လံာ်တၢ်သးဝံၣ်တဖၣ်အတၢ်သးဝံၣ် 7 - Sgaw Karen Common Bible

ပိာ်ခွါ

¹ နမ့ၢ်ပိာ်မုၣ်ဖိလၢအလီၤလးတဂၤဒိၣ်မးလဲၣ် နခီၣ်လၣ်တဖၣ်လၢခီၣ်ဖံးအပူၤန့ၣ်ဃံလၤဝဲဆံးဒိၣ်လဲၣ် နကံၣ်ဒုၣ်အက့ၣ်ကွီၤတဖၣ်ဖျၢၣ်ဝဲ လီၤဂာ်ဒ်ပှၤစုသ့ တဂၤအတၢ်မၤလၢမၤဝဲအသိးလီၤ.

² နဒ့မၤအသးဒ်လီခီတဖျၢၣ်, လၢစပံးထံနၢမူတဖၣ်တလီၤသံးနီတဘျီ အသိးန့ၣ်လီၤ. နဟၢဖၢမၤအသးဒ်ဘုကၠူၣ်တကဒိၣ်, လၢဖီဒ့ၣ်ညါတဖၣ်ကဝီၤဃာ်အီၤအသိးန့ၣ်လီၤ.

³ နနုၢ်ခံတိၣ်လီၤဂာ်ဒ်တၤဟိစဘံသဃံာ်ခံဒုအသိးန့ၣ်လီၤ.

⁴ နကိာ်လီၤဂာ်ဒ်ကဆီမဲအတၢးထီခၢၣ်သနၢၣ်တဖျၢၣ် အသိး, နမဲာ်ချံတဖၣ်လီၤဂာ်ဒ်နိၣ်တဖၣ်လၢကီၢ်ဃ့ၡဘိၣ် အဝ့ၢ်ပူၤ, အိၣ်ဘူးဒီးဝ့ၢ်ဖးဒိၣ်န့ၣ်အတြဲၤလီၤ. နနါစ့ၤလီၤအဲၣ်လီၤကွံဒ်လဘၤနိၣ်အတၢးထီခၢၣ်သနၢၣ် လၢအဆၢထၢၣ်ဒီသဒၢဝ့ၢ်ဒၤမ့းစ့းအသိးန့ၣ်လီၤ.

⁵ နခိၣ်အိၣ်ထီၣ်ထီဒ်ကစၢၢ်ကၢ်မ့ၤလးအသိးန့ၣ်လီၤ. နခိၣ်သူသံၣ်အသး, ကပီၤဒ်သတိၢ်အဂ့ၤကတၢၢ်အသိး, အတၢ်ဃံတၢ်လၤဖီၣ်န့ၢ်စီၤပၤအသးသ့ဝဲန့ၣ်လီၤ.

⁶ နလီၤအဲၣ်လီၤကွံနးလဲၣ်, နဃံနလၤဒိၣ်မးလဲၣ် နတၢ်အဲၣ်လၢအမၤမုာ်လၤသးခုတၢ်န့ၣ်လၢပှဲၤဝဲဒၣ် ဒိၣ်မးလဲၣ်.

⁷ နမ့ၢ်တၢ်လၢအမဲာ်မုာ်ဘၣ်သးပှၤ, လီၤဂာ်ဒ်လိၣ်အထူၣ်တထူၣ်အသိး, ဒီးနနုၢ်လီၤဂာ်ဒ်သ့ၣ်စူၣ်ပလူၣ်သၣ်အချံၣ်တဖၣ်အသိးန့ၣ်လီၤ.

⁸ ယကထီၣ်လိၣ်အထူၣ်န့ၣ်, ဒီးဒဲးန့ၢ်အသၣ်လီၤ. နနုၢ်ခံတိၣ်မၤအသးဒ်စပံးသၣ်အချံၣ်တဖၣ်လၢယဂီၢ်, နတၢ်သါထီၣ်သါလီၤနၢမူဒ်ဖီသၣ်တဖၣ်အသိး,

⁹ ဒီးနကိာ်ပူၤလီၤဂာ်ဒ်စပံးထံအဂ့ၤကတၢၢ်အသိးန့ၣ်လီၤ. မ်စပံးထံယွၤလီၤန့ၢ်ယတၢ်အဲၣ်, ယွၤလီၤလၢအနိးဖံးဒီးအမဲအလိၤန့ၣ်တက့ၢ်.

ပိာ်မုၣ်

¹⁰ ယဘၣ်ဃးဒီးပှၤလၢယအဲၣ်တဂၤ, ဒီးအဝဲအဲၣ်ယၤန့ၣ်လီၤ.

¹¹ ဟဲ, ယတၢ်အဲၣ်သးဘိဧၢ, မ်ပကလဲၤသကိးဆူခိခိၣ်, ဒီးမၤလၢာ်ကွံာ်မုၢ်နၤဖဲသဝီတဖၣ်အပူၤတက့ၢ်.

¹² ပကဂဲၤဆၢထၢၣ်ဂီၤဂီၤဒီးကွၢ်စပံးမုၢ်တဖၣ်, ဒီးထံၣ်မ့ၢ်အဒိၣ်ထီၣ်လံဧါ, မ့ၢ်အဝဲသ့ၣ်ဘိၣ်ထီၣ်ဖးထီၣ်လံဧါ, ဒီးသ့ၣ်သလဲသၣ်ဖျိထီၣ်လံဧါန့ၣ်တက့ၢ်. ဖဲန့ၣ်ယကဟ့ၣ်နၤယတၢ်အဲၣ်န့ၣ်လီၤ.

¹³ နကနၢဘၣ်ဒူးဒးသၣ်အစိ, ဒီးတၤသၣ်လၢအဂ့ၤခဲလၢာ်န့ၣ်အိၣ်ဘူးဒီးပပဲတြီလီၤ. ယတၢ်အဲၣ်သးဘိဧၢ, ယပာ်ဃာ်န့ၢ်နၤ, တၤသၣ်အသီမ့ၢ်ဂ့ၤ, အလီၢ်လံၤမ့ၢ်ဂ့ၤလၢအဝံၣ်အဘဲတဖၣ်န့ၣ်လီၤ.