လံာ်နီၢ်ရူၤသး 1 - Sgaw Karen Common Bible

စီၤအလံၤမ့လ့းဒီးအပှၤဟံၣ်ဖိဃီဖိ သုးအသးဆူကီၢ်မိၤအး

¹ မုၢ်နံၤမုၢ်သီလၢပှၤစံၣ်ညီၣ်ကွီၢ်တဖၣ်ပၢအံၣ်စရ့လးအကတီၢ် န့ၣ်, တၢ်သၣ်ဝံၤလီၤဒိအိၣ်ထီၣ်ဝဲဒၣ်လၢထံကီၢ်အပူၤန့ၣ်လီၤ.

² လၢတၢ်အံၤအဃိပှၤအိၣ်ဝဲတဂၤလၢဝ့ၢ်ဘ့ၤသလ့ဃ့ၣ်လၢကီၢ်ယူဒၤ အပူၤန့ၣ်, လဲၤဆူကီၢ်မိၤအးဃုာ်ဒီးအမါဒီးအဖိခွါခံဂၤဒ်သိးအကလဲၤ အိၣ်ဝဲတစိၢ်တလီၢ်အဂီၢ်န့ၣ်လီၤ. ပှၤတဂၤအံၤအမံၤမ့ၢ်ဝဲစီၤအလံၤမ့လ့း, အမါအမံၤမ့ၢ်နီၢ်နၤဧမံ, ဒီးအဖိခွါခံဂၤန့ၣ်, မ့ၢ်စီၤမၤဃလိၣ်ဒီးစီၤကံးလယိၣ်န့ၣ်လီၤ. အဝဲသ့ၣ်တဖၣ်န့ၣ်ဘၣ်ဃးဒီးပှၤအ့ဖရးသးဖိအဒူၣ်အထၢလီၤ.

³ ဖဲအဝဲသ့ၣ်အိၣ်ဝဲလၢကီၢ်မိၤအးအဖၢမုၢ်, စီၤအလံၤမ့လ့းသံ ဝဲ, ဒီးနီၢ်နၤဧမံဘၣ်အိၣ်လီၤတဲာ်ဒီးအဖိခွါခံဂၤန့ၣ်လီၤ.

⁴ အဝဲသ့ၣ်ဟံးန့ၢ်အမါလၢပှၤမိၤအးမုၣ်, တဂၤန့ၣ်အမံၤလၢနီၢ် ဧိးရပၤဒီးအဂၤတဂၤမ့ၢ်နီၢ်ရူၤသးလီၤ. ဖဲအဝဲသ့ၣ်အိၣ်ဝဲဖဲန့ၣ်အနံၣ်တဆံဝံၤအလီၢ်ခံန့ၣ်,

⁵ စီၤမၤဃလိၣ်ဒီးစီၤကံးလယိၣ်သံဝဲ, ဒီးနီၢ်နၤဧမံဘၣ်အိၣ် လီၤတဲာ်ထဲတဂၤဧိၤ, လၢအဖိခွါခံဂၤဒီးအဝၤတအိၣ်လၢၤ ဘၣ်အလီၢ်ခံန့ၣ်လီၤ.

နီၢ်နၤဧမံဒီးနီၢ်ရူၤသးက့ၤကဒါက့ၤဆူဝ့ၢ်ဘ့ၤသလ့ဃ့ၣ်.

⁶ ဖဲအအိၣ်ဒံးဝဲဖဲကီၢ်မိၤအးအပူၤန့ၣ်, နီၢ်နၤဧမံနၢ်ဟူဝဲ လၢယွၤဆိၣ်ဂ့ၤအပှၤဂီၢ်မုၢ်ဒီးဟ့ၣ်အဝဲသ့ၣ်လၢတၢ်အီၣ်တၢ်အီအ ဃိ, ကတဲာ်ကတီၤအသးဒ်သိးကဟးထီၣ်ကွံာ်လၢကီၢ်မိၤအး အပူၤဃုာ်ဒီးအဒဲၣ်တဖၣ်န့ၣ်လီၤ.

⁷ ဒီးဟးထီၣ်သကိးဝဲဒီးက့ၤကဒါက့ၤဆူကီၢ်ယူဒၤန့ၣ်လီၤ.

⁸ ဘၣ်ဆၣ်ဖဲအလဲၤတၢ်အဖၢမုၢ်, နီၢ်နၤဧမံစံးဘၣ်အဒဲၣ်ခံဂၤ, “က့ၤကဒါက့ၤသုဝဲတဂၤဆူသုမိၢ်ဒၣ်ဝဲအဟံၣ်တက့ၢ်. မ်ယွၤမၤတၢ်ဂ့ၤလၢသုဖီခိၣ်, ဒ်သုမၤဂ့ၤတ့ၢ်, ပှၤလၢအသံတဖၣ်ဒီးယၤအသိးန့ၣ်တက့ၢ်.

⁹ မ်ယွၤမၤစၢၤသုလၢသုကဆီဟံၣ်ဆီဃီကဒီးတဘျီဒီးထံၣ်န့ၢ် တၢ်မုာ်တၢ်ခုၣ်န့ၣ်တက့ၢ်.” ဒီးနၢမူအဝဲသ့ၣ်လၢတၢ်လီၤဖးအတၢ်နၢမူလီၤ. ဘၣ်ဆၣ်အဝဲသ့ၣ်ဟီၣ်ဝဲလၢအကလုၢ်ဖးဒိၣ်န့ၣ်လီၤ.

¹⁰ ဒီးစံးဘၣ်အီၤ, “တမ့ၢ်ဘၣ်, ပကက့ၤဒီးနၤဆူနပှၤကလုာ်အ အိၣ်လီၤ.”

¹¹ ဘၣ်ဆၣ်နီၢ်နၤဧမံစံးဆၢဝဲ, “ယဖိမုၣ်သ့ၣ်ဧၢ, သုကဘၣ်က့ၤကဒါက့ၤလီၤ. ဘၣ်မနုၤလၢသုအဲၣ်ဒိးဟဲသကိးဒီးယၤ လဲၣ်. မ့ၢ်သုဆိကမိၣ်လၢယကအိၣ်ဒံးဒီးယဖိခွါတဖၣ်လၢသုကဆီ ဟံၣ်ဆီဃီအဂီၢ်န့ၣ်ဧါ.

¹² က့ၤကဒါက့ၤ, ယဖိမုၣ်သ့ၣ်ဧၢ, ယသးပှၢ်ကဲၣ်ဆိးလၢယက န့ၢ်ကဒီးယဝၤတဘျီအဂီၢ်လီၤ. ယမ့ၢ်စံးလၢယအိၣ်ဒံးဒီးတၢ်မုၢ်လၢ်, ဒီးထံၣ်န့ၢ်ဝၤတနၤအံၤဒီးဆံးစၢ်န့ၢ်ဖိခွါတဖၣ်ဒၣ်လဲာ်,

¹³ မ့ၢ်သုကအိၣ်ခိးတုၤအဒိၣ်ထီၣ်စ့ၢ်ကီးဧါ. မ့ၢ်သုကပၢၤသုသး လၢအဂီၢ်ဒီးတန့ၢ်ဝၤဘၣ်န့ၣ်ဧါ. ယဖိမုၣ်သ့ၣ်ဧၢ, တမ့ၢ်ဒ်န့ၣ်ဘၣ်. ယသးအုးဒိၣ်နီၢ်မးလၢသုဂီၢ်မ့ၢ်လၢယွၤဃၣ်အသးထီဒါယၤလံအဃိလီၤ.”

¹⁴ အန့ၣ်ဒီးအဝဲသ့ၣ်ဟီၣ်ကဒီးဝဲလၢအကလုၢ်ဖးဒိၣ်လီၤ. ဒီးနီၢ်ဧိးရပၤနၢမူအမံၤပှၢ်ပိာ်မုၣ်ဝံၤဒီးက့ၤကဒါက့ၤဆူ အဟံၣ်န့ၣ်လီၤ. မ့မ့ၢ်နီၢ်ရူၤသးန့ၣ်အိၣ်စဲဘူးအသးဒီးအီၤလီၤ.

¹⁵ ဒီးနီၢ်နၤဧမံစံးဘၣ်အီၤ, “နီၢ်ရူၤသးဧၢ, နခံနဲမုၣ်တဂၤက့ၤက ဒါက့ၤလံဆူအပှၤကလုာ်ဒီးအကစၢ်တဖၣ်အအိၣ်လံ. က့ၤပိာ်အခံဆူနဟံၣ်ဒၣ်နဲတက့ၢ်.”

¹⁶ ဘၣ်ဆၣ်နီၢ်ရူၤသးစံးဆၢဝဲ, “တဘၣ်ဃ့ကညးယၤလၢယက လဲၤသဒၣ်နၤအဂီၢ်မ့ၢ်ဂ့ၤ, ယသုတပိာ်နခံအဂီၢ်မ့ၢ်ဂ့ၤန့ၣ်တ ဂ့ၤ. ဖဲနလဲၤတပူၤလၢ်လၢ်ယကလဲၤယဲ, ဖဲနအိၣ်တပူၤလၢ်လၢ် ယကအိၣ်ယဲ, နပှၤကလုာ်ကမ့ၢ်ဝဲဒၣ်ယပှၤကလုာ်, ဒီးနကစၢ်ယွၤကမ့ၢ်ဝဲယကစၢ်ယွၤန့ၣ်လီၤ.

¹⁷ ဖဲနသံတပူၤလၢ်လၢ်ယကသံယဲ, ဒီးယကဘၣ်တၢ်ခူၣ်လီၤကွံာ်ယၤဖဲ န့ၣ်လီၤ. ယမ့ၢ်လဲၤသဒၣ်နၤ, မ့တမ့ၢ်ဘၣ်လၢတၢ်သံမၤလီၤဖးယၤဒီးနၤန့ၣ် မ်ယွၤအတၢ်စံၣ်ညီၣ်လီၤဘၣ်ယၤ, ဒီးအါန့ၢ်အန့ၣ်တက့ၢ်.”

¹⁸ ဒီးဖဲနီၢ်နၤဧမံထံၣ်ဝဲလၢနီၢ်ရူၤသးပာ်လီၤအသးနီၢ်နီၢ်လၢ ကလဲၤတၢ်ဒီးအီၤန့ၣ်, အဝဲတကတိၤအါတၢ်လၢၤဘၣ်န့ၣ်လီၤ.

¹⁹ အဝဲသ့ၣ်ခံဂၤလဲၤသကိးတၢ်တုၤအလဲၤတုၤဝ့ၢ်ဘ့ၤသလ့ဃ့ၣ်န့ၣ် လီၤ. ဖဲအလဲၤတုၤဝဲန့ၣ်, ပှၤဝ့ၢ်ဖိခဲလၢာ်အိၣ်ဒီးတၢ်သူၣ်ပိၢ်သးဝးန့ၣ်လီၤ. ဒီးပှၤပိာ်မုၣ်တဖၣ်စံးဝဲ, “အဝဲအံၤမ့ၢ်နီၢ်နၤဧမံန့ၣ်ဧါ.”

²⁰ အဝဲစံးဆၢဝဲ, “တဘၣ်ကိးယၤလၢနီၢ်နၤဧမံလၢအမ့ၢ်ပှၤလၢ အသူၣ်ဖှံသးညီတဂ့ၤ. ကိးယၤလၢနီၢ်မၤရၤလၢအမ့ၢ်ပှၤလၢအသူၣ်အုးသးအုး, မ့ၢ်လၢသ့တၢ်လၢာ်ကစၢ်ယွၤမၤဆါယၤနးနးကလဲာ်လံအဃိတက့ၢ်.

²¹ ဖဲယဟးထီၣ်လၢတၢ်လီၢ်အံၤအခါတၢ်အိၣ်ပှဲၤဒီးယၤ, ဘၣ်ဆၣ်ယွၤဒုးဟဲက့ၤယၤလၢတၢ်အိၣ်ကလီန့ၣ်လီၤ. ဘၣ်မနုၤလၢသုကိးယၤလၢနီၢ်နၤဧမံ, ဖဲယွၤသ့တၢ်လၢာ်ကစၢ်မၤကိၢ်မၤဂီၤယၤ ဒီးဒုးတူၢ်ယၤတၢ်နးတၢ်ဖှီၣ်န့ၣ်လဲၣ်.”

²² တၢ်အံၤမ့ၢ်နီၢ်နၤဧမံအတၢ်ဟဲက့ၤကဒါက့ၤလၢကီၢ်မိၤအး, ဃုာ်ဒီးအဒဲၣ်မုၣ်နီၢ်ရူၤသးလၢအမ့ၢ်ပှၤမိၤအးမုၣ်, ဒ်လဲၣ်န့ၣ်လီၤ. အဝဲသ့ၣ်ဟဲက့ၤတုၤလၢဝ့ၢ်ဘ့ၤသလ့ဃ့ၣ်ဖဲတၢ်ကူးသီဘုမုယီၤအကတီၢ်န့ၣ်လီၤ.