စံးထီၣ်ပတြၢၤ 56 - Sgaw Karen Common Bible

တၢ်ထုကဖၣ်လၢတၢ်နာ်ကစၢ်ယွၤအပူၤ

¹ ကစၢ်ယွၤဧၢ, သူၣ်ကညီၤသးကညီၤယၤတက့ၢ်. အဂ့ၢ်ဒ်အံၤ ယဘၣ်တၢ်ဒုးထီဒါယၤ ဒီးယဒုၣ်ယဒါတဖၣ် မၤနးမၤဖှီၣ်ယၤတထံၣ်ဃီလီၤ.

² ယဒုၣ်ယဒါတဖၣ်ယီၢ်တံၢ်ယၤကိးမုၢ်နံၤမုၢ်နၤဒဲးလီၤ. အဂ့ၢ်ဒ်အံၤ, ပှၤအါဂၤဒုးတၢ်ထီဒါယၤ အိၣ်ဒီးတၢ်သးထီၣ်ထီလီၤ.

³ ယွၤသ့တၢ်လၢာ်ကစၢ်ဧၢ, တုၤယပျံၤတၢ်ဒီး ယသန့ၤယသးလၢနၤလီၤ.

⁴ ယသန့ၤယသးလၢကစၢ်ယွၤအပူၤ ယတအိၣ်ဘၣ်ဒီးတၢ်ပျံၤဘၣ်န့ၣ်လီၤ. ယစံးထီၣ်ပတြၢၤအီၤလၢ အတၢ်အၢၣ်လီၤအီလီၤအဃိ, ပှၤကညီမၤယၤကသ့ဒ်လဲၣ်.

⁵ ယဒုၣ်ယဒါတဖၣ်ဃုမၤဆါယၤသ့သ့တနံၤလီၤ. အတၢ်ဆိကမိၣ်ခဲလၢာ်ထီဒါယၤလၢ တၢ်အၢအဂ့ၢ်လီၤ.

⁶ အဝဲသ့ၣ်အိၣ်ဖှိၣ်ရိဖှိၣ်တပူၤဃီ, လၢတၢ်ခူသူၣ်, ဒီးကွၢ်ယခီၣ်ခါတဖၣ် ဒ်အဝဲသ့ၣ်ခိးကွၢ်တ့ၢ်ယသးသမူအသိးန့ၣ်လီၤ.

⁷ ကစၢ်ယွၤဧၢ, မ့ၢ်အဝဲသ့ၣ်ကပူၤဖျဲးလၢအတၢ်ကမၣ်အဃိန့ၣ်ဧါ, လၢနတၢ်သးထီၣ်အပူၤမၤလီၤဃံၤကွံာ် ပှၤဂီၢ်မုၢ်တဖၣ်န့ၣ်တက့ၢ်.

⁸ နသ့ၣ်ညါယဘၣ်ကိၢ်ဘၣ်ဂီၤဆံးအါလဲၣ်, နပာ်ကီၤဃာ်ယမဲာ်ထံအတၢ်ကွဲးနီၣ်လီၤ. အိၣ်ကွဲးအသးလၢနလံာ်ပူၤတမ့ၢ်ဘၣ်ဧါ.

⁹ မုၢ်တနံၤလၢယကိးထီၣ်နၤန့ၣ်, ယဒုၣ်ယဒါသ့ၣ်တဖၣ်ကဃၣ်ကဒါက့ၤအသး ဆူလီၢ်ခံန့ၣ်လီၤ. တၢ်အံၤယသ့ၣ်ညါလၢကစၢ်ယွၤအိၣ်ဒီးယၤ,

¹⁰ ယွၤတဂၤလၢယစံးထီၣ်တြၢၤ အတၢ်အၢၣ်လီၤအီလီၤတဖၣ်န့ၣ်လီၤ.

¹¹ ယသန့ၤယသးလၢကစၢ်ယွၤအပူၤ, ယတအိၣ်ဘၣ်ဒီးတၢ်ပျံၤဘၣ်န့ၣ်လီၤ. ပှၤကညီမၤယၤကသ့ဒ်လဲၣ်.

¹² ကစၢ်ယွၤဧၢ, တၢ်လၢယဆိၣ်တၢ်လၢနဂီၢ်သ့ၣ်တဖၣ်န့ၣ်, ယကပာ်ဖျါထီၣ်အီၤ, ယကဟ့ၣ်ထီၣ်တၢ်စံးထီၣ်ပတြၢၤ အတၢ်မၤဘူၣ်သ့ၣ်တဖၣ်ဆူနၤလီၤ.

¹³ အဂ့ၢ်ဒ်အံၤ, နမၤပူၤဖျဲးယသးလၢတၢ်သံ, ဒ်သိးယခီၣ်သုတလီၤတလံာ်တဂ့ၤ, ဒ်သိးယကလဲၤတၢ်လၢကစၢ်ယွၤအမဲာ်ညါလၢ ပှၤမူတဖၣ်အတၢ်ကပီၤအပူၤန့ၣ်လီၤ.