စံးထီၣ်ပတြၢၤ 8 - Sgaw Karen Common Bible

ကစၢ်ယွၤအလၤကပီၤဒီးပှၤကညီ အသူးအသ့ၣ်

¹ ယွၤ, ပကစၢ်ဧၢ, နမံၤလၢဟီၣ်ခိၣ်ဒီဘ့ၣ်ညါန့ၣ် ဒိၣ်စိဒိၣ်ကမီၤဆံးဒိၣ်လဲၣ်. နလၤကပီၤအိၣ်လၢမူခိၣ်န့ၣ်, ဘၣ်တၢ်သးဝံၣ်စံးထီၣ်ပတြၢၤအီၤလၢ

² ဖိသၣ်တဖၣ်ဒီးဖိသၣ်အီနုၢ်ထံတဖၣ်အထးခိၣ်လီၤ. နပူၤဖျဲးလၢနဒုၣ်နဒါခဲလၢာ် ဒီးတၢ်အၢတဘၣ်ဘၣ်နၤလၢၤဘၣ်. နဆိကတီၢ်ကွံာ်ပှၤတဂၤလၢ်လၢ်လၢ အထီဒါနၤန့ၣ်လီၤ.

³ တုၤယကွၢ်ထီၣ်မူခိၣ်လၢနတ့အီၤ, လါဒီးဆၣ်ဧိၤဖီဧိၤ လၢနပာ်လီၤလၢအလီၢ်ဒၣ်ဝဲန့ၣ်ဒီး,

⁴ ပှၤကညီလၢနကသ့ၣ်နီၣ်ထီၣ်က့ၤအီၤ, ဒီးပှၤကညီဖိလၢနကသူၣ်အိၣ်သးအိၣ်အီၤန့ၣ်, မ့ၢ်မနုၤလဲၣ်.

⁵ နတ့ပှၤကညီဒီးပာ်အီၤအတီၤဖုၣ်န့ၢ်ဒၣ်ထဲနၤဧိၤဒၣ်လဲာ်. နကုာ်အခိၣ်လၢတၢ်လၤကပီၤဒီး တၢ်ပာ်ဒိၣ်ပာ်ထီန့ၣ်လီၤ.

⁶ နဒုးပၢအီၤလၢနစုအတၢ်ဘၣ်တ့ခဲလၢာ်, နပာ်လီၤတၢ်ခဲလၢာ်လၢအခီၣ်ဖီလာ်,

⁷ သိဒီးဂီၤဘုၣ်ဂီၤဖံးခဲလၢာ်, ဒီးဆၣ်ဖိကီၢ်ဖိအမံၤခဲလၢာ်,

⁸ ထိၣ်ဧိၤလံာ်ဧိၤလၢမူကပိာ်လိၤ, ဒီးဒ့ၣ်ဧိၤညၣ်ဧိၤလၢပီၣ်လဲၣ်ပူၤဒီး တၢ်ဘၣ်တ့လၢအအိၣ်လၢပီၣ်လဲၣ်ပူၤခဲလၢာ်လီၤ.

⁹ ယွၤ, ပကစၢ်ဧၢ, နမံၤလၢဟီၣ်ခိၣ်ဒီဘ့ၣ်ညါန့ၣ် ဒိၣ်စိဒိၣ်ကမီၤဆံးဒိၣ်လဲၣ်.