စံးထီၣ်ပတြၢၤ 52 - Sgaw Karen Common Bible

ကစၢ်ယွၤအတၢ်စံၣ်ညီၣ်ဒီးအတၢ်ဘျုးတၢ်ဖှိၣ်

¹ ပှၤအဆူၣ်တဂၤဧၢ, ဘၣ်မနုၤလၢ နပာ်ကဖိနသးလၢနမၤကမၣ်တၢ်အဃိန့ၣ်လဲၣ် ကစၢ်ယွၤအတၢ်အဲၣ်န့ၣ်. အိၣ်ဝဲလီၤထူလီၤယိာ်လီၤ.

² နကူၣ်ထီၣ်တၢ်မၤဟးဂီၤပှၤဂၤ, နပျ့ၤလီၤဂာ်ဒီးဒီလူၤတၢ်လၢအကနၣ်အ့ၣ်ဝဲ, ဒီးနမ့ၢ်ပှၤမၤတၢ်လၢတၢ်သူၣ်တဘျၢ သးတဘျၢအပူၤလီၤ.

³ နအဲၣ်တၢ်အၢဒိၣ်န့ၢ်တၢ်ဂ့ၤ, ဒီးတၢ်ကတိၤကဘျံးကဘျၣ်အါန့ၢ် တၢ်ကတိၤအမ့ၢ်အတီန့ၣ်လီၤ. စ့လၤ

⁴ ပျ့ၤလီတၢ်ဧၢ, နအဲၣ်ကယဲၢ် တၢ်ကတိၤမၤဟးဂီၤတၢ်ခဲလၢာ်န့ၣ်လီၤ.

⁵ မ့မ့ၢ်ကစၢ်ယွၤကမၤဟးဂီၤနၤလီၤထူလီၤယိာ်လီၤ. အဝဲကဖီၣ်န့ၢ်နၤဒီးထုးထီၣ်ကွံာ်နၤလၢနဒဲပူၤ, ဒီးကထဲးထီၣ်ကွံာ်နၤလၢတၢ်မူအကီၢ်န့ၣ်လီၤ. စ့လၤ

⁶ ပှၤအတီအလိၤကထံၣ်ဘၣ်ဝဲ, ဒီးကပျံၤတၢ်, ဒီးကနံၤဘၣ်နၤ, ဒီးစံးဝဲ,

⁷ “ကွၢ်, ပှၤတဂၤလၢအတပာ်ဘၣ်ကစၢ်ယွၤလၢ အတၢ်အိၣ်တဒၢအလီၢ်, မ့မ့ၢ်သန့ၤအသးလၢအတၢ်ထူးတၢ်တီၤ လၢအအါဒီး ဃုထံၣ်န့ၢ်အတၢ်အိၣ်တဒၢအလီၢ်လၢ လၢအတၢ်ဟးဂီၤအပူၤန့ၣ်တက့ၢ်.”

⁸ မ့မ့ၢ်ယဲဒၣ်အံၤ, ယမၤသးဒ်သ့ၣ်စၤယံးသံကစဲာ် တထံးလၢကစၢ်ယွၤအဟံၣ်ပူၤအသိးန့ၣ်လီၤ. ယသန့ၤယသးလၢယွၤအဘျုးအဖှိၣ် လီၤထူလီၤယိာ်လီၤ.

⁹ ယကစံးဘျုးနၤထီဘိ ကစၢ်ယွၤဧၢ, မ့ၢ်လၢနမၤတ့ၢ်တၢ်အံၤအဃိလီၤ. ယကမုၢ်လၢ်တၢ်လၢနမံၤလီၤ. အဂ့ၢ်ဒ်အံၤ, ဂ့ၤဝဲလၢပှၤလၢအအဲၣ်နၤအကျါလီၤ.