စံးထီၣ်ပတြၢၤ 64 - Sgaw Karen Common Bible

တၢ်ထုကဖၣ်လၢတၢ်ကဟုဘံၣ်ကယာ်ဘၢ အဂီၢ်

¹ ကစၢ်ယွၤဧၢ, ဒိကနၣ်လၢ်ယတၢ်ထုကဖၣ်န့ၣ်တက့ၢ်. ယအိၣ်လၢတၢ်ကိၢ်တၢ်ဂီၤအပူၤလီၤ. ယပျံၤယဲယဒုၣ်ယဒါသ့ၣ်တဖၣ်လီၤ. မၤပူၤဖျဲးယသးသမူန့ၣ်တက့ၢ်.

² ပာ်ခူသူၣ်ယၤလၢပှၤအၢဖိအတၢ်ကူၣ်ခူသူၣ်တဖၣ်, လၢပှၤမၤတၢ်အၢတၢ်သီသ့ၣ်တဖၣ် အတၢ်ပာ်ဖှိၣ်အသးန့ၣ်တက့ၢ်.

³ အဝဲသ့ၣ်ကျ့အပျ့ၤတဖၣ်ဒ်နးတဖၣ်အသိး, ဒီးပညိၣ်အတၢ်ကတိၤအအၢအသီတဖၣ် ဒ်ပျၢ်တဖၣ်အသိးန့ၣ်လီၤ.

⁴ ခးခူသူၣ်ပှၤလၢအတၢ်ကမၣ်တအိၣ်, ခးအီၤသတူၢ်ကလာ်ဒီးတပျံၤဘၣ်တၢ်ဘၣ်.

⁵ အဝဲသ့ၣ်ဟ့ၣ်ဆူၣ်ထီၣ်လိာ်အသးတဂၤဒီးတဂၤလၢ တၢ်ကူၣ်အအၢအသီတဖၣ်အဂီၢ်, ကူၣ်ကျဲၤတၢ်လီၢ်ဖဲကပာ်လီၤခူသူၣ်ပျံၤသကွီၤ, ဒီးစံးဝဲဒၣ် “မ့ၢ်မတၤထံၣ်ပှၤကသ့လဲၣ်,”

⁶ အဝဲသ့ၣ်ဒုးကဲထီၣ်တၢ်ကူၣ်အအၢအသီတဖၣ်ဒီးစံးဝဲ, “မ့ၢ်မတၤဃုထံၣ်န့ၢ်ပတၢ်ကမၣ်တဖၣ်ကသ့လဲၣ်.” အဂ့ၢ်ဒ်အံၤ အသးဒီးအတၢ်ဆိကမိၣ်န့ၣ် ပှၤနၢ်ပၢၢ်အီၤတသ့ဘၣ်

⁷ ဘၣ်ဆၣ်ကစၢ်ယွၤကခးအပျၢ်လၢအဝဲသ့ၣ်, အဝဲသ့ၣ်ကဘၣ်ဒိဆါသတူၢ်ကလာ်လီၤ.

⁸ လၢအဝဲသ့ၣ်အတၢ်ကတိၤတဖၣ်န့ၣ်အဃိ ယွၤကမၤဟးဂီၤအဝဲသ့ၣ်, ဒီးပှၤလၢအထံၣ်အဝဲသ့ၣ်ခဲလၢာ် ကကျၢၢ်ကျာ်အခိၣ်လီၤ.

⁹ အန့ၣ်ဒီး ပှၤခဲလၢာ်ကပျံၤတၢ်လီၤ. အဝဲသ့ၣ်က ဆိကမိၣ်ဝဲတၢ်လၢယွၤမၤတ့ၢ်ဝဲဒီး တဲဖျါထီၣ်ကစၢ်ယွၤအတၢ်မၤတဖၣ်န့ၣ်လီၤ.

¹⁰ မ်ပှၤတီပှၤလိၤသးခုလၢယွၤအပူၤ ဒီးအိၣ်ပူၤဖျဲးလၢအပူၤန့ၣ်တက့ၢ်. မ်ပှၤလၢအအိၣ်ဒီးတၢ်သူၣ်တီသးလိၤ မၤလၤကပီၤအပီၤအီၤလၢ အသးပူၤတက့ၢ်. စံးထီၣ်ပတြၢၤအီၤတက့ၢ်.