စံးထီၣ်ပတြၢၤ 77 - Sgaw Karen Common Bible

တၢ်မၤမုာ်ထီၣ်က့ၤလၢတၢ်ကိၢ်တၢ်ဂီၤ အကတီၢ်

¹ ယကိးပသူထီၣ်တၢ်ဆူကစၢ်ယွၤအအိၣ်, ယကိးပသူထီၣ်ဒီးအဝဲဒၣ်ဒိကနၣ်ယၤလီၤ.

² လၢယတၢ်ကိၢ်တၢ်ဂီၤအမုၢ်နံၤန့ၣ်, ယဃုယွၤ, ယစုယူာ်ထီၣ်အသးလၢမုၢ်နၤ လၢတၢ်တလီၤဘှံးလီၤတီၤဘၣ်အပူၤ, ဘၣ်ဆၣ်တၢ်မၤမုာ်ထီၣ်က့ၤယၤတသ့ဘၣ်.

³ တုၤယဆိကမိၣ်ထီၣ်ကစၢ်ယွၤန့ၣ်ဒီး, ယဟီၣ်ယယၢၤယဲ, ဒီးယသးလီၤဘှါယဲလီၤ. စ့လၤ

⁴ နဟံးဃာ်ယမဲာ်ဖံးလၢတၢ်ဆိးသီအပူၤလီၤ. ယကိၢ်ယဂီၤတၢ်ဒိၣ်မးတုၤဒၣ်လဲာ် ယကတိၤတၢ်တသ့လၢၤဘၣ်န့ၣ်လီၤ.

⁵ ယဆိကမိၣ်တၢ်လၢမုၢ်နံၤလၢပျၢၤတဖၣ်, ယသ့ၣ်နီၣ်ထီၣ်က့ၤနံၣ်ဧိၤလါဧိၤလၢပျၢၤန့ၣ်လီၤ.

⁶ ယသ့ၣ်နီၣ်ထီၣ်က့ၤယတၢ်သးဝံၣ်လၢမုၢ်နၤလၢယသး, ယဆိကမိၣ်ထီၣ်တၢ်ဒီး တၢ်အံၤမ့ၢ်တၢ်လၢ ယသံကွၢ်လီၤက့ၤယသး,

⁷ “မ့ၢ်ယွၤကညိကွံာ်ပှၤထီဘိဧါ. မ့ၢ်အဝဲတဘၣ်သူၣ်ဘၣ်သးက့ၤလၢၤပှၤ နီတဘျီဘၣ်န့ၣ်ဧါ.

⁸ ဆိကတီၢ်တ့ၢ်လံအတၢ်အဲၣ်ပှၤန့ၣ်ဧါ. မ့ၢ်အတၢ်အၢၣ်လီၤတဖၣ်တအိၣ်နီတဘျီ လၢၤဘၣ်န့ၣ်ဧါ.

⁹ မ့ၢ်ကစၢ်ယွၤသးပ့ၤနီၣ်တ့ၢ်လံလၢကသးကညီၤတၢ်န့ၣ်ဧါ. မ့ၢ်အတၢ်သးထီၣ်ဟံးန့ၢ် အတၢ်သးကညီၤအလီၢ်န့ၣ်လံဧါ. စ့လၤ

¹⁰ အန့ၣ်ဒီးယစံး, “တၢ်လၢအမၤဘၣ်ဒိဆါယၤအဒိၣ်ကတၢၢ် မ့ၢ်ဝဲ, ကစၢ်ယွၤအစိကမီၤတအိၣ် လၢၤဘၣ်န့ၣ်လီၤ.”

¹¹ ကစၢ်ယွၤဧၢ, ယကသ့ၣ်နီၣ်ထီၣ်က့ၤနတၢ်မၤဖးဒိၣ်တဖၣ် ဒီးယကစံးဘၣ်တဲဘၣ်တၢ်မၤလီၤလးတဖၣ်လၢ နမၤတ့ၢ်လၢအပူၤကွံာ်န့ၣ်လီၤ.

¹² ယကဆိကမိၣ်ထီၣ်က့ၤကယဲၢ်တၢ်လၢနမၤတ့ၢ်ခဲလၢာ် ဒီးနစိနကမီၤအတၢ်ဖံးတၢ်မၤတဖၣ်န့ၣ်လီၤ.

¹³ ကစၢ်ယွၤဧၢ, နကျဲခဲလၢာ်န့ၣ်စီဆှံဝဲလီၤ. မ့ၢ်ကစၢ်လၢအဒိၣ်ဝဲဒ်ပကစၢ်အသိးန့ၣ်အိၣ်ဝဲဧါ.

¹⁴ နမ့ၢ်ကစၢ်ယွၤလၢအမၤတၢ်လီၤလးတဖၣ်, ဒီးဒုးနဲၣ်ဖျါနစိနကမီၤလၢ ပှၤကလုာ်တဖၣ်အကျါန့ၣ်လီၤ.

¹⁵ လၢနစိနကမီၤန့ၣ်နအုၣ်က့ၤခီၣ်က့ၤနပှၤဂီၢ်မုၢ်, စီၤယၤကိာ်ဒီးစီၤယိၤသးအစၢၤအသွဲၣ်တဖၣ်လီၤ. စ့လၤ

¹⁶ ကစၢ်ယွၤဧၢ, တုၤမ့ၢ်ထံတဖၣ်ထံၣ်နၤဒီးအဝဲသ့ၣ်ပျံၤတၢ် ဒီးပီၣ်လဲၣ်အတၢ်ယိာ်တဖၣ်ဟူးဝးဝဲလီၤ.

¹⁷ တၢ်အၢၣ်တဖၣ်လူလီၤထံ, မူကပိာ်လိၤဒုးသီၣ်လီ ဒီးလီဝၢ်ဒံးကပြ့ၢ်ထီၣ်လၢ တၢ်လီၢ်ကိးကပၤဒဲးလီၤ.

¹⁸ နလီသီၣ်အိၣ်ဝဲလၢကလံၤသဝံးအပူၤ, လီဝၢ်ဒံးန့ၣ်မၤကပီၤထီၣ်ဟီၣ်ခိၣ် ဒီးဟီၣ်ခိၣ်ဆှဲးဆှိးဒီးဟူးဝးဝဲလီၤ.

¹⁹ နလဲၤခီဂာ်လပီတဖၣ် ဒီးနခီဂာ်ပီၣ်လဲၣ်လၢအယိာ်ဝဲ, ဘၣ်ဆၣ်နခီၣ်လီၢ်တဖၣ်တၢ်ထံၣ်န့ၢ်အီၤတသ့ဘၣ်.

²⁰ နဆှၢနပှၤဂီၢ်မုၢ်ဒ်သိတဖုအသိး လၢစီၤမိၤၡ့ဒီးစီၤအၤဟရိၣ်အစုန့ၣ်လီၤ.