စံးထီၣ်ပတြၢၤ 9 - Sgaw Karen Common Bible

တၢ်စံးဘျုးစံးဖှိၣ်ကစၢ်ယွၤ လၢအတၢ်စံၣ်ညီၣ်တီအဃိ

¹ ယကစံးထီၣ်ပတြၢၤယွၤလၢယသးဒီဖျၢၣ်ညါ, ယကစံးဘၣ်တဲဘၣ်ယဲ နတၢ်မၤလီၤလးခဲလၢာ်လၢနမၤတ့ၢ်နဲလီၤ.

² ယကသူၣ်ခုသးခုဒီးသူၣ်ဖှံသးညီလၢနပူၤ, ယကသးဝံၣ်စံးထီၣ်ပတြၢၤနမံၤ, တၢ်ထီကတၢၢ်ကစၢ်ယွၤဧၢ.

³ တုၤနလီၣ်ဖျါထီၣ်နသးဒီးယဒုၣ်ယဒါတဖၣ်ဃၣ်ကဒါက့ၤအသးဒီး အဝဲသ့ၣ်လီၤဃံၤဒီးသံဝဲလၢနမဲာ်ညါလီၤ.

⁴ အဂ့ၢ်ဒ်အံၤ, နစံၣ်ညီၣ်တီန့ၢ်တၢ်လၢယဂီၢ်လံ. နဆ့ၣ်နီၤလၢနလီၢ်ပစိာ်အဖီခိၣ်ဒီး စံၣ်ညီၣ်တၢ်တီတီလိၤလိၤလီၤ.

⁵ နသိၣ်ဃီၣ်ပှၤလၢတဘူၣ်ထီၣ်ဘါထီၣ်နၤတဖၣ်, နမၤဟးဂီၤပှၤတတီတလိၤလံ. နတြူာ်ကွံာ်အမံၤလီၤစိၤလီၤထီလံ.

⁶ ပဒုၣ်ပဒါတဖၣ်ဘၣ်တၢ်မၤဟးဂီၤကွံာ်အီၤ လၢာ်လၢာ်ဆ့ဆ့, ဒီးနမၤဟးဂီၤကွံာ်အဝ့ၢ်တဖၣ် ဒီးအဝဲသ့ၣ်ဘၣ်တၢ်သးပ့ၤနီၣ်ကွံာ်အီၤလံ.

⁷ မ့မ့ၢ်, ယွၤမ့ၢ်စီၤပၤလီၤစိၤလီၤထီလီၤ. ပာ်လီၤဝဲအလီၢ်ပစိာ်လၢတၢ်စံၣ်ညီၣ်အဂီၢ်လံ.

⁸ အဝဲပၢပှၤဟီၣ်ခိၣ်ဖိလၢတၢ်တီတၢ်လိၤ, စံၣ်ညီၣ်ပှၤကလုာ်တဖၣ်လၢတၢ်စံၣ်ညီၣ်တီအပူၤ

⁹ ယွၤမ့ၢ်တိာ်တဖျၢၣ်လၢ ပှၤဘၣ်တၢ်မၤအၢမၤနးအီၤအဂီၢ်, ဒီးတၢ်ပူၤဖျဲးအလီၢ်လၢ တၢ်မၤကိၢ်မၤဂီၤအကတီၢ်န့ၣ်လီၤ.

¹⁰ ဒီးပှၤလၢအသ့ၣ်ညါနမံၤန့ၣ်ကသန့ၤအသးလၢနၤလီၤ. အဂ့ၢ်ဒ်အံၤ, ယွၤဧၢ, နတစူးကွံာ်ညိကွံာ်ပှၤလၢအဃုနၤန့ၣ်ဘၣ်.

¹¹ သးဝံၣ်ထီၣ်ယွၤလၢအပၢတၢ်လၢစံယိၣ်, စံးဘၣ်တဲဘၣ်ပှၤကလုာ်ခဲလၢာ် တၢ်လၢအမၤတ့ၢ်ဝဲန့ၣ်တက့ၢ်.

¹² ကစၢ်ယွၤသ့ၣ်နီၣ်ပှၤလၢအဘၣ်တၢ်နးတၢ်ဖှီၣ်, တသးပ့ၤနီၣ်အဝဲသ့ၣ်အတၢ်ကိးထီၣ်အီၤဘၣ်, ဒီးစံၣ်ညီၣ်ပှၤလၢအမၤကမၣ်အဝဲသ့ၣ်လီၤ.

¹³ သူၣ်ကညီၤသးကညီၤယၤယွၤဧၢ, ကွၢ်ယတၢ်နးတၢ်ဖှီၣ်လၢ ယဒုၣ်ယဒါမၤဘၣ်ယၤန့ၣ်တက့ၢ်. ယွၤဧၢ, ဒုးပူၤဖျဲးယၤလၢတၢ်သံ,

¹⁴ ဒ်သိးယကဆၢထၢၣ်ဘၣ်ယဲလၢ ဝ့ၢ်ယရူၤၡလ့ၣ်အပှၤဂီၢ်မုၢ်အမဲာ်ညါ ဒီးစံးဘၣ်အဝဲသ့ၣ်ခဲလၢာ်လၢ ယဘၣ်စံးထီၣ်ပတြၢၤ နၤအဂ့ၢ်န့ၣ်တက့ၢ်. ယကသူၣ်ဖှံသးညီလၢနအုၣ်က့ၤခီၣ်က့ၤယၤအဃိလီၤ.

¹⁵ ပှၤတဘူၣ်ထီၣ်ဘါထီၣ်ယွၤတဖၣ်လီၤတဲာ်နုာ်ဆူ တၢ်ပူၤလၢအခူၣ်ဝဲလီၤ. အခီၣ်ဘၣ်ဘျးလံလၢပှာ်ဧိၤစၤဧိၤလၢ အပာ်လီၤခူသူၣ်ဒၣ်ဝဲန့ၣ်လီၤ.

¹⁶ ယွၤဒုးနဲၣ်အသးခီဖျိအတၢ်စံၣ်ညီၣ်အတီအလိၤတဖၣ်, ဒီးပှၤတတီတလိၤတဖၣ်န့ၣ်, ဘၣ်ဘျးလၢပျံၤသကွီၤလၢ အမၤဝဲလၢအစုဒၣ်ဝဲလီၤ. ဟံၣ်ကယိၣ်စ့လၤ

¹⁷ ကယဲၢ်ပှၤကလုာ်တဖၣ်လၢအသးပ့ၤနီၣ်ကစၢ်ယွၤခဲလၢာ်, ပှၤတတီတလိၤန့ၣ်ကဘၣ်က့ၤဆူပျုၤပူၤလီၤ.

¹⁸ အဂ့ၢ်ဒ်အံၤ, ပှၤအဖှီၣ်အယာ်န့ၣ် တၢ်တသးပ့ၤနီၣ်အီၤတဘိယူၢ်ဃီဘၣ်. ဒီးပှၤဖှီၣ်ဖိယာ်ဖိအတၢ်မုၢ်လၢ်န့ၣ် တဘၣ်တၢ်မၤဟးဂီၤအီၤလီၤစိၤလီၤထီဘၣ်.

¹⁹ ယွၤဧၢ, ဂဲၤဆၢထၢၣ်တက့ၢ်. မ်ပှၤကညီအသုတခီၣ်ဆၢနၤတဂ့ၤ. မ်ပှၤတဘူၣ်ထီၣ်ဘါထီၣ်နၤတဖၣ် ဘၣ်တၢ်စံၣ်ညီၣ်အီၤလၢနမဲာ်ညါတက့ၢ်.

²⁰ ယွၤဧၢ, ပာ်တၢ်ပျံၤတၢ်ဖုးလၢအလိၤ, မ်ပှၤကလုာ်တဖၣ်သ့ၣ်ညါလၢ အမ့ၢ်ဒၣ်ပှၤကညီလၢအသံသ့န့ၣ်တက့ၢ်. စ့လၤ