စံးထီၣ်ပတြၢၤ 74 - Sgaw Karen Common Bible

တၢ်ထုကဖၣ်လၢပှၤကလုာ်အတၢ်ပူၤဖျဲးအဂီၢ်

¹ ကစၢ်ယွၤဧၢ, ဘၣ်မနုၤလၢနညိကွံာ်ပှၤ လီၤထူလီၤယိာ်န့ၣ်လဲၣ်. ဘၣ်မနုၤလၢနတၢ်သးထီၣ်အမ့ၣ်အူခုၣ်ထီၣ်ထီဒါ နတၢ်အီၣ်ဆၣ်အလီၢ်အသိတဖုန့ၣ်လဲၣ်.

² သ့ၣ်နီၣ်ထီၣ်က့ၤနပှၤဂီၢ်မုၢ်, ပှၤလၢနဃုထၢတ့ၢ်လံလၢနဂီၢ်လၢပျၢၤ, လၢနထုးထီၣ်ကွံာ်အီၤလၢကုၢ်အလီၢ် လၢကကဲထီၣ်နဒူၣ်ဖိထၢဖိဒၣ်နဲန့ၣ်တက့ၢ်. သ့ၣ်နီၣ်ထီၣ်က့ၤကစၢၢ်စံယိၣ်, လၢတဘျီနအိၣ်နဆိးတ့ၢ်နဲန့ၣ်တက့ၢ်.

³ ပဒုၣ်ပဒါတဖၣ်မၤဟးဂီၤတ့ၢ်လံတၢ်ခဲလၢာ်လၢ အအိၣ်လၢတၢ်လုၢ်ဟံၣ်အပူၤန့ၣ်လံ. ကွၢ်ဃုသ့ၣ်ညါတၢ်ဟးဂီၤလၢာ်လၢာ်ဆ့ဆ့ တဖၣ်အံၤန့ၣ်တက့ၢ်.

⁴ နဒုၣ်နဒါတဖၣ်ကိးထီၣ်လၢတၢ်မၤနၢၤအပူၤ, လၢနတၢ်လုၢ်ဟံၣ်အပူၤန့ၣ်လီၤ. ဖဲန့ၣ်အဝဲသ့ၣ်သူၣ်ထီၣ်အနီၣ်တယၣ်တဖၣ်ဒ် တၢ်မၤနၢၤအပနီၣ်တဖၣ်အသိးလီၤ.

⁵ အဝဲသ့ၣ်လီၤဂာ်ဒီးပှၤကျီသ့ၣ်လၢ အကျီလီၤကွံာ်သ့ၣ်တဖၣ်လၢအကွါန့ၣ်လီၤ.

⁶ အဝဲသ့ၣ်ကျီဟးဂီၤကွံာ်သ့ၣ်အဂီၤပၤတဖၣ် လၢအကွါဒီးခံၣ်ခူၣ်တဖၣ်န့ၣ်လီၤ.

⁷ အဝဲသ့ၣ်မၤဟးဂီၤနတၢ်လုၢ်ဟံၣ်ဒီး ဒွဲၣ်အူကွံာ်ဝဲဒၣ်လၢမ့ၣ်အူန့ၣ်လီၤ. နတၢ်ဘူၣ်ထီၣ်ဘါထီၣ်အလီၢ်န့ၣ်အဝဲသ့ၣ် မၤဘၣ်အၢဘၣ်သီကွံာ်ဝဲ န့ၣ်လီၤ.

⁸ အဝဲသ့ၣ် စံးလီၤအသးလၢ အဲၣ်ဒိးမၤဟးဂီၤကွံာ်ပှၤ လၢာ်လၢာ်ဆ့ဆ့လီၤ. အဝဲသ့ၣ်ဒွဲၣ်ကွံာ်ကယဲၢ်မ့ၢ်ယွၤအတၢ်လီၢ်စီဆှံ တဖၣ်လၢထံကီၢ်အပူၤန့ၣ်လီၤ.

⁹ ပတထံၣ်ဘၣ်ပတၢ်ပနီၣ်စီဆှံတဖၣ်လၢၤဘၣ်, ဝံတအိၣ်လၢၤနီတဂၤဘၣ်, ဒီးတၢ်အံၤကယံာ်ဆံးယံာ်လဲၣ်န့ၣ် ပှၤလၢပကျါတသ့ၣ်ညါနီတဂၤဘၣ်.

¹⁰ ကစၢ်ယွၤဧၢ, ပဒုၣ်ပဒါသ့ၣ်တဖၣ် ကနံၤဘၣ်ဖၣ်လဲနၤဆံးယံာ်လဲၣ်. မ့ၢ်အဝဲသ့ၣ်ကကတိၤတရီတပါနမံၤထီဘိဧါ.

¹¹ ဘၣ်မနုၤလၢနထုးက့ၤနစုန့ၣ်လဲၣ်. ဘၣ်မနုၤလၢနပၢၤဃာ်နစုထွဲလၢ လီၢ်ခံန့ၣ်လဲၣ်.

¹² ကစၢ်ယွၤမ့ၢ်ယစီၤပၤလၢပျၢၤ, လၢအမၤတၢ်အုၣ်က့ၤခီၣ်က့ၤလၢ ထံဧိၤကီၢ်ဧိၤအပူၤလီၤ.

¹³ နမၤသ့ၣ်ဖးပီၣ်လဲၣ်လၢနဂံၢ်နဘါလီၤ. နဘိးကၢ်ပယိၤအခိၣ်လၢထံကျါလီၤ.

¹⁴ နမၤလီၤကလဲသမၣ်အခိၣ်, ဒီးနဟ့ၣ်လီၤကွံာ်အီၤဒ်တၢ်အီၣ်လၢပှၤအိၣ်လၢ ပှၢ်မုၢ်ကနၢတဖၣ်အဂီၢ်အသိးန့ၣ်လီၤ.

¹⁵ နဒုးယွၤလီၤထံကျိဖိဒီးထံထီၣ်ပၢၢ် ဒီးနဒုးဃ့ထီၣ်ကွံာ်ထံကျိဖးဒိၣ်တဖၣ်လီၤ.

¹⁶ နတ့လီၤမုၢ်ဆါဒီးမုၢ်နၤ, ဒီးနပာ်လီၤမုၢ်ဒီးလါလၢအလီၢ်ဒၣ်ဝဲန့ၣ်လီၤ.

¹⁷ နပာ်လီၤဟီၣ်ခိၣ်အသရ့ၤ, ဒီးနတ့တၢ်ကိၢ်ကတီၢ်ဒီးတၢ်ဂိၢ်အကတီၢ်န့ၣ်လီၤ.

¹⁸ ကစၢ်ယွၤဧၢ, သ့ၣ်နီၣ်ထီၣ်က့ၤတၢ်အံၤ, လၢနဒုၣ်နဒါဒုၣ်ဒွဲၣ်နၤဒ်လဲၣ်, ဒီးပှၤဂီၢ်မုၢ်လၢအတစီတဆှံ မၤတရီတပါနမံၤဒ်လဲၣ်န့ၣ်တက့ၢ်.

¹⁹ ဟ့ၣ်လီၤကွံာ်နထိၣ်လွံၢ်ဘုၣ်အသးဆူ တၢ်မံၤလာ်တဖၣ်န့ၣ်တဂ့ၤ. ဒီးသးပ့ၤနီၣ်ကွံာ်နပှၤဂီၢ်မုၢ်လၢအဘၣ်နးဘၣ်ဖှီၣ်အသးသမူ လီၤထူလီၤယိာ်တဂ့ၤ.

²⁰ သ့ၣ်နီၣ်ထီၣ်က့ၤနတၢ်အၢၣ်လီၤလၢ နမၤတ့ၢ်ဒီးပှၤန့ၣ်တက့ၢ်. တၢ်မၤတၢ်လၢတၢ်စုဆူၣ်ခီၣ်တကးအိၣ်လၢ ထံကီၢ်ပူၤလၢတၢ်လီၢ်အခံးကိးတီၤဒဲးလီၤ.

²¹ မ်ပှၤလၢအဘၣ်တၢ်မၤအၢမၤနး အသုတဘၣ်တၢ်မၤမဲာ်ဆှးအီၤန့ၣ်တဂ့ၤ. မ်ပှၤဖှီၣ်ဖိယာ်ဖိဒီးပှၤလၢအလိၣ်ဘၣ် တၢ်မၤစၢၤသ့ၣ်တဖၣ်စံးထီၣ်ပတြၢၤနၤတက့ၢ်.

²² ကစၢ်ယွၤဧၢ, ထိၣ်ဂဲၤထီၣ်နသးဒီး ဒီဒၣ်နကွီၢ်န့ၣ်တက့ၢ်. သ့ၣ်နီၣ်ထီၣ်က့ၤပှၤလၢအတအိၣ်ဒီးယွၤ နံၤဘၣ်ဖၣ်လဲနၤဒီတနံၤညါန့ၣ်တက့ၢ်.

²³ သးပ့ၤနီၣ်နဒုၣ်နဒါတဖၣ် အတၢ်ကိးထီၣ်လၢတၢ်သးထီၣ်အပူၤ, ပှၤလၢအထီဒါနၤတဖၣ်အတၢ်တၢထီၣ်တၢလီၤ လၢအသီၣ်ထီၣ်ဝဲတထံၣ်ဃီန့ၣ်တဂ့ၤ.