လံာ်တၢ်သးဝံၣ်တဖၣ်အတၢ်သးဝံၣ် 3 - Sgaw Karen Common Bible

¹ ယမံလၢယလီၢ်မံပူၤတနၤဘၣ်တနၤ, ဒီးမံမီၢ်ဘၣ်ပှၤလၢယအဲၣ်တဂၤန့ၣ်လီၤ. ယကွၢ်ဃုအီၤ, ဘၣ်ဆၣ်ယတထံၣ်န့ၢ်အီၤဘၣ်.

² ယဟးတရံးဝ့ၤဝီၤလၢဝ့ၢ်ပူၤ, ဆူကျဲဘိတဖၣ်ဒီးကျဲကဆူးတဖၣ်, ဒီးဃုပှၤလၢယအဲၣ်တဂၤန့ၣ်လီၤ. ယကွၢ်ဃုပှၤလၢယအဲၣ်အီၤတဂၤ, ဘၣ်ဆၣ်ယတထံၣ်န့ၢ်အီၤဘၣ်.

³ ပှၤပၢၤတၢ်ဖိလၢအဟးတရံးလၢဝ့ၢ်ပူၤတဖၣ်ထံၣ်ဘၣ်ယၤန့ၣ်လီၤ. ယသံကွၢ်အဝဲသ့ၣ်, “သုထံၣ်န့ၢ်ပှၤလၢယအဲၣ်အီၤတဂၤစ့ၢ်ကီး ဧါ.”

⁴ တုၤယလဲၤပူၤကွံာ်အဝဲသ့ၣ်တဘျီဃီန့ၣ်, ယထံၣ်န့ၢ်က့ၤပှၤလၢ ယအဲၣ်အီၤတဂၤလီၤ. ယဟံးဃာ်အီၤကျၢၤကျၢၤ, တုၤလီၤလၢယက့ၤကိးအီၤဆူယမိၢ်အဟံၣ်ပူၤ, ဒီးဒၢးလၢယအိၣ်ဖျဲၣ်ထီၣ်အပူၤန့ၣ်, ယတပျၢ်အီၤလၢၤဘၣ်.

⁵ ဝ့ၢ်ယရူၤၡလ့ၣ်အဖိမုၣ်သ့ၣ်ဧၢ, အၢၣ်လီၤယၤ, ဒီးဆိၣ်တၢ်ဒီးယၤလၢတၤဟိစဘံဒီးတၤဟိမိၢ်ဖိအမဲာ်ညါ, လၢသုတမၤတံာ်တာ်ဘၣ်ပတၢ်အဲၣ်လိာ်ပသးဘၣ်န့ၣ်တက့ၢ်.

တၢ်သးဝံၣ်သၢယုၢ်တယုၢ် ပိာ်မုၣ်

⁶ တၢ်လၢအဟဲထီၣ်လၢပှၢ်မုၢ်ကနၢလီၤဂာ်ဒ်မ့ၣ်အူလုၣ်အထူၣ်တထူၣ်အ သိး, နၢမူဝဲဒီးမူရၣ်ဒီးလီၢ်ဘၣ်, တၢ်နၢမူလၢပှၤကၤတၢ်ဖိဆါဝဲတဖၣ်န့ၣ်, မ့ၢ်တၢ်မနုၤလဲၣ်.

⁷ ကွၢ်ကွၢ်, မ့ၢ်ဝဲစီၤပၤၡလိၤမိၤဟဲဝဲ, ဘၣ်တၢ်စိာ်အီၤလၢစီၤ ပၤအလီၢ်ဆ့ၣ်နီၤလိၤ, ဒီးကီၢ်အံၣ်စရ့လးအသုးဖိလၢအဂ့ၤကတၢၢ်အဂၤဃုဆံပၢၤဃာ်အသး သမူလီၤ.

⁸ အဝဲသ့ၣ်ကိးဂၤဒဲး, သ့ဒုးတၢ်ဒီးနး, အဝဲသ့ၣ်မ့ၢ်တ့ၢ်သုးဖိလီၢ်လံၤလၢအဒုးတ့ၢ်တၢ်အါမးန့ၣ်လီၤ. အဝဲသ့ၣ်တဂၤစုာ်စုာ်ကံာ်တူာ်ဃးအနးဒၣ်ဝဲ, ဒ်သိးကတြီဆၢဒုၣ်ဒါလၢမုၢ်နၤခီအကတီၢ်လီၤ.

⁹ စီၤပၤၡလိၤမိၤဘၣ်တၢ်စိာ်အီၤလၢအစီၤပၤအလီၢ်ဆ့ၣ်နီၤအလိၤ, လီၢ်ဆ့ၣ်နီၤလၢအဘၣ်တၢ်မၤအီၤလၢသ့ၣ်အဂ့ၤကတၢၢ်ဟဲလၢလဘၤနိၣ် န့ၣ်လီၤ.

¹⁰ လီၢ်ဆ့ၣ်နီၤတဖၣ်ဘၣ်တၢ်ကးဘၢအီၤလၢစ့, အချၢသန့ၤအလီၢ်ဒီးအခိၣ်ဒုးဘၣ်တၢ်မၤအီၤလၢတၢ်ကံးယာ်လၢတၢ် ဆးဒဲးကံၣ်ဒဲးဝ့ၤအီၤလၢထူလီၤ. အလီၢ်ဆ့ၣ်နီၤကပုာ်တဖၣ်ဘၣ်တၢ်ဒါဘၢအီၤလၢတၢ်ကံးယာ်လုးတ ကုာ်, လၢအဘၣ်တၢ်ထါအီၤဃံဃံလၤလၤလၢဝ့ၢ်ယရူၤၡလ့ၣ်အဖိမုၣ်တဖၣ် န့ၣ်လီၤ.

¹¹ ဝ့ၢ်စံယိၣ်အဖိမုၣ်သ့ၣ်ဧၢ, ဟဲဒီးကွၢ်စီၤပၤၡလိၤမိၤတက့ၢ်. အဝဲအိၣ်ဒီးခိၣ်သလုးလၢအမိၢ်ဒုးကုာ်ထီၣ်အီၤလၢအခိၣ်လိၤ, ဖဲအဒိးတ့ဒိးဖျီအသးအနံၤ, အမုၢ်နံၤလၢအပှဲၤဒီးတၢ်သူၣ်ခုသးခုဒီးတၢ်သူၣ်ဖှံသးညီ န့ၣ်လီၤ.