Luke 22 - Karen Paku1 ဘူၣ်ကွိၣ်တအိၣ်ဘၣ်လါ ကွိၣ်မံၤလိ တၢ်ကိးအီၤလိ ဘူၣ်လဲၤကပၤနဲၢ်, အဆၢကတီၢ်ဘူးထီၣ်ဝဲဒၣ်လိ. 2 ဘၠီၣ်လုၢ်တၢ်အခွိၣ်အဒွိၣ်တလိၣ်လါ ဘၠီၣ်သ့းတၢ်ဘူၣ်တၢ်ဘါအတၢ်သိၣ်တၢ်သီတလိၣ် ဂုၢ်ကျဲးစၢၤချုဝဲကျဲၣ်တဘိၣ်ဘိၣ်လိ အကမၤသ့းယ့ၣ်ရှူးလိ. တၢ်ဂ့ၢ်မဲၢ်လိ အဝဲဝီၤသးပလံၤဘၠီၣ်ထီဖူၣ်ထီခၠၢအဃိလိ. 3 တၢ်နံၤဝံၤအလီၢ်ခံ, မုၣ်ကီၤလံၢ်လဲၤနုလီၤလိ စီၤယူဒၤလိ တၢ်ကိးအီၤလိ အံၣ်စကၤရံၤအိၣ်လိ အမဲၢ်ဘၠီၣ်တၢ်မၢဖိ တဆ့ခံဂၤအကျၣ်တဂၤနဲၢ်အပူၤလိ. 4 လိတၢ်နံၤအဃိ, စီၤယူဒၤ ဟးထီၣ်ဘျီး ကတိၤတၢ်လါ ဘၠီၣ်လုၢ်တၢ်အခွိၣ်အဒွိၣ်တလိၣ်ဘျီး တၢ်လုၢ်ဟံၣ်အဘၠီၣ်ခိးတၢ်ဖိအခွိၣ်အနၢ်တလိၣ် ဘၣ်ဃးလိ အကဟ့လီၤကွံၤယ့ၣ်ရှူးဒ်လဲၣ်ဒ်လဲၣ်အဂ့ၢ်နဲၢ်လိ. 5 အဝဲဝီၤ အသူၣ်ခုသးခု, ဘျီး အၢၣ်လီၤအီလီၤလိ အကဟ့လီၤစ့ၣ်လိ. 6 စီၤယူဒၤအၢၣ်လီၤ တူၢ်လိၤဝဲဘျီး ချုခွဲးဂ့ၤယၤဘၣ်လိ အကဟ့လီၤကွံၤယ့ၣ်ရှူးလိ အဝဲဝီၤအစုၣ်ပူၤဖဲဘၠီၣ်ထီဖူၣ်ထီခၠၢတသံညါ ဝဲ အဆၢကတီၢ်နဲၢ်လိ. 7 မုၢ်နံၤမုၢ်သီဟဲတုၤအိၣ်ဝဲဒၣ်ဖဲဘူၣ်ကွိၣ်တအိၣ်လါ ကွိၣ်မံၤအဆၢကတီၢ်. လိသိဖွိတလိၣ်အကဘၣ်တၢ်မၤသ့းအီၤလိ ဘူၣ်လဲၤကပၤအတၢ်အီၣ်အဂီၢ်လိ. 8 ယ့ၣ်ရှူးမၢလီၤစီၤပ့းတရူးလါစီၤယိၤဟၣ်ဘျီး မါလွိၤအဝဲဝီၤဒ့းအ့ၤ, ‘လဲၤဘျီး ကတဲၤကတီၤပၤပဘူၣ်လဲၤကပၤအတၢ်အီၣ်လိ ပကအီၣ်အီၤအဂီၢ်နဲၢ်တကဲၢ်.’ 9 အဝဲဝီၤသ့းကွၢ်ဝဲ, ‘နအဲၣ်ဒိးပကတဲၤကတီၤပၤအီၤလိ တၢ်လီၢ်ဖဲလဲၣ်တခိလဲၣ်.’ 10 အဝဲဒၣ်စံးဝဲ, ‘ကနၣ်တကဲၢ်. ဖဲသုလဲၤနုလိ ဝ့ၢ်ပူၤနဲၢ် ဘၠီၣ်ပွိၤခွါတဂၤလိ အစိၤထံလိ သပၢၤထံတဖျၢၣ်အပူၤကဟဲခိသုလိ. နုၤလီၤပိၤအခံလိ ဟံၣ်လိ အဝဲလဲၤနုလီၤလိ အပူၤ. 11 ဘျီး စံးဘၣ်ဟံၣ်ကစၢ်နဲၢ်, ‘သရၣ်စံးဘၣ်နၤ, ဒၢၣ်လိ ယခ့ယပှၤလါယၤ ပကအီၣ်ဘူၣ်လဲၤကပၤအတၢ်အီၢ်အဂီၢ်နဲၢ်, အိၣ်လိ ဖဲလဲၣ်ခိလဲၣ်. 12 အဝဲဒၣ် ကဒွိးနဲၢ်သုဒၢၣ်ဖးဒွိၣ်လိတၢ်ဖီခွိၣ်တဒၢၣ်အိၣ်ကတဲၤကတီၤပၤအသးဂ့ၤဂ့ၤဘၣ်ဘၣ်ဘျီး သုကဘၣ်ကတဲၤကတီၤတၢ်ခဲလုၤခဲဆ့ဖဲနံၤလိ. 13 အဝဲဝီၤ ဟးထီၣ်ဘျီး ထ့ၣ်တၢ်ခဲလုၤခဲဆ့ဒ်ယ့ၣ်ရှူးစံးဘၣ်တီၢ်အီၤအသိး, ဘျီး ကတဲၤကတီၤပၤဘူၣ်လဲၤကပၤအတၢ်အီၣ်နဲၢ်လိ. 14 ဖဲဆၢကတီၢ်နၤရံၣ်တုၤဂီၤနဲၢ်, ယ့ၣ်ရှူးဟံးန့ၢ်အလီၢ်ဖဲစီၤနီၤခွိၣ် ဟူၤလါ တၢ်မၢဖွိတလိၣ်နဲၢ်လိ. 15 အဝဲဒၣ်စံးဘၣ် အဝဲဝီၤ, ‘ယသါအိၣ်နီၢ်ဝဲ အဒွိၣ်အအါလိ ယကအီၣ်ဘၣ်ဘူၣ်လဲၤကပၤအတၢ်အီၣ်တဘျီအံၤတပူၤဃီလါသု တချုးယတူၢ်ဘၣ်ဒ်ဘၣ်တၢ်နဲၢ်လိ. 16 တၢ်ဂ့ၢ်ဒ့းအ့ၤ, ယစံးဘၣ်သု တချုးဘူၣ်လဲၤကပၤအတၢ်အီၣ်အဝဲအံၤ ဘၣ်တၢ်ပၤဖျါထီၣ်အခီပညီလိလိပှဲၤပှဲၤ လိ ကစၢ်ယွၤ အဘီအမုၢ်အပူၤဒံးဘၣ်နဲၢ်, ယတအီၣ်လၢၤအီၤနီတဘျီဘၣ်.’ 17 အနံၤဝံၤဘျီး ယ့ၣ်ရှူးဟံးထီၣ်လ့ခီ, စံးဘျုးစံးဖှိၣ်ကစၢ်ယွၤဘျီးစံးဝဲ, ‘ဟံးနဲၢ်တၢ်အဝဲအံၤ, ဘျီးနီၤလီၤအီၤလိ သုကဆူးကတ့ၤနဲၢ်တကဲၢ်. 18 တၢ်ဂ့ၢ်ဒ့းအ့ၤ, ယစံးဘၣ်သုလိ, စးထီၣ်ခဲနဲအံၤဘျီးတုၤလီၤလိ ယွၤအဘီအမုၢ်ဟဲဝဲတဘျီးနဲၢ်, ယတအိလၢၤဘၣ်စပံးထံအံၤဘၣ်.’ 19 အဝဲနံၤဝံၤအလီၢ်ခံ, အဝဲဒၣ်ဟံးန့ၢ်ကွိၣ်, စံးဘျုး စံးဖှိၣ်ကစၢ်ယွၤစိၤပလ့းဝဲ, ဘျီး ဟ့လီၤအီၤလိ အဝဲဝီၤ အအိၣ်ဘျီး စံးဝဲ, ‘အဝဲအံၤမဲၢ်ယနီၢ်ခိလိ အဘၣ်တၢ်ဟ့လီၤအီၤလိ သုဂီၢ်လိ. 20 မၤတၢ်အဝဲအံၤလိ တၢ်သ့းနီၣ်ထီၣ်ဂ့ၤယၤအဂီၢ်နဲၢ်တကဲၢ်.’ ဒ့းန့ၤအသိး, ဖဲအအီၣ်တၢ်လိ ဟါအီၣ်ဝံၤနဲၢ်, အဝဲဒၣ် ဟ့လီၤအဝဲဝီၤလိ လ့ခီဘျီး စံးဝဲ, ‘လ့ခီအံၤမဲၢ်ကစၢ်ယွၤအတၢ်အၢၣ်လီၤအီလီၤ အသီလိ အဘၣ်တၢ်မၤနီၣ်ဃၤအီၤလိ ယသွံၣ်, လိအဘၣ်တၢ်လူလီၤဂၢ်လီၤအီၤလိသုဂီၢ်နဲၢ်လိ. 21 လၢၤဘျီး ကွၢ်တကဲၢ်. ဘၠီၣ်လိ အဟ့လီၤကွံၤယၤတဂၤနဲၢ်အိၣ်လါယၤလိစီၤနီၤခွိၣ်ဖဲအံၤလိ. 22 တၢ်ဂ့ၢ်မဲၢ်လိ ပှၤကညီဖွိခွါကသ့းဝဲဒ်ကစၢ်ယွၤကျဲၤပၤစၢၤဝဲအသိးနဲၢ်လိ. လၢၤဘျီး ဘၠီၣ်လိ အကဟ့လီၤကွံၤအီၤတဂၤနဲၢ်, ကဘၣ်တၢ်ဖှီၣ်ထဲလဲၣ်ခိလဲၣ်. 23 တုၤနုၤတဘျီး အဝဲဝီၤသ့းကွၢ်လွိၤအသးတဂၤလါတဂၤလိ အဝဲဝီၤအကျၣ်မဲၢ်တမဂၤကဟ့လီၤကွံၤအီၤလဲၣ်နဲၢ်လိ. 24 တၢ်ဂ့ၢ်လိၤဘှီလိၤ အိၣ်ထီၣ်ဝဲလိ အခ့အပှၤတလိၣ်အကျၣ်ဘၣ်ဃးလါမတဂၤ ကြၢးဘၣ်ဝဲ တၢ်ပၤကဲအီၤဒ်ဘၠီၣ်အဒွိၣ်ကတၢၢ်တဂၤလဲၣ်နဲၢ်လိ. 25 ယ့ၣ်ရှူးစံးဘၣ်အဝဲဝီၤ, ‘ပှၤကလုၢ်ဂၤအစီၤပၤတလိၣ်အိၣ်လါအစိကမီၤလိ အဘၠီၣ်ထီဖူၣ်ထီခၠၢတလိၣ်အဖီခွိၣ်ဘျီး ဘၠီၣ်ပၢဘၠီၣ်ပြးတၢ်တလိၣ်ဘၣ်တၢ်ကိးအီၤလိ ဘၠီၣ်မၤဘျုးမၤဖှိၣ်တၢ်တလိၣ်လိ. 26 လၢၤဘျီး သုဝဲတလိၣ်, သုတမဲၢ်ဒ့းန့ၤအသိးဘၣ်. မဲၢ်မဲၢ် ဘၠီၣ်အဒွိၣ်ကတၢၢ်လိ သုကျၣ်ကဘၣ်မဲၢ်ဝဲဒ်ဘၠီၣ်အသးကတၢၢ်တဂၤအသိး ဘျီး ဘၠီၣ်အခွိၣ်ကဘၣ်မဲၢ်ဝဲဒ် တၢ်ခ့တၢ်ပှၤတဂၤအသိးနဲၢ်လိ. 27 မတဂၤဒွိၣ်လဲၣ်. ဘၠီၣ်တဂၤလိ အဆ့နီၤအီၣ်တၢ်ဧါ. မဲၢ်တမဲၢ်လိ ဘၠီၣ်တဂၤလိ အမၤတၢ်အခ့အပှၤအတၢ်မၤလိဘၠီၣ်ဆ့နီၤအီၣ်တၢ်အဂီၢ်နဲၢ်လဲၣ်. သပှၢ်ကတၢၢ် ဘၠီၣ်လိ အဆ့နီၤအီၣ်တၢ်နဲၢ်လိ. လၢၤဘျီး ယအိၣ်လိသုကျၣ်ဒ်ဘၠီၣ်လိ အမၤတၢ်ခ့တၢ်ပှၤအတၢ်မၤတဂၤအသိးလိ. 28 လိတၢ်မၤကွၢ်လိ အဟဲဘၣ်ယၤထီဆၢကတီၢ်အပူၤနဲၢ်သုဝဲတလိၣ်သုအိၣ်ဒံးသုဝဲလါယၤလိ. 29 ဘျီးဒ်ယပၢ်ဟ့စိဟ့ကမီၤယၤလိ ယကပၢဘၣ်တၢ်အသိးနဲၢ် ယကဟ့သုတၢ်တမံၤဃီနဲၢ်လိ. 30 သုကအီၣ်တၢ်အိတၢ်လိ ယစီၤနီၤခွိၣ်လိ ယဘီမုၢ်အပူၤ ဘျီး သုကဆ့နီၤလိခံဆ့နီၤအဖီခွိၣ်ဒ်သိးသုကပၢဘၠီၣ်အံၣ်စရ့လးဖွိတဆ့ခံဒူၣ်နဲၢ်လိ. 31 စီၤရှံမိၤဧိ, စီၤရှံမိၣ်ဧိ, ကနၣ်တကဲၢ်. မုၣ်ကီၤလံၢ်မၤန့ၢ်လ့တၢ်ပျဲလိ အကမၤကွၢ်သုဝဲကိးဂၤဒ့းလိ အကနီၤဖးတၢ်ဂ့ၤလါတၢ်အၢၣ်, ဒ်ဘၠီၣ်ထူစံၤဖွိတဂၤကူဘုၣ်အသိးနဲၢ်လိ. 32 လၢၤဘျီး ယဘါထုကဖၣ်ပၤစၢၤဝဲလိ နဂီၢ်, စီၤရှံမိၣ်ဧၢ ဒ်သိး နတၢ်စူၤတၢ်နၤဘၣ်တဟးဂီၤတဂ့ၤအဂီၢ်လိ. ဘျီးဖဲနဃၣ်ခွိၣ်ခံဂ့ၤနသးလိ ယအိၣ်နဲၢ် နကဘၣ်ဟ့ၣ်ဂံၢ်ဟ့ၣ်ဘါ နထီပုၢ်ဝဲၢ်တလိၣ်လိ. 33 စီၤပ့းတရူးးစံးဆၢဝဲ, ‘ကစၢ်ဧၢ, ယအိၣ်ကတဲၤကတီၤယသးလိ ယကလဲၤလိ တၢ်စၢၣ်ဃၤလီၢ်ပူၤဟူၤလါနၤဘျီး ယကသ့းပကိးလါနၤနဲၢ်လိ. 34 ယ့ၣ်ရှူးစံးဆၢဝဲ, ‘ယစံးဘၣ်နၤ, စီၤပ့းတရူးဧၢ, ကဲနၤနဲၢ် တချုးနလိယၤသၢဘျီးဒံးဘၣ်နဲၢ်ဆီဖါ ကီၢ်တအွိးအွိၣ်ဘၣ်ဝဲဘၣ်.’ 35 တၢ်နံၤဝံၤအလီၢ်ခံ ယ့ၣ်ရှူးစံးဘၣ်အဝဲဝီၤ, ‘တဘျီလိ ယမၢလီၤသု, တအိၣ်လါစ့ၣ်ထၢၣ်မဲၢ်ဂ့ၤ, တၢ်အီၣ်အထၢၣ်မဲၢ်ဂ့ၤ, ခီၣ်ဖံးမဲၢ်ဂ့ၤနဲၢ်, တၢ်တလၢတၢ်လီၢ်လိ သုဂီၢ်အိၣ်ဝဲတခါခါဒ့းဧါ.’ 36 အဝဲဒၣ်စံးဆၢဝဲ, ‘တအိၣ်နီတမံၤဘၣ်.’ လၢၤဘျီး ခဲနဲအံၤ, ယ့ၣ်ရှူးစံးဆၢဝဲ, ‘ဘၠီၣ်တဂၤဂၤလိ အအိၣ်လါ စ့ၣ်ထၢၣ်တဖျၢၣ်မဲၢ်ဂ့ၤ, တၢ်အီၣ်အထၢၣ်မဲၢ်ဂ့ၤ,မ်အကဟံးနဲၢ်အီၤတကဲၣ်. ဘျီး ဘၠီၣ်တဂၤဂၤလိ အတအိၣ်လါ နးတဘ့ၣ်မ်အကဆါကွံၤအဆ့ကၤဖီခွိၣ်လါ ပှ့ၤနဲၢ်အီၤတကဲၢ်. 37 တၢ်ဂ့ၢ်ဒ့းအ့ၤ, ယစံးဘၣ်သု တၢ်တမံၤအံၤ, တၢ်ကွ့းအသးစံးဝဲ, ‘အဝဲဘၣ်တၢ်ဂံၢ်ဟူၤအီၤလိ ဘၠီၣ်တကနၣ်ထံကီၢ်အတၢ်သိၣ်တၢ်သီတလိၣ်အကဆူကတ့ၤ, တတီၤနဲၢ် ကဘၣ်ဟဲလိထီၣ်ပှဲၤထီၣ်ဝဲလိယၤလိ. တၢ်ဂ့ၢ်ဒ့းအ့ၤ, တၢ်လိ အဘၣ်တၢ်ကွ့းတီၢ်အီၤလိ ယဂ့ၢ်နဲၢ်ဟဲလိ ထီၣ်ပှဲၤထီၣ်ဝဲဒၣ်လိ. 38 အခ့အပှၤတလိၣ်စံးဝဲ, ‘ကွၢ်လိအံၤယဲၢ် ကစၢ်ဧၢ. နးအိၣ်ဝဲဒၣ်ဖဲအံၤခံဘ့ၣ်လိ.’ ဘျီးအဝဲဒၣ်စံးဝဲ, ‘ဘၣ်လ့.’ 39 ယ့ၣ်ရှူးဟးထီၣ်လိ ဝ့ၢ်ပူၤဘျီး လဲၤညီနုၢ်ဝဲအသိးလိကစၢၢ်သ့ၣ်စၤယံးလါအခ့အပှၤတလိၣ်လဲၤပကိးအီၤလိ. 40 ဖဲအဝဲဒၣ်ဟဲတုၤတၢ်လီၢ်အဝဲနံၤ, စံးဘၣ်အဝဲဝီၤ, ‘ဘါထုကဖၣ်ဒ်သိးသုသုတလီၤနုလိ တၢ်လ့ပစီအပူၤတဂ့ၤနဲၢ်တကဲၢ်.’ 41 အနံၤဝံၤဘျီး အဝဲဒၣ် ဟးစီၤစုၤလါအဝဲဝီၤ ကဘၣ်အမံၤညါ ပံတံဘျီး ချံလီၤအခီၣ်ဒ့ဘျီး ဘါထုကဖၣ်တၢ်လိ. 42 ‘ပၢ်ဧၢ’ အဝဲဒၣ်စံးဝဲ ‘မဲၢ်ဘၣ်နသးလါဟံးကွံၤနလ့ခီအံၤလိယအိၣ်တကဲၢ်. လၢၤဘျီး, တမဲၢ်ယသးဘၣ်. မဲၢ်နတၢ်ဘၣ်နသးလိဘၣ်တၢ်မၤလိထီၣ်ပှဲၤထီၣ်အီၤတကဲၢ်.’ 43 ကလူးလိမွိခွိၣ်တဂၤဟဲလီၤဖျါထီၣ်အသးလိအီၤ, ဘျီး ဟ့ဂံၢ်ဟ့ဘါအီၤလိ. 44 လိတၢ်သူၣ်ကွိၢ်သးဂီၤဖးဒွိၣ်အပူၤ, အဝဲဘါထုကဖၣ်တၢ်လိ တၢ်ပၤအသးအပှၢ်ပှၢ်အပူၤ, ဒွိၣ်နဲၢ်အလီၢ်လိ, အဝဲဒၣ် အကပၢၤယွၤလီၢ်ဒ်တၢ်သွံအလီၤစီၤတလိၣ်အသိး, လိဟီခွိၣ်လိၤလိ. 45 အဝဲဒၣ်ဘါထုကဖၣ်တၢ်ဝံၤ, ဂ့ၤထ့ဘျီး က့ၤဂ့ၤလိ အခ့အပှၤတလိၣ်အအိၣ်နဲၢ်, ထ့ၣ်ဝဲလိ အမ့းဘၣ်အသးမဲၢ်လိ တၢ်ဘှံးတၢ်တီၤအသးလါအသးတမူၤနီၤအဃိလိ. 46 ဘျီး အဝဲဒၣ်စံးအဝဲဝီၤ, ‘ဘၣ်မနီၤအဃိသုမ့းလဲၣ်.ဂ့ၤထ့လါဘါထုကဖၣ်ဒ်သိးသုတလီၤနုလိ တၢ်လ့ပစီအပူၤတဂ့ၤနဲၢ်တကဲၢ်.’ 47 ယ့ၣ်ရှူးကတိၤဒံးတၢ်အဖၢမုၢ်နဲၢ်, ဘၠီၣ်ထီဖူၣ်ထီခၠၢဟဲတုၤဝဲဒၣ်လိ စီၤယူဒၤလိအမဲၢ်ဘၠီၣ်တၢ်မၢဖွိတဆ့ခံဂၤအကျၣ်တဂၤနဲၢ်ဆှၢအဝဲဝီၤဘျီးအဝဲဒၣ်ဟဲထီၣ်လိ ယ့ၣ်ရှူးအအိၣ်ဒ်သိးအကနၢမူအီၤလိ. 48 လၢၤဘျီး ယ့ၣ်ရှူးစံးဝဲဒၣ်, ‘စီၤယူဒၤဧၢ, မဲၢ်နဟ့လီၤကွံၤပှၤကညီဖွိခွါလိ တၢ်နၢမူတဘီၣ်နဲၢ်ဧါ.’ 49 ဖဲအခ့အပှၤလိ အအိၣ်လါ ယ့ၣ်ရှူးတလိၣ်ထ့ၣ်တၢ်လိ အကမၤအသးနဲၢ်အဝဲဝီၤစံးဝဲ, ‘ကစၢ်ဧၢမဲၢ်ပကဘၣ်ကျီလိပနးတလိၣ်နဲၢ်ဧါ.’ 50 ‘ဘျီးအဝဲဝီၤ အကျၣ်တဂၤကျီဘၠီၣ်လုၢ်တၢ်အခွိၣ်အဒွိၣ်ကတၢၢ်အပှၤတဂၤအနၢ်လိအတထွဲအခိဘျီး အနၢ်သီတ့ၤကွံၤဝဲဒၣ်လိ. 51 လၢၤဘျီး ယ့ၣ်ရှူးစံးဝဲ, ‘ထဲနံၤဘၣ်လ့’ အဝဲဒၣ်ထွိးဘၠီၣ်တဂၤနဲၢ်အနၢ်ဘျီး မၢ်ဟါမၤဂ့ၤနဲၢ်အီၤလိ.’ 52 တုၤနုၤတဘျီး ယ့ၣ်ရှူးစံးဘၣ်ဘၠီၣ်လုၢ်တၢ်အခွိၣ်အဒွိၣ်တလိၣ်ဘျီး တၢ်ဘါလီၢ်အဘၠီၣ်ခိးတၢ်ဖွိအခွိၣ်အနၢ်တလိၣ်ဘျီးဘၠီၣ်ယူဒၤဖိကရၢအခွိၣ်အနၢ်တလိၣ်လိ အဟဲပၤစၢၤဝဲဖဲနံၤဒ်သိး အကဖီၣ်အီၣ်နဲၢ်, ‘မဲၢ်သုဘၣ်ဟဲလိနးလါနီၣ်ဂၢၢ်, မၤနီၢ်အသးဒ်ယမဲၢ်ဘၠီၣ်လိ အလုၤခါပတၤထံကီၢ်အတၢ်သိၣ်တၢ်သီတဂၤအသိးနဲၢ်ဧါ. 53 ယအိၣ်လါ သုလိ တၢ်ဘါလီၢ်ပူၤကိးနံၤဒ့း, ဘျီး သုတဖီၣ်ယၤဘၣ်, လၢၤဘျီး အဝဲအံၤမဲၢ်တၢ်ဆၢကတီၢ်နၤရံၣ်လိ သုကမၤတၢ်တမံၤအဂီၢ်, ဖဲတၢ်ခံးတၢ်နၤ အစိကမီၤပၢတၢ်နဲၢ်လိ. 54 တုၤနုၤတဘျီ အဝဲဝီၤဖီၣ်ယ့ၣ်ရှူးဘျီး စိၤကွံၤအီၤလိ ဘၠီၣ်လုၢ်တၢ်အခွိၣ်အဒွိၣ်ကတၢၢ်အဟံၣ်ပူၤ, ဘျီး စီၤပ့းတရူးပိၤထီၣ်သကွ့ၤအခံလိ. 55 ဘၠီၣ်မၤကဲၤထီၣ်မဲၣ်လိကွီၢ် ဘျီၣ်အဂၢၤခၢၣ်သး, ဘျီး စီၤပ့းတရူးလဲၤဆ့နီၤပကိးဘၠီၣ်လိအဆ့နီၤတရံးတံၢ်ပိၤတလိၣ်နဲၢ်လိ. 56 လိဖဲနံၤအကျၣ်တၢ်ခ့တၢ်ပှၤမ့ၣ်ပှၢ်တဂၤထ့ၣ်အဝဲဒၣ်ဆ့နီၤလိမဲၣ်အူအမံၤညါနဲၢ်, အဝဲဒၣ်ကွၢ်ဝီၤအီၤလိၤလိၤဘျီးစံးဝဲ, ‘ဘၠီၣ်တဂၤအံၤနဲၢ်နဲၢ် ပိၤယ့ၣ်ရှူးအခံလိ.’ 57 လၢၤဘျီးစီၤပ့းတရူးလိ တၢ်ဘျီးစံး, ‘ဘၠီၣ်မ့ၣ်ပှၢ်ဧိ, ယတသံညါဘၠီၣ်အဝဲအံၤဘၣ်.’ 58 တကဲၢ်ဝံၤအလီၢ်ခံနဲၢ်ဘၠီၣ်ပွိၤခွါတဂၤပၤသူၣ်ပၤသးလိအီၤဘျီး စံးဝဲ, ‘နမဲၢ်အဝဲဝီၤအကျၣ်တဂၤနဲၢ်လိ.’ လၢၤဘျီးစီၤပ့းတရူးစံးဆၢဝဲ, ‘ဘၠီၣ်တဂၤဧၢ တမဲၢ်ယၤဘၣ်.’ 59 ဘျီး ကဘၣ်တနၤရံၣ်ဝံၤအလီၢ်ခံနဲၢ် ဘၠီၣ်အဂၤတဂၤစံးဝဲလိအမံၤကဲၤလိ အကလုၢ်ဆူၣ်တကိၤအပူၤ, ‘တလိၣ်လိတၢ်သးဒ့ဒီအိၣ်ဝဲနီဆံးကိၤလိ ဘၠီၣ်တဂၤအံၤ ပိၤယ့ၣ်ရှူးအခံနဲၢ်ဘၣ်. တၢ်ဂ့ၢ်ဒ့းအ့ၤ အဝဲဒၣ်နဲၢ်နဲၢ် မဲၢ်ဘၠီၣ်ကၤလံၤလါဖွိတဂၤနဲၢ်လိ. 60 လၢၤဘျီး စီၤပ့းတရူးစံးဆၢဝဲ, ‘ဘၠီၣ်တဂၤဧၢ နစံးတၢ်မနီနဲၢ်ယတသံညါဘၣ်.’ တဘျီးဃီအဝဲဒၣ်ကတိၤဒံးတၢ်အဖၢမုၢ်နဲၢ်, ဆီဖါကီၢ်တဘ့ၣ်အွိးအွိၣ်ထီၣ်ဝဲနဲၢ်လိ. 61 ကစၢ်ဃၣ်တရံးအသးဘျီ ကွၢ်ဝီၤတၢ်လိၤလိၤလိ စီၤပ့းတရူးအအိၣ်, ဘျီး စီၤပ့းတရူးသ့းနီၣ်ထီၣ်ကစၢ်အတၢ်ကတိၤလိ အစံးဘၣ်ပၤစၢၤအီၤ, ‘ကဲနၤနဲၢ်တချုးဆီဖါကီၢ်အွိးအွိၣ်ထီၣ်နဲၢ် နကလိနဲၢ်ယတၢ်သၢဘျီနဲၢ်လိ.’ 62 စီၤပ့းတရူးဟးထီၣ်ဘျီး ဟီၣ်နီၢ်ဟီၣ်သ့းနိၤလိ. ယ့ၣ်ရှူးဘၣ်တၢ်ကတိၤပစွိပစါ ဘျီး ဘၣ်တၢ်ဂၢၢ်အီၤ 63 ဘၠီၣ်လိ အအိၣ်ခိးကွၢ်ကိးသုၣ်ယ့ၣ်ရှူးတလိၣ်မၤအီၤကလိာ်ကလာ်ဘျီး ဂၢၢ်အီၤလိ. 64 အဝဲဝီၤမၤဘံအမံၤဘျီး သ့းကွၢ်အီၤ, ‘မတဂၤဂၢၢ်နၤဆိမိၣ်ဘျီး စံးတကဲၢ်.’ 65 ဘျီးအဝဲဝီၤကတိၤပစွိပစါကတိၤဆါဝဲလိ တၢ်ကတိၤဘျၢသးလိ. ယ့ၣ်ရှူးလိဘၠီၣ်ယူဒၤဖွိတဖူၣ် အတၢ်စံၣ်ညီၣ်အမံၤညါ 66 မုၢ်ဆ့ၣ်ဝၣ်ထီၣ်နဲၢ် ဘၠီၣ်ယူဒၤဖွိတဖူၣ်အခွိၣ်အနၢ်တလိၣ်, ဘၠီၣ်လုၢ်တၢ်အခွိၣ်အဒွိၣ်တလိၣ်, ဘျီး ဘၠီၣ်သ့းတၢ်ဘူၣ်တၢ်ဘါအတၢ်သိၣ်တၢ်သီတလိၣ်ပၤဖှိၣ်ထီၣ်အသးတလိၣ်ဃီဘျီး ယ့ၣ်ရှူးဘၣ်တၢ်ဟဲစိၤထီၣ်အီၤလိ အဝဲဝီၤအတၢ်စံၣ်ညီၣ်နဲၢ်လိ. 67 အဝဲဝီၤ စံးဝဲ, ‘စံးဘၣ်ဘၠီၣ်တကဲၢ်နမဲၢ်ခရံာ်နဲၢ်ဧါ.’ အဝဲဒၣ်စံးဆၢဝဲ, ‘ယမဲၢ်စံးဘၣ်ဘျီး သုတနၢ်ယၤဘၣ်. 68 ဘျီး ယမဲၢ်သ့းကွၢ်သုတၢ်သ့းကွၢ်တထ့ၣ်နဲၢ်သုတစံးဆၢယၤဘၣ်. 69 လၢၤဘျီး စးထီၣ်ခဲနဲအံၤလါဆူမံၤညါနဲၢ်, ပှၤကညီဖွိခွါအံၤ ဘၠီၣ်ကဘၣ်ဒွိးဆ့နီၤအီၤလိ ကစၢ်ယွၤသ့းတၢ်ခဲလုၤတဂၤအစဒ့အတထွဲတခိပၤလိ.’ 70 အဝဲဝီၤကိးဂၤဒ့းစံးဝဲ, ‘မဲၢ်မဲၢ်ဒ့းန့ၤဘျီး, နမဲၢ်ဝဲကစၢ်ယွၤအဖွိခွါဧါ.’ အဝဲဒၣ်စံးဆၢအဝဲဝီၤ, ‘သုစံးလိယမဲၢ်လိ.’ 71 အဝဲဝီၤစံးဝဲ, ‘ပတလိၣ်နိၤဘၠီၣ်အုၣ်အသးနီတဂၤဘၣ်. ပနီၢ်ကစၢ်ဒၣ်ပဝဲ ပနၢ်ဟူဘၣ်လ့ အဝဲအတၢ်ကတိၤဒၣ်ဝဲတလိၣ်လ့.’ |
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.