စံးထီၣ်ပတြၢၤ 69 - Sgaw Karen Common Bible

တၢ်ကိးထီၣ်လၢတၢ်မၤစၢၤအဂီၢ်

¹ ကစၢ်ယွၤဧၢ, အုၣ်က့ၤခီၣ်က့ၤယၤတက့ၢ်. အဂ့ၢ်ဒ်အံၤ ထံတဖၣ်ဟဲထီၣ်ပၢၢ်တုၤလၢယကိာ်န့ၣ်လီၤ.

² ယလီၤဘျၢလၢကပံာ်ယိာ်အကျါ, ဒီးဆၢထၢၣ်အလီၢ်တအိၣ်ဘၣ်. ယဟဲနုာ်တ့ၢ်လၢထံယိာ်အကျါ, ဒီးထံလုၣ်ဘၢယၤလီၤ.

³ တၢ်ဘှံးယသးလၢယကိးထီၣ်အဃိ, ဒီးယကိာ်ယူၢ်ဃ့ထီဝဲလီၤ. ယမဲာ်ယုာ်ဝဲလၢယကွၢ်လၢ်ယကစၢ်ကဟဲ ဒီးမၤစၢၤယၤအဂီၢ်အဃိန့ၣ်လီၤ.

⁴ ပှၤလၢအသးဟ့ယၤကလီကလီတဖၣ်န့ၣ် အိၣ်ဝဲအါန့ၢ်ယခိၣ်သူအဘိတက့ၢ်လီၤ. ပှၤလၢကမၤဟးဂီၤယၤ, ပှၤလၢအထီဒါယၤ လၢတၢ်လီတၢ်ဝ့ၤအပူၤတဖၣ်န့ၣ် အိၣ်ဝဲအါမးန့ၣ်လီၤ. အဝဲသ့ၣ်မၢ ယဟ့ၣ်ကဒါက့ၤတၢ်လၢ ယတဟုၣ်န့ၢ်အီၤဘၣ်လီၤ.

⁵ ကစၢ်ယွၤဧၢ, နသ့ၣ်ညါယတၢ်သူၣ်တဆးသးတဆးလီၤ. ယတၢ်ဒဲးဘးတဖၣ်လၢယမၤတ့ၢ်လံအီၤန့ၣ် တအိၣ်တဒၢဘၣ်လၢနၤဘၣ်.

⁶ ယွၤ, တၢ်သုးမုၢ်ဂီၢ်မုၢ်အကစၢ်ယွၤဧၢ, မ်ပှၤလၢအမုၢ်လၢ်တၢ်လၢနၤတဖၣ်န့ၣ် အသုတ ဘၣ်တၢ်မၤမဲာ်ဆှးအီၤလၢယဃိန့ၣ်တဂ့ၤ. အံၣ်စရ့လးအကစၢ်ယွၤဧၢ, မ်ပှၤလၢအဃုနၤတဖၣ်န့ၣ်အသုတဘၣ် တၢ်မၤတရီတပါအီၤလၢယဃိန့ၣ်တဂ့ၤ.

⁷ အဂ့ၢ်ဒ်အံၤ, ယဘၣ်တၢ်ဒုၣ်ဒွဲၣ်လၢနဃိလီၤ. တၢ်မဲာ်ဆှးလုၣ်ဘၢတ့ၢ်လံယမဲာ်လံ.

⁸ ယကဲထီၣ်တ့ၢ်လံပှၤသမှံၤလၢယဒီပုၢ်ဝဲၢ် သ့ၣ်တဖၣ်အဂီၢ်, လီၤဂာ်ဒီးပှၤတခီဘီမုၢ်ဖိလၢယမိၢ်အဖိတဖၣ် အဂီၢ်န့ၣ်လီၤ.

⁹ အဂ့ၢ်ဒ်အံၤ, ယတၢ်သးဆူၣ်လၢနဟံၣ်အဂီၢ်န့ၣ် အီၣ်ကွံာ်ယၤဒ်မ့ၣ်အူအသိး ဒီးပှၤအတၢ်ဒုၣ်ဒွဲၣ်နၤန့ၣ် လီၤဘၣ်လၢယလိၤလီၤ.

¹⁰ တုၤယဆီၣ်လီၤယသးလၢတၢ်ဒုၣ်တၢ်အီၣ်န့ၣ် ကဲထီၣ်က့ၤဝဲလၢတၢ်ဒုၣ်ဒွဲၣ်ယၤန့ၣ်လီၤ.

¹¹ ယသိးထီၣ်တၢ်သးအုးအကူအသိးဒီး အဝဲသ့ၣ်နံၤဘၣ်ယၤလီၤ.

¹² ယကဲထီၣ်တၢ်ဘၣ်ကတိၤအလီၢ်လၢပှၤလၢ အဆ့ၣ်နီၤလၢပဲတြီဒီး ပှၤအီမူၤသံးတဖၣ်မၤတၢ်သးဝံၣ်တဖၣ်ဘၣ်ဃး ဒီးယၤလီၤ.

¹³ ယွၤဧၢ, မ့မ့ၢ်ယဲဒၣ်အံၤ, ယဘါထုကဖၣ်တၢ်ဆူနၤလီၤ. ကစၢ်ယွၤဧၢ, လၢဆၢကတီၢ်လၢနဃုထၢအီၤ ဒီးလၢနတၢ်အဲၣ်ဂၢၢ်ကျၢၤလၢလၢပှဲၤပှဲၤအပူၤန့ၣ် စံးဆၢလၢ်ယၤတက့ၢ်. အဂ့ၢ်ဒ်အံၤ, နဟံးဃာ်ကျၢၤနတၢ်အၢၣ်လီၤအီလီၤလၢ နကအုၣ်က့ၤခီၣ်က့ၤတၢ်လီၤ.

¹⁴ မၤပူၤဖျဲးယၤလၢတၢ်လီၤဘျၢလၢကပံာ်န့ၣ်တက့ၢ်. မ်ယဘၣ်တၢ်မၤပူၤဖျဲးယၤလၢဒုၣ်ယဒါတဖၣ် ဒီးလၢထံယိာ်တဖၣ်န့ၣ်တက့ၢ်.

¹⁵ မ်ထံသုတလုၣ်ဘၢယၤတဂ့ၤ. မ်ထံယိာ်အသုတယူၢ်လီၤကွံာ်ယၤတဂ့ၤ. မ်တၢ်ပူၤအသုတကျၢၢ်ဘၢအကိာ်ပူၤလၢယၤတဂ့ၤ.

¹⁶ ယွၤဧၢ, စံးဆၢလၢ်ယၤတက့ၢ်. အဂ့ၢ်ဒ်အံၤ, နတၢ်အဲၣ်ဂၢၢ်ကျၢၤမ့ၢ်တၢ်ဂ့ၤလီၤ. ဃၣ်နသးဆူယအိၣ်ဒ်နတၢ်သးကညီၤ အလၢအပှဲၤအသိးန့ၣ်တက့ၢ်.

¹⁷ ပာ်တဒၢနမဲာ်လၢနခ့နပှၤအအိၣ်န့ၣ်တဂ့ၤ. အဂ့ၢ်ဒ်အံၤ, ယအိၣ်လၢတၢ်ကိၢ်တၢ်ဂီၤဖးဒိၣ်အပူၤလီၤ. မၤချ့ချ့လၢနကစံးဆၢယၤန့ၣ်တက့ၢ်.

¹⁸ သုးဘူးနသးဆူယအိၣ်တက့ၢ်. ပှ့ၤက့ၤယၤတက့ၢ်. မၤပူၤဖျဲးယၤလၢယဒုၣ်ယဒါအစုပူၤန့ၣ်တက့ၢ်.

¹⁹ နသ့ၣ်ညါယဘၣ်တၢ်ဒုၣ်ဒွဲၣ်ယၤဒ်လဲၣ်, တၢ်မၤမဲာ်ဆှးဒီး မၤတရီတပါယၤဒ်လဲၣ်, နထံၣ်ယဒုၣ်ယဒါခဲလၢာ်လီၤ.

²⁰ တၢ်ဒုၣ်ဒွဲၣ်ဒုးသူၣ်ကၢ်သးလီၤတ့ၢ်ယၤ, တုၤဒၣ်လဲာ်ယအိၣ်လၢ တၢ်သူၣ်ဟးဂီၤသးဟးဂီၤအပူၤန့ၣ်လီၤ. ယကွၢ်လၢ်ပှၤလၢအကသးကညီၤတၢ်, ဘၣ်ဆၣ်တအိၣ်နီတဂၤဘၣ်. ဒီးပှၤလၢအမၤမုာ်တၢ်တဖၣ်, ဘၣ်ဆၣ်ယတထံၣ်န့ၢ်နီတဂၤဘၣ်.

²¹ တုၤတၢ်သၣ်ဝံၤယသးဒီးအဝဲသ့ၣ်ဟ့ၣ်ယၤ တၢ်အစုၣ်လၢတၢ်အီၣ်အဂီၢ် ဒီးတုၤတၢ်သူယသးလၢထံဒီးအဝဲသ့ၣ်ဟ့ၣ်ယၤ တၤဆံၣ်အထံလၢယကအီအဂီၢ်န့ၣ်လီၤ.

²² မ်အစီၢ်နီၤခိၣ်ကဲထီၣ်ထုတဆိလၢအမဲာ်ညါတက့ၢ်. မ်အတၢ်အီၣ်လုၢ်ထီၣ်ပာ်ထီၣ်တဖၣ်အံၤ ကဲထီၣ်ပျံၤသကွီၤန့ၣ်တက့ၢ်.

²³ မ်အမဲာ်ခံးလီၤဒ်သိးအသုတထံၣ်ဘၣ် တၢ်တဂ့ၤအဂီၢ်န့ၣ်တက့ၢ်. ဒီးဒုးကနိးအယီၢ်ဒ့တထံၣ်ဃီန့ၣ်တက့ၢ်.

²⁴ လူလီၤနတၢ်သးထီၣ်လၢအလိၤတက့ၢ်. ဒီးမ်နတၢ်သးဒိၣ်အတၢ်ကဲၤထီၣ်ချုးန့ၢ်အီၤတက့ၢ်.

²⁵ မ်အအိၣ်အဆိးအလီၢ်အိၣ်သယုၢ်တက့ၢ်. မ်ပှၤအသုတအိၣ်တဆိးလၢ အဒဲတဖၣ်အပူၤန့ၣ်တဂ့ၤ.

²⁶ အဂ့ၢ်ဒ်အံၤ, အဝဲသ့ၣ်မၤအၢမၤသီပှၤလၢ နသိၣ်ဃီၣ်တ့ၢ်အီၤတဖၣ်, အဝဲသ့ၣ်စံးကတိၤပှၤလၢနမၤဆါတ့ၢ်အီၤ အတၢ်နးတၢ်ဖှီၣ်အဂ့ၢ်လီၤ.

²⁷ လိာ်ကွီၢ်အဝဲသ့ၣ်လၢ တၢ်ကမၣ်တခါဝံၤတခါဒီး မ်အသုတဒိးန့ၢ်နတၢ်အုၣ်က့ၤခီၣ်က့ၤနီတမံၤတဂ့ၤ.

²⁸ မ်အမံၤဘၣ်တၢ်တြူာ်ကွံာ်အီၤလၢလံာ်မူအပူၤတက့ၢ်. မ်အသုတအိၣ်ကွဲးလီၤအသးလၢ ပှၤအတီအလိၤတဖၣ်အကျါတဂ့ၤ.

²⁹ မ့မ့ၢ်ယဲဒၣ်အံၤယဘၣ်နးဘၣ်ဖှီၣ်ဒီး ယအိၣ်လၢတၢ်ဆူးတၢ်ဆါအပူၤလီၤ. ကစၢ်ယွၤဧၢ, မ်နတၢ်အုၣ်က့ၤခီၣ်က့ၤပာ်ယၤလၢ တၢ်ထီၣ်ထီန့ၣ်တက့ၢ်.

³⁰ ယကသးဝံၣ်စံးထီၣ်ပတြၢၤကစၢ်ယွၤအမံၤ လၢတၢ်သးဝံၣ်, ယကပာ်ဒိၣ်အီၤလၢတၢ်စံးဘျုးစံးဖှိၣ်လီၤ.

³¹ ဒီးတၢ်အံၤကမၤမုာ်ယွၤအသးအါန့ၢ်ဒံး တၢ်လုၢ်ထီၣ်ပာ်ထီၣ်ဂီၤဘုၣ်ဂီၤဖံး, ဒိၣ်န့ၢ်ဒံးတၢ်လုၢ်ထီၣ်ကျီၢ်ဖျါ တဒုလၢအဒိၣ်တုာ်ခိၣ်ပှဲၤတက့ၢ်န့ၣ်လီၤ.

³² မ်ပှၤလၢအဘၣ်တၢ်မၤအၢအီၤ ထံၣ်ဒီးသူၣ်ခုသးခုန့ၣ်တက့ၢ်. ပှၤလၢအဃုကစၢ်ယွၤဧၢ, မ်နသးမူထီၣ်က့ၤတက့ၢ်.

³³ အဂ့ၢ်ဒ်အံၤ, ယွၤနၢ်ဟူပှၤဖှီၣ်ဖိယာ်ဖိအကလုၢ် ဒီးအပှၤလၢအဘၣ်တၢ်စၢဃာ်တဖၣ်န့ၣ် တသးပ့ၤနီၣ်ဝဲဒၣ်ဘၣ်.

³⁴ မ်မူခိၣ်ဒီးဟီၣ်ခိၣ်, ပီၣ်လဲၣ်ဒီး ကယဲၢ်တၢ်လၢအလဲၤလၢအပူၤခဲလၢာ်န့ၣ်, စံးထီၣ်ပတြၢၤကစၢ်ယွၤတက့ၢ်.

³⁵ အဂ့ၢ်ဒ်အံၤ, ယွၤကအုၣ်က့ၤခီၣ်က့ၤစံယိၣ်, ဒီးကသူၣ်ထီၣ်က့ၤယူဒၤအဝ့ၢ်တဖၣ် ဒီးအခ့အပှၤသ့ၣ်တဖၣ်ကအိၣ်ကဆိးဖဲန့ၣ်ဒီး ကန့ၢ်ဘၣ်ကီၢ်န့ၣ်လီၤ.

³⁶ အခ့အပှၤအဖိတဖၣ်ကန့ၢ်သါဘၣ်ဝဲ, ဒီးပှၤလၢအအဲၣ်အမံၤတဖၣ် ကအိၣ်ကဆိးလၢအပူၤလီၤ.