စံးထီၣ်ပတြၢၤ 5 - Sgaw Karen Common Bible

တၢ်ထုကဖၣ်လၢတၢ်ကဟုကယာ်အဂီၢ်

¹ ယွၤဧၢ, ဒိကနၣ်ယတၢ်ကတိၤ, ဒီးပာ်သူၣ်ပာ်သးလၢယတၢ်ကအုကစွါန့ၣ်တက့ၢ်.

² ကနၣ်ယတၢ်ကိးထီၣ်လၢတၢ်မၤစၢၤအဂီၢ်, ယကစၢ်ယွၤဒီးယစီၤပၤဧၢ, အဂ့ၢ်ဒ်အံၤ, ယဃ့ဘါထုကဖၣ်တၢ်လၢနၤလီၤ.

³ ယွၤဧၢ, လၢမုၢ်ဂီၤန့ၣ်နနၢ်ဟူယကလုၢ်, ဒီးလၢမုၢ်ဟဲထီၣ်အကတီၢ်န့ၣ် ယလုၢ်ထီၣ်ယတၢ်ထုကဖၣ်ဒီးခိးကွၢ်လၢ်နၤလီၤ.

⁴ အဂ့ၢ်ဒ်အံၤ, နတမ့ၢ်ကစၢ်ယွၤတဂၤလၢအဘၣ်သူၣ်ဘၣ်သးလၢ တၢ်တတီတလိၤန့ၣ်ဘၣ်. တၢ်အၢတၢ်သီတအိၣ်တဆိးဘၣ်ဒီးနၤဘၣ်.

⁵ ပှၤပာ်ကဖိအသးန့ၣ်တဆၢထၢၣ်ဘၣ်လၢနမဲာ်ညါ, နသးဟ့ကယဲၢ်ပှၤမၤတၢ်အၢတၢ်သီခဲလၢာ်န့ၣ်လီၤ.

⁶ နမၤဟးဂီၤပှၤလၢအကတိၤကဘျံးကဘျၣ်တၢ်လီၤ. ပှၤလၢအအဲၣ်ဒိးတၢ်ဂၢ်သွံၣ်ဂၢ်စီၤ, ဒီးပှၤလီတၢ်သ့ၣ်တဖၣ်န့ၣ် နသးဘၣ်အၢအီၤလီၤ.

⁷ မ့မ့ၢ်ယဲဒၣ်အံၤ, ခီဖျိနတၢ်အဲၣ်ဂၢၢ်ကျၢၤလၢအဒိၣ်ဝဲအါဝဲန့ၣ်, ယကဟဲနုာ်ဘၣ်ဆူနဟံၣ်ပူၤ, ယကဘူၣ်ထီၣ်ဘါထီၣ်ဘၣ်နၤလၢ နတၢ်လုၢ်ဟံၣ်စီဆှံအပူၤ လၢတၢ်ပျံၤဒီးတၢ်ယူးယီၣ်ပာ်ကဲနၤအပူၤန့ၣ်လီၤ.

⁸ ယွၤဧၢ, ဆှၢယၤလၢနကျဲမ့ၢ်ကျဲတီအပူၤ မ့ၢ်လၢယအိၣ်ဒီးယဒုၣ်ယဒါအါမးအဃိန့ၣ်တက့ၢ်. မၤလိၤမၤပျီနကျဲလၢယမဲာ်ညါတက့ၢ်.

⁹ အဂ့ၢ်ဒ်အံၤ, တၢ်ကတိၤအမ့ၢ်အတီ တအိၣ်ဘၣ်လၢအထးခိၣ်နီတထံၣ်ဘၣ်. လၢအသးကံၢ်ပူၤန့ၣ်အိၣ်ထဲ တၢ်သးအိၣ်မၤဟးဂီၤတၢ်န့ၣ်လီၤ. အကိာ်ပူၤန့ၣ်လီၤဂာ်ဒီးတၢ်သွၣ်ခိၣ်အပူၤ အိၣ်အိးထီၣ်အသး, အပျ့ၤတဖၣ်ပှဲၤဒီးတၢ်ကတိၤအူသဖှိထီၣ်တၢ်လၢ ကလီန့ၢ်ပှၤအဂီၢ်လီၤ.

¹⁰ ကစၢ်ယွၤဧၢ, စံၣ်ညီၣ်ဒီးသိၣ်ဃီၣ်အဝဲသ့ၣ်န့ၣ်တက့ၢ်. မ်အတၢ်ကူၣ်အၢဒၣ်ဝဲ ကမၤဟးဂီၤက့ၤအဝဲသ့ၣ်န့ၣ်တက့ၢ်. မ့ၢ်လၢအတၢ်ဒဲးဘးအါဝဲဒီးအတၢ်ပူထီၣ်နၤအဃိ, နီၣ်ထီၣ်ကွံာ်အဝဲသ့ၣ်လၢနမဲာ်ညါန့ၣ်တက့ၢ်.

¹¹ မ့မ့ၢ်ကယဲၢ်ပှၤလၢအအိၣ်တဒၢလၢနပူၤန့ၣ် မ်အသူၣ်ခုသးခု, သူၣ်ဖှံသးညီတက့ၢ်. မ်အသူၣ်ဝံၣ်သးဆၢတၢ်လၢတၢ်သးခုအပူၤ တဘိယူၢ်ဃီတက့ၢ်. ပှၤလၢအအဲၣ်နမံၤန့ၣ်ကဟုကယာ်အီၤ, ဒ်သိးကသူၣ်ဖှံသးညီလၢနပူၤန့ၣ်တက့ၢ်.

¹² အဂ့ၢ်ဒ်အံၤ, ယွၤဧၢ, နဆိၣ်ဂ့ၤပှၤအတီအလိၤ, နတၢ်အဲၣ်ကဟုဘံၣ်ကယာ်ဘၢအီၤ ဒ်ကတီၤတဘ့ၣ်အသိးန့ၣ်လီၤ.