Luke 17 - Karen Paku1 ယ့ၣ်ရှူးစံးဘၣ် အခ့အပှၤတလိၣ်, ‘တၢ်တလိၣ်လိ အဒွိးလီၤနုပှၤကညီလိ တၢ်ဒဲးဘးအပူၤနဲၢ် ကမၤသးလိ. လၢၤဘျီးတဂၤလိ အဒွိးအိၣ်ထီၣ်တၢ်အဝဲအံၤတလိၣ်နဲၢ်, ဘၣ်တၢ်ဖှီၣ်ထဲလဲၣ်ခိလဲၣ်. 2 ဆၢၣ်ဂူာ်လၢၢ်မဲၢ်ဘၣ်တၢ်စၢၣ်ဃၤအီၤလိ အခဘိၣ်လိၤဘျီး တၢ်တ့လီၤအီၤလိ ပီၣ်လဲၣ်ပူၤနဲၢ်, ကဂ့ၤဒွိၣ်နဲၢ်ဒံးအဝဲဒၣ် ကဒွိးမၤဘၠီၣ်အဆံးတလိၣ်အံၤအကျၣ်တဂၤလိ တၢ်ဒဲးဘးနဲၢ်တကဲၢ်လိ. 3 လိတၢ်နံၤအဃိ ပလီၢ်သုသးတကဲၢ်, နထီပုၢ်ဝဲၢ်မဲၢ်မၤကမၣ်တၢ်နဲၢ်, သိၣ်ဃီၣ်အီၤ, ဘျီး အဝဲဒၣ် မဲၢ်ပီၢ်ယၢ်လီၤဂ့ၤအသးနဲၢ်, ပျၢ်အတၢ်ကမၣ်တကဲၢ်. 4 အဝဲဒၣ်မဲၢ်မၤကမၣ်နၤနွံဘျီလိ တနံၤအတီၢ်ပူၤ, ဘျီးတဘျီဘၣ်တဘျီဖဲ အဟဲလါ စံး ‘ယပီၢ်ယၢ်လီၤဂ့ၤယသးလ့’ နဲၢ် , နကဘၣ်ပျၢ်အတၢ်ကမၣ်လိ. 5 တၢ်မၢဖွိတလိၣ်စံးဘၣ်ကစၢ်, ‘မၤအၣ်ထီၣ်ပတၢ်စူၤတၢ်နၤတကဲၢ်,’ 6 ကစၢ်စံးဆၢဝဲ, ‘သုတၢ်နၤမဲၢ်အိၣ်ထဲသိးလါ သဘၣ်ချံတဖျၢၣ်နဲၢ် သုမဲၢ်စံးဘၣ်ဝံာ်တခွိၣ်အံၤ, ‘ထ့းထီၣ်ကွံၤနသးလိ နဂံၢ်တလိၣ်, ဘျီး သူၣ်လီၤနသးလိ ပီၣ်လဲၣ်အပူၤတကဲၢ်’ ဒ့းန့ၤဘျီး အဝဲဒၣ်ကနၤသုကလုၢ်လိ. 7 ပစံးအဒိ, လိသုဝဲအကျၣ်တဂၤအိၣ်လါတၢ်ခ့တၢ်ပှၤတဂၤလိ အထူစံၤ, မဲၢ်တမဲၢ် ကွၢ်သိနဲၢ်လိ. ဖဲအဝဲ ဟဲက့ၤလိ စံၤပူၤနဲၢ် မဲၢ်သုစံးဘၣ်အီၤ, ‘မၤကမ့းကမွိဘျီး အိၣ်တၢ်တကဲၢ်’နဲၢ်ဧါ. 8 တမဲၢ်နိၤဝဲဘၣ်, မဲၢ်မဲၢ် သုစံးဘၣ်အီၤ, ‘ကတဲၤကတီၤနဲၢ်ယတၢ်အီၤဝံၤဘျီးစကံၢ်ထီၣ်နယီၢ်ဒ့လိ တၢ်ကံးယၤဘျီး အိၣ်ခိကွၢ်ထွဲယတၢ်လိၢ်ဖဲယအီၣ်တၢ်အဆၢကတီၢ်နဲၢ်တကဲၢ်. တၢ်နံၤဝံၤအလီၢ်ခံနအီၣ်တၢ်သ့းဝဲလိ. 9 ‘အလီၢ်တအိၣ်လိ တၢ်ခ့တၢ်ပှၤတဂၤကဘၣ်စံးဘျုးစံးဖှိၣ်အီၤလိ အကနၣ်အကလုၢ်အဃိနဲၢ်ဘၣ်. 10 သုဝဲနဲၢ်နဲၢ် မဲၢ်ဒ့းန့ၤလိ. သုမၤလ့တၢ်လိဘၠီၣ်မၢသုခဲလုၤနဲၢ်, စံးသုဝဲ, ‘ပမဲၢ်ဒၣ်တၢ်ခ့တၢ်ပှၤတလိၣ်လိ. မဲၢ်ဒၣ်ပမၤပှဲၤပမူပဒါတလိၣ်လိ.’ 11 ဖဲယ့ၣ်ရှူးလဲၤဝဲလိ ဝ့ၢ်ယရူၤရှလ့ၣ်နဲၢ်, အဝဲဒၣ်လဲၤကျဲၣ်လိ အခီဂၤကီၢ်ရှၤမရံလါကီၢ်ကၤလံၤလါအကီၢ်ဆၢနဲၢ်လိ. 12 ဖဲအဝဲဒၣ်လဲၤနုလိသဝီတဖျၢၣ်အပူၤနဲၢ်, အဝဲဘၣ်ဟဲခိပကိးအီၤလိ ဘၠီၣ်လိၤတဂ့ၤအဂၤတဆ့လိ. အဝဲဝီၤအိၣ်ဆ့ထၢၢ်လိ အယံၤ. 13 ဘျီးကိးကလူထီၣ်ဘျီးစံးဘၣ်ဝဲ, ‘ယ့ၣ်ရှူးကစၢ်ဧိ သးဘၣ်ဃဲၤဘၠီၣ်တကဲၢ်.’ 14 ယ့ၣ်ရှူးထ့ၣ်အဝဲဝီၤဘျီး စံးဘၣ်ဝဲ, လဲၤဘျီးဒွိးနဲၣ်သုသးလိဘၠီၣ်လုၢ်တၢ်အခွိၣ်တလိၣ်တကဲၢ်.’ ဖဲအဝဲလဲၤလိ ကျဲၣ်နဲၢ်, ကဆှီထီၣ်ဂ့ၤဝဲလိ. 15 အဝဲဝီၤအကျၣ်တဂၤဖဲအထ့ၣ်ဘၣ်ဝဲလိ အဘၣ်တၢ်မၤဟါမၢ်အီၤလ့နဲၢ်ဟဲက့ၤခွိၣ်ခံဂ့ၤဘျီး စံးထီၣ်ပတြၢၤကစၢ်ယွၤလိ အကလုၢ်ဖးဒွိၣ်လိ. 16 အဝဲဒၣ် ထွိၣ်လီၤပှီၤအသးလိ ဟီၣ်ခွိၣ်လိၤလိ ယ့ၣ်ရှူးအခီၣ်ထံးဘျီးစံးဘျုးစံးဖှိၣ်အီၤလိ. ဘၠီၣ်တဂၤအံၤနဲၢ် မဲၢ်ဝဲဘၠီၣ်ရှၤမရံဖွိတဂၤလိ. 17 ယ့ၣ်ရှူးကတိၤတၢ်ဘျီးစံးဝဲ, ‘ဘၠီၣ်လိအဘၣ်တၢ်မၤကဆှီၣ်ထီၣ်ဂ့ၤအီၤအိၣ်အဂၤတဆ့လိ. အဂၤခွံဂၤလဲၤအိၣ်လိဘျီၣ်. 18 ဘၣ်မနီၢ်အဃိ ဘၠီၣ်ကလုၢ်ဂၤတဂၤအံၤ မဲၢ်ဝဲဘၠီၣ်ထဲတဂၤဧိၤလိအဟဲက့ၤဘျီး ဟ့ဂ့ၤတၢ်စံးဘျုးလိ ကစၢ်ယွၤနဲၢ်လဲၣ်.’ 19 ဘျီးယ့ၣ်ရှူးစံးဘၣ်ဝဲ, ‘ဂ့ၤထ့ဘျီး ဟါထီၣ်တကဲၢ်, နတၢ်စူၤတၢ်နၤဒွိးသါမါထီၤဂ့ၤနၤလ့.’ 20 ဘၠီၣ်ဖၤရံၤရှဲတနီၤသ့းကွၢ်ယ့ၣ်ရှူးလိ ကစၢ်ယွၤအဘီအမုၢ်ကဟဲဝဲဒၣ် ဖဲတၢ်ဆၢကတီၢ်ဖဲလဲၣ်အခါနဲၢ်လဲၣ်. အဝဲဒၣ် တစံးဆၢဝဲဘၣ်မဲၢ်လိ, ‘ကစၢ်ယွၤအဘီအမုၢ်တဟဲဝဲလိ ကျဲၣ်လိ ဘၠီၣ်ထ့ၣ်အီၤသ့းအပူၤနဲၢ်ဘၣ်. 21 ဘၠီၣ်တစံးဝဲ, ‘ကွၢ်တကဲၢ်, အိၣ်လိအံၤ, ’ မဲၢ်တမဲၢ် ‘အိၣ်လိနံၤ’ နဲၢ်နီတဂၤဘၣ်. တၢ်ဂ့ၢ်ဒ့းအ့ၤ, ’ယွၤအဘီအမုၢ်နဲၢ် အိၣ်ဝဲဒၣ်လိ သုသးကံၢ်ပူၤလိ.’ 22 တုၤနုတဘျီ အဝဲဒၣ်စံးဘၣ်အခ့အပှၤတလိၣ် ‘ဆၢကတီၢ်ကတုၤအိၣ်ဝဲလိ သုကဆၢ ထ့ၣ်ဘၣ်ပှၤကညီဖွိခွါအမုၢ်နံၤမုၢ်သီတလိၣ်အကျၣ်တနံၤ, လၢၤဘျီး သုကထ့ၣ်ဘၣ်သုဝဲဘၣ်. 23 ဘၠီၣ်ကအိၣ်ဝဲဒၣ်လိ အကစံးဘၣ်သု, ‘ကွၢ်ဃီၤလိနံၤ’ မဲၢ်တမဲၢ် ‘ကွၢ်ဃီၤလိအံၤ’ နဲၢ်လိ. လၢၤဘျီး သုတဘၣ်ဟးထီၣ်ကွၢ်ချုအီၤတဂ့ၤ. 24 ဒ်လီဝၢ်အဒံးလိမွိခွိၣ်လိၤတကပၤ မၤကပီၤထီၣ်မွိခွိၣ်ထီဘ့ၣ်ညါ တုၤလိ အကတၢၢ်တကပၤအသိးနဲၢ်, ပှၤကညီဖွိခွါ ကမဲၢ်တၢ်ဒ့းန့ၤအသိးဖဲအဝဲဒၣ်အမုၢ်နံၤတနံၤနဲၢ်လိ. 25 လၢၤဘျီး အဆိကတၢၢ်နဲၢ်, အဝဲကဘၣ်တူၢ်ဘၣ်တၢ်ဖးဒွိၣ်ဝံၤဘျီး ကဘၣ်တၢ်ညိကွံၤအီၤလိဘၠီၣ်တစိၤအံၤနဲၢ်လိ. 26 လိတၢ်မၤအသးဖဲစီၤနိအၤအဆၢကတီၢ်အသိးနဲၢ်, တၢ်ကမၤအသးဒ့းန့ၤအသိးဖဲပှၤကညီဖွိခွါအမုၢ်နံၤမုၢ်သီတလိၣ်နဲၢ်လိ. 27 ဘၠီၣ်အီၣ်တၢ်အိတၢ်, န့ၢ်မါန့ၢ်ဝၤတုၤလီၤမုၢ်တနံၤလိ စီၤနိအၤလဲၤနုလိ ကဘီပူၤ, ဘျီး ထံဒွိၣ်ထီၣ်ဘျီး ဘၠီၣ်အိၣ်လိခိတလိၣ်သ့းကွံၤဝဲဒၣ်ကိးဂၤဒ့းလိ. 28 တၢ်ကမၤအသးဒ်တၢ်မၤပၤစၢၤအသးဖဲစီၤလိာ်အဆၢကတီၢ်အသိးနဲၢ်လိ. ဘၠီၣ်အီၣ်တၢ်အိတၢ်, ပှ့ၤတၢ်ဘျီးဆါတၢ်, သူၣ်ထီၣ်တၢ်ဘျီးထီၣ်တၢ်ကွ့ၤကွ့ၤလိ. 29 ဖဲမုၢ်တနံၤလိ စီးလိာ်ဟးထီၣ်ကွံၤလိ ဝ့ၢ်စဒိၣ်နဲၢ်, တၢ်ဟဲစူၤလီၤလိမဲၣ်အူဘျီးကးလိမွိခွိၣ်, ဘျီး မၤသ့းကွံၤအဝဲဝီၤကိးဂၤဒ့းလိ. 30 တၢ်ကမၤအသးဒ့းန့ၤအသိးဖဲမုၢ်တနံၤလိ ပှၤကညီဖွိခွါဘၣ်တၢ်လီၢ်ဖျါထီၣ်အီၤနဲၢ်လိ. 31 ဖဲမုၢ်နံၤအဝဲနဲၢ်, ဘၠီၣ်တဂၤလိ အအိၣ်လိ အဟံၣ်ခွိၣ်အဖီခွိၣ်နဲၢ် တဘၣ်ဟဲက့ၤလီၤဘျီးက့ၤနုလိ အဟံၣ်ပူၤဒ်သိး အကဟံးန့ၢ်အတၢ်ဖွိတၢ်လ့ၤလိအအိၣ်ဖဲနံၤတလိၣ်ဘၣ်. ဒ့းန့ၤအသိးဘၠီၣ်တဂၤလိ အအိၣ်စံၤအပူၤနဲၢ်, တဘၣ်က့ၤခွိၣ်ခံဂ့ၤလိ အဟံၣ်ဘၣ်. 32 သ့းနီၣ်ထီၣ်ဂ့ၤ စီၤလိာ်အမါ နဲၢ်တကဲၢ်. 33 ဘၠီၣ်တဂၤလၢ်လၢ်လိ အဂုာ်ကျဲးစၢၤအုၣ်ခီၣ်ဂ့ၤအသးဒၣ်ဝဲနဲၢ်, ကဒွိးဟါမၢ်ကွံၤအီၤဘၠီၣ်တဂၤလၢ်လၢ်လိ အဒွိးလီၤမၢ်ကွံၤအသးနဲၢ် ကအုၣ်ခီၣ်ဂ့ၤအီၤလိ. 34 ဖဲမုၢ်တနံၤနဲၢ်, ယစံးဘၣ်သု ဘၠီၣ်ကအိၣ်ဝဲဒၣ်ခံဂၤလိ အမံလိလီၢ်မံတပူၤဃီ,ဘျီး တဂၤအဘၣ်တၢ်စိၤကွံၤအီၤ, တဂၤကဘၣ်တၢ်ပၤထီၢ်အီၤလိ. 35 ဘၠီၣ်မ့ၣ်ပှၢ်ခံဂၤကဂံၢ်ဘုၣ်ဒ်သိးသိး, ဘျီးတဂၤကဘၣ်တၢ်စိၤကွံၤအီၤ, အဂၤတဂၤကဘၣ်တၢ်ပၤတီၢ်အီၤလိ. 36 ဘၠီၣ်ပွိၤခွါခံဂၤကအိၣ်လိစံၤပူၤတဂၤအဘၣ်တၢ်ဟံးထီၣ်ကွံၤအီၤ, ဘျီးတဂၤကဘၣ်တၢ်ပၤတီၢ်အီၤလိ. 37 အခ့အပှၤတလိၣ်သ့းကွၢ်ဝဲ, ‘ဖဲလဲၣ်ပူၤလဲၣ်, ကစၢ်ဧိ.’ ယ့ၣ်ရှူးစံးဆၢဝဲ, ‘ဖဲတၢ်သ့းစွိၣ်အိၣ်ဝဲအလီၢ်နဲၢ်, ထွိၣ်လီၤတာ်တလိၣ်ကအိၣ်ပၤဖှိၣ်ထီၣ်အသးလိ. |
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.