လံာ်တၢ်သးဝံၣ်တဖၣ်အတၢ်သးဝံၣ် 1 - Sgaw Karen Common Bible

¹ တၢ်သးဝံၣ်တဖၣ်အကျါအမုာ်ကတၢၢ်, တဖၣ်လၢစီၤၡလိၤမိၤ,

တၢ်သးဝံၣ်တၢတယုၢ် ပိာ်မုၣ်

² နထးခိၣ်အတၢ်နၢမူတဖၣ်လုၣ်ဘၢယၤ, အဂ့ၢ်ဒ်အံၤ, နတၢ်အဲၣ်ဂ့ၤဒိၣ်န့ၢ်ဒံးစပံးထံတက့ၢ်လီၤ.

³ သိလၢနဖှူအီၤန့ၣ်နၢမူဝဲ, ဒီးနမံၤမၤအသးဒ်သိနၢမူလၢအလူလီၤ အသးအသိးန့ၣ်လီၤ. မၤသးဒ်န့ၣ်ဒီး, ပှၤပိာ်မုၣ်တအဲၣ်နၤအိၣ်တကဲနီတဂၤဘၣ်.

⁴ ကိးဃုာ်ယၤတက့ၢ်, ဒီးပကဃ့ၢ်ပိာ်လိာ်ပခံလီၤ. မ်နကဲထီၣ်ယစီၤပၤ, ဒီးကိးနုာ်ယၤဆူနဒၢးပူၤတက့ၢ်. ပကမုာ်လၤသးခုဒီးမၤလၢာ်ပဆၢကတီၢ်လၢတၢ်အဲၣ်ယိာ်အပူၤ အါန့ၢ်ဒံးလၢစပံးထံအပူၤတက့ၢ်လီၤ. ပှၤပိာ်မုၣ်ခဲလၢာ်အဲၣ်နၤန့ၣ်တလီၤကမၢကမၣ်ဘၣ်.

⁵ ဝ့ၢ်ယရူၤၡလ့ၣ်အဖိမုၣ်သ့ၣ်သုဧၢ, ယသူဘၣ်ဆၣ်ဒီးယဃံလၤယဲဒၣ် န့ၣ်လီၤ. ယသူဒ်ပှၤက့ဒၢ်ဖိအဒဲတဖၣ်လၢမဲးမုၢ်ခိၣ်, ဘၣ်ဆၣ်ဃံလၤယဲဒ်ယၣ်ဘျးသဒၢတဖၣ်, လၢစီၤၡလိၤမိၤအနူၢ်ပူၤအသိးန့ၣ်လီၤ.

⁶ လၢယဖံးယညၣ်သူအဃိဒီးကွၢ်တလီၤယၤတဂ့ၤ. အဂ့ၢ်ဒ်အံၤ, မုၢ်ကိၢ်သွၣ်ဘၣ်ယၤလီၤ. ယဒီပုၢ်ဝဲၢ်ခွါတဖၣ်သူၣ်ဒိၣ်သးဖျိးယၤ, ဒီးမၢယမၤတၢ်လၢစပံးအလီၢ်လီၤ. တၢ်ဆၢကတီၢ်တအိၣ်နီတစဲးလၢယကကွၢ်လီၤယသးအဂီၢ်ဘၣ်.

⁷ ယတၢ်အဲၣ်ဧၢ, တဲယၤလၢနကလဲၤဒုးအီၣ်နသိတဖၣ်အဆၣ်ဖဲလဲၣ်, ဒီးနကဒုးအိၣ်ဘှံးအဝဲသ့ၣ်လၢမုၢ်ထူၣ်အဆၢကတီၢ်န့ၣ်ဖဲလဲၣ်. ဘၣ်မနုၤလၢယကဘၣ်ဟးဝ့ၤဝီၤဒီးဃုနၤလၢသိအဂၤတဖၣ်အပှၤကွၢ် သိအကျါန့ၣ်လဲၣ်.

ပိာ်ခွါ

⁸ မုၣ်ကနီၤလၢအဃံလၤကတၢၢ်တဂၤဧၢ, နတသ့ၣ်ညါတၢ်လီၢ်ဘၣ်ဧါ. လဲၤဒီးပိာ်ထီၣ်သိမဲာ်တဲးလဲးအဖုအဂီၢ်အခံ, ဒီးဃုထံၣ်တၢ်အီၣ်ဆၣ်အလီၢ်လါဟ့လၢ အဝဲသ့ၣ်အဂီၢ် ဘူးဒီးပှၤကွၢ်သိအဒဲတဖၣ်အဃၢၤန့ၣ်တက့ၢ်.

⁹ ယတၢ်အဲၣ်သးဘိဧၢ, မၤကတၢသူၣ်ကတၢသးထီၣ်ပိာ်ခွါတဖၣ်, ဒ်ကသ့ၣ်မိၢ်တဒုအသိးလၢအထိၣ်ဟူးထိၣ်ဂဲၤထီၣ် စီၤပၤဖၤရိၤအလ့ၣ်ကဟၣ်အကသ့ၣ်ဒုးသုးတဖၣ်တက့ၢ်.

¹⁰ နခိၣ်သူလၢအလီၤစဲၤလၢနဘိးပၤအလိၤတဖၣ်န့ၣ်မၤဃံမၤလၤထီၣ် နဘိးပၤ, ဒီးလၢအလီၤစဲၤလၢနကိာ်ကျၤခံတဖၣ်န့ၣ်လီၤဂာ်ဒီးဖဲအဝီတဖၣ် လၢတၢ်မၤအီၤလၢလၢၢ်လုၢ်ဒိၣ်ပှ့ၤဒိၣ်တဖၣ်လီၤ.

¹¹ ဘၣ်ဆၣ်ဒီးပကပိာ်န့ၢ်နၤဖဲထူတပျံၤ ဒီးတၢ်ကယၢကယဲတဖၣ်လၢတၢ်မၤအီၤလၢစ့န့ၣ်လီၤ.

ပိာ်မုၣ်

¹² ယစီၤပၤမံနီၤလၢအလီၢ်ဆ့ၣ်နီၤခးအလိၤ, ဖဲယတၢ်နၢမူနၢ်ဒူး, နၢမူထီၣ်လၢကလံၤကျါလီၤ.

¹³ ပှၤလၢယအဲၣ်အီၤတဂၤနၢမူဒ်မူရၣ်အသိး, ဖဲအဝဲမံနီၤလၢယနုၢ်ကဆူးပူၤန့ၣ်လီၤ.

¹⁴ ပှၤလၢယအဲၣ်အီၤတဂၤလီၤဂာ်ဒ်သ့ၣ်ဂီၤစုမ့ၣ်တကရူၢ်အသိး, လၢအဘိၣ်ထီၣ်ဖးထီၣ်ဖဲဧ့ၣ်က့ဒံၤစပံးအလီၢ်တဖၣ်လီၤ.

ပိာ်ခွါ

¹⁵ နဃံနလၤဆံးဒိၣ်လဲၣ်, ယတၢ်အဲၣ်ဧၢ, နမဲာ်ချံတဖၣ်ကတြ့ၣ်ကတြိၣ်ဒ်ထိၣ်လွံၢ်အမဲာ်ချံတဖၣ်လၢအပှဲၤ ဒီးတၢ်အဲၣ်အသိးလီၤ.

ပိာ်မုၣ်

¹⁶ ယပှၤသးဘိဧၢ, နက့ၢ်နဂီၤတဖၣ်ဃံလၤဆံးဒိၣ်လဲၣ်, နမၤသးခုယၤဆံးဒိၣ်လဲၣ်, နီၣ်လါဟ့ကမ့ၢ်ပမံနီၤအလီၢ်,

¹⁷ သ့ၣ်ဆှိအ့ရ့းကမ့ၢ်ပဟံၣ်အတၢ်တီတဖၣ်, ဒီးသ့ၣ်ဆှိကမ့ၢ်ပဟံၣ်ခိၣ်ဒုးလာ်န့ၣ်လီၤ.