လံာ်တၢ်သးဝံၣ်တဖၣ်အတၢ်သးဝံၣ် 4 - Sgaw Karen Common Bible

ပိာ်ခွါ

¹ နဃံလၤဆံးဒိၣ်လဲၣ်, ယတၢ်အဲၣ်သးဘိဧၢ. နမဲာ်ချံတဖၣ်ကပီၤထီၣ်ဝဲဒီးတၢ်အဲၣ်, လၢနနီၣ်ကျၢၢ်ဘၢမဲာ်အဖီလာ်မးလဲၣ်. နခိၣ်သူဒံဝ့ၤဒံဝီၤမၤအသးဒ်မဲာ်တဲးလဲးလၢအဟဲဃ့ၢ်စံၣ် လီၤလၢကီၢ်ကံးလဧးအတၢ်လူၢ်တဖၣ်အလိၤအသိးန့ၣ်လီၤ.

² နမဲတဖၣ်ဝါဒ်သိတဖုလၢတၢ်တံာ်အဆူၣ်ဒီးတၢ်သ့စီကွံာ်အီၤအသိး န့ၣ်လီၤ. အဝဲသ့ၣ်တဟါမၢ်ဘၣ်နီတဘ့ၣ်ဘၣ်, ဒီးဃူလိာ်အသးကိးဘ့ၣ်ဒဲးန့ၣ်လီၤ.

³ နနိးဖံးတဖၣ်မၤအသးဒ်သတိၢ်ပျံၤအဂီၤလုးတဘိအသိး, ဒီးဃံလၤဝဲဒိၣ်မးဖဲနကတိၤတၢ်အခါန့ၣ်လီၤ. နဘိးပၤတဖၣ်ဆဲးကပီၤထီၣ်လၢနနီၣ်ကျၢၢ်ဘၢမဲာ်အဖီလာ်, ဂီၤဝဲဒ်သ့ၣ်သလဲသၣ်လၢအသ့ၣ်ဖးတခီအသိးန့ၣ်လီၤ.

⁴ နကိာ်န့ၣ်ဖျၢၣ်ဒီးဘျ့ဝဲအိၣ်ဒီးဖဲတပျံၤလီၤဂာ်ဒ်စီၤဒၤ ဝံးအတၢးထီခၢၣ်သနၢၣ်အသိး, လၢကတီၤအဘ့ၣ်တကထိဘျးလီၤအသးဝးတရံးအီၤန့ၣ်လီၤ.

⁵ နနုၢ်ခံတိၣ်မၤအသးဒ်တၤဟိစဘံသဃံာ်ခံဒုလၢအအီၣ်အဆၣ်လၢဖီ ဒ့ၣ်ညါတဖၣ်အကျါအသိးန့ၣ်လီၤ.

⁶ ယကအိၣ်လၢမူရၣ်အတၢ်လူၢ်လၢအနၢမူဝဲအလိၤ တုၤလၢဂီၤခီအကလံၤဆှံဟဲအူထီၣ်ဝဲ, ဒီးတၢ်ခံးလီၤမၢ်ကွံာ် ဝဲန့ၣ်လီၤ.

⁷ နဃံလၤဆံးဒိၣ်လဲၣ်, ယတၢ်အဲၣ်ဧၢ, မဲၣ်သူမဲၣ်ဂီၤတအိၣ်ဒီးနၤမးလဲၣ်.

⁸ ဟဲဃုာ်ဒီးယၤလၢလဘၤနိၣ်အကစၢၢ်ကလိတဖၣ်တက့ၢ်, ယတလးမူးပိာ်မုၣ်ဧၢ, ဟဲဃုာ်ဒီးယၤလၢကီၢ်လဘၤနိၣ်တက့ၢ်. ဟဲလီၤလၢကစၢၢ်အမါနၤအဒီခိၣ်, လၢကစၢၢ်စနံၣ်ဒီးကစၢၢ်ဃ့ရမိၣ်, ဖဲခ့ယုၢ်ဒီးခ့စံၣ်ပိၣ်တဖၣ်အိၣ်ဆိးဝဲအလီၢ်တက့ၢ်.

⁹ ယတၢ်အဲၣ်ဒီးယတလးမူးပိာ်မုၣ်ဧၢ, နမဲာ်ချံအတၢ်ကွၢ် ဒီးဖဲလၢနလံာ်အီၤတဖၣ်န့ၣ်, ထုးန့ၢ်ယသးန့ၣ်လီၤ.

¹⁰ နတၢ်အဲၣ်န့ၣ်ဒုးသးခုယၤ, ယတၢ်အဲၣ်ဒီးယတလးမူးပိာ်မုၣ်ဧၢ. နတၢ်အဲၣ်န့ၣ်ဂ့ၤန့ၢ်စပံးထံ, နထံနၢမူတဖၣ်နၢမူဒိၣ်န့ၢ်ဒံးတၢ်နၢမူအဂၤတဖၣ်တက့ၢ်န့ၣ် လီၤ.

¹¹ ယတၢ်အဲၣ်သးဘိဧၢ, နနိးဖံးတဖၣ်ဆၢဒ်ကနဲစီအသိး, တၢ်နုၢ်ထံဒီးကနဲစီအိၣ်ဝဲလၢနပျ့ၤအလိၤလီၤ. နတၢ်ကူတၢ်သိးတဖၣ်အိၣ်ဒီးကီၢ်လဘၤနိၣ်အတၢ်နၢမူ ခဲလၢာ်န့ၣ်လီၤ.

¹² ယတၢ်အဲၣ်ဒီးယတလးမူးပိာ်မုၣ်မ့ၢ်တၤသၣ်လီၢ်ခူသူၣ်တလီၢ်, တၤသၣ်လီၢ်လၢတၢ်ကရၢၢ်တံၢ်ဃာ်အီၤ, ဒီးထံမူထီၣ်ပၢၢ်တပူၤလၢအကစၢ်အိၣ်ဝဲ,

¹³ ဖဲန့ၣ်တၢ်မုၢ်တၢ်ဘိတဖၣ်မဲထီၣ်ဝဲန့ၣ်လီၤ. အဝဲသ့ၣ်ဘၣ်တၢ်သူၣ်လီၤအီၤဒ်တၤသၣ်လီၢ်တပူၤအသိး, ဖဲသ့ၣ်သလဲအထူၣ်တဖၣ်မဲထီၣ်ဒီးသၣ်ထီၣ်တၤသၣ်အဂ့ၤကတၢၢ်တဖၣ် န့ၣ်လီၤ.

¹⁴ ဖဲန့ၣ်, တၢ်နၢမူအကလုာ်ကလုာ်ဒ်, သ့ၣ်ဂီၤစုမ့ၣ်ဒီးသ့ၣ်နၢ်ဒး, သ့ၣ်နၢ်ဒးဒီးသ့ၣ်ကၢ်ကိၣ်, သ့ၣ်လီၢ်ဟ့ၣ်ဒီးသ့ၣ်ကဒါရါမ့တမ့ၢ် သ့ၣ်နၢမူအထူၣ်အဂၤတဖၣ်အိၣ်ဝဲလီၤ. မူရၣ်ဒီးအကၠီၣ်မဲထီၣ်ဝဲဒၣ်ဖဲန့ၣ်, အိၣ်ဒီးတၢ်နၢမူအဂ့ၤကတၢၢ်တဖၣ်န့ၣ်လီၤ.

¹⁵ ထံမူထီၣ်ပၢၢ်တဖၣ်မၤဘၣ်စီၣ်တၤသၣ်လီၢ်, ထံကျိဖိတဖၣ်ယွၤလီၤဝဲ, ထံထီၣ်ပၢၢ်အပူၤတဖၣ်ပုာ်ထီၣ်ယွၤလီၤဟဲဝဲလၢလဘၤနိၣ်အကစၢၢ် ကလိတဖၣ်န့ၣ်လီၤ.

ပိာ်မုၣ်

¹⁶ ကလံၤစိးအကလံၤဧၢ, ဖုးသံနီၣ်ထီၣ်တက့ၢ်. ကလံၤထံးအကလံၤဧၢ, အူဘၣ်ယတၤသၣ်လီၢ်, ဒီးမၤပှဲၤအီၤပှဲၤဒီးတၢ်နၢမူန့ၣ်တက့ၢ်. မ်ယတၢ်အဲၣ်ဟဲဆူအတၤသၣ်လီၢ်, ဒီးအီၣ်အတၤသၣ်အဂ့ၤကတၢၢ်တဖၣ်တက့ၢ်.