စံးထီၣ်ပတြၢၤ 83 - Sgaw Karen Common Bible

တၢ်ထုကဖၣ်လၢတၢ်မၤနၢၤအံၣ်စရ့လး အဒုၣ်အဒါတဖၣ်အဂီၢ်

¹ ကစၢ်ယွၤဧၢ, အိၣ်ဘှ့ၣ်အိၣ်ဘှီၣ်တဂ့ၤ. အိၣ်ဂၢၢ်တပၢၢ်တဂ့ၤ အိၣ်ဃိကလာ်တဂ့ၤ

² ကွၢ်ကွၢ်, နဒုၣ်နဒါတဖၣ်အိၣ်လၢ တၢ်တၢထီၣ်တၢလီၤအပူၤ, ဒီးပှၤလၢအသးဟ့နၤတဖၣ်ပူထီၣ်လီထီၣ်တၢ်လီၤ.

³ အဝဲသ့ၣ်ကူၣ်ထီၣ်တၢ်ကူၣ်ခူသူၣ်ထီဒါနပှၤဂီၢ်မုၢ် ဒီးကူၣ်တၢ်အၢထီဒါပှၤလၢနကဟုဘံၣ်ကယာ်ဘၢ အီၤတဖၣ်န့ၣ်လီၤ.

⁴ အဝဲသ့ၣ်စံးဝဲ, “ဟဲ, မ်ပမၤဟးဂီၤအပှၤကလုာ်, ဒ်သိးအံၣ်စရ့လးကဘၣ်တၢ်သးပ့ၤနီၣ်ကွံာ်အီၤ လီၤစိၤန့ၣ်တက့ၢ်.”

⁵ အဝဲသ့ၣ်ကူၣ်လိာ်သကိးအသးလၢ အသးတဖျၢၣ်ဃီဒီး, မၤတၢ်အၢၣ်လီၤထီဒါနၤ,

⁶ ပှၤဂီၢ်မုၢ်တဖၣ်လၢအဘၣ်ဃးဒီးကီၢ်အဒိၣ်ဒီး ပှၤယံးၡမၤဧ့လးဖိ, ပှၤမိၤအးဖိဒီးပှၤဟၤကၢ်ဖိ,

⁷ ကံးဘလး, ဧၣ်မိၣ်, ဒီးဧမၤလ့းအပှၤဂီၢ်မုၢ်, ပှၤဖလ့ၡသးဖိဒီးပှၤစိၢ်ဖိ,

⁸ ပှၤအၤၡူၢ်ဖိပာ်ဖှိၣ်စ့ၢ်ကီးအသးဒီးအဝဲသ့ၣ် ဒ်ပှၤဒီသိၣ်ဒီမှံၤလၢအဂံၢ်ဆူၣ်ဘါဆူၣ်လၢအမ့ၢ် စီၤလိၣ်အစၢၤအသွဲၣ်တဖၣ်န့ၣ်လီၤ. စ့လၤ

⁹ မၤအဝဲသ့ၣ်ဒ်နမၤပှၤမံးဒယၣ်ဖိအသိး, ဒီးဒ်စီၤစံစရၤ, ဒီးစီၤယၤဘံၣ်လၢထံကျိကံၡိၣ် အသိးန့ၣ်တက့ၢ်.

¹⁰ နမၤနၢၤကွံာ်အဝဲသ့ၣ်လၢဧံၤဒိၣ် ဒီးအခိၣ်တဖၣ်အုၣ်ကွံာ်လၢ ဟီၣ်ခိၣ်လိၤလီၤ.

¹¹ မၤအပှၤခိၣ်ပှၤနၢ်သ့ၣ်တဖၣ်ဒ်နမၤတ့ၢ် စီၤဧိၤရ့ာ်ဒီးစီၤစအ့ာ်အသိး, မၤနၢၤကွံာ်အပဒိၣ်ခဲလၢာ်ဒ်နမၤနၢၤတ့ၢ် စီၤစ့ဘၤဒီးစီၤစးလမူနၤအသိး,

¹² ပှၤလၢအစံးဝဲ, “ထံဧိၤကီၢ်ဧိၤလၢ အဘၣ်ဃးဒီးကစၢ်ယွၤန့ၣ်ပကဟံးန့ၢ်လၢပဂီၢ်လီၤ.”

¹³ အိ, ယကစၢ်ယွၤဧၢ, မၤလီၤပြံလီၤပြါအဝဲသ့ၣ်ဒ်ဖ့အသိး ဒီးဒ်လီၢ်အကမူၣ်လၢ ကလံၤအမဲာ်ညါအသိးန့ၣ်တက့ၢ်.

¹⁴ ဒ်မ့ၣ်အူအီၣ်သ့ၣ်ပှၢ်အသိးဒီးဒ်မ့ၣ်အူလၣ် ကဲၤကပျီၤထီၣ်ကစၢၢ်ကလိအသိးန့ၣ်,

¹⁵ လူၤထွဲအဝဲသ့ၣ်လၢနကလံၤမုၢ်တွၤ, ဒီးမၤပျံၤအဝဲသ့ၣ်လၢနကလံၤ မုၢ်လၢအအူတပျုာ်တပျီၤတၢ် တက့ၢ်.

¹⁶ ယွၤဧၢ, မၤပှဲၤအမဲာ်ဒီးတၢ်မဲာ်ဆှး ဒ်သိးအကဃုသ့ၣ်ညါနမံၤတက့ၢ်.

¹⁷ မ်အဘၣ်တၢ်မဲာ်ဆှးဒီးပျံၤတၢ်ဖုးတၢ်လီၤထူလီၤယိာ်, ဒီးမ်အဟးဂီၤကွံာ်လၢာ်လၢာ်ဆ့ဆ့ လၢတၢ်ဘၣ်ဆိၣ်အၢအပူၤတက့ၢ်.

¹⁸ မ်အဝဲသ့ၣ်, သ့ၣ်ညါလၢထဲနၤတဂၤဧိၤန့ၣ်နမ့ၢ်ယွၤ, ပှၤပၢတၢ်အဒိၣ်ကတၢၢ်လၢဟီၣ်ခိၣ်ချၢန့ၣ်တက့ၢ်.