စံးထီၣ်ပတြၢၤ 68 - Sgaw Karen Common Bible

ပှၤဂီၢ်မုၢ်အတၢ်မၤနၢၤအတၢ်သးဝံၣ်

¹ မ်ကစၢ်ယွၤဂဲၤဆၢထၢၣ်တက့ၢ်. မ်အဒုၣ်အဒါတဖၣ်လီၤပြံလီၤပြါတက့ၢ်. မ်ပှၤလၢအသးဟ့အီၤတဖၣ် ဃ့ၢ်ကွံာ်လၢအမဲာ်ညါန့ၣ်တက့ၢ်.

² ဒ်မ့ၣ်အူလုၣ်ဒံကွံာ်အသိးန့ၣ်ဟီထီၣ်ကွံာ်အဝဲသ့ၣ်, ဒီးဒ်ဃိးပှံၢ်ဝဲလၢမ့ၣ်အူအမဲာ်ညါအသိးန့ၣ် မ်ပှၤတတီတလိၤဟးဂီၤကွံာ်လၢ ကစၢ်ယွၤအမဲာ်ညါန့ၣ်တက့ၢ်.

³ မ့မ့ၢ်ပှၤတီပှၤလိၤန့ၣ်မ်အသးခုတက့ၢ်. မ်အဝဲသ့ၣ်သူၣ်ဖှံသးညီလၢကစၢ်ယွၤ အမဲာ်ညါတက့ၢ်. မ်အဝဲသ့ၣ်ကိးထီၣ်လၢတၢ်သးခုန့ၣ်တက့ၢ်.

⁴ သးဝံၣ်ထီၣ်ကစၢ်ယွၤ, သးဝံၣ်စံးထီၣ်ပတြၢၤအမံၤန့ၣ်တက့ၢ်. ကတဲာ်ကတီၤကျဲတဘိလၢပှၤလၢလဲၤခီဂာ်တၢ်လၢ ပှၢ်မုၢ်ကနၢတဂၤအဂီၢ်န့ၣ်တက့ၢ်. အမံၤမ့ၢ်ယွၤလီၤ. သူၣ်ဖှံသးညီလၢအမဲာ်ညါတက့ၢ်.

⁵ ကစၢ်ယွၤလၢအအိၣ်လၢအလီၢ်စီဆှံအပူၤန့ၣ် မ့ၢ်ပှၤဖိၣ်ဃဲအပၢ်ဒီးပှၤလၢကဟုဘံၣ်ကယာ်ဘၢ မုၣ်ကမဲသ့ၣ်တဖၣ်န့ၣ်လီၤ.

⁶ ပှၤလၢအအိၣ်သယုၢ်ထဲတဂၤဧိၤန့ၣ် ယွၤဟ့ၣ်အီၤဟံၣ်လၢကအိၣ်ဝဲ, အဝဲဆှၢဝဲပှၤဘၣ်တၢ်စၢဃာ်သ့ၣ်တဖၣ်ဆူ တၢ်အီၣ်ကုာ်အီပှဲၤန့ၣ်လီၤ. မ့မ့ၢ်ပှၤပူထီၣ်တၢ်ဖိသ့ၣ်တဖၣ်န့ၣ် အိၣ်ဝဲဆိးဝဲလၢတၢ်လီၢ်အိၣ်သယုၢ်န့ၣ်လီၤ.

⁷ ကစၢ်ယွၤဧၢ, တုၤနလဲၤထီၣ်လၢနပှၤဂီၢ်မုၢ်အမဲာ်ညါ, တုၤနလဲၤခီဂာ်ပှၢ်မုၢ်ကနၢန့ၣ်ဒီး, စ့လၤ

⁸ ဟီၣ်ခိၣ်ဆှဲးဆှိးဝဲဒီး မူခိၣ်ဒုးစူၤလီၤတၢ်, လၢကစၢ်ယွၤ လၢအမ့ၢ်ကစၢၢ်စံၤနါအကစၢ်, အကစၢ်ယွၤလၢအမ့ၢ် အံၣ်စရ့လးအကစၢ်ယွၤအမဲာ်ညါန့ၣ်လီၤ.

⁹ ကစၢ်ယွၤဧၢ, နမၢတၢ်ဟဲစူၤအါအါကလဲာ်, နမၤကျၢၤနတၢ်န့ၢ်သါဖဲတၢ်ဘှံးအသးအခါန့ၣ်လီၤ.

¹⁰ နပှၤဂီၢ်မုၢ်အိၣ်ဝဲဆိးဝဲလၢအပူၤ, ယွၤဧၢ, နကတဲာ်ကတီၤန့ၢ်တၢ်လၢ ပှၤဖှီၣ်န့ၢ်ယာ်ကဲအဂီၢ် လၢနတၢ်ဂ့ၤတၢ်ဝါအပူၤန့ၣ်လီၤ.

¹¹ ကစၢ်ဟ့ၣ်လီၤအကလုၢ်, ဒီးပိာ်မုၣ်အါဂၤစိာ်တၢ်ကစီၣ်တဖၣ်န့ၣ်လီၤ.

¹² “စီၤပၤတဖၣ်ဒီး အသုးမုၢ်တဖၣ်ဃ့ၢ်ကွံာ်ဝဲ, ဃ့ၢ်ကွံာ်ဝဲ,” ဒီးပိာ်မုၣ်လၢအအိၣ်ဒၣ်တၢ်လၢဟံၣ်ပူၤန့ၣ် နီၤဖးတၢ်ဂုာ်န့ၢ်,

¹³ လၢအမ့ၢ်, ထိၣ်လွံၢ်အဂီၤတဖၣ်လၢ တၢ်ကးဘၢအီၤဒီးစ့, အိၣ်ဒီးအဒံးဆ့လၢ အကတြ့ၣ်ဒီးသူန့ၣ်လီၤ. (လၢတၢ်ဒုးတၢ်ယၤအမုၢ်နံၤန့ၣ် ဘၣ်မနုၤသုဝဲတနီၤအိၣ်မံလီၤလၢသိကရၢၢ်ပူၤလဲၣ်)

¹⁴ တုၤတၢ်သ့တၢ်လၢာ်ကစၢ်ယွၤမၤလီၤပြံလီၤပြါ စီၤပၤတဖၣ်လၢကစၢၢ်စၤလမိၣ်အလိၤန့ၣ်ဒီး အဝဲဒုးဟဲစူၤလီၤမူခိၣ်ဖီဖဲန့ၣ်လီၤ.

¹⁵ ယွၤအကစၢၢ်ကလိ, မ့ၢ်ဘၤၡၣ်ကစၢၢ်တဖျၢၣ်လၢ အအိၣ်ဒီးတၢ်စိခိၣ်အါမးန့ၣ်လီး. တၢ်ထီၣ်ထီတဖၣ်အကစၢၢ်, ဘၤၡၣ်အကစၢၢ်ဧၢ,

¹⁶ ဘၣ်မနုၤသုကွၢ်တၢ်လၢတၢ်စိခိၣ် ဖးထီတဖၣ် လၢတၢ်သးက့ၣ်ဆူ ကစၢၢ်လၢ ကစၢ်ယွၤ ဃုထၢအီၤလၢ ကအိၣ်ဆိးဝဲန့ၣ်လဲၣ်. ယွၤကအိၣ်ဖဲန့ၣ်လီၤထူလီၤယိာ်လီၤ. မ့ၢ်လံ, ယွၤကအိၣ်လၢအလိၤလီၤထူလီၤယိာ်လီၤ.

¹⁷ ယွၤဟဲလၢစံၤနါဆူတၢ်လီၢ်စီဆှံ ဃုာ်ဒီးအလ့ၣ်ကဟၣ်လၢအအိၣ်ဒီး အစိကမီၤ အကထိတဖၣ်အကထိန့ၣ်လီၤ.

¹⁸ အဝဲလဲၤထီၣ်လံဆူတၢ်ထီၣ်ထီတဖၣ်လံ. ဖီၣ်န့ၢ်ကုၢ်တဖၣ်ဒီးဒိးန့ၢ်ဘၣ် တၢ်ဟ့ၣ်တဖၣ်လၢပှၤကညီအကျါ, လၢပှၤပူထီၣ်တၢ်သ့ၣ်တဖၣ်အကျါဒၣ်လဲာ်န့ၣ်လီၤ. ယွၤကစၢ်ယွၤကအိၣ်ဝဲဆိးဝဲဖဲန့ၣ်လီၤ.

¹⁹ မ်ကစၢ်ယွၤလၢအဝံပတၢ်ဝံတၢ်ယိးတနံၤဘၣ်တနံၤန့ၣ် ဘၣ်တၢ်စံးထီၣ်ပတြၢၤအီၤတက့ၢ်. တၢ်အုၣ်က့ၤခီၣ်က့ၤပှၤန့ၣ်မ့ၢ်ကစၢ်ယွၤလီၤ. စ့လၤ

²⁰ ပကစၢ်ယွၤန့ၣ်မ့ၢ်ကစၢ်ယွၤလၢ အအုၣ်က့ၤခီၣ်က့ၤတၢ်လီၤ. အဝဲမ့ၢ်ယွၤ, ပယွၤ ပှၤလၢအအုၣ်က့ၤခီၣ်က့ၤပှၤလၢတၢ်သံန့ၣ်လီၤ.

²¹ မ့ၢ်မးကစၢ်ယွၤကမၤသဘှံးအဒုၣ်အဒါတဖၣ်အခိၣ်, ပှၤတဖၣ်လၢ အလဲၤဒၣ်တၢ်တခီနၢ်လၢ အတၢ်ဒဲးဘးအကျဲပူၤန့ၣ်လီၤ.

²² ယွၤစံးဝဲဒၣ်, “ယကဒုးဟဲက့ၤသုဒုၣ်သုဒါတဖၣ်လၢဘၤၡၣ်, ယကဒုးဟဲက့ၤအဝဲသ့ၣ်လၢပီၣ်လဲၣ်အတၢ်ယိာ်ပူၤ,

²³ ဒ်သိးသုကဘျၢလီၤသုခီၣ်လၢ အဝဲသ့ၣ်အသွံၣ်အပူၤဒီး သုထွံၣ်တဖၣ်ကလ့ၣ်တၢ်ဖဲအဲၣ်ဒိးလ့ၣ်ဝဲန့ၣ်လီၤ.”

²⁴ ကစၢ်ယွၤဧၢ, ပှၤကိးဂၤဒဲး ထံၣ်ဘၣ်နတၢ်မၤနၢၤအတၢ်လဲၤထီၣ်, ယကစၢ်ယွၤ, ယစီၤပၤ အတၢ်လဲၤနုာ်ဆူ အတၢ်လီၢ်စီဆှံအပူၤန့ၣ်လီၤ.

²⁵ ပှၤသးဝံၣ်တၢ်ဖိလဲၤလၢညါ, ပှၤဒ့တၢ်ဖိလဲၤလၢခံ ဒီးလၢအဘၢၣ်စၢၤန့ၣ် ပှၤမုၣ်ကနီၤတဖၣ်လၢအပှီၢ်ဒၢတဖၣ်န့ၣ်လီၤ.

²⁶ လၢပှၤဂီၢ်မုၢ်အကျါန့ၣ်စံးထီၣ်ပတြၢၤယွၤတက့ၢ်. “စံးထီၣ်ပတြၢၤယွၤ, သုဝဲစီၤယၤကိာ်အစၢၤအသွဲၣ်သ့ၣ်ဧၢ.”

²⁷ ဒူၣ်အဆံးကတၢၢ်, ဘံၣ်ယၤမံၣ်ဟဲလၢညါ, ဝံၤဒီးယူဒၤအခိၣ်အနၢ်တဖၣ်ဒီး အဝဲသ့ၣ်အကရူၢ်လၢ စဘူလိၣ်ဒီးနးသၤလံ အပှၤခိၣ်ပှၤနၢ်တဖၣ် ပိာ်ထွဲထီၣ်အခံန့ၣ်လီၤ.

²⁸ ကစၢ်ယွၤဧၢ, နဲၣ်ဖျါထီၣ်နစိနကမီၤ, နစိနကမီၤလၢနသူအီၤလၢပဂီၢ်,

²⁹ လၢနတၢ်လုၢ်ဟံၣ်လၢယရူၤၡလ့ၣ်အပူၤ, ဖဲစီၤပၤတဖၣ်ဟဲစိာ်တၢ်ဟ့ၣ်တဖၣ်ဆူ နအိၣ်န့ၣ်တက့ၢ်.

³⁰ သိၣ်ဃီၣ်အဲၤကူပတူး, ဆၣ်ဖိကီၢ်ဖိအဒူတဒုန့ၣ် လၢအအိၣ်လၢတပိၢ်အကျါ, သိၣ်ဃီၣ်ထံကီၢ်တဖၣ်, လၢအလီၢ်ဂာ်ဒီး ဂီၤဖံးဖါတဖုအိၣ်ဒီး ဂီၤဖံးဖါဖိတဖၣ်, တုၤလၢအဝဲသ့ၣ်ခဲလၢာ်တီၤလီၤ ကဒွံကျိာ်ဒီး လုၢ်ထီၣ်နၤလၢ အစ့တဖၣ်တက့ၢ်. မၤလီၤပြံလီၤပြါပှၤဂီၢ်မုၢ်လၢ အအဲၣ်တၢ်ဒုးတၢ်ယၤတက့ၢ်.

³¹ ပဒိၣ်တဖၣ်ကဟဲထီၣ်လၢအဲၤကူပတူးအပူၤ, ကူၤၡးကယူာ်ထီၣ်အစုဆူယွၤအအိၣ် လၢတၢ်ထုကဖၣ်န့ၣ်လီၤ.

³² ဟီၣ်ခိၣ်အဘီမုၢ်ဖိသ့ၣ်ဧၢ, သးဝံၣ်ထီၣ်ကစၢ်ယွၤတက့ၢ်. သးဝံၣ်စံးထီၣ်ပတြၢၤယွၤ, စ့လၤ

³³ ပှၤလၢအဒိးတၢ်လၢ တၢ်အၢၣ်အပူၤ, တၢ်အၢၣ်လၢပျၢၤန့ၣ်တက့ၢ် ကနၣ်အတၢ်ကိးထီၣ် အသီၣ်ဖးဒိၣ်တက့ၢ်.

³⁴ ဒုးဟူထီၣ်သါလီၤကစၢ်ယွၤအစိကမီၤ, အလၤကပီၤလၢအံၣ်စရ့လးအဖီခိၣ်, အတၢ်ဂံၢ်ဆူၣ်ဘါဆူၣ်လၢ အအိၣ်လၢမူကပိာ်လိၤန့ၣ်တက့ၢ်.

³⁵ ကစၢ်ယွၤဧၢ, နမ့ၢ်တၢ်လီၤပျံၤအလီၢ်လၢ နလီၢ်စီဆှံအပူၤလီၤ. အံၣ်စရ့လးကစၢ်ယွၤ, မ့ၢ်ပှၤလၢ အဟ့ၣ်အပှၤဂီၢ်မုၢ်လၢတၢ်စိတၢ်ကမီၤဒီး တၢ်ဂံၢ်တၢ်ဘါန့ၣ်လီၤ. စံးထီၣ်ပတြၢၤကစၢ်ယွၤတက့ၢ်.