စံးထီၣ်ပတြၢၤ 88 - Sgaw Karen Common Bible

တၢ်ကိးထီၣ်လၢတၢ်မၤစၢၤအဂီၢ်

¹ ကစၢ်ယွၤ, တၢ်အုၣ်က့ၤခီၣ်က့ၤယၤကစၢ်ယွၤဧၢ, လၢမုၢ်ဆါယကိးထီၣ်နၤလၢတၢ်မၤစၢၤအဂီၢ်, ဒီးလၢမုၢ်နၤယကိးထီၣ်လၢနမဲာ်ညါလီၤ.

² မ်ယတၢ်ထုကဖၣ်ဟဲထီၣ်ဆူနမဲာ်ညါတက့ၢ်. ဒိးနနၢ်လၢယတၢ်ကိးထီၣ်န့ၣ်တက့ၢ်.

³ အဂ့ၢ်ဒ်အံၤ, ယသးပှဲၤဒီးတၢ်ကိၢ်တၢ်ဂီၤ ဒီးယသးသမူအိၣ်ဘူးဒီးတၢ်သံန့ၣ်လီၤ.

⁴ ယဘၣ်တၢ်ဂံၢ်ယၤလၢပှၤလဲၤလီၤဆူတၢ်သံအကီၢ်ပူၤ, ဒီးယမ့ၢ်ပှၤကညီတဂၤလၢ အဂံၢ်အဘါတအိၣ်ဘၣ်န့ၣ်လီၤ.

⁵ ယဘၣ်တၢ်ညိကွံာ်တ့ၢ်လံယၤလၢ ပှၤသံသ့ၣ်တဖၣ်အကျါ, ယလီၤဂာ်ဒီးပှၤသံလၢအမံနီၤလၢတၢ်သွၣ်ခိၣ်အပူၤ, ပှၤသ့ၣ်တဖၣ်လၢနသးပ့ၤနီၣ်တ့ၢ်လံအီၤလၢာ်လၢာ်ဆ့ဆ့, ပှၤလၢနတၢ်မၤစၢၤတတုၤဆူအအိၣ်ဘၣ်န့ၣ်လီၤ.

⁶ နတ့ၢ်လီၤယၤဆူတၢ်ပူၤအယိာ်ကတၢၢ်အပူၤ, လၢတၢ်ခံးကျါဒီးတၢ်ယိာ်အပူၤန့ၣ်လီၤ.

⁷ နတၢ်သးထီၣ်အိၣ်ဃၢလၢယလိၤ, ဒီးနဒုးလုၣ်ဘၢယၤလၢကယဲၢ်နလပီခဲလၢာ်န့ၣ်လီၤ. စ့လၤ

⁸ နမၢယတံၤသကိးသ့ၣ်တဖၣ်ညိကွံာ်ယၤ, ဒီးယကဲထီၣ်တၢ်သး ဘၣ်အၢလၢ အဝဲသ့ၣ်အဂီၢ်လီၤ. ယဘၣ်တၢ်ကဝီၤဃာ်ယၤဒီး ယထူၣ်ဖျဲးထီၣ်တသ့ဘၣ်.

⁹ ယမဲာ်ချံတဖၣ်အဂံၢ်စၢ်ဘါစၢ်လၢတၢ်နးတၢ်ဖှီၣ်အဃိလီၤ. ယွၤဧၢ, ယကိးထီၣ်နၤကိးမုၢ်နံၤမုၢ်နၤဒဲး, ယယူာ်ထီၣ်ယစုဆူနအိၣ်လၢ တၢ်ထုကဖၣ်အပူၤလီၤ.

¹⁰ မ့ၢ်နမၤတၢ်လီၤလးတဖၣ်လၢပှၤသံအဂီၢ်ဧါ. မ့ၢ်အဝဲသ့ၣ်ဂဲၤဆၢထၢၣ်ဒီးစံးထီၣ်ပတြၢၤနၤဧါ. စ့လၤ

¹¹ မ့ၢ်နတၢ်အဲၣ်ဂၢၢ်ကျၢၤဘၣ်တၢ်စံးကတိၤအဂ့ၢ်လၢ တၢ်သွၣ်ခိၣ်အပူၤ, မ့တမ့ၢ်နတၢ်သူၣ်တီသးလိၤလၢ တၢ်ဟးဂီၤအလီၢ်န့ၣ်ဧါ.

¹² မ့ၢ်နတၢ်လီၤလးတဖၣ်ဘၣ်တၢ်သ့ၣ်ညါအီၤလၢ တၢ်ခံးတၢ်နၤအပူၤဧါ. မ့တမ့ၢ်နတၢ်အုၣ်က့ၤခီၣ်က့ၤအတၢ်မၤစၢၤလၢ တၢ်သးပ့ၤနီၣ်အကီၢ်ပူၤစ့ၢ်ကီးဧါ.

¹³ ယွၤဧၢ, မ့မ့ၢ်ယဲဒၣ်အံၤယကိးထီၣ်နၤ, ဒီးလၢမုၢ်ဂီၤန့ၣ်ယတၢ်ထုကဖၣ်ဟဲထီၣ်ဆူ နမဲာ်ညါန့ၣ်လီၤ.

¹⁴ ယွၤဧၢ, ဘၣ်မနုၤလၢနညိကွံာ်ယၤန့ၣ်လဲၣ်. ဘၣ်မနုၤလၢနပာ်တဒၢနမဲာ်လၢယၤန့ၣ်လဲၣ်.

¹⁵ လၢယဖိၣ်သၣ်ခွါထီၣ်လံၤလံၤဒၣ်လဲာ်, ယဘၣ်တ့ၢ်လံ တၢ်နးတၢ်ဖှီၣ်ဒီးဘူးလၢယကသံန့ၣ်လီၤ. ယလီၤဘှံးတ့ၢ်လံယဲလၢနတၢ်သိၣ်ဃီၣ်တဖၣ် အတၢ်ဝံတၢ်ယိးအဃိန့ၣ်လီၤ.

¹⁶ နတၢ်သးကဲၤထီၣ်မၤသဘှံးယၤ နတၢ်ဒုးလၢ နးမးန့ၣ်မၤဟးဂီၤယၤလီၤ.

¹⁷ အဝဲသ့ၣ်အိၣ်ဝးတရံးယၤဒ်ထံလုၣ်ဘၢတၢ်အသိး သ့တနံၤကျၢၤ, ကဝီၤဃာ်ယၤတပူၤဃီလီၤ.

¹⁸ ယတံၤသကိးတဖၣ်လၢ အဘူးကတၢၢ်ဒီးဒၣ်လဲာ်န့ၣ် နပျဲအညိကွံာ်ယၤလီၤ. ဖဲယလဲၤတပူၤလၢ်လၢ်အလီၢ်န့ၣ် အိၣ်ဒၣ်ထဲတၢ်ခံးတၢ်နၤန့ၣ်လီၤ.