပ် ကာဆာ၊ အမိနဒပ်ကော အဒ်မိန် ငါဆာ၊ အဒ်မိန်ငေါ် အာရံနိ ကာဆာ၊ အာရံနိကော ဟေဇရုံ ငါဆာ၊ ဟေဇရုံငေါ ဖာရက် ကာဆာ၊ ဖာရက်ကော ယုဒ ကာဆာ၊ 34 ယာကုပ်ကာ ဆာ၊ ယာကုပ်ကော ဣဇက် ကာဆာ၊ ဣဇက်ကော အာဗြဟံ ငါဆာ၊ အာဗြဟံငေါ တေရ ကာဆာ၊ တေရကော နာခေါ် ကာဆာ၊ 35 စေရောက် ကာဆာ၊ စေရောက်ကော ရာဂေါ ကာဆာ၊ ရာဂေါကော ဖာလက် ကာဆာ၊ ဖာလက်ကော ဟေဗာ ကာဆာ၊ ဟေဗာကော ရှာလ ကာဆာ၊ 36 ကာဣနန် ငါဆာ၊ ကာဣနန်ငေါ် အာဖာဇဒ် ကာဆာ၊ အာဖာဇဒ်ကော ရှေမ ကာဆာ၊ ရှေမကော နောဧ ကာဆာ၊ နောဧကော လာမက် ကာဆာ၊ 37 လာမက်ကော မသုရှလ ကာဆာ၊ မသုရှလကော ဧနောက် ကာဆာ၊ ဧနောက်ကော ယာရက် ကာဆာ၊ ယာရက်ကော မဟာလေလ ကာဆာ၊ မဟာလေလကော ကာဣနန် ငါဆာ၊ 38 ကာဣနန်ငေါ် ဧနုတ် ကာဆာ၊ ဧနုတ်ကော ရှေသ ကာဆာ၊ ရှေသကော အာဒံ ငါဆာ၊ အာဒံငေါ ဘုရားရှင်ငါ ဆာထာမာ့။ |
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.