စံးထီၣ်ပတြၢၤ 42 - Sgaw Karen Common Bible

ပှၤတဂၤလၢအဘၣ်တၢ်ဟီထီၣ်ကွံာ်အီၤ လၢအထံအကီၢ်အပူၤ အတၢ်ထုကဖၣ်

¹ ကစၢ်ယွၤဧၢ, ဒ်တၤဟိဆၢန့ၢ်ထံကျိဖိလၢ အယွၤလီၤအသိး, ယသးဆၢန့ၢ်ဘၣ်နၤလီၤ.

² ကစၢ်ယွၤလၢအမူဝဲတဂၤဧၢ, တၢ်သူယသးလၢနၤလီၤ. ယကလဲၤဒီးဘူၣ်ထီၣ်ဘါထီၣ်ဘၣ်နၤအခါဖဲလဲၣ်.

³ ဖဲယဒုၣ်ယဒါတဖၣ်သံကွၢ်ယၤတထံၣ်ဃီလၢ “နကစၢ်ယွၤအိၣ်ဖဲလဲၣ်” န့ၣ်ဒီး, ယမဲာ်ထံမဲာ်နိမ့ၢ်ယတၢ်အီၣ်လၢ မုၢ်ဆါဆဲးလၢမုၢ်နၤန့ၣ်လီၤ.

⁴ တုၤယသ့ၣ်နီၣ်ထီၣ်က့ၤတၢ်လၢအပူၤကွံာ်န့ၣ်, ယသူၣ်ကၢ်သးလီၤယဲလီၤ. အဂ့ၢ်ဒ်အံၤ, ယလဲၤတ့ၢ်တၢ်ဒီးပှၤဂီၢ်မုၢ် ဆူကစၢ်ယွၤအဟံၣ် ဒီးဆှၢအဝဲသ့ၣ်လၢအတၢ်လဲၤအပူၤ အိၣ်ဒီးတၢ်သးဝံၣ်စံးထီၣ်ပတြၢၤကစၢ်ယွၤလၢ တၢ်သူၣ်ခုသးခု, လၢဘူၣ်အကတီၢ်န့ၣ်လီၤ.

⁵ ယသးဧၢ, ဘၣ်မနုၤလၢနသူၣ်ကၢ်သးလီၤန့ၣ်လဲၣ်. ဘၣ်မနုၤလၢနသူၣ်ကိၢ်နသးဂီၤန့ၣ်လဲၣ်. မုၢ်လၢ်တၢ်လၢကစၢ်ယွၤအပူၤ, အဂ့ၢ်ဒ်အံၤ, ယကစံးထီၣ်ပတြၢၤကဒီး ယကစၢ်ယွၤလၢအမၤပူၤဖျဲးက့ၤယၤလီၤ.

⁶ ဖဲအံၤလၢ တၢ်စိာ်မၢကဲကုၢ်အလီၢ်န့ၣ်, ယသူၣ်ကၢ်သးလီၤယဲလီၤ. ဒ်ထံလီၤဆူ သီၣ်လီၤလၢ ကစၢၢ်ဃ့ရမိၣ်ဒီး ကစၢၢ်မံစၢ်အလိၤဆူ ထံကျိယၢ်ဒ့ၣ်အသိးန့ၣ်

⁷ နဆှၢလီၤတၢ်သူၣ်အုးသးအုးအလပီသ့ၣ်တဖၣ်လၢ ယသးအလိၤ, တၢ်သဘံၣ်ဘုၣ်ကိးပသူထီၣ်ဆူ ယအိၣ်ဒ်တၢ်လုၣ်ဘၢတၢ်အသိးန့ၣ်လီၤ.

⁸ ယွၤပာ်ဖျါအတၢ်အဲၣ်ဂၢၢ်ကျၢၤလၢမုၢ်နံၤအကတီၢ် ဒ်သိးတၢ်သးဝံၣ်ကအိၣ်ဒီးယၤလၢမုၢ်နၤ, တၢ်ထုကဖၣ်ဆူယသးသမူ အကစၢ်ယွၤအအိၣ်န့ၣ်လီၤ.

⁹ ယစံးဘၣ်ကစၢ်ယွၤ, ယလၢၢ်, “ဘၣ်မနုၤလၢနသးပ့ၤနီၣ်ကွံာ်ယၤလဲၣ်. ဘၣ်မနုၤလၢယဘၣ်ဟီၣ်ဘၣ်ယၢၤလၢ ဒုၣ်ဒါအတၢ်ဆီၣ်ဘံၣ်ဆီၣ်ဘၢယၤအဃိန့ၣ်လဲၣ်.”

¹⁰ ယဘၣ်တၢ်ဆီၣ်တံၢ်ဆီၣ်သနံးယၤလၢအဝဲသ့ၣ် အတၢ်ကတိၤဒုၣ်ဒွဲၣ် ခီဖျိအတၢ်သံကွၢ်ယၤတထံၣ်ဃီ “နကစၢ်ယွၤအိၣ်ဖဲလဲၣ်” အဃိန့ၣ်လီၤ.

¹¹ ယသးဧၢ, ဘၣ်မနုၤလၢနသူၣ်ကၢ်သးလီၤန့ၣ်လဲၣ်. ဘၣ်မနုၤလၢနသူၣ်ကိၢ်နသးဂီၤန့ၣ်လဲၣ်. မုၢ်လၢ်တၢ်လၢကစၢ်ယွၤအပူၤ, အဂ့ၢ်ဒ်အံၤ, ယကစံးထီၣ်ပတြၢၤကဒီးယကစၢ်ယွၤလၢ အမၤပူၤဖျဲးတ့ၢ်ယၤန့ၣ်လီၤ.