စံးထီၣ်ပတြၢၤ 81 - Sgaw Karen Common Bible

တၢ်သးဝံၣ်လၢအဘၣ်ဃးဒီး ဘူၣ်တဘူၣ်အဂ့ၢ်

¹ သးဝံၣ်ထီၣ်ကစၢ်ယွၤ, ပဂံၢ်ပဘါ လၢတၢ်သးခုကိးပသူထီၣ်ဒိၣ်ဒိၣ်ဆူ စီၤယၤကိာ်အကစၢ်ယွၤတက့ၢ်.

² စးထီၣ်တၢ်သးဝံၣ်, ပှီၢ်ဒၢဖိတဖၣ်, ဒီးဒ့တၢ်သးဝံၣ်အမုာ်လၢသီတူၢ်ဒီးတနၢ်

³ အူထီၣ်ကွဲၤလၢဘူၣ်အဂီၢ်, ဖဲလါထီၣ်သီဒီးဖဲလါပှဲၤအနံၤန့ၣ်တက့ၢ်.

⁴ အဂ့ၢ်ဒ်အံၤ, တၢ်အံၤမ့ၢ်တၢ်သိၣ်တၢ်သီလၢ အံၣ်စရ့လးအကီၢ်ပူၤ, ဒီးမ့ၢ်စီၤယၤကိာ်အကစၢ်ယွၤအတၢ်မၤလိာ်န့ၣ်လီၤ.

⁵ အဝဲဟ့ၣ်လီၤတၢ်န့ၣ် ဆူအံၣ်စရ့လးအပှၤဂီၢ်မုၢ်, ဖဲအဒုးကီၢ်အဲၤကူပတူးအခါန့ၣ်လီၤ. ယနၢ်ဟူတၢ်ကလုၢ်တမံၤလၢယတသ့ၣ်ညါဘၣ်စံးဝဲ,

⁶ “ယသုးကွံာ်နဖံဘၣ်ခိၣ်အတၢ်ဝံတၢ်ယိး, ဒီးနစုတဖၣ်ထူၣ်ဖျဲးထီၣ်လၢတၢ်ဃၢတၢ်စုာ် အလိၤလံ.”

⁷ လၢသုဘၣ်တၢ်ကိၢ်တၢ်ဂီၤန့ၣ်သုကိးထီၣ်ယၤ, ဒီးယမၤပူၤဖျဲးသုလီၤ. ယစံးဆၢသုလၢလီသီၣ်အလီၢ်ခူသူၣ်, ဒီးယမၤကွၢ်သုဖဲမရံၤဘါအထံထီၣ်ပၢၢ်လီၤ. စ့လၤ

⁸ ယပှၤဂီၢ်မုၢ်သ့ၣ်ဧၢ, ကနၣ်တၢ်, ယတၢ်ဟ့ၣ်ပလီၢ် အံၣ်စရ့လးဧၢ, ယဆၢလၢနကဒိကနၣ်ယၤဆံးဒိၣ်လဲၣ်.

⁹ သုတဘၣ်ဘူၣ်ထီၣ်ဘါထီၣ်ကစၢ်အဂၤနီတစုဘၣ်.

¹⁰ ယဲဒၣ်အံၤယမ့ၢ်ယွၤသုကစၢ်ယွၤ လၢအဒုးဟးထီၣ်သု လၢအဲၤကူပတူးအကီၢ်ပူၤလီၤ. အဲးထီၣ်သုထးခိၣ်လဲၢ်လဲၢ်တက့ၢ်. ဒီးယကမၤပှဲၤအီၤလီၤ.

¹¹ “ဘၣ်ဆၣ်ယပှၤဂီၢ်မုၢ်တဒိကနၣ်ယကလုၢ်ဘၣ်. အံၣ်စရ့လးတစူၢ်ယၤဘၣ်.

¹² အဃိ, ယပျဲလဲၤအဝဲသ့ၣ်ဆူအသးအၢအကျဲပူၤ ဒီးဒုးမၤအီၤတၢ်လၢ အအဲၣ်ဒိးဝဲန့ၣ်လီၤ.

¹³ ယဆၢလၢယပှၤဂီၢ်မုၢ်ကဒိကနၣ်ယၤဆံးဒိၣ်လဲၣ်. ယဆၢလၢအဝဲသ့ၣ်ကစူၢ်ယၤဆံးဒိၣ်လဲၣ်.

¹⁴ ယကမၤဃၣ်ကွံာ်အဒုၣ်အဒါတဖၣ်ချ့သဒံး ဒီးမၤနၢၤကွံာ်အဒုၣ်အဒါခဲလၢာ်န့ၣ်လီၤ.

¹⁵ ပှၤလၢအသးဟ့ယၤတဖၣ်ကဆုးလီၤအခိၣ်လၢ ယမဲာ်ညါလၢတၢ်ပျံၤအပူၤ, တၢ်သိၣ်ဃီၣ်လၢအဂီၢ်ကအိၣ်ဝဲလီၤစိၤလီၤထီလီၤ.

¹⁶ မ့မ့ၢ်ယဲၢအံၤယကဒုးအီၣ်နၤလၢဘုကၠူၣ်အဂ့ၤကတၢၢ် ဒီးဒုးမံသူၣ်မံသးနၤလၢကနဲစီအမံၤန့ၣ်လီၤ.”