စံးထီၣ်ပတြၢၤ 70 - Sgaw Karen Common Bible

တၢ်ထုကဖၣ်လၢတၢ်မၤစၢၤအဂီၢ်

¹ ကစၢ်ယွၤဧၢ, မၤပူၤဖျဲးယၤတက့ၢ်. ယွၤဧၢ, မၤချ့ချ့လၢနကမၤစၢၤယၤတက့ၢ်.

² ပှၤလၢအဃုယသးသမူတဖၣ်န့ၣ် မ်အဘၣ်တၢ်မၤမဲာ်ဆှးဒီး ဘၣ်တၢ်မၤကဒံကဒါအီၤန့ၣ်တက့ၢ်. ပှၤလၢအဆၢမၤဆါယၤန့ၣ် မ်အဝဲသ့ၣ်ဂုၤက့ၤဆူအလီၢ်ခံဒီး ဘၣ်တၢ်မၤဟးဂီၤအလၤကပီၤန့ၣ်တက့ၢ်.

³ ပှၤလၢအစံး, အၣ်ဟါ, အၣ်ဟါန့ၣ် မ်အဘၣ်တၢ်မၤပျံၤမၤဖုးအီၤလၢ အတၢ်မဲာ်ဆှးအဃိန့ၣ်တက့ၢ်.

⁴ ပှၤလၢအဃုနၤခဲလၢာ်န့ၣ် မ်အသူၣ်ဖှံသးညီဒီးသူၣ်ခုသးခုလၢနပူၤတက့ၢ်. မ်ပှၤလၢအအဲၣ်နတၢ်အုၣ်က့ၤခီၣ်က့ၤတဖၣ်န့ၣ် စံးဝဲထီဘိ “ကစၢ်ယွၤန့ၣ်ဒိၣ်ဝဲ” န့ၣ်တက့ၢ်.

⁵ ယမ့ၢ်ပှၤဖှီၣ်ဖိယာ်ဖိဒီး ပှၤလိၣ်ဘၣ်တၢ်မၤစၢၤန့ၣ်လီၤ. ကစၢ်ယွၤဧၢ, မၤချ့ချ့လၢယဂီၢ်န့ၣ်တက့ၢ်. နမ့ၢ်ယတၢ်မၤစၢၤဒီးပှၤမၤပူၤဖျဲးယၤလီၤ. ယွၤဧၢ, မၤယံာ်မၤနီၢ်နသးတဂ့ၤ.