စံးထီၣ်ပတြၢၤ 61 - Sgaw Karen Common Bible

တၢ်ထုကဖၣ်လၢတၢ်ကဟုဘံၣ်ကယာ်ဘၢ အဂီၢ်

¹ ကစၢ်ယွၤဧၢ, ကနၣ်ယတၢ်ကိးပသူထီၣ်, ဒိကနၣ်ယတၢ်ထုကဖၣ်န့ၣ်တက့ၢ်.

² လၢတၢ်သးဟးဂီၤဒီး တၢ်အိၣ်ယံၤဒီး ဟံၣ်အပူၤန့ၣ်ယကိးထီၣ်နၤလီၤ. ဆှၢယၤဆူတၢ်ပူၤဖျဲးအလီၢ်တတီၤန့ၣ်တက့ၢ်.

³ အဂ့ၢ်ဒ်အံၤနမ့ၢ်ယတၢ်ပူၤဖျဲးအလီၢ်, တၢးထီခၢၣ်သနၢၣ်လၢတၢ်ထီဒါ ယဒုၣ်ယဒါအဂီၢ်န့ၣ်လီၤ.

⁴ ပျဲယကအိၣ်ဘၣ်လၢနဒဲစီဆှံအပူၤလီၤထူလီၤယိာ်, ဟ့ၣ်ယၤတၢ်ပူၤဖျဲးလၢနဒံးဆ့အဖီလာ်န့ၣ်တက့ၢ်. စ့လၤ

⁵ ကစၢ်ယွၤဧၢ, အဂ့ၢ်ဒ်အံၤ နနၢ်ဟူတ့ၢ်လံယတၢ်ဆိၣ်တဖၣ်န့ၣ်လံ. နဟ့ၣ်တ့ၢ်လံယၤတၢ်န့ၢ်သါလၢအဘၣ်ဃးဒီး ပှၤလၢအပျံၤနမံၤလံ.

⁶ ပာ်ဖှိၣ်အါထီၣ်စီၤပၤအသးသမူအနံၣ်အလါတဖၣ် ဒီးပျဲအအိၣ်မူတစိၤဘၣ်တစိၤတက့ၢ်.

⁷ မ်အပၢဘၣ်တၢ်လၢကစၢ်ယွၤအမဲာ်ညါ လီၤထူလီၤယိာ် န့ၣ်တက့ၢ်. ပာ်လီၤနတၢ်အဲၣ်အဂၢၢ်အကျၢၤ ဒီးပၢၤအီၤလၢတၢ်သူၣ်တီသးလိၤန့ၣ်တက့ၢ်.

⁸ မ့မ့ၢ်ဒ်န့ၣ်ဒီး ယကသးဝံၣ်စံးထီၣ်ပတြၢၤနမံၤလီၤစိၤလီၤထီ ဒ်ယဟ့ၣ်ယတၢ်အၢၣ်လီၤအတၢ်ဟ့ၣ် တနံၤဘၣ်တနံၤအသိးန့ၣ်လီၤ.