လံာ်တၢ်သးဝံၣ်တဖၣ်အတၢ်သးဝံၣ် 2 - Sgaw Karen Common Bible

¹ ယမ့ၢ်ဒၣ်ၡၤရိၣ်အဖီတၤဆှုၣ်အမံၤတဖီးလၢပှၢ်လၢ်ကျါ, ဒီးဖီဒ့ၣ်ညါတဖီးလၢကစၢၢ်အတၢ်တြီၤပူၤလီၤ.

ပိာ်ခွါ

² ဒ်ဖီဒ့ၣ်ညါတဖီးလၢအအိၣ်လၢတၤဆှုၣ်တဖၣ်အကျါအသိးန့ၣ်, ပှၤလၢယအဲၣ်အီၤတဂၤအိၣ်လၢပိာ်မုၣ်တဖၣ် အကျါလီၤ.

ပိာ်မုၣ်

³ ဒ်သ့ၣ်ဖီသၣ်တထူၣ်အိၣ်လၢသ့ၣ်အဂၤတဖၣ်အကျါလၢပှၢ်ပူၤအသိးန့ၣ်, ပှၤလၢယအဲၣ်အီၤတဂၤဘၣ်တၢ်ပာ်သတြီၤအီၤဒီးပိာ်ခွါအဂၤတဖၣ် လီၤ. ယဆ့ၣ်နီၤလၢအကဒုအဖီလာ်ပှဲၤဒီးတၢ်သးခု, ဒီးအသၣ်တဖၣ်န့ၣ်ယအီၣ်ဝံၣ်ဒိၣ်မးလီၤ.

⁴ အဝဲဆှၢယၤဆူအတၢ်အီၣ်တၢ်အီအမူးအဒၢး, ဒီးယူာ်ထီၣ်ထီတၢ်အဲၣ်အနီၣ်တယၢ်လၢ ယဖီခိၣ်န့ၣ်လီၤ.

⁵ ဒုးဆူၣ်ထီၣ်က့ၤယဂံၢ်ယဘါလၢစပံးသၣ်အဃ့တဖၣ်, ဒီးမၤကျၢၤထီၣ်က့ၤယသးလၢဖီသၣ်တဖၣ်လီၤ. အဂ့ၢ်ဒ်အံၤ, ယဂံၢ်ယဘါလီၤစၢ်လၢတၢ်အဲၣ်အဃိလီၤ.

⁶ အစုစ့ၣ်ဖီၣ်ဃးယကိာ်, ဒီးအစုထွဲန့ၣ်မၤမုာ်ယၤလီၤ.

⁷ ဝ့ၢ်ယရူၤၡလ့ၣ်အဖိမုၣ်သ့ၣ်ဧၢ, အၢၣ်လီၤယၤ, ဒီးဆိၣ်တၢ်ဒီးယၤလၢတၤဟိစဘံဒီးတၤဟိမိၢ်ဖိအမဲာ်ညါ, လၢသုတမၤတံာ်တာ်ဘၣ်ပတၢ်အဲၣ်လိာ်ပသးဘၣ်န့ၣ်တက့ၢ်.

တၢ်သးဝံၣ်ခံယုၢ်တယုၢ် ပိာ်မုၣ်

⁸ ယနၢ်ဟူပှၤလၢယအဲၣ်အီၤတဂၤအကလုၢ်န့ၣ်လီၤ. အဝဲဟဲဃ့ၢ်လၢကစၢၢ်တဖၣ်အလိၤ, ဒီးဃ့ၢ်ခီဂာ်တၢ်လူၢ်ဖိတဖၣ်ဆူယအိၣ်န့ၣ်လီၤ.

⁹ ပှၤလၢယအဲၣ်အီၤတဂၤလီၤဂာ်ဒ်တၤဟိစဘံတဒု, လီၤဂာ်ဒ်တၤဃီၤဖါသးစၢ်တဒုအသိးန့ၣ်လီၤ. အဝဲဆၢထၢၣ်ဝဲလၢတၢ်ဒူၣ်အကပၤ, ကွၢ်နုာ်တၢ်ခီဖျိပဲတြီဖိတဖၣ်, ဒီးကွၢ်တကျ့တၢ်ခီဖျိပဲတြီကဘျံးဖိတဖၣ်န့ၣ်လီၤ.

¹⁰ ပှၤလၢယအဲၣ်အီၤတဂၤကတိၤတၢ်ဒီးယၤလီၤ. ဟဲ, ပှၤလၢယအဲၣ်အီၤတဂၤဧၢ, ဟဲဃုာ်ဒီးယၤတက့ၢ်, ယတၢ်အဲၣ်သးဘိဧၢ.

ပိာ်ခွါ

¹¹ တၢ်ကိၢ်ခါအကတီၢ်ပူၤကွံာ်လံ, ဒီးတၢ်စူၤအကတီၢ်လၢာ်ကွံာ်လံ,

¹² ဖီတဖၣ်ဘိၣ်ထီၣ်ဖးထီၣ်လၢဟီၣ်ခိၣ်အဖီခိၣ်လံန့ၣ်လီၤ. အအံၤမ့ၢ်တၢ်ဆၢကတီၢ်လၢတၢ်သူၣ်ဝံၣ်သးဆၢအဂီၢ်, ဒီးပနၢ်ဟူထိၣ်လွံၢ်တဖၣ်ပှ့ၤထီၣ်လၢပကီၢ်ပူၤန့ၣ်လီၤ.

¹³ ချၢၣ်ဒၢသၣ်တဖၣ်မံထီၣ်လံ, ဒီးစပံးမုၢ်တဖၣ်ဖီထီၣ်ဒီးအတၢ်နၢမူဒံဝ့ၤဝီၤလၢကလံၤကျါ လီၤ. ဟဲ, ပှၤလၢယအဲၣ်အီၤတဂၤဧၢ, ဟဲဃုာ်ဒီးယၤတက့ၢ်, ယတၢ်အဲၣ်သးဘိဧၢ.

¹⁴ နလီၤဂာ်ဒီးထိၣ်လွံၢ်တဘ့ၣ်လၢအအိၣ်ခူသူၣ်လၢလၢၢ်သ့ၣ်ဖး အကဆူးပူၤ, ဒီးအိၣ်တဒၢလၢလ့ကဘျၣ်အပူၤန့ၣ်လီၤ. ဒုးထံၣ်ယၤလၢနမဲာ်ဃံလၤလီၤအဲၣ်လီၤကွံ, ဒီးပျဲယနၢ်ဟူနကလုၢ်လၢအမုာ်သယုၢ်တက့ၢ်.

¹⁵ ဖီၣ်န့ၢ်ထွံၣ်ဟီၣ်ခိၣ်တဖၣ်, ဒီးထွံၣ်ဟီၣ်ခိၣ်ဖိတဖၣ် တချုးဒံးဘၣ်လၢအဝဲသ့ၣ်မၤဟးဂီၤကွံာ်ပစပံးအလီၢ်လၢအဘိၣ် ထီၣ်ဖးထီၣ်တက့ၢ်.

ပိာ်မုၣ်

¹⁶ ပှၤလၢယအဲၣ်အီၤတဂၤမ့ၢ်ယတၢ်ဒီးယမ့ၢ်အတၢ်လီၤ. အဝဲဒုးအီၣ်အသိမဲာ်တဲးလဲးအဖုအဂီၢ်အဆၣ်လၢဖီဒ့ၣ်ညါတဖၣ်အ ကျါ,

¹⁷ တုၤလီၤလၢမုၢ်ဂီၤအကလံၤဖိအူထီၣ်, ဒီးတၢ်ခံးတၢ်နၤဟါမၢ်ကွံာ်ဝဲဒၣ်န့ၣ်လီၤ. ဟဲက့ၤ, ယတၢ်အဲၣ်သးဘိဧၢ, ဒ်တၤဟိစဘံတဒုဒီးဒ်တၤဃီၤဖါသးစၢ်တဒုလၢလၢၢ်မုၢ်လ့တီ ကစၢၢ်လိၤအသိးတက့ၢ်.