စံးထီၣ်ပတြၢၤ 4 - Sgaw Karen Common Bible

မုၢ်ဟါအတၢ်ထုကဖၣ်လၢတၢ်မၤစၢၤအဂီၢ်

¹ ယတၢ်တီတၢ်လိၤကစၢ်ယွၤဧၢ, တုၤယကိးထီၣ်နၤဒီးစံးဆၢလၢ်ဘၣ်ယၤတက့ၢ်. ဖဲယအိၣ်လၢတၢ်ကိၢ်တၢ်ဂီၤအပူၤန့ၣ်နမၤစၢၤယၤလီၤ. သူၣ်ကညီၤသးကညီၤယၤဒီး ဒိကနၣ်ယတၢ်ထုကဖၣ်တက့ၢ်.

² သုဝဲ, ပှၤဂီၢ်မုၢ်ကမၤတရီတပါယၤဆံးယံာ်လဲၣ်. သုကအဲၣ်တၢ်ကလီကလီ, ဒီးလူၤဃုတၢ်တတီတလိၤန့ၣ်ဆံးယံာ်လဲၣ်. စ့လၤ

³ သ့ၣ်ညါလၢယွၤပာ်လီၤဆီပှၤအဲၣ်ယွၤပျံၤယွၤ လၢအဂီၢ်ဒၣ်ဝဲန့ၣ်တက့ၢ်. တုၤယကိးထီၣ်အီၤဒီးအဝဲဒၣ်နၢ်ဟူယၤလီၤ.

⁴ ကနိးကစုာ်လၢ တၢ်ပျံၤတၢ်ဖုးဒီးမၤတၢ်ဒဲးဘးလၢၤတဂ့ၤ. ဖဲသုမံလီၤလၢသုလီၢ်မံပူၤန့ၣ်, ဆိကမိၣ်လီၤက့ၤ သုသးလၢတၢ်ဘှ့ၣ်တၢ်ဘှီၣ်အပူၤတက့ၢ်.

⁵ လုၢ်တၢ်လုၢ်အတီအလိၤတဖၣ်, ဒီးသန့ၤသုသးလၢယွၤတက့ၢ်. စ့လၤ

⁶ ပှၤအိၣ်ဝဲအါဂၤလၢအစံး, “အိ, မ့ၢ်မတၤကဒုးထံၣ်ပှၤ လၢတၢ်အဂ့ၤန့ၣ်လဲၣ်. ယွၤဧၢ, ကွၢ်လီၤပှၤလၢ တၢ်သူၣ်ကညီၤသးကညီၤအပူၤတက့ၢ်.”

⁷ တၢ်သးခုလၢနဟ့ၣ်ယၤန့ၣ်, ဒိၣ်န့ၢ်အဝဲသ့ၣ် အတၢ်သးခုလၢအအိၣ်ဒီးအီၤ ဖဲအဘုဧိၤဟုဧိၤဒီးအစပံးထံအိၣ်ဝဲ အါအါဂီၢ်ဂီၢ်အခါန့ၣ်လီၤ.

⁸ ယကမံလီၤဒီးမံယဲမုာ်မုာ်လီၤ. ယွၤဧၢ, နမ့ၢ်ပှၤထဲတဂၤဧိၤလၢအကဟုဘံၣ် ကယာ်ဘၢယၤလၢလၢပှဲၤပှဲၤန့ၣ်လီၤ.