လံာ်စဖါနယၤ 1 - Sgaw Karen Common Bible

¹ အအံၤမ့ၢ်တၢ်ကစီၣ်လၢယွၤဟ့ၣ်လီၤတ့ၢ်စီၤစဖါနယၤဖဲစီၤအၤမိၣ် အဖိခွါ, ကီၢ်ယူဒၤအစီၤပၤစီၤပၤယိၤၡံယၤပၢတၢ်အကတီၢ်န့ၣ်လီၤ. (စီၤစဖါနယၤမ့ၢ်ပှၤလီၤစၢၤလၢစီၤပၤဃံးစကံယၤ, စီၤအမၤရယၤ, စီၤကဒါလယၤဒီးစီၤကူၤၡံန့ၣ်လီၤ.)

ယွၤအတၢ်စံၣ်ညီၣ်အမုၢ်တနံၤ

² ယွၤစံးဝဲဒၣ်, “ယကမၤဟးဂီၤကွံာ်ကယဲၢ်တၢ်အိၣ်လၢဟီၣ်ခိၣ်ချၢ,

³ ကယဲၢ်ပှၤကညီဒီးဆၣ်ဖိကီၢ်ဖိ, ထိၣ်ဧိၤလံာ်ဧိၤဒီးဒ့ၣ်ဧိၤညၣ်ဧိၤ ခဲလၢာ်န့ၣ်လီၤ. ယကမၤတၢ်လၢပှၤအၢပှၤသီအခီၣ်ကဘၣ်တိၢ်ဒီးလီၤဃံၤအဂီၢ်လီၤ. ယကမၤဟးဂီၤကွံာ်ပှၤဟီၣ်ခိၣ်ဖိခဲလၢာ်ဒီးပှၤအမူတအိၣ်တ့ၢ်ဘၣ် နီတဂၤဘၣ်. ယၤ, ယွၤကတိၤလံတၢ်လံ.”

⁴ ယကစံၣ်ညီၣ်ဝ့ၢ်ယရူၤၡလ့ၣ်အပှၤဂီၢ်မုၢ်ဒီးကယဲၢ်ပှၤအိၣ်လၢကီၢ် ယူဒၤအပူၤခဲလၢာ်န့ၣ်လီၤ. ယကမၤဟးဂီၤကွံာ်ပှၤဘူၣ်ထီၣ်ဘါထီၣ် ဘဧၤလးဖဲန့ၣ်, တုၤလၢပှၤအိၣ်လီၤတဲာ်တ့ၢ်လၢခံကတၢၢ်တဂၤတစုလီၤ. ဒီးပှၤကသ့ၣ်နီၣ်ပှၤဘါတၢ်ဂီၤတၢ်ဖီၣ်အပှၤလုၢ်တၢ်အခိၣ်တဖၣ်လၢ အမၤဘဧၤလးအတၢ်တအိၣ်လၢၤဘၣ်နီတဂၤဒၣ်လဲာ်ဘၣ်.

⁵ ယကမၤဟးဂီၤကွံာ်ကယဲၢ်ပှၤတဂၤလၢ်လၢ်လၢအလဲၤ ထီၣ်ဆူဟံၣ်ခိၣ်ဒီးဘူၣ်ထီၣ်ဘါထီၣ်မုၢ်, လါဒီးဆၣ်တဖၣ်န့ၣ်လီၤ. ယကမၤဟးဂီၤကွံာ်စ့ၢ်ကီးပှၤလၢအဘူၣ်ထီၣ်ဘါထီၣ်ယၤဒီးပှၤ တဖၣ်လၢအအၢၣ်လီၤအီလီၤအသးလၢကတီဒီးယၤဘၣ်ဆၣ်ဒီး မၤတၢ်ဆိၣ်လီၤအသးတဖၣ်လၢကစၢ်မိလးအမံၤအပူၤန့ၣ်လီၤ.

⁶ ပှၤတဖၣ်လၢအဃၣ်ကဒါက့ၤအသးဆူအလီၢ်ခံဒီးတပိာ် လၢၤဘၣ်ယခံ, ပှၤတဖၣ်လၢအတဟဲဘၣ်ဆူယအိၣ်မ့ၢ်ဂ့ၤ, တသံကွၢ်ဘၣ်ယၤလၢယကပၢဆှၢအီၤမ့ၢ်ဂ့ၤန့ၣ် ယကမၤဟးဂီၤအီၤလီၤ.”

⁷ မုၢ်နံၤလၢယွၤကဆ့ၣ်နီၤလၢတၢ်စံၣ်ညီၣ်အလီၢ်န့ၣ်ဘူးထီၣ်လံ. မၤသးဒ်န့ၣ်ဒီးအိၣ်ဘှီၣ်ကလာ်လၢအမဲာ်ညါန့ၣ်တက့ၢ်. ယွၤကတဲာ်ကတီၤလံတၢ်လုၢ်ထီၣ်ပာ်ထီၣ်အပှၤဂီၢ်မုၢ်ဒီးကွဲ ဃီၤဒုၣ်ဒါတဖၣ်လၢကဂုာ်ဆူၣ်ပျီဆူၣ်ဒီးမၤဟးဂီၤကီၢ်ယူဒၤန့ၣ်လီၤ.

⁸ ယွၤစံးဝဲဒၣ်, “လၢတၢ်မၤသံမၤဝီတၢ်အမုၢ်နံၤဝဲန့ၣ်, ယကစံၣ်ညီၣ်အပဒိၣ်ပပှၢ်တဖၣ်, စီၤပၤအဖိခွါတဖၣ်ဒီးကယဲၢ်ပှၤလၢအလူၤထွဲမၤထွဲပှၤတခီဘီမုၢ်ဖိ အလုၢ်အလၢ်တဖၣ်န့ၣ်လီၤ.

⁹ ယကစံၣ်ညီၣ်ကယဲၢ်ပှၤလၢအဘူၣ်ထီၣ်ဘါထီၣ် တၢ်ဒ်ပှၤဘါတၢ်ဂီၤတၢ်ဖီၣ်တဖၣ်အသိး, ဒီးပှၤလၢအဟုၣ်တၢ်ဒီးမၤသံတၢ်ဒ်သိးအကမၤပှဲၤအကစၢ်အဟံၣ်လၢ အတၢ်ဂုာ်န့ၢ်တဖၣ်န့ၣ်လီၤ.”

¹⁰ ဒီးယွၤစံးဝဲဒၣ်, “လၢမုၢ်နံၤအဝဲန့ၣ်တၢ်ကမၤအသးလၢတၢ်ကိးပသူထီၣ်ကသီၣ်ထီၣ် ဝဲလၢဝ့ၢ်ယရူၤၡလ့ၣ်အတြဲၤညၣ်န့ၣ်လီၤ. ဒီးသုကနၢ်ဟူတၢ်ဟီၣ်တၢ်ယၢၤလၢတၢ်လီၢ်အသီတတီၤလၢဝ့ၢ်အပူၤ ဒီးတၢ်လီၤပှီၢ်အသီၣ်ဖးဒိၣ်တမံၤလၢတၢ်လူၢ်ခိၣ်တဖၣ်အဒီခိၣ်န့ၣ်လီၤ.

¹¹ ပှၤအိၣ်ဝဲဆိးဝဲလၢဝ့ၢ်အလာ်ခီသ့ၣ်ဧၢ, တုၤသုနၢ်ဟူတၢ်အံၤဒီးကိးပသူထီၣ်တက့ၢ်. အဂ့ၢ်ဒ်အံၤ, ကယဲၢ်ပှၤကၤတၢ်ဖိခဲလၢာ်ကသံဝဲလီၤ.

¹² အကတီၢ်ဖဲန့ၣ်ယကစိာ်မ့ၣ်အူဒၢတဖျၢၣ်ဒီးကဃုတၢ်လၢဝ့ၢ် ယရူၤၡလ့ၣ်အပူၤလီၤ. ယကစံၣ်ညီၣ်ပှၤလၢအသးမံလီၤဒၣ်အသးဒီးနာ်န့ၢ်လီၤအသးလၢ အစံးလီၤအသးလၢ ‘တၢ်အဂ့ၤမ့ၢ်ဂ့ၤ, တၢ်အအၢမ့ၢ်ဂ့ၤယွၤတမၤဘၣ်ပှၤဘၣ်’ သ့ၣ်တဖၣ်န့ၣ်လီၤ.

¹³ အတၢ်ဖိတၢ်လံၤဒီးအဟံၣ်အဃီသ့ၣ်တဖၣ်ကဘၣ်တၢ်ဂုာ်ဆူၣ်ပျီဆူၣ် ဒီးမၤဟးဂီၤကွံာ်အီၤန့ၣ်လီၤ. အဝဲသ့ၣ်တအိၣ်ဘၣ်လၢၤလၢဟံၣ်လၢအသူၣ်ထီၣ်ဝဲမ့ၢ်ဂ့ၤ, တအီဘၣ် လၢၤစပံးထံလၢစပံးမုၢ်လၢအသူၣ်လီၤဝဲသ့ၣ်တဖၣ်မ့ၢ်ဂ့ၤနီတဘျီဘၣ်.”

¹⁴ ယွၤအမုၢ်နံၤဖးဒိၣ်အံၤဘူးထီၣ်လံ. ဘူးထီၣ်ဝဲဖးဒိၣ်လံဒီးဟဲဝဲ ချ့ချ့လီၤ. မုၢ်နံၤအဝဲန့ၣ်ကမ့ၢ်မုၢ်နံၤအခၣ်တနံၤန့ၣ်လီၤ. အဂ့ၢ်ဒ်အံၤ, ပှၤသုးဖိလၢအဒူကတၢၢ်တဖၣ်ဒၣ်လဲာ်ကကိးပသူ ထီၣ်လၢတၢ်သူၣ်ဟးဂူာ်သးဟးဂီၤအပူၤန့ၣ်လီၤ.

¹⁵ မုၢ်တနံၤန့ၣ်ကမ့ၢ်တၢ်သူၣ်ဒိၣ်သးဖျိးအမုၢ်တနံၤ, တၢ်သူၣ်ကိၢ်သးဂီၤဒီးတၢ်ကီတၢ်ခဲအမုၢ်တနံၤ, တၢ်ဟးဂူာ်ဟးဂီၤဒီးတၢ်လီၤပှီၢ်အမုၢ်တနံၤ, တၢ်ခံးတၢ်နၤဒီးတၢ်သးဟးဂီၤအမုၢ်တနံၤ, တၢ်အၢၣ်ဒီးတၢ်ခံးသူအမုၢ်တနံၤ,

¹⁶ မုၢ်တနံၤလၢအပှဲၤဒီးတၢ်ဒုးတၢ်ယၤအကွဲၤတဖၣ်အသီၣ်ဒီးတၢ်ဒုး တၢ်ယၤအတၢ်ကိးပသူလၢပှၤသုးဖိတဖၣ်ဖဲအလဲၤထီၣ်ဒုးဝ့ၢ်အိၣ်ဒီး အခိၣ်ဒူဒီးအတၢးထီၣ်ထီတဖၣ်န့ၣ်လီၤ.

¹⁷ ယွၤစံးဝဲဒၣ်, “ယကဟဲစိာ်တၢ်ဟးဂူာ်ဟးဂီၤဒ်သိးအံၤတဖၣ်ဆူ ပှၤဟီၣ်ခိၣ်ဖိခဲလၢာ်အလိၤဒ်သိးပှၤကိးဂၤဒဲး ကဃုပုာ်ကလၢၢ်တၢ်ဒ်ပှၤမဲာ်ဘျီၣ်တဂၤအသိးန့ၣ်လီၤ. အဝဲသ့ၣ်မၤတ့ၢ်တၢ်ဒဲးဘးထီဒါယၤ, ဒီးခဲကနံၣ်အံၤအသွံၣ်ကဘၣ် တၢ်လူလီၤအီၤဒ်ထံအသိး, ဒီးအစိၣ်တဖၣ်အိၣ်မံလီၤလၢ ဟီၣ်ခိၣ်လိၤအုၣ်သံကျၣ်သံဝဲဒၣ်န့ၣ်လီၤ.”

¹⁸ လၢယွၤပာ်ဖျါအသးကဲၤထီၣ်အမုၢ်တနံၤန့ၣ်, ကယဲၢ်အဝဲသ့ၣ်အထူမ့ၢ်ဂ့ၤ, အစ့မ့ၢ်ဂ့ၤခဲလၢာ်ဒၣ်လဲာ် မၤပူၤဖျဲးအီၤတသ့ဘၣ်. ယွၤအတၢ်သးထီၣ်အမ့ၣ်အူကမၤဟးဂီၤကွံာ်ဟီၣ်ခိၣ်ဒီဘ့ၣ်ညါန့ၣ်လီၤ. အဝဲကမၤကတၢၢ်ကွံာ်ကယဲၢ်ပှၤအိၣ်မူလၢဟီၣ်ခိၣ်ချၢခဲလၢာ်လၢတၢ် မၤကတၢၢ်သတူၢ်ကလာ်အပူၤန့ၣ်လီၤ.