စံးထီၣ်ပတြၢၤ 57 - Sgaw Karen Common Bible

တၢ်ထုကဖၣ်လၢတၢ်မၤစၢၤအဂီၢ်

¹ သူၣ်ကညီၤသးကညီၤယၤ, ကစၢ်ယွၤဧၢ, သူၣ်ကညီၤသးကညီၤယၤတ က့ၢ်. အဂ့ၢ်ဒ်အံၤ, ယသးသန့ၤအသးလၢနၤလီၤ. ယကဟံးန့ၢ်တၢ်အိၣ်ဘံၣ်အိၣ်ဘၢလၢနဒံးဆ့အဖီလာ် တုၤတၢ်ကိၢ်တၢ်ဂီၤအကလံၤမုၢ် လဲၤပူၤကွံာ်ယၤန့ၣ်လီၤ.

² ယကိးထီၣ်ဆူတၢ်ထီကတၢၢ်ကစၢ်ယွၤတဂၤ, ကစၢ်ယွၤလၢအမၤလၢပှဲၤအတၢ်တိာ်လၢယဂီၢ်န့ၣ်လီၤ.

³ အဝဲကစံးဆၢယၤလၢမူခိၣ်ဒီး အုၣ်က့ၤခီၣ်က့ၤယၤန့ၣ်လီၤ. စ့လၤ အဝဲကဒုးမဲာ်ဆှးပှၤလၢ အယီၢ်တံၢ်ယၤတဖၣ်န့ၣ်လီၤ. ကစၢ်ယွၤကလီၣ်ဖျါထီၣ်အတၢ်အဲၣ်ဂၢၢ်ကျၢၤဒီးအတၢ်တီတၢ်လိၤန့ၣ်လီၤ.

⁴ ယဘၣ်တၢ်ကဝီၤဃာ်ယၤလၢယဒုၣ်ယဒါသ့ၣ်တဖၣ် လၢအလီၤဂာ်ဒီးခ့ယုၢ်လၢအအီၣ်ပှၤကညီန့ၣ်လီၤ. အမဲလီၤဂာ်ဒီးဘီဒီးပျၢ် ဒီးအပျ့ၤလီၤဂာ်ဒီးနးလၢအကနၣ်အ့ၣ်န့ၣ်လီၤ.

⁵ ကစၢ်ယွၤဧၢ, မ်နဘၣ်တၢ်ပာ်ထီၣ်ထီနၤလၢမူခိၣ် ဒီးနလၤကပီၤလၢဟီၣ်ခိၣ်ဒီဘ့ၣ်ညါန့ၣ်တက့ၢ်.

⁶ ယဒုၣ်ယဒါသ့ၣ်တဖၣ်ရၤလီၤအပှာ် ဧိၤစၤဧိၤလၢကဖီၣ်န့ၢ်ယၤအဂီၢ်လီၤ. ယဘၣ်တၢ်မၤနၢၤယၤလၢတၢ်ကိၢ်တၢ်ဂီၤန့ၣ်လီၤ. အဝဲသ့ၣ်ခူၣ်လီၤတၢ်ပူၤလၢယကျဲ, ဘၣ်ဆၣ်အကစၢ်ဒၣ်ဝဲလီၤတဲာ်လၢတၢ်ပူၤန့ၣ်လီၤ. စ့လၤ

⁷ ယသးအိၣ်ဂၢၢ်ဆိးကျၢၤ, ကစၢ်ယွၤဧၢ, ယသးအိၣ်ဂၢၢ်ဆိးကျၢၤ လီၤ. ယကသးဝံၣ်တၢ်ဒီးစံးထီၣ်ပတြၢၤနၤလီၤ.

⁸ ဖုသံနီၣ်ထီၣ်, ယသးဧၢ, ဖုသံနီၣ်ထီၣ်, ယသီတူၢ်ဒီးတနၢ်သ့ၣ်ဧၢ, ယကထိၣ်ဂဲၤမုၢ်ဆ့ၣ်ဝါန့ၣ်လီၤ.

⁹ ကစၢ်ယွၤဧၢ, လၢပှၤဂီၢ်မုၢ်အကျါန့ၣ်, ယကစံးဘျုးနၤ, ဒီးလၢပှၤကလုာ်တဖၣ်အကျါန့ၣ်ယကသးဝံၣ်စံးထီၣ်ပတြၢၤနၤလီၤ.

¹⁰ အဂ့ၢ်ဒ်အံၤ, နတၢ်အဲၣ်အဂၢၢ်အကျၢၤဒိၣ် တုၤအထီၣ်ဘးဆူမူခိၣ်အလီၢ်တဖၣ်ဒီး နတၢ်တီတၢ်လိၤပၢၢ်လၢတၢ်အၢၣ်တဖၣ်လီၤ.

¹¹ ကစၢ်ယွၤဧၢ, မ်နဘၣ်တၢ်ပာ်ထီၣ်ထီနၤလၢမူခိၣ် ဒီးနလၤကပီၤလၢဟီၣ်ခိၣ်ဒီဘ့ၣ်ညါန့ၣ်တက့ၢ်.