လံာ်လီၣ်ဖျါ 5 - Sgaw Karen Common Bible

လံာ်ထူဒီးသိဖိ

¹ ယထံၣ်လံာ်ထူတထူလၢပှၤလၢအဆ့ၣ်နီၤလၢလီၢ်ပစိာ်တဂၤ န့ၣ်အစုထွဲပူၤလီၤ. လံာ်ထူအဝဲအံၤတၢ်ကွဲးအိၣ်လၢအလိၤခံ ကပၤလၢာ်, ဒီးဘၣ်တၢ်စဲပနီၣ်ဃာ်အီၤလၢတၢ်စဲပနီၣ်ဃာ်နွံ ခါလီၤ.

² ဒီးယထံၣ်မူခိၣ်ကလူးအဂံၢ်ဆူၣ်ဘါဆူၣ်တဂၤ, လၢအဘိးဘၣ်သ့ၣ်ညါတၢ်လၢအကလုၢ်ဖးဒိၣ်, “မ့ၢ်မတၤကြၢးဝဲဘၣ်ဝဲလၢအကမၤသ့ၣ်ဖးတၢ်စဲပနီၣ်ဃာ် တဖၣ်, ဒီးအိးထီၣ်လံာ်ထူန့ၣ်တဂၤလဲၣ်.”

³ ဘၣ်ဆၣ်ဒီး လၢမူခိၣ်မ့ၢ်ဂ့ၤ, လၢဟီၣ်ခိၣ်မ့ၢ်ဂ့ၤ, လၢဟီၣ်ခိၣ်အဖီလာ်မ့ၢ်ဂ့ၤ, ပှၤလၢအအိးထီၣ်လံာ်ထူဒီးကွၢ်နုာ်တၢ်လၢအအိပူၤသ့ဝဲန့ၣ် တအိၣ်နီတဂၤဘၣ်.

⁴ ယဟီၣ်ယဲဒၣ်နးနးကလဲာ်, အဂ့ၢ်မ့ၢ်လၢပှၤလၢအကြၢးဝဲဘၣ်ဝဲလၢအကအိးထီၣ်လံာ်ထူဒီး ကွၢ်နုာ်တၢ်လၢအအိပူၤန့ၣ်, တၢ်တထံၣ်န့ၢ်အီၤနီတဂၤဘၣ် အဃိန့ၣ်လီၤ.

⁵ တုၤနုၤတစု ပှၤသူၣ်က့သးပှၢ်အကျါတဂၤစံးဘၣ်ယၤ, “တဘၣ်ဟီၣ်တဂ့ၤ. ကွၢ်တက့ၢ်. ခ့ယုၢ်လၢစီၤယူဒၤအဒူၣ် အထၢအပူၤ, ပှၤဖးဒိၣ်လၢအဟဲလီၤစၢၤလၢစီၤဒၤဝံးတဂၤန့ၣ်, ဒိးန့ၢ်ဘၣ်တၢ်မၤနၢၤလံ, ဒီးအဝဲဒၣ်မၤသ့ၣ်ဖးတၢ်စဲပနီၣ်ဃာ်နွံခါဒီးအိးထီၣ်လံာ်ထူ န့ၣ်သ့ဝဲလီၤ.”

⁶ တုၤနုၤတစုယထံၣ်သိဖိတဒုဆၢထၢၣ်လၢလီၢ်ပစိာ်အခၢၣ်သး, ဘၣ်တၢ်ကဝီၤဃာ်အီၤလၢတၢ်အသးသမူအိၣ်လွံၢ်ဒုဒီးပှၤ သူၣ်က့သးပှၢ်တဖၣ်န့ၣ်လီၤ. အိၣ်ဖျါလၢသိဖိတဒုန့ၣ်ဘၣ် တၢ်မၤသံအီၤလီၤ. အဝဲအိၣ်ဒီးအနၢၤနွံဘိဒီးအမဲာ်ချံနွံတိၣ်, လၢအမ့ၢ်ဝဲကစၢ်ယွၤအသးနွံဖျၢၣ်, လၢအဘၣ်တၢ်ဆှၢလီၤတ့ၢ်အီၤသကုၤဟီၣ်ခိၣ်ဒီဘ့ၣ်ညါန့ၣ်လီၤ.

⁷ သိဖိအဝဲန့ၣ်လဲၤဒီးဟံးန့ၢ်လံာ်ထူလၢပှၤလၢအဆ့ၣ်နီၤ လၢလီၢ်ပစိာ်အလိၤတဂၤန့ၣ်အစုထွဲပူၤလီၤ.

⁸ ဖဲအမၤဝဲဒ်န့ၣ်န့ၣ်, တၢ်အသးသမူအိၣ်လွံၢ်ဒုဒီးပှၤသူၣ်က့သး ပှၢ်ခံဆံလွံၢ်ဂၤထိၣ်လီၤပှီၤအသးလၢသိဖိအမဲာ်ညါလီၤ. အဝဲသ့ၣ်တဒုဘၣ်တဒု, တဂၤဘၣ်တဂၤအိၣ်ဒီးတနၢ်တဆိဒီးသလၢထူတဖၣ်လၢ အပှဲၤဒီးတၢ်နၢမူနၢဆှီ, လၢအမ့ၢ်ကစၢ်ယွၤအပှၤဂီၢ်မုၢ်အတၢ်ထုကဖၣ်တဖၣ်န့ၣ်လီၤ.

⁹ အဝဲသ့ၣ်သးဝံၣ်တၢ်သးဝံၣ်အသီတယုၢ်, “နကြၢးဝဲဘၣ်ဝဲလၢနကဟံးန့ၢ်လံာ်ထူ ဒီးအိးထီၣ်အတၢ်စဲပနီၣ်ဃာ်တဖၣ်လီၤ. အဂ့ၢ်ဒ်အံၤနဘၣ်တၢ်မၤသံနၤ, ဒီးခီဖျိနသွံၣ်န့ၣ်, နပှ့ၤန့ၢ်ပှၤလၢဒူၣ်ဖိထၢဖိကိးဒူၣ်ဒဲးအပူၤ, လၢပှၤကတိၤကျိာ်အါကျိာ်အကျါ, လၢထံကီၢ်အါဘ့ၣ်အပူၤ, ဒီးပှၤကလုာ်အါကလုာ်အပူၤလၢကစၢ်ယွၤအဂီၢ် န့ၣ်လီၤ.

¹⁰ နဒုးကဲထီၣ်အဝဲသ့ၣ်လၢဘီမုၢ်တဘ့ၣ်လၢ အဘၣ်ဃးဒီးပှၤလုၢ်တၢ်အခိၣ်တဖၣ် လၢအကမၤကစၢ်ယွၤအတၢ်ဖံးတၢ်မၤအဂီၢ်န့ၣ်လီၤ. ဒီးအဝဲသ့ၣ်ကပၢတၢ်လၢဟီၣ်ခိၣ်ချၢလီၤ.”

¹¹ ဒီးယကွၢ်ကဒီးတၢ်, ဒီးယနၢ်ဟူကလူးတဖၣ်လၢအအိၣ်ဝဲ အကထိတဖၣ်အကထိ, ဒီးအကကွဲၢ်တဖၣ်အကကွဲၢ်န့ၣ်လီၤ. အဝဲသ့ၣ်အိၣ်ဆၢထၢၣ်ဝးတရံးလီၢ်ပစိာ်, တၢ်အသးသမူအိၣ် လွံၢ်ဒု, ဒီးပှၤသူၣ်က့သးပှၢ်တဖၣ်,

¹² ဒီးသးဝံၣ်တၢ်လၢအကလုၢ်ဖးဒိၣ် “သိဖိလၢအဘၣ်တၢ်မၤသံအီၤန့ၣ် ကြၢးဝဲဘၣ်ဝဲလၢအကဒိးန့ၢ်ဘၣ် တၢ်စိတၢ်ကမီၤ, တၢ်ထူးတၢ်တီၤ, တၢ်ကူၣ်ဘၣ်ကူၣ်သ့ဒီးတၢ်ဂံၢ်တၢ်ဘါ, တၢ်မံၤလၤသၣ်ကပီၤ, တၢ်ယူးယီၣ် ဒီးတၢ်စံးထီၣ်ပတြၢၤန့ၣ်လီၤ.”

¹³ ဒီးယနၢ်ဟူ, ကယဲၢ်တၢ်ဘၣ်တ့လၢမူခိၣ်ဟီၣ်ခိၣ်ဒီးလၢဟီၣ်ခိၣ် အဖီလာ်တဖၣ်ဒီးပီၣ်လဲၣ်ဒီဘ့ၣ်ညါတၢ်အိၣ်လၢအပူၤခဲလၢာ် သးဝံၣ်တၢ်ဒ်အံၤ, “မ်ပှၤလၢအဆ့ၣ်နီၤလၢလီၢ်ပစိာ်အလိၤ, ဒီးသိဖိတဒုန့ၣ်, ဒိးန့ၢ်ဘၣ်တၢ်စံးထီၣ်ပတြၢၤ, တၢ်မံၤလၤသၣ်ကပီၤ, တၢ်ယူးယီၣ်ဒီး တၢ်ဂံၢ်တၢ်ဘါ အစိၤစိၤဃၣ်ဃၣ်န့ၣ်တက့ၢ်.”

¹⁴ ဒီးတၢ်အသးသမူအိၣ်လွံၢ်ဒုန့ၣ်စံးဆၢဝဲ, “အၤမ့ၣ်” ဒီးပှၤသူၣ်က့သးပှၢ်တဖၣ်ထိၣ်လီၤပှီၤအသးဒီးဘူၣ်ထီၣ် ဘါထီၣ်တၢ်လီၤ.