စံးထီၣ်ပတြၢၤ 53 - Sgaw Karen Common Bible

ပှၤကညီအတၢ်တတီတလိၤ

¹ ပှၤဟးဂီၤဖိစံးလၢအသးကံၢ်ပူၤ “ကစၢ်ယွၤတအိၣ်ဘၣ်န့ၣ်လီၤ.” အဝဲသ့ၣ်ခဲလၢာ်ဟးဂီၤဝဲ ဒီးမၤတ့ၢ်တၢ်လီၤပျံၤတဖၣ်ဒီး ပှၤလၢအမၤတၢ်လၢအဘၣ်န့ၣ်တအိၣ်နီတဂၤဘၣ်.

² ကစၢ်ယွၤကွၢ်လီၤတၢ်လၢမူခိၣ်လၢပှၤကညီဖိအဖီခိၣ် ဒ်သိးအကထံၣ်ဝဲပှၤလၢအအိၣ်ဒီး တၢ်ကူၣ်ဘၣ်ကူၣ်သ့, ဒီးပှၤလၢအဃုယွၤအိၣ်တအိၣ်လဲၣ်န့ၣ်လီၤ.

³ ဘၣ်ဆၣ်အဝဲသ့ၣ်လဲၤကမၣ်လံခဲလၢာ်လံ. အဝဲသ့ၣ်ဟးဂီၤလံတပူၤဃီလံ. ပှၤလၢအမၤတၢ်ဂ့ၤတအိၣ်ဘၣ်လၢ အဝဲသ့ၣ်အကျါ နီတဂၤဘၣ်. ထဲတဂၤဧိၤတအိၣ်ဘၣ်.

⁴ ကစၢ်ယွၤသံကွၢ်ဝဲ, “မ့ၢ်အဝဲသ့ၣ်တသ့ၣ်ညါဘၣ်ဧါ. အဝဲသ့ၣ်အိၣ်မူလၢ တၢ်ဟုၣ်ယပှၤဂီၢ်မုၢ်အပူၤ, ဒီးတဘါထုကဖၣ် တၢ်ဆူယၤနီတစုဘၣ်.”

⁵ ဘၣ်ဆၣ်အဝဲသ့ၣ်အိၣ်လၢတၢ်ပျံၤဖးဒိၣ် လၢအတမၤအသးဒ်အံၤနီတဘျီဘၣ်အပူၤန့ၣ်လီၤ. အဂ့ၢ်ဒ်အံၤ, ကစၢ်ယွၤကမၤလီၤပြံလီၤပြါ အပှၤဂီၢ်မုၢ်အဒုၣ်အဒါတဖၣ်အဃံအကွဲလီၤ. အဝဲသ့ၣ်တဖၣ်ကဘၣ်တၢ်မၤမဲာ်ဆှးအီၤအဂ့ၢ်မ့ၢ်လၢ ကစၢ်ယွၤညိကွံာ်တ့ၢ်လံအဝဲသ့ၣ်အဃိန့ၣ်လီၤ.

⁶ မ်တၢ်မၤပူၤဖျဲးအလီၢ်လၢအံၣ်စရ့လးအဂီၢ်အံၤ ကဟဲလၢစံယိၣ်တက့ၢ်. တုၤကစၢ်ယွၤဒုးဟဲက့ၤအပှၤဂီၢ်မုၢ်လၢ တၢ်စိာ်မၢကဲကုၢ်အလီၢ်န့ၣ်ဒီး ယၤကိာ်ကသူၣ်ဖှံသးညီဒီး အံၣ်စရ့လးကသူၣ်ခုသးခုဝဲဒၣ်န့ၣ်လီၤ.