စံးထီၣ်ပတြၢၤ 41 - Sgaw Karen Common Bible

ပှၤဆူးပှၤဆါတဂၤအတၢ်ထုကဖၣ်

¹ ပှၤလၢအဆိကမိၣ်တၢ်လၢပှၤဖှီၣ်ဖိယာ်ဖိအဂီၢ်န့ၣ် ဘၣ်ဆိၣ်ဂ့ၤဝဲလီၤ. ယွၤကမၤပူၤမၤဖျဲးအီၤလၢတၢ်ကိၢ်တၢ်ဂီၤ အမုၢ်တနံၤန့ၣ်လီၤ.

² ယွၤကကဟုဘံၣ်ကယာ်ဘၢအီၤဒီးဒုးမူအီၤန့ၣ်လီၤ. အဝဲကဘၣ်တၢ်ကိးအီၤလၢပှၤဘၣ်ဆိၣ်ဂ့ၤလၢ ထံဧိၤကီၢ်ဧိၤအပူၤန့ၣ်လီၤ. ယွၤတဟ့ၣ်လီၤအီၤဒ်အဒုၣ်အဒါသ့ၣ်တဖၣ် အတၢ်ဘၣ်အသးအသိးန့ၣ်ဘၣ်.

³ ယွၤမၤစၢၤအီၤလၢအတၢ်ဆူးတၢ်ဆါလီၢ်မံအဖီခိၣ်, ဒီးလၢအတၢ်ဆူးတၢ်ဆါအပူၤန့ၣ်, ယွၤမၤဘျါက့ၤအတၢ်ဆူးတၢ်ဆါခဲလၢာ်န့ၣ်လီၤ.

⁴ ယစံး, “ယွၤဧၢ, ယမၤတ့ၢ်တၢ်ဒဲးဘးထီဒါလံနၤလံ. သူၣ်ကညီၤသးကညီၤယၤဒီးမၤဘျါယၤတက့ၢ်.”

⁵ ယဒုၣ်ယဒါသ့ၣ်တဖၣ်ကတိၤဆၢအၢဆၢသီယၤ ဒီးစံးဝဲ, “အဝဲကသံဒီးအမံၤကဘၣ်တၢ် သးပ့ၤနီၣ်အီၤအခါဖဲလဲၣ်.”

⁶ ပှၤလၢအဟဲထံၣ်ယၤသ့ၣ်တဖၣ်အံၤ တအိၣ်ဒီးတၢ်သးတီဘၣ်. အဝဲသ့ၣ်ပာ်ဖှိၣ်တၢ်ကစီၣ်လၢအတဂ့ၤတဖၣ် လၢအဘၣ်ဃးဒီးယၤ, ဝံၤဟးထီၣ်ဒီးတဲတၢ်အံၤလၢ တၢ်လီၢ်ကိးတီၤဒဲးန့ၣ်လီၤ.

⁷ ပှၤလၢအသးဟ့ယၤခဲလၢာ် စံးကတိၤသကိးယဂ့ၢ်ကသွံဒံ, ဒီးအဝဲသ့ၣ်ဆိကမိၣ်ထီၣ်န့ၢ်တၢ်အအၢကတၢၢ် လၢအကဘၣ်ယၤန့ၣ်လီၤ.

⁸ အဝဲသ့ၣ်စံးဝဲ, “အဝဲဆါတုၤအကသံလီၤ. ဆၢထၢၣ်က့ၤလၢအလီၢ်မံခိၣ် တန့ၢ်နီတဘျီလၢၤဘၣ်.”

⁹ ယတံၤသကိးအဂ့ၤကတၢၢ်, ပှၤလၢယနာ်န့ၢ်အီၤအဒိၣ်ကတၢၢ် လၢယဟ့ၣ်နီၤလီၤအီၤယတၢ်အီၣ်တဂၤဒၣ်လဲာ်, ထီဒါက့ၤယၤလီၤ.

¹⁰ ယွၤဧၢ, သးကညီၤလၢ်ယၤဒီး ဒုးအိၣ်ဆူၣ်အိၣ်ချ့ထီၣ်က့ၤယၤ ဒ်သိးယကဟ့ၣ်ကၣ်ဘၣ်က့ၤယဒုၣ်ယဒါ တဖၣ်အဂီၢ်န့ၣ်တက့ၢ်.

¹¹ လၢယဒုၣ်ယဒါတဖၣ်တမၤနၢၤယၤလၢၤဘၣ်အဃိ, ယကသ့ၣ်ညါလၢနဘၣ်သူၣ်ဘၣ်သးလၢယၤလီၤ.

¹² နဟံးဃာ်တ့ၢ်လံယၤမ့ၢ်လၢ ယမၤတၢ်အမ့ၢ်အတီအဃိ, ဒီးနကပာ်ယၤလၢနမဲာ်ညါလီၤစိၤလီၤထီန့ၣ်လီၤ.

¹³ မ်ယွၤအံၣ်စရ့လးအကစၢ်ယွၤ, ဘၣ်တၢ်စံးထီၣ်ပတြၢၤအီၤ အစိၤစိၤအဃၣ်ဃၣ်တက့ၢ်. အၤမ့ၣ်ဒီးအၤမ့ၣ်.