လံာ်တၢ်သးဝံၣ်တဖၣ်အတၢ်သးဝံၣ် 8 - Sgaw Karen Common Bible

¹ ယဆၢမုၢ်လၢ်လၢနကမ့ၢ်ယဒီပုၢ်ဝဲၢ်ခွါ, လၢယမိၢ်ဒုးအီတ့ၢ်အီၤအနုၢ်န့ၣ်လီၤ. တုၤနုၤတစု, ယမ့ၢ်ဘၣ်သဂၢၢ်နၤလၢကျဲခိၣ်ဒီး, ယနၢမူနၤကသ့, ဒီးတမ့ၢ်ပှၤကတဲယၤနီတဂၤဘၣ်.

² ယကဆှၢနၤဆူယမိၢ်အဟံၣ်ပူၤ, တၢ်လီၢ်ဖဲနကသိၣ်လိယၤလၢတၢ်အဲၣ်န့ၣ်လီၤ. ယကဟ့ၣ်နၤထံခၣ်လၢအဃါဃုာ်ဒီးတၢ်နၢမူအစီ, ယသလဲသၣ်အစပံးထံလၢနကအိအီၤအဂီၢ်လီၤ.

³ နစုစ့ၣ်ဖီၣ်ဃးယကိာ်, ဒီးနစုထွဲန့ၣ်မၤမုာ်ယၤလီၤ.

⁴ ဝ့ၢ်ယရူၤၡလ့ၣ်အဖိမုၣ်သ့ၣ်ဧၢ, အၢၣ်လီၤယၤလၢသုတမၤတံာ်တာ်ဘၣ် ပတၢ်အဲၣ်လိာ်ပသးဘၣ်န့ၣ်တက့ၢ်.

တၢ်သးဝံၣ်ဃုယုၢ်တယုၢ် ပိာ်မုၣ်တဖၣ်

⁵ ပှၤလၢအဟဲလၢပှၢ်လၢ်ကျါဒီးဟံးဃာ်လိာ်အစုဒီးအတၢ်အဲၣ်န့ၣ် မ့ၢ်မတၤတဂၤလဲၣ်. ယထိၣ်ဂဲၤထၢၣ်နၤလၢသ့ၣ်ဖီသၣ်အဖီလာ်, တၢ်လီၢ်လၢနအိၣ်ဖျဲၣ်တ့ၢ်န့ၣ်လီၤ.

ပိာ်မုၣ်

⁶ အိးထီၣ်နသးလၢနကအဲၣ်ယၤထဲတဂၤဧိၤ, ဒီးဖိးဟုယၤထဲတဂၤဧိၤတက့ၢ်. တၢ်အဲၣ်န့ၣ်ဆူၣ်ထဲသိးဒီးတၢ်သံ, တၢ်အဲၣ်တၢ်ကွံအဂံၢ်အဘါဆူၣ်ဒ်တၢ်သံအနီၢ်ကစၢ်န့ၣ်လီၤ. ကပျီၤထီၣ်ဝဲဒ်မ့ၣ်အူလၣ်ဒီးအီၣ်တၢ်ဒ်မ့ၣ်အူလၢအသလၣ်လီၤအသး တပျုာ်တပျီၤအသိးန့ၣ်လီၤ.

⁷ ထံမၤလီၤပံာ်အီၤတသ့ဘၣ်, ထံလုၣ်ဘၢတၢ်မၤလီၤဘျၢအီၤတသ့ ဘၣ်. ဘၣ်ဆၣ်ပှၤတဂၤဂၤမ့ၢ်ကျဲးစၢးပှ့ၤန့ၢ်တၢ်အဲၣ်လၢအတၢ်ထူးတၢ် တီၤဒီး, တၢ်လၢအဝဲကမၤန့ၢ်မ့ၢ်, တၢ်သးဟ့, တၢ်သးဘၣ်အၢလီၤ.

ပိာ်မုၣ်အဒီပုၢ်ဝဲၢ်ခွါတဖၣ်

⁸ ပအိၣ်ဒီးပဒီပုၢ်ဝဲၢ်မုၣ်သးစၢ်တဂၤ, ဒီးအနုၢ်တဖၣ်ဆံးဒံးဝဲန့ၣ်လီၤ. ဖဲပိာ်ခွါသးစၢ်တဂၤဟဲဃ့အဲၣ်အီၤန့ၣ်, ပမၤတၢ်လၢအဂီၢ်ကသ့ဒ်လဲၣ်.

⁹ အဝဲမ့မ့ၢ်တၢ်ဒူၣ်တခါဒီး, ပကဘှီထီၣ်န့ၢ်အီၤတၢးခၢၣ်သနၢၣ်စ့တဖျၢၣ်န့ၣ်လီၤ. ဘၣ်ဆၣ်အဝဲမ့မ့ၢ်ကျဲစၢၤတပူၤဒီး, ပကဒီဒၣ်အိၣ်ပှိၤအီၤလၢသ့ၣ်ဆှိးအ့ရ့းအသ့ၣ်ဘၣ်တဖၣ်လီၤ.

ပိာ်မုၣ်

¹⁰ ယဲဒၣ်အံၤယမ့ၢ်တၢ်ဒူၣ်တခါ, ဒီးယနုၢ်တဖၣ်မ့ၢ်အတၢးအခၢၣ်သနၢၣ်တဖၣ်န့ၣ်လီၤ. ပှၤလၢယအဲၣ်အီၤတဂၤသ့ၣ်ညါဝဲလၢ, ယထံၣ်န့ၢ်တၢ်သးမံဒီးတၢ်ဃူတၢ်ဖိးဒီးအီၤလီၤ.

ပိာ်ခွါ

¹¹ စီၤပၤၡလိၤမိၤအိၣ်ဒီးအစပံးလီၢ်တလီၢ်, ဖဲတၢ်လီၢ်တတီၤလၢအဘၣ်တၢ်ကိးအီၤလၢ ဘဧၤလဟမိၣ်လီၤ. အဝဲဒိးလဲလီၤဝဲဆူပှၤထူစံာ်ဖိတဖၣ်အအိၣ်, ဒီးပှၤတဂၤစုာ်စုာ်န့ၣ်ဟ့ၣ်အီၤစ့အဘ့ၣ်တကထိန့ၣ်လီၤ.

¹² စီၤပၤၡလိၤမိၤဒိးန့ၢ်ဘၣ်အစ့အဘ့ၣ်တကထိ, ဒီးပှၤထူစံာ်ဖိတဖၣ်မၤန့ၢ်ဝဲခံကယၤစုာ်စုာ်ဒ် အတၢ်နီၤဟ့ၣ်အသိးလီၤ. မ့မ့ၢ်ယဲယအိၣ်ဒီးယကစၢ်ဒၣ်ယဲအစပံးလီၢ် တလီၢ်န့ၣ်လီၤ.

¹³ ယတၢ်အဲၣ်ဧၢ, ပျဲယနၢ်ဟူနကလုၢ်လၢတၤသၣ်လီၢ်တက့ၢ်. ယတံၤသကိးတဖၣ်အိၣ်ခိးဝဲဒ်သိးကနၢ်ဟူနကတိၤတၢ်လီၤ.

ပိာ်မုၣ်

¹⁴ ယတၢ်အဲၣ်ဧၢ, ဟဲဆူယအိၣ်ဒ်တၤဟိစဘံတဒု, ဒ်တၤဟိဖါဖိတဒုအသိး, ဖဲကစၢၢ်တဖၣ်လၢသ့ၣ်နၢမူ အထူၣ်တဖၣ်မဲထီၣ်ဝဲအလိၤန့ၣ်တက့ၢ်.