Luke 18 - Karen Paku1 တၢ်နံၤဝံၤအလီၢ်ခံ ယ့ၣ်ရှူးစံးဘၣ်အဝဲဝီၤလိ တၢ်ကတိၤဒိတထ့ၣ်အံၤဒ်သိး အကသိၣ်လိ အဝဲဝီၤလိ အကဃ့ဘါထုကဖၣ် တၢ်ခဲနဲအံၤ, ခဲနဲအံၤ ဘျီး အသးသုတဟးဂီၤနီတဘျီတဂ့ၤနဲၢ်လိ. 2 ‘လိဝ့ၢ်တဖျၢၣ်အပူၤနဲၢ်, ဘၠီၣ်စံၣ်ညီၣ်ကွီၢ်အိၣ်ဝဲတဂၤလိ အဝဲတအိၣ်လါ တၢ်ပျံၤယွၤမဲၢ်ဂ့ၤ, တၢ်ယူးယီၢ်ပၤကဲပှၤကညီမဲၢ်ဂ့ၤနဲၢ်ဘၣ်လိ. 3 ဘျီးလိ ဝ့ၢ်တဖျၢၣ်ဃီအပူၤနဲၢ်ဘၠီၣ်မုၣ်ကမဲအိၣ်ဝဲဒၣ်တဂၤလိ အဟဲကိးဘျီးဒ့းလိ အအိၣ်ဘျီး ဃ့ကညးအီၤဒ်သိး အကစံၣ်ညီၣ်တၢ်လိအဘၣ်နဲၢ်အဂီၢ်ဘျီးစံးဝဲ, ‘မၤစၢၤယၤလိ ယဒုၣ်ယဒါထီဒါယၤအပူၤတကဲၢ်.’ 4 ဘၠီၣ်စံၣ်ညီၣ်ကွီၢ်တကနၣ်ဝဲမုၣ်ကမဲတဂၤအံၤအတၢ်ဃ့ဖးယံၤညါဘၣ်. လၢၤဘျီး ခံကတၢၢ်နဲၢ်အဝဲဒၣ် စံးလီၤဂ့ၤအသး ‘ယမဲၢ်တသးပလံၤယွၤဘျီးယူးယီၣ်ပၤကဲပှၤကညီလၢၤဘၣ်နဲၢ်. 5 မဲၢ်လိ မုၣ်ကမဲတဂၤအံၤမၤတံၤတၤယၤထဲထဲအံၤအဃိ ယကကွၢ်သူးကျဲၤဝဲဒ်သိးအဝဲဒၣ်ကဒိးန့ၢ်ဘၣ်အခွဲးအယၤတလိၣ်လိ. မဲၢ်တမဲၢ်ဘၣ်ဘျီး အဝဲဒၣ် ယဟဲးဒံးလိ ယအိၣ်ခဲနဲအံၤခဲနဲအံၤ, ဘျီးလိခံကတၢၢ်နဲၢ်ကဟ့ယၤတၢ်ဘှံးသူၣ်ဘှံးသးဖးဒိၣ်လိ.’ 6 ဘျီး ကစၢ်စံးသီတဘျီးဝဲ, ‘ဒိကနၣ်တၢ်လိ ဘၠီၣ်စံၣ်ညီၣ်ကွီၢ်တမူၤတနီၢ်တဂၤနဲၢ်စံးဝဲတကဲၢ်. 7 ခဲနဲအံၤ မဲၢ်ယွၤတစံၣ်ညီၣ်တီနဲၢ်တၢ်လိ အဘၠီၣ်ထီဖူၣ်ထီခၠၢဒၣ်ဝဲလိအကိးဃ့တၢ်မၤစၢၤလိ အအိၣ်မုၢ်ဆါလါမုၢ်နၤနဲၢ်အဂီၢ်ဘၣ်ဧါ. မဲၢ်အဝဲဒၣ်ကဝံခွိၣ်ဒွိၣ်ခံဃၢလိကမၤစၢၤအဝဲလိၣ်အဂီၢ်နဲၢ်ဧါ. 8 ယစံးဘၣ်သု, အဝဲဒၣ် ကစံၣ်ညီၣ်တီနဲၢ်တၢ်လိအဝဲအဂီၢ် ဘျီး ကမၤဝဲကမ့းကမွိလိ. လၢၤဘျီး ဖဲပှၤကညီဖွိခွါဟဲဝဲနဲၢ်, မဲၢ်အဝဲကထ့ၣ်ဘၠီၣ်အိၣ်လါ တၢ်စူၤတၢ်နၤလိ ဟီၣ်ခွိၣ်ချၢနဲၢ်ဧါ.’ 9 ဘၠီၣ်လိ အနၤန့ၢ်လီၤအသးလိ အဂ့ၤဝဲဝၣ်ဝဲ, ဘျီးကွၢ်တလီၤဘၠီၣ်ကိးဂၤဒ့းနဲၢ်, ယ့ၣ်ရှူးစံးဘၣ်နဲၢ်နဲၢ်အဝဲဝီၤလိတၢ်ကတိၤဒိ အဝဲအံၤ. 10 ‘ဘၠီၣ်ခံဂၤလဲၤထီၣ်လိတၢ်လုၢ်ဟံၣ် ဒ်သိး အကဃ့ဘါထုကဖၣ်တၢ်လိ. တဂၤနဲၢ်မဲၢ်ဝဲ ဘၠီၣ်ဖၤရံရှဲလါအဂၤတဂၤမဲၢ်ဝဲ ဘၠီၣ်ဃ့သွဲလိ. 11 ဘၠီၣ်ဖၤရံရှဲတဂၤ ဆ့ထၢၣ်ဝဲလိ တၢ်လီၢ်တပူၤဒၣ်ဝဲဘျီး ဃ့ဘါထုကဖၣ် တၢ်ဘျီး စံး, ‘ယစံးဘျုးနၤလိ ကစၢ်ယွၤဧိ. ယတမဲၢ်ဘၠီၣ်ဂုာ်ဆူၣ်ပျိဆူၣ်တၢ်, ဘၠီၣ်မၤတၢ်အၢၣ်တၢ်သီ, ဘၠီၣ်အဲၣ်ဘၢတၢ်ဒ်ဘၠီၣ်အဂၤအသိးဘၣ်အဃိနဲၢ်လိ. ယစံးဘျုးနၤလိ ယတလီၤဂၤလါ ဘၠီၣ်ဃ့သွဲတဂၤနဲၢ်ဘၣ်. 12 ယဒုၣ်တၢ်အီၣ်တၢ်အီ တနွံခံဘျီ, ကိးနွံဒ့း, ဘျီးလိ ယတၢ်ဟဲနုခဲလုၤနဲၢ်ယဟ့နၤအပူတဆ့တပူလိ. 13 မဲၢ်မဲၢ်ဘၠီၣ်ဃ့သွဲတဂၤနဲၢ်, အိၣ်ဆ့ထၢၣ်ဝဲလိ တၢ်လီၢ်အယံၤ, ဘျီး တကျ့ၣ်ထီၣ်အမံၤလိ မွိခွိၣ်ဘၣ်. မဲၢ်မဲၢ် အဝဲဒၣ် ဒဲၣ်လီၤအသးနါပှၢ်ဘျီး စံးဝဲ, ‘ကစၢ်ဧိ သးကညီၤဘၣ်ယၤဒ်ယမဲၢ်ဘၠီၣ်တၢ်ဒဲးဘးဖွိတဂၤအံၤတကဲၢ်.’ 14 ယ့ၣ်ရှူးစံးဘၣ်အဝဲဝီၤ, ‘ယစံးဘၣ်သု, ဘၠီၣ်ဃ့သွဲတဂၤအ့ၤလိအတမဲၢ်ဘၠီၣ်ဖၤရံၤရှဲတဂၤဘၣ်နဲၢ်, မဲၢ်ဘၠီၣ်နီၢ်လိကစၢ်ယွၤအမံၤညါဘျီး အဝဲဒၣ်က့ၤဂ့ၤလိ အဟံၣ်နဲၢ်လိ. တၢ်ဂ့ၢ်ဒ့းအ့ၤကယဲၢ်ဘၠီၣ်လိ အပၤထီၣ်ထီအသးတဂၤလၢ်လၢ်နဲၢ်, အဘၣ်တၢ်ဆီၣ်လီၤအီၤဘျီး ကယဲၢ်ဘၠီၣ်လိ အဆီၣ်လီၤအသးတဂၤလၢ်လၢ်နဲၢ် ကဘၣ်တၢ် ပၤထီၣ်ထီအီၤလိ.’ 15 ဘၠီၣ်တနီၤဟဲစိၤဘၠီၣ်ဖွိသၣ်ပံတံတလိၣ်လိ ယ့ၣ်ရှူးအခီၣ်ထံးဒ်သိး အဝဲဒၣ် ကပၤထီၣ်အစဒ့လိ အဝဲဝီၤအလိၤအဂီၢ်နဲၢ်လိ. လၢၤဘျီးအခ့အပှၤတလိၣ်ထ့ၣ်အဝဲဝီၤဘျီး ဒူၣ်ဝဲအလိၤလိ. 16 လၢၤဘျီး ယ့ၣ်ရှူး ကိးဝီၤဘၠီၣ်ဖွိသၣ်တလိၣ်လိ အအိၣ်ဘျီးစံးဝဲ, ‘ပျဲဘၠီၣ်ဖွိသၣ်တလိၣ်ဘျီး မၢအဟဲလိယအိၣ်တကဲၢ်. ဘျီးတဘၣ်တြီအဝဲဝီၤတဂ့ၤ. တၢ်ဂ့ၢ်မဲၢ်ဒ့းအ့ၤ ကစၢ်ယွၤအဘီအမုၢ်မဲၢ်ဘၠီၣ်ဒ့းန့ၤအသိးတလိၣ်အတၢ်လိ. 17 သ့းနီၢ်ထီၣ်တၢ်အံၤတကဲၢ်. ဘၠီၣ်တဂၤလၢ်လၢ်လိအတတူၤလိၤကစၢ်ယွၤအဘီအမုၢ်ဒ်ဖွိသၣ်တဂၤအသိးနဲၢ်, တလဲၤနုဘၣ်ဝဲလိ အပူၤနီတဘျီးဘၣ်.’ 18 ဘၠီၣ်ယူဒၤဖွိအခွိၣ်အနၢ်တဂၤသ့းကွၢ်ယ့ၣ်ရှူး, ‘သရၣ်လိအဂ့ၤတဂၤဧိ, ဒ်သိးယကဒိးန့ၢ်ဘၣ်တၢ်မူအထူအယိာ်အဂီၢ်နဲၢ်, ယကဘၣ်မၤဝဲဒ်လဲၣ်.’ 19 ယ့ၣ်ရှူးသ့းကွၢ်ဝဲ, ‘ဘၣ်မနီၢ်အဃိ နကိးယၤလိဘၠီၣ်အဂ့ၤလဲၣ်. ဘၠီၣ်အဂ့ၤတအိၣ်နီတဂၤဘၣ်, အိၣ်ထဲကစၢ်ယွၤတဂၤဧိၤလိ. 20 နသံညါတၢ်သိၣ်တၢ်သီတလိၣ်လိဧါ. တဘၣ်အဲၣ်ဘၢတၢ်တဂ့ၤ. တဘၣ်မၤသံတၢ်တဂ့ၤ. တဘၣ်ဟုၣ်တၢ်တဂ့ၤ. တဘၣ်ကတိၤပစွိပစါတၢ်တဂ့ၤ, ယူးယီၣ်ပၤကဲနမွိၢ်လါနပၢ်တကဲၢ်.’ 21 ဘၠီၣ်တဂၤနဲၢ်စံးဆၢဝဲ, ‘တၢ်အံၤဝီၤဒၣ်,ယတွိၢ်နီၣ်လါစူၤဝဲလိ. ယဖွိသၣ်ခွါလ့ၤလ့ၤလိ.’ 22 ယ့ၣ်ရှူးနၢ်ဟူတၢ်ကတိၤအဝဲအံၤနဲၢ်, အဝဲဒၣ်စံးဘၣ်အီၤ, ‘တၢ်လိအလိၢ်လါနၤအိၣ်ဒံးဝဲတမံၤလိ. ဆါကွံၤတၢ်လိ အအိၣ်လါနၤခဲလုၤ, ဘျီးဟ့နီၤလီၤဘၠီၣ်ဖှီၣ်ဘၠီၣ်ယၤတကဲၢ်. ဘျီးနကအိၣ်လါ တၢ်ထူးတၢ်တီၤလိမွိခွိၣ်လိ. တၢ်နံၤဝံၤအလီၢ်ခံဟဲဘျီး ကဲၢ်ထီၣ်ယခ့ယပှၤတကဲၢ်.’ 23 လၢၤ, ဖဲဘၠီၣ်တဂၤနဲၢ်နၢ်ဟူယ့ၣ်ရှူးအတၢ်ကတိၤတထ့ၣ်နဲၢ်ဘျီး, အဝဲဒၣ်အသးတမူနီၢ်တမူၤသ့း, မဲၢ်လိ အဝဲဒၣ်အတၢ်အိၣ်တၢ်ယၢၤနီအဃိနဲၢ်လိ. 24 ယ့ၣ်ရှူးထ့ၣ်ဘၣ်လိ အဝဲဒၣ်အသးတမူၤဘျီး စံးဝဲ, ‘ဘၠီၣ်အတၢ်အိၣ်တၢ်ယၢၤတလိၣ်ကလဲၤနုလီၤလိ ကစၢ်ယွၤအဘီအမုၢ်အပူၤအဂီၢ်နဲၢ် ကီၣ်ဝဲနီၢ်လဲၣ်. 25 ဘၠီၣ်တၢ်အိၣ်တၢ်ယၢၤတဂၤကလဲၤနုလီၤလိ ကစၢ်ယွၤအဘီအမုၢ်ပူၤနဲၢ်, ကီၣ်ဒွိၣ်နဲၢ်ဒံးကိၤလၤအူးတဒုၣ်ကဝၣ်ဟိထးအမဲၢ်ခံတကဲၢ်လိ.’ 26 ဘၠီၣ်ထီဖူၣ်ထီခၠၢလိ အနၢ်ဟူအဝဲအတၢ်ကတိၤတလိၣ်သ့းကွၢ်အီၤ, ‘မဲၢ်မဲၢ် ဒ့းန့ၤဘျီး မတဂၤကမၤန့ၢ် တၢ်အုၣ်က့ၤခီၣ်က့ၤ ကသ့းဝဲတဂၤလဲၣ်.’ 27 ယ့ၣ်ရှူးစံးဆၢဝဲ, ‘တၢ်လိပှၤကညီမၤတသ့းနဲၢ်, ကစၢ်ယွၤမၤဝဲသ့းလိ.’ 28 တုၤနုၤတဘျီ စီၤပ့းတရူးစံးဝဲ, ‘ကွၢ်တကဲၢ်, ပဝဲဝီၤတလိၣ်အံၤ ပပၤတီၢ်ပဟံၣ်ပဃီဒ်သိးပကကဲၣ်ထီၣ်နခ့နပှၤအဂီၢ်လိ.’ 29 ‘မဲၢ်လိ’ ယ့ၣ်ရှူးစံးဘၣ်အဝဲဝီၤ, ‘ယစံးဘၣ်သုအနီကီၢ်, ဘၠီၣ်တဂၤလၢ်လၢ်လိ အပၤတီၢ်အဟံၣ်အဃီ, မဲၢ်တမဲၢ် အမါ, မဲၢ်တမဲၢ် အထီပုၢ်ဝဲၢ်တလိၣ်, မဲၢ်တမဲၢ် အမွိၢ်အပၢ်တလိၣ်, မဲၢ်တမဲၢ်အဖွိအလ့ၤတလိၣ်လိယွၤအဘီအမုၢ်အပူၤနဲၢ်, 30 ကမၤန့ၢ်ဘၣ်တၢ်အၣ်နဲၢ်အလီၢ်အစးတလိၣ်အစးလိစိၤခဲနဲအံၤ, ဘျီးတၢ်မူအထူအယိၤလိစိၤလိ အကဟဲနဲၢ်လိ. 31 ယ့ၣ်ရှူးကိးနဲၢ်ထဲတၢ်မၢဖွိတဆ့ခံဂၤကစုၣ်ဒုၣ်ဘျီးစံးဘၣ်အဝဲဝီၤ, ‘ကနၣ်တကဲၢ်. ပကလဲၤပဝဲလိ ဝ့ၢ်ယရူၤရှလ့ၣ်ဖဲကယဲၢ်တၢ်တမံၤလၢ်လၢ်လိ ဝံတလိၣ်အတၢ်ကွ့းဝဲလိပှၤကညီဖွိခွါ အဂ့ၢ်နဲၢ်ကလိထီၣ်ပှဲၤထီၣ်ဝဲလိ. 32 အဝဲဒၣ်ကဘၣ်တၢ်ဟ့လီၤကွံၤအီၤလိ ဘၠီၣ်ကလုၢ်ဂၤတလိၣ်အစုၣ်ပူၤ, လိအကစံးပစွိပစါနံၤဘၣ်ဖၣ်လဲအီၤဘျီး ထွိးဝဲၣ်အီၤအဂီၢ်နဲၢ်လိ. 33 အဝဲဝီၤ ကတိၤအီၤ ဖျ့းအီၤ မၤသ့းအီၤ, လၢၤဘျီး ဖဲသၢသီတသီနဲၢ်, အဝဲဒၣ်ကဂ့ၤထ့ထီၣ်ဂ့ၤဝဲလိ.’ 34 လၢၤအခ့အပှၤတလိၣ်တနၢ်ပၢၢ်တၢ်ကတိၤတလိၣ်အံၤနီတဘီၣ်ဘၣ်. တၢ်ကတိၤတလိၣ်အခီပညီအိၣ်လီၤဘျၢၣ်အသးလိ အဝဲဝီၤအမံၤညါ, ဘျီး ယ့ၣ်ရှူးစံးကတိၤတၢ်ဘၣ်ဃးတၢ်မနီၢ်အဂ့ၢ်နဲၢ်, အဝဲဝီၤတသံညါဝဲဘၣ်. 35 ယ့ၣ်ရှူးဟဲဘူးထီၣ်လိ ဝ့ၢ်ယရံၤဃိ, ဘျီး ဘၠီၣ်မံၤဘျိၣ်တဂၤဆ့နီၤလိ ကျဲၣ်ကပၤဘျီး ဃ့အီၣ်တၢ်လိ. 36 ဖဲအဝဲနၢ်ဟူ ဘၠီၣ်ထီဖူၣ်ထီခၠၢတလိၣ်လဲၤခီဂၤတၢ်အသီၣ်နဲၢ်သ့းကွၢ်ဝဲ, ‘တၢ်သီၣ်အဝဲအံၤမဲၢ်တၢ်မနီၢ်လဲၣ်.’ 37 အဝဲဝီၤစံးဘၣ်ဝဲ, ‘ဘၠီၣ်နစၤရ့ဖွိယ့ၣ်ရှူးဟဲခီဂၤဖဲ အံၤလိ.’ 38 အဝဲဒၣ်ကိးထီၣ်ဝဲ, ‘စီၤဒၤဝံးအဖွိခွါယ့ၣ်ရှူးဧၢ သးဘၣ်ဃဲၤယၤတကဲၢ်.’ 39 ဘၠီၣ်အိၣ်လိ တၢ်မံၤညါတလိၣ်ဒူၣ်အလိၤ, ‘ဘျီးမၢအဝဲဒၣ်အိၣ်ကစုၣ်ဒုၣ်လိ. လၢၤဘျီး အဝဲဒၣ်ကိးကလူထီၣ်ဒွိၣ်နဲၢ်အလီၢ်. ‘စီၤဒၤဝံၤအဖိခွါဧိ, သးဘၣ်ဃဲၤယၤတကဲၢ်.’ 40 လိတၢ်နံၤအဃိ, ယ့ၣ်ရှူးအိၣ်ကတီၢ်ဘျီး မၢဘၠီၣ်ဟဲဆှၢဘၠီၣ်မံၤဘျိၣ်တဂၤနဲၢ်လိ အအိၣ်လိ. ဖဲအဝဲဒၣ်ဟဲဘူးထီၣ်နဲၢ်ယ့ၣ်ရှူးသ့းကွၢ်အီၤ, 41 ‘နအဲၣ်ဒိးလိ ယကမၤတၢ်မနီၢ်တမံၤလိ နဂီၢ်လဲၣ်.’ အဝဲစံး ‘ကစၢ်ဧိ, ယအဲၣ်ဒိးထ့ၣ်ထီၣ်ဂ့ၤတၢ်လိ.’ 42 တုၤနုၤတဘျီ ယ့ၣ်ရှူးစံးဘၣ်ဝဲ, ‘ထ့ၣ်ထီၣ်ဂ့ၤတၢ်တကဲၢ်. နတၢ်နၤမၤဘျါဂ့ၤလ့နၤလ့.’ 43 တဘျီဃီ ဖဲနံၤ အဝဲဒၣ်ထ့ၣ်ထီၣ်ဂ့ၤတၢ်, ဘျီး အဝဲဒၣ်ပိၤထီၣ်ယ့ၣ်ရှူးအခံ, အိၣ်လါတၢ်စံးဘျုးစံးဖှိၣ်ယွၤလိ. ဖဲဘၠီၣ်ထီဖူၣ်ထီခၠၢထ့ၣ်တၢ်အံၤဘျီး , စံးထီၣ်ပတြၢၤယွၤခဲလုၤလိ. |
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.