စံးထီၣ်ပတြၢၤ 66 - Sgaw Karen Common Bible

တၢ်စံးထီၣ်ပတြၢၤဒီးတၢ်စံးဘျုးစံးဖှိၣ် အတၢ်သးဝံၣ်

¹ စံးထီၣ်ပတြၢၤကစၢ်ယွၤလၢတၢ်သူၣ်ဖှံသးညီ အတၢ်ကိးထီၣ်တက့ၢ်. ပှၤကလုာ်ခဲလၢာ်သ့ၣ်ဧၢ.

² သးဝံၣ်ထီၣ်အမံၤအလၤကပီၤ, ဟ့ၣ်ထီၣ်အီၤလၢတၢ်လၤကပီၤ အတၢ်စံးထီၣ်ပတြၢၤန့ၣ်တက့ၢ်.

³ စံးဘၣ်ကစၢ်ယွၤ, “နမၤတၢ်တဖၣ်န့ၣ် မ့ၢ်တၢ်ပျံၤအလီၢ်ဆံးဒိၣ်လဲၣ်. လၢနစိဒိၣ်ကမီၤထီအဃိန့ၣ်, နဒုၣ်နဒါတဖၣ်ဆီၣ်လီၤအသးလၢ နခီၣ်ထံးမဲာ်ညါလီၤ.

⁴ ပှၤဟီၣ်ခိၣ်ဖိခဲလၢာ်ဘူၣ်ထီၣ်ဘါထီၣ်နၤ, သးဝံၣ်စံးထီၣ်ပတြၢၤနၤ, သးဝံၣ်စံးထီၣ်ပတြၢၤနမံၤန့ၣ်လီၤ.” စ့လၤ

⁵ ဟဲဒီးကွၢ်တၢ်လၢကစၢ်ယွၤမၤတ့ၢ်န့ၣ်တက့ၢ်. အဝဲမ့ၢ်တၢ်ပျံၤအလီၢ်လၢ အတၢ်မၤတဖၣ်လၢပှၤကညီအကျါန့ၣ်လီၤ.

⁶ အဝဲဒုးကဲထီၣ်ပီၣ်လဲၣ်ဆူ ခိဒီးပမိၢ်ပၢ်ဖံဖုတဖၣ် ခီဂာ်ထံကျိလၢအခီၣ်လီၤ. ဒီးအဝဲသ့ၣ်သးခုလၢ တၢ်လၢယွၤမၤတ့ၢ်ဝဲအဃိန့ၣ်လီၤ.

⁷ ပၢတၢ်အစိၤစိၤအဃၣ်ဃၣ်လၢအစိအကမီၤလီၤ. အမဲာ်ကွၢ်ထံပှၤကလုာ်တဖၣ်လီၤ. မ်ပှၤပူထီၣ်တၢ်ဖိတဖၣ် အသုတပာ်ထီၣ်ထီအသးတဂ့ၤ. စ့လၤ

⁸ ပှၤကလုာ်ခဲလၢာ်သ့ၣ်ဧၢ, စံးထီၣ်ပတြၢၤပကစၢ်ယွၤ, မ်သုတၢ်စံးထီၣ်ပတြၢၤအသီၣ်ဟူထီၣ်တက့ၢ်.

⁹ ပၢၤဃာ်ပသးလၢပှၤမူသ့ၣ်တဖၣ်အကျါ ဒီးတဟ့ၣ်ပခီၣ်လီၤတလံာ်ဘၣ်.

¹⁰ ကစၢ်ယွၤဧၢ, အဂ့ၢ်ဒ်အံၤ, နမၤကွၢ်တ့ၢ်လံပှၤလံ. နမၤပှံၢ်တ့ၢ်လံပှၤ ဒ်စ့ ဘၣ်တၢ်မၤပှံၢ်အီၤအသိးန့ၣ်လီၤ.

¹¹ နဒုးလဲၤနုာ်တ့ၢ်ပှၤလၢပှာ်ဧိၤစၤဧိၤအပူၤ, နပာ်တၢ်ဖှီၣ်လၢပယီၢ်ဒ့အလိၤ,

¹² နပျဲပဒုၣ်ပဒါတဖၣ်ယီၢ်တံၢ်ပှၤ, ပလဲၤခီဖျိမ့ၣ်အူဒီးထံ, ဘၣ်ဆၣ်ခဲအံၤနဟဲစိာ်ပှၤဆူ တၢ်ပူၤဖျဲးအလီၢ်န့ၣ်လီၤ.

¹³ ယကဟဲဆူနဟံၣ်ပူၤဒီးတၢ်လုၢ်မ့ၣ်အူတဖၣ်, ယကဟ့ၣ်ထီၣ်နၤလၢယတၢ်ဆိၣ်သ့ၣ်တဖၣ်,

¹⁴ လၢအထီၣ်ဖျဲးလၢယနိးဖံးတဖၣ်, ဒီးယထးခိၣ်အၢၣ်လီၤဖဲ ယဘၣ်တၢ်ကိၢ်တၢ်ဂီၤန့ၣ်လီၤ.

¹⁵ ယကလုၢ်ထီၣ် တၢ်လုၢ်မ့ၣ်အူလၢ ဆၣ်ဖိကီၢ်ဖိတဖၣ်ဆူနၤ, ဒီးတၢ်ဆိၣ်ကဲၤနၢမူဘၣ်ဃးဒီးသိဖါတဖၣ်, ယကလုၢ်ဂီၤဖံးဖါဒီးမဲာ်တဲးလဲးတဖၣ်လီၤ. စ့လၤ

¹⁶ ပှၤလၢအပျံၤကစၢ်ယွၤခဲလၢာ်သ့ၣ်ဧၢ, ဟဲကနၣ်တက့ၢ်. ဒီးယကတဲတၢ်လၢအမၤတ့ၢ်ဝဲလၢယဂီၢ်န့ၣ်လီၤ.

¹⁷ ယကိးထီၣ်ဆူအအိၣ်လၢတၢ်မၤစၢၤအဂီၢ်, ယစံးထီၣ်ပတြၢၤအီၤလၢတၢ်သးဝံၣ်တဖၣ်လီၤ.

¹⁸ ယမ့ၢ်ပာ်ကဲတ့ၢ်တၢ်အၢလၢယသးကံၢ်ပူၤဒီး ယွၤတဒိကနၣ်ဘၣ်ယၤဘၣ်.

¹⁹ မ့မ့ၢ်ကစၢ်ယွၤကနၣ်လံဝဲလံ. အဝဲဒိကနၣ်တ့ၢ်လံဝဲ ယတၢ်ထုကဖၣ်အကလုၢ်န့ၣ်လံ.

²⁰ စံးထီၣ်ပတြၢၤကစၢ်ယွၤတက့ၢ်. အဂ့ၢ်ဒ်အံၤ တဃၣ်ဒူချၢအသးလၢယတၢ်ထုကဖၣ်ဘၣ် ဒီးတသုးကွံာ်အတၢ်အဲၣ်ဂၢၢ်ကျၢၤလၢယၤဘၣ်.