Luke 3 - Karen Paku1 အဆၢကတီၢ်မဲၢ်ဝဲ စီၤပၤဖးဒွိၣ်တံၤဘ့းရံ ပၢတၢ် ပှဲၤထီၣ် တဆ့ယဲၢ်နံၣ်တနံၣ်, ဖဲစီၤပီၣ်တံၤပံၤလးမဲၢ်ကီၢ်ယူဒၤ အပဒွိၣ်ဖးဒွိၣ်, စီၤဟ့ၤရိာ်မဲၢ် ကီၢ်ကၤလံၤလါအပဒွိၣ်, ဘျီး အထီပုၢ်ဝဲၢ်စီၤဖံလံးပူးမဲၢ် ကီၢ်ယတူၢ်ဒီး ကီၢ်တြဃိၤန့ အပဒွိၣ်, စီၤလူၤစံၤနံမဲၢ် ကီၢ်အဘ့ၤလ့ အပဒွိၣ်, 2 ဘျီး စီၤအၣ်နၣ်လါ စီၤကၤယါဖၤမဲၢ် ဘၠီၣ်လုၢ်တၢ်အခွိၣ် အဒွိၣ်ကတၢၢ်တလိၣ်လိ. ဖဲအဆၢကတီၢ်အဝဲနဲၢ်, ကစၢ်ယွၤအကလုၢ် တုၤအိၣ်စီၤစဃၤရံ အဖွိခွါ စီၤယိၤဟၣ် ဖဲပှၢ်လၤကျၣ်နဲၢ်လိ. 3 လိတၢ်နံၤအဃိ စီၤယိၤဟၣ် လဲၤဝဲသကုၤတၢ်လီၢ်တၢ်ကျဲၣ်ထီကဝီၤလိ အအိၣ်ဝဲဒၣ် ဖဲထံကျိၣ်ယၢ်ဒ့ၣ်အကပၤ ဘျီးဟီတရါ တၢ်ဒ့းအံၤ, ‘ဃၢ်ကွံၤသုသးလိသုတၢ်ဒဲးဘး တလိၣ်ဘျီး ဒိးဘျၢသုသးတကဲၢ်. ဘျီး ကစၢ်ယွၤကပျၢ်ကွံၤသုတၢ်ဒဲးဘးတလိၣ်နဲၢ်လိ.’ 4 ဒ်တၢ်ကွ့းပၤအသးဖဲလ့ၤဝံယရှါယၤအပူၤအသိး, ‘ဘၠီၣ်တဂၤကိးသတြီၤလိပှၢ်လၤကျၣ်အပူၤ, အိၣ်ကတဲၤကတီၤပၤကျဲၣ်မုၢ်ဒွိၣ်လိ ကစၢ်အဂီၢ်, မၤနဲၢ်ကျဲၣ်ဖွိအလိၤတဘိၣ်လိ အဝဲဒၣ် ကလဲၤတၢ်အဂီၢ်တကဲၢ်. ကယဲၢ်ကစၢၢ်ကဆူးကဘၣ်တၢ်မၤပှဲၤထီၣ်အီၤ, ကယဲၢ်တၢ်လူၢ်တၢ်တြီၤလါကစၢၢ်ခွိၣ်ကလိကျၣ်တလိၣ် ကဘၣ်တၢ်မၤပၢၤအီၤ ကယဲၢ်ကျဲၣ်အက့ၢ်အကူ တလိၣ်, ကဘၣ်တၢ်မၤလိၤအီၤ, ဘျီးကျဲၣ်ဖွိလိ အထီၣ်ခူလီၤယၢၣ်တလိၣ် ကဘၣ်တၢ်မၤပှဲၤထီၣ်အီၤလိ. 6 ဘၠီၣ်ဟီၣ်ခွိၣ်ဖွိကိးဂၤဒ့း ကထ့ၣ်ဘၣ် ကစၢ်ယွၤအတၢ်အုၣ်က့ၤခီၣ်က့ၤလိ. . ဘၠီၣ်ထီဖူၣ်ထီခၠၢ ဟဲလိ စီၤယိၤဟၣ်အအိၣ်, ဒ်သိးအကဘၣ်တၢ်ဘျၢအီၤလိထံလိ. အဝဲဒၣ် စံးဘၣ်အဝဲဝီၤ, ‘ဂူၢ်ဘီၣ်အွိးလိၣ်ဧၢ, မဲၢ်မတဂၤ စံးဘၣ်သုလိ သူပူၤဖျဲးဘျီး တၢ်စံၣ်ညီၣ်လိ ကစၢ်ယွၤသါကဆှၢလီၤဝဲနဲၢ်သ့းဝဲတဂၤလဲၣ်. 8 မၤတၢ်အံၤတလိၣ်လိ အကဒုးနဲၣ်ဖျါထီၣ်လိ သုဃၣ်ကွံၤလ့သုသးလိ တၢ်ဒဲးဘးတလိၣ်နဲၢ်တကဲၢ်. ဘျီးတဘၣ်စံးလိၤသုသးပကိပကိ လိ စီၤအၤဘြၤဟၣ်မဲၢ် သုပၢ်ဖးဒွိၣ်လိ သုဟဲလီၤစၢၤလိ အီၤတဂၤနဲၢ်တဂ့ၤ. ယစံးဘၣ်သုလိ ကစၢ်ယွၤဟံးနဲၢ်လၢၢ်တလိၣ်အံၤဘျီး ဒွိးကဲၣ်ထီၣ်ဝဲစၢၤသွဲၣ်တလိၣ်လိ စီၤအၤဘြၤဟၣ်အဂီၢ်နဲၢ်သ့းဝဲလိ. 9 ကွၣ်အိၣ်ကတဲၤကတီၤပၤလ့အသးလိ တၢ်ကကူၤလီၤကွံၤသ့ၣ်တလိၣ်တုၤလိ အဂံၢ်ခီၣ်ထံးလိ. သ့ၣ်တခွိၣ်လၢ်လၢ်လိ အတသၣ်ထီၣ်တၢ်သၣ်အဂ့ၤနဲၢ်, ကဘၣ်တၢ်ကူၤလီၤဘျီး တ့ၢ်လီၤကွံၤအီၤလိ မဲၣ်အပူၤလိ. 10 ဘၠီၣ်ထီဖူၣ်ထီခၠၢသ့းကွၢ်ဝဲ, ‘မဲၢ်မဲၢ်ဒ့းန့ၤဘျီး, ပကဘၣ်မၤဒ်လဲၣ်.’ 11 အဝဲစံးဆၢဝဲ, ‘ဘၠီၣ်တဂၤလၢ်လၢ်လိ အဆ့ကၤအိၣ်ခံဘ့ၣ်နဲၢ်, ကဘၣ်ဟ့ဝဲတဘ့ၣ်လိ ဘၠီၣ်လိ အတၢ်တအိၣ်နီတဘ့ၣ်, ဘျီးဘၠီၣ်တဂၤလၢ်လၢ်လိ အအိၣ်လါ တၢ်အီၣ်နဲၢ်, ကဘၣ်နီၤလီၤဝဲလိ.’ 12 ဘၠီၣ်ဃ့တၢ်တနီၤဟဲဝဲဒ်သိး အကဘၣ်တၢ်ဘျၢအီၤလိထ့း, ဘျီးအဝဲဝီၤသ့းကွၢ်အီၤ, ‘သရၣ်ဧၢ, ပကဘၣ်မၤဒ်လဲၣ်.’ 13 အဝဲဒၣ်စံးဘၣ်အဝဲဝီၤ, ‘တဘၣ်ထၢတၢ် အခွိၣ်အသွဲအါနဲၢ်တၢ်သိၣ်တၢ်သီ ဟ့ၣ်စိဟ့ၣ်ကမီၤသုတဂ့ၤ.’ 14 ဘၠီၣ်သုၣ်ဖွိတနီၤသ့းကွၢ်နဲၢ်နဲၢ်ဝဲ, ‘ပဝဲတခိနဲၢ် ပကဘၣ်မၤဒ်လဲၣ်.’ အဝဲဒၣ်စံးဘၣ်အဝဲဝီၤ, ‘တဘၣ်ဟံးနဲၢ်ဆူၣ်စ့ၣ်လိဘၠီၣ်မဲၢ်ဂ့ၤ, မဲၢ်တမဲၢ်ပၤတၢ်ကမၣ်ကဘျံးကဘျၣ်လိ ဘၠီၣ်တဂၤအလိၤမဲၢ်ဂ့ၤ,နီတဂၤတဂ့ၤ. သူၣ်မံသးမံဘျီးသူဘူးသူလဲတကဲၢ်.’ 15 ဘၠီၣ်ထီဖူၢ်ထီခၠၢအတၢ်မုၢ်လၢ် အၣ်ထီၣ်, ဘျီးဆိကမိၣ်ဝဲလိ ဘၣ်တဘၣ်စီၤယိၤဟၣ်ကမဲၢ်ခရံာ်1လိ. 16 လိတၢ်နံၤအဃိ, စီၤယိၤဟၣ်စံးဘၣ်အဝဲဝီၤကိးဂၤဒ့း, ‘ယဲဒၣ်အံၤ, ယဘျၢသုလိထ့းလိ. မဲၢ်မဲၢ်ဘၠီၣ်ဟဲဝဲတဂၤလိ အဒွိၣ်နဲၢ်ဒံးယၤစၢတလၢၢ်လိ. ယတကြၢးတဘၣ်ဒၣ်လဲၣ်လိယကဘ့လီၤနဲၢ်အဝဲဒၣ်အခီၣ်ဖံးပျံၤအဂီၢ်နဲၢ်လိ. အဝဲဒၣ် ကဘျၢသုလိ သးစီဆှံဘျီးလိ မဲၣ်နဲၢ်လိ. 17 အဝဲဒၣ်လီၤဂၤလါဘၠီၣ်တဂၤလိ အဟံးဃၤအကီၢ်လဲၢ်လိအစဒ့ပူၤဒ်သိးအကဘၣ်မၤဆှီၣ်ထီၣ်အဘုၣ်တလိၣ်, ဘျီးကဂၢ်ဖှိၣ်အဘုၣ်ကၠူၣ်တလိၣ်လိ အဘုၣ်ဖီအပူၤ, မဲၢ်မဲၢ်လီၢ်ဧိၤဒံးဧိၤလါ ဖ့တလိၣ်ကဆူးကဲၤထီၣ်ကွံၤဝဲလိ မဲၣ်လိ အလီၤပံၤတသ့းအပူၤနဲၢ်လိ. 18 စီၤယိၤဟၣ်ဟီတရါလီၤတၢ်သးခုကစီၣ်လိ ကျဲၣ်အါဘိၣ်ဘျီးသဆၣ်ထီၣ်ဘၠီၣ်ထီဖူၣ်ထီခၠၢအခံလိ. 19 လၢၤအဝဲဒၣ်သိၣ်ဃီၣ်ဘျီး ပၤတၢ်ကမၣ်လိ ပဒွိၣ်ဖးဒွိၣ်စီၤဟ့ၤရိာ်အလိၤမဲၢ်လိ အဝဲဒၣ် ဟံးနဲၢ်အထီပုၢ်ဝဲၢ်အမါနီၢ်ဟ့ၤရိၤဒံ, ဘျီးလိတၢ်အၢၣ်တၢ်သီအဂၤအါမံၤအါကလုာ်လိ အမၤပၤစၢၤဝဲတလိၣ် အဃိလိ. 20 အနံၤဝံၤအလီၢ်ခံ, စီၤဟ့ၤရိာ်မၤတၢ်တမံၤလိ အအၢၣ်အသီဒွိၣ်ဒၣ်တၢ်တကဲၢ်ခီဖျိ အတ့ၢ်နုစီၤယိၤဟၣ်လိတၢ်တ့ၢ်နုတၢ်အလီၢ်အပူၤနဲၢ်လိ. 21 ဘၠီၣ်ထီဖူၣ်ထီခၠၢ ဘၣ်တၢ်ဘျၢအီၤလိထံဝံၤအလီၢ်ခံနဲၢ်, ယ့ၣ်ရှူးနဲၢ်နဲၢ်ဘၣ်တၢ်ဘျၢအီၤလိထံနဲၢ်လိ. ဖဲအဝဲဒၣ်ဃ့ဘါထုကဖၣ်တၢ်အဖၢမုၢ်နဲၢ်, မွိခွိၣ်အွိးထီၣ်အသး. 22 ဘျီးသးစီဆှံဟဲလီၤလိ အလိၤအိၣ်လါနီၢ်ခိအက့ၢ်အဂီၤဒ်ထွိၣ်လွံၢ်တဘ့ၣ်အသိးနဲၢ်လိ. ဘျီးတၢ်ကလုၢ်သီၣ်ထီၣ်လိ မွိခွိၣ်ဘျီး စံးဝဲ, ‘နဲဒၣ်အံၤ နမဲၢ်ယဖွိခွါဒၣ်ယဲလိယအဲၣ်အီၤတဂၤလိ. ယဘၣ်သူၣ်ဘၣ်သးနီနၤလိ.’ 23 ဖဲယ့ၣ်ရှူးစးထီၣ်အတၢ်ဖံးတၢ်မၤနဲၢ်, အဝဲအသးအိၣ်လ့ သၢဆံ ဃၣ်ဃၣ်လိ. ဘၠီၣ်အတၢ်ဆိကမိၣ်အိၣ်ဝဲလိ အမဲၢ် စီၤယိၤသးလိ အဘၣ်တၢ်ထီၣ်ဖွိအီၤလိ စီၤဟ့ၤလံ တဂၤနဲၢ် အဖွိခွါလိ. 24 စီၤဟ့ၤလံအပၢ်မဲၢ် စီၤမးသး, စီၤမးသး အပၢ်မဲၢ် စီၤလ့ၤဝံ, စီၤလ့ၤဝံ အပၢ်မဲၢ် စီၤမ့းလဃံ, စီၤမ့းလဃံ အပၢ်မဲၢ် စီၤယၣ်နါ, စီၤယၣ်နါ အပၢ်မဲၢ် စီၤယိၤသး, 25 စီၤယိၤသး အပၢ်မဲၢ် စီၤမးတၤသံ, စီၤမးတၤသံအပၢ်မဲၢ် စီၤအမိၣ်, စီၤအမိၣ် အပၢ်မဲၢ် စီၤနအူၣ်, စီၤနအူၣ် အပၢ်မဲၢ် စီၤအ့းစလံ, စီၤအ့းစလံ အပၢ်မဲၢ် စီၤနၤကဲ, 26 စီၤနၤကဲ အပၢ်မဲၢ် စီၤမအါသး, စီၤမအါသး အပၢ်မဲၢ်စီၤမးတၤသံ, စီၤမးတၤသံ အပၢ်မဲၢ် စီၤစ့းမ့းအံ, စီၤစ့းမ့းအံ အပၢ်မဲၢ် စီၤယိၤသး, စီၤယိၤသး အပၢ်မဲၢ် စီၤယူဒၤ, 27 စီၤယူဒၤ အပၢ်မဲၢ် စီၤယိၤအၣ်နၣ်, စီၤယိၤအၣ်နၣ် အပၢ်မဲၢ် စီၤရ့ၤစါ, စီၤရ့ၤစါ အပၢ်မဲၢ် စီၤစရူဘၤဘ့းလး, စီၤစရူဘၤဘ့းလး အပၢ်မဲၢ် စီၤရှၤလတံၤအ့လး, စီၤရှၤလတံၤအ့လး အပၢ်မဲၢ် စီၤန့ၤရံ, 28 စီၤန့ၤရံအပၢ်မဲၢ် စီၤမ့းလဃံ, စီၤမ့းလဃံ အပၢ်မဲၢ် စီၤအးဒံး, စီၤအးဒံး အပၢ်မဲၢ် စီၤကိၣ်စၣ်, စီၤကိၣ်စၣ် အပၢ်မဲၢ် စီၤအ့းလမိၤဒၣ်, စီၤအ့းလမိၤဒၣ် အပၢ်မဲၢ် စီၤအ့ၢ်, 29 စီၤအ့ၢ်အပၢ်မဲၢ် စီၤယိၤရှူ, စီၤယိၤရှူ အပၢ်မဲၢ် စီၤအလံၤဧ့စ့ၢ်, စီၤအလံၤဧ့စ့ၢ် အပၢ်မဲၢ် စီၤယိၤရံၣ်, စီၤယိၤရံၣ် အပၢ်မဲၢ် စီၤမးသး, စီၤမးသး အပၢ်မဲၢ် စီၤလ့ၤဝံ, 30 စီၤလ့ၤဝံ အပၢ်မဲၢ်စီၤစူၤမ့းအိၣ်, စီၤစူၤမ့းအိၣ် အပၢ်မဲၢ် စီၤယူဒၤ, စီၤယူဒၤ အပၢ်မဲၢ် စီၤယိၤသး, စီၤယိၤသး အပၢ်မဲၢ် စီၤယိၤနာ်, စီၤယိၤနာ် အပၢ်မဲၢ် စီၤအ့းလယါကံၣ်, စီၤအ့းလယါကံၣ် အပၢ်မဲၢ် စီၤမ့းလ့း, 31 စီၤမ့းလ့း အပၢ်မဲၢ် စီၤမအံနၣ်, စီၤမအံနၣ် အပၢ်မဲၢ် စီၤမးတၤသါ, စီၤမးတၤသါ အပၢ်မဲၢ်စီၤနၤသၣ်, စီၤနၤသၣ် အပၢ်မဲၢ် စီၤဒၤဝံး, 32 စီၤဒၤဝံး အပၢ်မဲၢ်စီၤယံးရှဲ, စီၤယံးရှဲ အပၢ်မဲၢ်စီၤဧိၤဘ့း, စီၤဧိၤဘ့း အပၢ်မဲၢ်စီၤဘိၤဧး, စီၤဘိၤဧး အပၢ်မဲၢ် စီၤစၤလမိၣ်, စီၤစၤလမိၣ် အပၢ်မဲၢ် စီၤနးရှိၣ်, 33 စီၤနးရှိၣ် အပၢ်မဲၢ် စီၤဧးမံၤနဒး, စီၤဧးမံၤနဒး အပၢ်မဲၢ် စီၤရၣ်, စီၤရၣ် အပၢ်မဲၢ် စီၤဃ့ၤစရိၣ်, စီၤဃ့ၤစရိၣ် အပၢ်မဲၢ် စီၤပ့းရ့း, စီၤပ့းရ့း အပၢ်မဲၢ် စီၤယူဒၤ, 34 စီၤယူဒၤ အပၢ်မဲၢ် စီၤယၤကိာ်, စီၤယၤကိာ် အပၢ်မဲၢ် စီၤအံၤစဲး, စီၤအံၤစဲး အပၢ်မဲၢ် စီၤအၤဘြၤဟၣ်, စီၤအၤဘြၤဟၣ် အပၢ်မဲၢ် စီၤတ့ရၤ,စီၤတ့ရၤ အပၢ်မဲၢ် စီၤနၤဃိၢ်, 35 စီၤနၤဃိၢ် အပၢ်မဲၢ် စီၤစၤရူာ်, စီၤစၤရူာ် အပၢ်မဲၢ်စီၤရူၤ, စီၤရူၤ အပၢ်မဲၢ် စီၤပ့ၤလ့း, စီၤပ့ၤလ့း အပၢ်မဲၢ် စီၤဧၤဘ့ၢ်, စီၤဧၤဘ့ၢ် အပၢ်မဲၢ် စီၤစ့ၤလါ, 36 စီၤစ့ၤလါ အပၢ်မဲၢ်စီၤက့ၤနၣ်, စီၤက့ၤနၣ် အပၢ်မဲၢ် စီၤအၢ်ဖးရှး, စီၤအၢ်ဖးရှး အပၢ်မဲၢ် စီၤရှ့ၣ်, စီၤရှ့ၣ် အပၢ်မဲၢ် စီၤနိအၤ, စီၤနိအၤ အပၢ်မဲၢ် စီၤလ့ၤမ့း, 37 စီၤလ့ၤမ့း အပၢ်မဲၢ်စီၤမသူရှလၤ, စီၤမသူရှလၤ အပၢ်မဲၢ် စီၤဃနိာ်, စီၤဃနိာ် အပၢ်မဲၢ် စီၤယၤရ့း, စီၤယၤရ့းအပၢ်မဲၢ် စီၤမဟၤလ့လး, စီၤမဟၤလ့လး အပၢ်မဲၢ် စီၤက့ၤနၣ်, 38 စီၤက့ၤနၣ် အပၢ်မဲၢ် စီၤအနိၣ်, စီၤအနိၣ် အပၢ်မဲၢ် စီၤရှ့သး, စီၤရှ့သး အပၢ်မဲၢ် စီၤအၤဒၣ်လိ အမဲၢ် ကစၢ်ယွၤအဖွိခွါနဲၢ်လိ. |
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.