စံးထီၣ်ပတြၢၤ 65 - Sgaw Karen Common Bible

တၢ်စံးထီၣ်ပတြၢၤဒီးတၢ်စံးဘျုးစံးဖှိၣ်

¹ ကစၢ်ယွၤဧၢ, ဂ့ၤဝဲလၢပကစံးထီၣ်ပတြၢၤနၤလၢစံယိၣ် ဒီးပၢၤဃာ်ပတၢ်အၢၣ်လီၤဒီးနၤ,

² မ့ၢ်လၢနစံးဆၢပတၢ်ထုကဖၣ်အဃိန့ၣ်လီၤ. ပှၤကလုာ်လၢလီၢ်ကိးပူၤဒဲးကဟဲဆူနအိၣ်,

³ လၢအတၢ်ဒဲးဘးတဖၣ်အဃိန့ၣ်လီၤ. ပတၢ်ကမၣ်တဖၣ်မၤနၢၤပှၤ ဘၣ်ဆၣ်နပျၢ်ပတၢ်ကမၣ်လီၤ.

⁴ ပှၤလၢနဃုထၢအီၤ, ပှၤလၢနဟဲစိာ်အီၤဆူနလီၢ်စီဆှံအပူၤ ဒ်သိးကအိၣ်ကဆိးဘၣ်ဝဲအဂီၢ်တဖၣ်န့ၣ် ဘၣ်ဆိၣ်ဂ့ၤဝဲလီၤ. ပကသူၣ်မံသးမံလၢတၢ်ဂ့ၤတဖၣ်လၢနဟံၣ်ပူၤ, နတၢ်လုၢ်ဟံၣ်စီဆှံအတၢ်ဆိၣ်ဂ့ၤဆိၣ်ဝါတဖၣ်န့ၣ်လီၤ.

⁵ နစံးဆၢပှၤခီဖျိနဟ့ၣ်ပှၤတၢ်မၤနၢၤ ဒီးနမၤတၢ်လီၤလးတဖၣ်လၢပတၢ်ပူၤဖျဲးအဂီၢ်လီၤ. ပှၤကလုာ်လၢဟီၣ်ခိၣ်ချၢခဲလၢာ် ဒီးလၢပီၣ်လဲၣ်ပီၣ်တြီၤသ့ၣ်တဖၣ် သန့ၤအသးလၢနၤလီၤ.

⁶ နပာ်လီၤကစၢၢ်ကလိသ့ၣ်တဖၣ်လၢအလီၢ်ဒၣ်ဝဲ ခီဖျိနဂံၢ်နဘါ, ပာ်ဖျါထီၣ်နတၢ်စိတၢ်ကမီၤဖးဒိၣ်န့ၣ်လီၤ.

⁷ နဒုးအိၣ်ဘှီၣ်ပီၣ်လဲၣ်အသီၣ် ဒီးလပီတဖၣ်အသီၣ်, ပှၤဂီၢ်မုၢ်အတၢ်တၢထီၣ်တၢလီၤန့ၣ်လီၤ.

⁸ ဟီၣ်ခိၣ်ဒီဘ့ၣ်ညါကမၢကမၣ်ဝဲလၢတၢ်မၤဖးဒိၣ်တဖၣ် လၢနမၤတ့ၢ်အဃိန့ၣ်လီၤ. နတၢ်မၤတဖၣ်ဒုးအိၣ်ထီၣ်တၢ်ကိးပသူ လၢမုၢ်ထီၣ်တုၤလီၤလၢမုၢ်နုာ်န့ၣ်လီၤ.

⁹ နဒုးနဲၣ်ဖျါထီၣ်နတၢ်အံးထွဲကွၢ်ထွဲဟီၣ်ခိၣ်ခီဖျိ နဒုးဟဲစူၤလီၤမူခိၣ်, နမၤအါထီၣ်ဟီၣ်ခိၣ်ညၣ်ထ့ၣ်န့ၣ်လီၤ. နမၤပှဲၤထံကျိဖိတဖၣ်လၢထံ, နကတဲာ်ကတီၤဟီၣ်ခိၣ်လၢ တၢ်မုၢ်တၢ်ဘိတဖၣ်လီၤ. တၢ်အံၤမ့ၢ်တၢ်လၢနမၤဝဲန့ၣ်လီၤ.

¹⁰ နဒုးဟဲစူၤလီၤမူခိၣ်အါအါကလဲာ်လၢပျီပူၤ ဒီးမၤဘၣ်စီၣ်အီၤလၢထံန့ၣ်လီၤ. နမၤကဘုးလီၤဟီၣ်ခိၣ်ခီဖျိတၢ်စူၤ ဒီးဒုးဒိၣ်ထီၣ်တၢ်မုၢ်တၢ်ဘိတဖၣ်န့ၣ်လီၤ.

¹¹ နတၢ်ဂ့ၤတၢ်ဝါဟ့ၣ်ထီၣ်တၢ်ကူးက့ၤအထူးအတီၤ, ဖဲနလဲၤတပူၤလၢ်လၢ်န့ၣ်တၢ်အိၣ်လၢအိၣ်ပှဲၤလီၤ.

¹² တၢ်အီၣ်ဆၣ်အလီၢ်တဖၣ်ပှဲၤဝဲဒီးသိအဖုတဖၣ်, ကစၢၢ်ကလိတဖၣ်ပှဲၤဒီးတၢ်သးခုန့ၣ်လီၤ.

¹³ စံာ်ပျီတဖၣ်ဘၣ်တၢ်လုၣ်ဘၢအီၤလၢ သိတဖၣ် ဒီးတၢ်ပၢၤခိၣ်န့ၣ်အိၣ်ပှဲၤဒီး ဘုဧိၤဟုဧိၤလီၤ. အဝဲသ့ၣ်ကိးပသူထီၣ်ဒီးသးဝံၣ်သကိးတပူၤဃီလၢတၢ်သးခု အဃိန့ၣ်လီၤ.