လံာ်တၢ်သးဝံၣ်တဖၣ်အတၢ်သးဝံၣ် 6 - Sgaw Karen Common Bible

ပိာ်မုၣ်တဖၣ်

¹ ပှၤအဃံလၤကတၢၢ်လၢပိာ်မုၣ်တဖၣ်အကျါတဂၤဧၢ, ပှၤလၢနအဲၣ်အီၤတဂၤလဲၤဖဲလဲၣ်. တဲပှၤလၢအဝဲလဲၤကျဲဖဲလဲၣ်တဘိလဲၣ်, ဒ်သိးပကဃုထံၣ်စၢၤနၤကသ့အဂီၢ်တက့ၢ်.

ပိာ်မုၣ်

² ပှၤလၢယအဲၣ်အီၤတဂၤလဲၤဆူအတၤသၣ်လီၢ်, ဖဲကသံၣ်ဖှူအသ့ၣ်တဖၣ်မဲထီၣ်ဝဲန့ၣ်လီၤ. အဝဲဒုးအီၣ်အဆၣ်ဖိကီၢ်ဖိတဖုအဆၣ်လၢတၤသၣ်လီၢ်ပူၤ, ဒီးထၢဖှိၣ်ဖီဒ့ၣ်ညါတဖၣ်လီၤ.

³ ပှၤလၢယအဲၣ်မ့ၢ်ယတၢ်ဒီးယမ့ၢ်အတၢ် အဝဲဒုးအီၣ်အဆၣ်ဖိကီၢ်ဖိတဖၣ်အဆၣ်လၢဖီဒ့ၣ်ညါတဖၣ်အကျါန့ၣ် လီၤ.

တၢ်သးဝံၣ်ယဲၢ်ယုၢ်တယုၢ် ပိာ်ခွါ

⁴ ယတၢ်အဲၣ်ဧၢ, နဃံနလၤဒ်သိးဝ့ၢ်ယရူၤၡလ့ၣ်, ဒီးနလီၤအဲၣ်လီၤကွံဒ်ဝ့ၢ်တံးရစၣ်အသိး, ဒီးနဒုးလီၤကတုၤယသးဒ်ဝ့ၢ်ဖးဒိၣ်တဖၣ်အံၤအသိးန့ၣ်လီၤ.

⁵ ဃၣ်ကွံာ်နမဲာ်ချံတဖၣ်လၢယအိၣ်တက့ၢ်, မ့ၢ်လၢအဝဲသ့ၣ်ဖီၣ်ဃးယၤဒ်ပှၤဘၣ်တၢ်စၢဃာ်အသိးအဃိလီၤ. နခိၣ်သူဒံဝ့ၤဝီၤမၤအသးဒ်မဲာ်တဲးလဲးတဖု လၢအဟဲဃ့ၢ်စံၣ်လီၤလၢကီၢ်ကံးလဧးအတၢ်လူၢ်တဖၣ်အလိၤအသိးန့ၣ် လီၤ.

⁶ နမဲတဖၣ်ဝါဝဲဒ်သိတဖု, လၢတၢ်သ့စီကွံာ်အီၤဝံၤသီသီအသိးန့ၣ်လီၤ. အဝဲသ့ၣ်တဟါမၢ်ဘၣ်နီတဘ့ၣ်ဘၣ်. ဒီးဃူလိာ်အသးကိးဘ့ၣ်ဒဲးန့ၣ်လီၤ.

⁷ နဘိးပၤတဖၣ်ဆဲးကပြုၢ်ထီၣ်လၢနနီၣ်ကျၢၢ်ဘၢမဲာ် အဖီလာ်လီၤ.

⁸ မ်စီၤပၤအိၣ်ဒီးအနီၢ်ပၤမုၣ်အဂၤဃုဆံ, အသံၣ်မါဃိးဆံ, ဒီးမုၣ်လိၤဘိလၢပဂံၢ်တသ့ဘၣ်န့ၣ်တက့ၢ်.

⁹ မ့မ့ၢ်ယအဲၣ်ပှၤထဲနၤဧိၤ, ဒီးအဝဲဒၣ်လီၤအဲၣ်လီၤကွံဒ် ထိၣ်လွံၢ်တဘ့ၣ်အသိးလီၤ. အဝဲမ့ၢ်အမိၢ်အဖိမုၣ်ထဲတဂၤဧိၤ, လၢအမိၢ်အဲၣ်အီၤဒိၣ်ကတၢၢ်န့ၣ်လီၤ. ပှၤပိာ်မုၣ်ခဲလၢာ်ကွၢ်အီၤဒီးစံးထီၣ်ပတြၢၤအီၤ, နီၢ်ပၤမုၣ်တဖၣ်ဒီးသံၣ်မါတဖၣ်သးဝံၣ်စံးထီၣ်ပတြၢၤအီၤလီၤ.

¹⁰ ပှၤလၢအကွၢ်တကျ့တၢ်လီၤဂာ်ဒ်မုၢ်ဆ့ၣ်ထီၣ်သီအသိးတဂၤမ့ၢ်မတၤ လဲၣ်. အဝဲဃံလၤဒီးကပြုၢ်ကပြီၤ, ဆှုၣ်မဲာ်ဆှုၣ်နါဒ်မုၢ်မ့တမ့ၢ်လါအသိးန့ၣ်လီၤ. လီၤပျံၤဝဲဒ်သုးမုၢ်တဖုလၢအအိၣ်ဒီးနီၣ်တယၢ်တဖၣ်အသိးန့ၣ် လီၤ.

¹¹ ယဟဲလီၤလၢတၤသၣ်လီၢ်, ဖဲၡီးက့းအထူၣ်တဖၣ်အိၣ်အကျါ, ဒ်သိးယကထံၣ်ဘၣ်တၢ်မုၢ်သးစၢ်တဖၣ်မဲထီၣ်လၢ တၢ်တြီၤပူၤ, ဒ်သိးယကထံၣ်ဘၣ်စပံးမုၢ်အလၣ်အသီတဖၣ် ဟဲဒိးထီၣ်, ဒီးသ့ၣ်သလဲအထူၣ်တဖၣ်ဘိၣ်ထီၣ်ဖးထီၣ်န့ၣ်လီၤ.

¹² ဒီးယကနိးကစုာ်ယဲလီၤ. အဂ့ၢ်ဒ်အံၤ, ယထံၣ်နၤဒီးနထိၣ်ဟူးထိၣ်ဂဲၤထီၣ်ယတၢ်အဲၣ်, ဒ်ပှၤနီၣ်လ့ၣ်ကဟၣ်တဂၤလၢကလဲၤဒုးတၢ်အသိးန့ၣ်လီၤ.

ပိာ်မုၣ်တဖၣ်

¹³ ပှၤၡူလမးမုၣ်ဧၢ, ဂဲၤကလံၣ်, ဂဲၤကလံၣ်တက့ၢ်. ပျဲပကွၢ်နဂဲၤကလံၣ်တက့ၢ်. ဘၣ်မနုၤသုအဲၣ်ဒိးကွၢ်ယၤ, ဖဲယဂဲၤကလံၣ်လၢပှၤကွၢ်တၢ်ဖိတဖၣ်အဘၢၣ်စၢၤန့ၣ်လဲၣ်.