စံးထီၣ်ပတြၢၤ 51 - Sgaw Karen Common Bible

တၢ်ထုကဖၣ်လၢတၢ်ပျၢ်တၢ်ကမၣ်အဂီၢ်

¹ ကစၢ်ယွၤဧၢ, သူၣ်ကညီၤသးကညီၤလၢ်ယၤ, ဒ်နတၢ်အဲၣ်ဂၢၢ်ကျၢၤအိၣ်ဝဲအသိး, ဒီးဒ်နတၢ်သးကညီၤအိၣ်အါအါကလဲာ်အသိးန့ၣ် တြူာ်ကွံာ်ယတၢ်မၤကမၣ်တၢ်တဖၣ်န့ၣ်တက့ၢ်.

² သ့စီယၤလၢယတၢ်အၢစီစီ, ဒီးမၤကဆှီယၤလၢယတၢ်ဒဲးဘးတက့ၢ်.

³ အဂ့ၢ်ဒ်အံၤ, ယသ့ၣ်ညါယတၢ်မၤကမၣ်တၢ်တဖၣ်, ဒီးယတၢ်ဒဲးဘးအိၣ်လၢယမဲာ်ညါတထံၣ်ဃီလီၤ.

⁴ ယမၤကမၣ်ဘၣ်တ့ၢ်လံနၤ, ထဲနၤတဂၤဧိၤ, ဒီးမၤတၢ်အၢလၢနမဲာ်ညါလံ. မၤသးဒ်န့ၣ်ဒီး, နမၤတၢ်တီတၢ်လိၤလၢ နတၢ်စံၣ်ညီၣ်ယၤအပူၤ ဒီးတၢ်ပာ်တၢ်ကမၣ်အလီၢ်တအိၣ်လၢ နတၢ်စံၣ်ညီၣ်အပူၤဘၣ်န့ၣ်လီၤ.

⁵ ကွၢ်ကွၢ်, ယအိၣ်ဖျဲၣ်ထီၣ်လၢတၢ်အၢတၢ်သီအပူၤ, ဒီးယမိၢ်ဒၢထီၣ်ယၤလၢတၢ်ဒဲးဘးအပူၤလီၤ.

⁶ တၢ်သူၣ်တီသးလိၤဒီးတၢ်မ့ၢ်တၢ်တီန့ၣ် မ့ၢ်တၢ်လၢနသးလီန့ၣ်လီၤ. မၤပှဲၤယသးလၢနတၢ်ကူၣ်သ့န့ၣ်တက့ၢ်.

⁷ မၤကဆှီယၤလၢကဖျီၣ်အ့စိးတက့ၢ်. ဒီးယကကဆှီထီၣ်လီၤ. သ့စီယၤတက့ၢ်, ဒီးယကဝါန့ၢ်မူခိၣ်ဖီလီၤ.

⁸ ဒုးနၢ်ဟူယၤလၢတၢ်သူၣ်ဖှံသးညီ, ဒီးတၢ်သူၣ်ခုသးခုတက့ၢ်. မ်တၢ်ဃံတၢ်ကွဲလၢနမၤကၢ်အီၤန့ၣ် သူၣ်ဖှံသးညီကဒီးတက့ၢ်.

⁹ ပာ်တဒၢနမဲာ်လၢယတၢ်ဒဲးဘး, ဒီးတြူာ်ကွံာ်ယတၢ်အၢတၢ်သီခဲလၢာ်န့ၣ်တက့ၢ်.

¹⁰ ကစၢ်ယွၤဧၢ, တ့လီၤသးအကဆှီလၢယပူၤ, ဒီးသူၣ်သီသးသီဒီးသူၣ်ဂၢၢ်သးကျၢၤလၢ ယပူၤတက့ၢ်.

¹¹ ညိကွံာ်ယၤလၢနမဲာ်ညါတဂ့ၤ, ဒီးဟံးထီၣ်ကွံာ်နသးစီဆှံလၢယၤတဂ့ၤ.

¹² ဒုးအိၣ်ထီၣ်က့ၤန့ၢ်ယၤလၢနတၢ်အုၣ်က့ၤခီၣ်က့ၤ အတၢ်သူၣ်ခုသးခု ဒီးမၤစၢၤယၤဒ်သိးယကဒိကနၣ်နၤန့ၣ်တက့ၢ်.

¹³ အန့ၣ်ဒီးယကဒုးနဲၣ်ပှၤမၤကမၣ်တၢ်ဖိလၢ နကျဲဧိၤကပူၤဧိၤ ဒီးပှၤတၢ်ဒဲးဘးဖိကဃၣ်လိၤက့ၤအသး ဆူနအိၣ်လီၤ.

¹⁴ ကစၢ်ယွၤဧၢ, မၤပူၤမၤဖျဲးယၤလၢတၢ်သံန့ၣ်တက့ၢ်. နမ့ၢ်ယတၢ်အုၣ်က့ၤခီၣ်က့ၤအကစၢ်, ဒီးယပျ့ၤကသးဝံၣ်ထီၣ်နၤဒိၣ်ဒိၣ် လၢနတၢ်မၤပူၤဖျဲးအဃိလီၤ.

¹⁵ ယွၤဧၢ, မၤစၢၤယၤလၢယကစံးကတိၤတၢ် ဒီးယကစံးထီၣ်ပတြၢၤနၤလီၤ.

¹⁶ အဂ့ၢ်ဒ်အံၤ, နတဘၣ်ဘၣ်နသးလၢတၢ်လုၢ်ဘၣ်. မ့ၢ်ယကဟ့ၣ်နၤတၢ်လုၢ်မ့ၣ်အူလၢ နတဘၣ်ဘၣ်နသးန့ၣ်ဧါ.

¹⁷ ကစၢ်ယွၤဧၢ, ယတၢ်လုၢ်န့ၣ်မ့ၢ်တၢ်သူၣ်ကၢ်သးလီၤလီၤ. ကစၢ်ယွၤဧၢ, တၢ်သူၣ်ကၢ်သးလီၤဒီး တၢ်ပီၢ်ယၢ်လီၤက့ၤသးန့ၣ် နတမၤအီၤတရီတပါဘၣ်.

¹⁸ ကစၢ်ယွၤဧၢ, သူၣ်ကညီၤသးကညီၤစံယိၣ် ဒီးမၤစၢၤအီၤတက့ၢ်. သူၣ်ထီၣ်က့ၤယရူၤၡလ့ၣ်အဝ့ၢ်ခိၣ်ဒူတက့ၢ်.

¹⁹ တုၤနုၤတစု, နကဘၣ်နသးလၢ တၢ်တီတၢ်လိၤအတၢ်လုၢ်တဖၣ် ဒီးလၢပတၢ်လုၢ်မ့ၣ်အူတဖၣ်န့ၣ်လီၤ. ဒီးဂီၤဖံးဖါတဖၣ်ကဘၣ်တၢ်လုၢ်ထီၣ်အီၤလၢ နတၢ်လုၢ်လီၢ်အဖီခိၣ်န့ၣ်လီၤ.