စံးထီၣ်ပတြၢၤ 94 - Sgaw Karen Common Bible

ကစၢ်ယွၤလၢအစံၣ်ညီၣ်ပှၤခဲလၢာ်

¹ ယွၤဧၢ, နမ့ၢ်ကစၢ်ယွၤလၢအသိၣ်ဃီၣ်တၢ်လီၤ. ပာ်ဖျါထီၣ်နတၢ်သးထီၣ်တက့ၢ်.

² နမ့ၢ်ပှၤခဲလၢာ်အပှၤစံၣ်ညီၣ်ကွီၢ်လီၤ. ဂဲၤထၢၣ်ဒီးဟ့ၣ်ပှၤပာ်ထီၣ်ထီအသး လၢတၢ်လၢအကြၢးဒိးန့ၢ်ဘၣ်ဝဲဒၣ်န့ၣ်တက့ၢ်.

³ ပှၤတတီတလိၤကသူၣ်ဖှံသးညီယံာ်ထီၣ် ဒံးဆံးယံာ်လဲၣ်. ယွၤဧၢ, ဆံးယံာ်ဒံးလဲၣ်.

⁴ ပှၤမၤကမၣ်တၢ်တဖၣ်အံၤ ကပာ်ထီၣ်ထီအသးဒီး ပာ်ကဖၢလၢအသးလၢ အတၢ်မၤကမၣ်တဖၣ်အဃိန့ၣ်ဆံးယံာ်ဒံးလဲၣ်.

⁵ ယွၤဧၢ, အဝဲသ့ၣ်မၤအၢမၤသီနပှၤဂီၢ်မုၢ်, ဒီးအဝဲသ့ၣ်မၤနးမၤဖှီၣ်ပှၤလၢ အဘၣ်ဃးဒီးနၤတဖၣ်န့ၣ်လီၤ.

⁶ အဝဲသ့ၣ်မၤသံကွံာ် ပှၤမုၣ်ကမဲတဖၣ် ပှၤဖိၣ်ဃဲတဖၣ် ဒီးမၤသံပှၤတခီဘီမုၢ်လၢ အအိၣ်ဆိးလၢ ပထံပကီၢ်အပူၤန့ၣ်လီၤ.

⁷ အဝဲသ့ၣ်စံးဝဲ “ယွၤတထံၣ်ပှၤဘၣ်, အံၣ်စရ့လးအကစၢ်ယွၤတပာ်သူၣ်ပာ်သး လၢပှၤဘၣ်.”

⁸ ယပှၤဂီၢ်မုၢ်ဧၢ, သုကဲထီၣ်ပှၤဟးဂီၤဖိထဲသိးန့ၣ်ဧါ. သ့ဒ်လဲၣ်. သုကမၤလိန့ၢ်တၢ်အခါဖဲလဲၣ်.

⁹ ကစၢ်ယွၤလၢအတ့လီၤပနၢ်တဂၤန့ၣ်, တနၢ်ဟူတၢ်ဘၣ်ဧါ. ကစၢ်ယွၤလၢအတ့လီၤပမဲာ်ချံတဂၤန့ၣ် တထံၣ်တၢ်ဘၣ်ဧါ.

¹⁰ ပှၤလၢအသိၣ်က့ၤသီက့ၤပှၤကလုာ်တဖၣ်န့ၣ်, မ့ၢ်တစံၣ်ညီၣ်အဝဲသ့ၣ်ဘၣ်ဧါ. ပှၤလၢအသိၣ်လိပှၤကညီတဂၤ, န့ၣ်အတၢ်သ့ၣ်ညါတအိၣ်နီတမံၤဘၣ်ဧါ.

¹¹ ယွၤသ့ၣ်ညါပှၤကညီအတၢ်ဆိကမိၣ်တဖၣ်, ဒီးသ့ၣ်ညါဝဲပှၤကညီအတၢ်ကူၢ်တၢ်ဆးန့ၣ်မ့ၢ်တၢ်ကလီကလီလီၤ.

¹² ယွၤဧၢ, ပှၤလၢနသိၣ်ဃီၣ်အီၤ, ဒီးလၢနသိၣ်လိအီၤလၢနတၢ်သိၣ်တၢ်သီန့ၣ်ဘၣ်ဆိၣ်ဂ့ၤဝဲလီၤ.

¹³ နဟ့ၣ်အီၤတၢ်အိၣ်ဘှံး လၢတၢ်ကိၢ်တၢ်ဂီၤအမုၢ်နံၤတဖၣ်အပူၤန့ၣ် နဒုးအိၣ်ဘှံးအီၤ, တုၤလီၤလၢတၢ်ပူၤတပူၤဘၣ်တၢ်ခူၣ်အီၤလၢ တၢ်ကဖီၣ်န့ၢ်ပှၤတတီတလိၤအဂီၢ်န့ၣ်လီၤ.

¹⁴ အဂ့ၢ်ဒ်အံၤ, ယွၤတညိကွံာ်ဘၣ်အပှၤဂီၢ်မုၢ်ဘၣ်, ဒီးတလဲၤသဒၣ်ဘၣ်အတၢ်န့ၢ်သါဘၣ်.

¹⁵ တၢ်စံၣ်ညီၣ်တီကအိၣ်က့ၤကဒီးလၢ ကွီၢ်ဘျီၣ်တဖၣ်အပူၤ ဒီးပှၤတီပှၤလိတဖၣ် ကဆီၣ်ထွဲမၤစၢၤအီၤလီၤ.

¹⁶ မ့ၢ်မတၤကဆၢထၢၣ်လၢယဂီၢ်ထီဒါ ပှၤတတီတလိၤန့ၣ်လဲၣ်. မ့ၢ်မတၤကမၤစၢၤယၤ ထီဒါပှၤမၤတၢ်အၢတဖၣ်န့ၣ်လဲၣ်

¹⁷ ယွၤမ့ၢ်တမၤစၢၤယၤဘၣ်န့ၣ်ဒီး, ယကလဲၤတ့ၢ်ယဲချ့သဒံးဆူ တၢ်အိၣ်ဘှီၣ်ကလာ်အလီၢ်န့ၣ်လီၤ.

¹⁸ ဖဲယစံး, “ယလီၤဃံၤလံ” န့ၣ်, ယွၤဧၢ, နတၢ်အဲၣ်ဂၢၢ်ကျၤန့ၣ်, ဒုးဆၢထၢၣ်ကျၢၤယၤလီၤ.

¹⁹ ဖဲယဘၣ်ယိၣ်ဘၣ်ဘီတၢ်ဒီးယသူၣ်ကိၢ်သးဂီၤအခါန့ၣ်, နမၤမုာ်ယၤဒီးမၤသးခုယၤလီၤ.

²⁰ စံၣ်ညီၣ်ကွီၢ်လၢအတတီတလိၤတဖၣ်န့ၣ်, ရ့လိာ်အသးဒီးနၤဘၣ်ကသ့ဝဲဧါ. ပှၤလၢအကူၣ်မၤနၢၤတၢ်န့ၣ် ဘၣ်တၢ်မၤတံာ်တာ်အီၤလၢတၢ်သိၣ်တၢ်သီလီၤ.

²¹ အဝဲသ့ၣ်ကူၣ်ထီဒါသကိးပှၤတီပှၤလိၤ ဒီးစံၣ်ညီၣ်ပှၤလၢ အတၢ်ဒဲးဘးတအိၣ်ဘၣ်လၢတၢ်သံန့ၣ်လီၤ.

²² မ့မ့ၢ်ယွၤဒီသဒၢယၤ, ဒီးယကစၢ်ယွၤကဟုဘံၣ်ကယာ်ဘၢယၤလီၤ.

²³ ယွၤကသိၣ်ဃီၣ်အဝဲသ့ၣ်လၢအတၢ်တတီတလိၤအဃိ ဒီးကမၤဟးဂီၤအဝဲသ့ၣ်လၢ အတၢ်ဒဲးဘးတဖၣ်အဃိန့ၣ်လီၤ. ယွၤပကစၢ်ယွၤကမၤဟးဂီၤအဝဲသ့ၣ်လီၤ.