စံးထီၣ်ပတြၢၤ 40 - Sgaw Karen Common Bible

တၢ်စံးထီၣ်ပတြၢၤအတၢ်သးဝံၣ်

¹ ယအိၣ်ခိးကွၢ်လၢ်ယွၤအတၢ်မၤစၢၤလၢ တၢ်သးစူၤအပူၤလီၤ. အဝဲဒိကနၣ်ယၤဒီးနၢ်ဟူတ့ၢ်ယတၢ်ကိးထီၣ်န့ၣ်လီၤ.

² အဝဲထုးထီၣ်ကွံာ်တ့ၢ်ယၤလၢတၢ်ပူၤလၢအလီၤပျံၤ လၢတၢ်သံအမဲးလီၤဘျၢၣ်အပူၤန့ၣ်လီၤ. အဝဲပာ်ယခိၣ်လၢလၢၢ်အဖီခိၣ် ဒီးမၤဂၢၢ်မၤကျၢၤယခီၣ်အတၢ်ထွဲတဖၣ်လီၤ.

³ အဝဲသိၣ်လိတ့ၢ်ယၤလၢယကသးဝံၣ်တၢ်သးဝံၣ်အသီ, တၢ်သးဝံၣ်စံးထီၣ်ပတြၢၤဆူပကစၢ်ယွၤန့ၣ်လီၤ. ပှၤအါဂၤလၢအထံၣ်တၢ်အံၤ ကအိၣ်ဒီးတၢ်ပျံၤဒီးတၢ်နာ်လၢယွၤအပူၤန့ၣ်လီၤ.

⁴ ပှၤလၢအပာ်ယွၤလၢအတၢ်သန့ၤအသး, ပှၤလၢအတဃၣ်အသးဆူတၢ်ဂီၤတၢ်ဖီၣ်, မ့တမ့ၢ်ပှၤလၢအတဒုးစဲဘူးအသးလၢ ကစၢ်လၢအတမ့ၢ်တတီသ့ၣ်တဖၣ်န့ၣ်, ဘၣ်ဆိၣ်ဂ့ၤဝဲလီၤ.

⁵ ယွၤပကစၢ်ယွၤဧၢ, နမၤတ့ၢ်တၢ်လီၤလးအါမးလၢပဂီၢ်လီၤ. ပှၤဒ်သိးဒီးနၤတအိၣ်နီတဂၤဘၣ်. နအိၣ်ဒီးတၢ်ကူၣ်ထီၣ်ဖးလီၤလၢ အလီၤလးအါမးလၢပဂီၢ်န့ၣ်လီၤ. ယစံးလၢအဂ့ၢ်တလၢာ်နီတဘျီဘၣ်. အါန့ၢ်ယဂံၢ်သ့တက့ၢ်လီၤ.

⁶ နတသးလီတၢ်လုၢ်တၢ်ပာ်ဒီး တၢ်လုၢ်မၤဘူၣ်တဖၣ်န့ၣ်ဘၣ်. နတဃ့တၢ်လုၢ်မ့ၣ်အူ ဒီးတၢ်လုၢ်တၢ်ဒဲးဘးန့ၣ်ဘၣ်. မ့မ့ၢ်နအိးထီၣ်ယနၢ်လၢ ယကနၢ်ဟူနၤအဂီၢ်န့ၣ်လီၤ.

⁷ လၢတၢ်န့ၣ်အဃိယစံးဆၢယဲ, ‘‘ယအိၣ်ဖဲအံၤလီၤ. နတၢ်သိၣ်လိသီလိလၢယဂီၢ်တဖၣ်အိၣ်ကွဲးအသး လၢလံာ်တၢ်သိၣ်တၢ်သီအပူၤလီၤ.

⁸ ယကစၢ်ယွၤဧၢ, ယသးခုမၤယဲနတၢ်ဘၣ်နသးန့ၣ်လီၤ. ယပၢၤဃာ်နတၢ်သိၣ်တၢ်သီလၢယသးပူၤလီၤ.’’

⁹ ယွၤဧၢ, လၢနပှၤဂီၢ်မုၢ်အတၢ်အိၣ်ဖှိၣ်ရိဖှိၣ်ဖးဒိၣ်အ ပူၤ, ယတဲဖျါတ့ၢ်ယဲတၢ်ကစီၣ်အမုာ်လၢ နမၤပူၤဖျဲးပှၤလီၤ. နသ့ၣ်ညါနဲလၢယတဆိကတီၢ် တဲတၢ်အံၤနီတဘျီဘၣ်.

¹⁰ ယတပာ်ခူသူၣ်နတၢ်မၤပူၤဖျဲးအဂ့ၢ်လၢ ယသးပူၤန့ၣ်ဘၣ်. ယစံးဘၣ်တဲဘၣ်လံယဲနတၢ်သူၣ်တီသးလိၤဒီး နတၢ်မၤပူၤမၤဖျဲးအဂ့ၢ်န့ၣ်လံ. ယတပာ်ခူသူၣ်နတၢ်အဲၣ်ဂၢၢ်ကျၢၤဒီး နတၢ်သူၣ်တီသးလိၤအဂ့ၢ် လၢပှၤဂီၢ်မုၢ်အတၢ်အိၣ်ဖှိၣ်ရိဖှိၣ်န့ၣ်ဘၣ်.

¹¹ ယွၤဧၢ, မ်နသုတထုးကွံာ်နတၢ်သးကညီၤလၢယၤတဂ့ၤ. မ်နတၢ်အဲၣ်ဂၢၢ်ကျၢၤဒီးနတၢ်သူၣ်တီသးတီ ပၢၤယၤတထံၣ်ဃီတက့ၢ်.

တၢ်ထုကဖၣ်လၢတၢ်မၤစၢၤအဂီၢ်

¹² ယဘၣ်တၢ်ကဝီၤဃာ်ယၤလၢတၢ်ကိၢ်တၢ်ဂီၤတဖၣ် ဒီးအါဝဲဒိၣ်မးလၢယကဂံၢ်အီၤဒၣ်လဲာ်န့ၣ်လီၤ. ယတၢ်ဒဲးဘးသ့ၣ်တဖၣ်ချုးန့ၢ်ယၤ ဒီးယတထံၣ်တၢ်လၢၤဘၣ်. အဝဲသ့ၣ်အါန့ၢ်ဒံးယခိၣ်သူအဘိတဖၣ် ဒီးယတၢ်သူၣ်ဒူသးဒူလီၤမၢ်န့ၢ်ယၤလီၤ.

¹³ ယွၤဧၢ, ဟဲဒီးမၤပူၤမၤဖျဲးယၤတက့ၢ်. ယွၤဧၢ, မၤချ့ချ့လၢနကမၤစၢၤယၤတက့ၢ်.

¹⁴ မ်ပှၤလၢအဂုာ်ကျဲးစၢးမၤသံယၤတဖၣ် ဘၣ်တၢ်မၤနၢၤဒီးဘၣ်တၢ်မၤသဘံၣ်ဘုၣ်ကွံာ်အီၤ လၢာ်လၢာ်ဆ့ဆ့ မ်ပှၤလၢအသးခုလၢယတၢ်ဘၣ်ကိၢ်ဘၣ်ဂီၤအဃိန့ၣ်, ဘၣ်တၢ်မၤဃၣ်ကွံာ်အီၤဒီး ဘၣ်တၢ်မၤမဲာ်ဆှးအီၤန့ၣ်တက့ၢ်.

¹⁵ မ်ပှၤလၢအနံၤဘၣ်ဖၣ်လဲယၤတဖၣ်န့ၣ် အမဲာ်ဆှးလီၤက့ၤအသးတုၤ အမၤက့ၤတၢ်မၤတသ့ဘၣ်နီတမံၤန့ၣ်တက့ၢ်.

¹⁶ မ်ပှၤလၢအဟဲဆူနအိၣ်ခဲလၢာ် ကသူၣ်ခုသးခုဒီးသူၣ်ဖှံသးညီန့ၣ်တက့ၢ်. မ်ပှၤလၢအစံးဘျုးနၤလၢ နတၢ်အုၣ်က့ၤခီၣ်က့ၤအဂီၢ်ခဲလၢာ် စံးထီဘိ, ‘‘ယွၤန့ၣ်ဒိၣ်ဝဲလီၤ’’ န့ၣ်တက့ၢ်.

¹⁷ ယွၤဧၢ, ယဂံၢ်ယဘါစၢ်ဒီးယဖှီၣ်ယဲလီၤ. ဘၣ်ဆၣ်နတသးပ့ၤနီၣ်တ့ၢ်ယၤဘၣ်. နမ့ၢ်ပှၤလၢအမၤပူၤဖျဲးယၤဒီးယကစၢ်ယွၤလီၤ. မၤယံာ်နသးလၢနကမၤစၢၤယၤအဂီၢ်န့ၣ်တဂ့ၤ.