စံးထီၣ်ပတြၢၤ 38 - Sgaw Karen Common Bible

ပှၤဘၣ်နးဘၣ်ဖှီၣ်တဂၤအတၢ်ထုကဖၣ်

¹ ယွၤဧၢ, သိၣ်ဃီၣ်ယၤလၢ နတၢ်သးထီၣ်အပူၤန့ၣ်တဂ့ၤ. ဒီးသိၣ်က့ၤသီက့ၤယၤလၢနတၢ်သးဒိၣ်အပူၤန့ၣ်တဂ့ၤ.

² နပျၢ်တဖၣ်ဆဲးဘၣ်ယၤ ဒီးနစုဒူၣ်မၤလီၤဃံၤတ့ၢ်လံယၤလံ.

³ လၢနတၢ်သးထီၣ်အဃိ, ယအိၣ်လၢတၢ်ဆါနးနးကလဲာ်အပူၤ, ယနီၢ်ကစၢ်ဒီတဂၤညါအိၣ်ဒီးတၢ်ဆူးတၢ်ဆါလၢ ယတၢ်ဒဲးဘးတဖၣ်အဃိန့ၣ်လီၤ.

⁴ ယတၢ်ဒဲးဘးလုၣ်ဘၢကွံာ်ယၤ ဒီးမ့ၢ်တၢ်ဝံတၢ်ယိးလၢအဃၢကဲၣ်ဆိးလၢ ယကယိးအီၤအဂီၢ်န့ၣ်လီၤ.

⁵ ယပူၤလီၢ်တဖၣ်နၢအုၣ်ဒီးဒၢဖံဝဲလၢ ယတၢ်တသ့ၣ်ညါယွၤအဃိန့ၣ်လီၤ.

⁶ ယသကူးလီၤယသးလၢာ်လၢာ်ဆ့ဆ့ ဒီးယထိၣ်လီၤပှီၤယသး, ယအိၣ်လၢတၢ်မိၣ်တၢ်မးအပူၤသ့သ့တနံၤလီၤ.

⁷ ယယီၢ်ဒ့ကိၢ်အူလၢတၢ်ဆါအဃိ ဒီးယအိၣ်လၢတၢ်ဆါနးနးကလဲာ်အပူၤလီၤ.

⁸ ယဂံၢ်ယဘါလၢာ်ကွံာ်ဒီးယဘၣ်တၢ်ဆီၣ်တံၢ်သနံးယၤ, ယကအုကစွါယဲလၢ ယသးဘၣ်တၢ်ကိၢ်တၢ်ဂီၤအဃိလီၤ.

⁹ ယွၤဧၢ, နသ့ၣ်ညါယတၢ်ဆၢန့ၢ်ဘၣ်ခဲလၢာ်, ဒီးနနၢ်ဟူယတၢ်ကအုကစွါခဲလၢာ်န့ၣ်လီၤ.

¹⁰ ယသူၣ်စံၣ်ယသးစံၣ်, ယဂံၢ်ယဘါလၢာ်ကွံာ် ဒီးယမဲာ်ချံအတၢ်ကပီၤစ့ၢ်ကီး လီၤမၢ်ကွံာ်န့ၢ်ယၤလံ.

¹¹ ယတံၤသကိးတဖၣ်ဒီးပှၤအိၣ်လၢယဃၢၤတဖၣ် အိၣ်ယံၤဒီးယၤ မ့ၢ်လၢယပူၤလီၢ်တဖၣ်အဃိ, ယဟံၣ်ဖိဃီဖိသ့ၣ်တဖၣ်ဒၣ်လဲာ် အိၣ်ယံၤဒီးယၤလီၤ.

¹² ပှၤလၢအအဲၣ်ဒိးမၤသံယၤပာ်လီၤပျံၤသကွီၤလၢယဂီၢ်, ပှၤလၢအအဲၣ်ဒိးမၤဆါယၤကတိၤပျံၤကတိၤဖုးတၢ်လၢကမၤဟး ဂီၤယၤလီၤ. အဝဲသ့ၣ်ကူၣ်တၢ်အၢထီဒါယၤသ့သ့တနံၤလီၤ.

¹³ ဒီးယလီၤဂာ်ဒီးပှၤနၢ်တအၢတဂၤ, ယတနၢ်ဟူတၢ်ဘၣ်. ယလီၤဂာ်ဒီးပှၤတအုၣ်တဂၤလၢ အတအဲးထီၣ်အထးခိၣ်ဘၣ်န့ၣ်လီၤ.

¹⁴ မ့ၢ်လီၤ. ယလီၤဂာ်ဒီးပှၤလၢအတနၢ်ဟူတၢ် ဒီးတကတိၤဆၢတၢ်အၢလၢ အထးခိၣ်ဘၣ်တဂၤန့ၣ်လီၤ.

¹⁵ ဘၣ်ဆၣ်ယွၤဧၢ, ယမုၢ်လၢ်တၢ်လၢနၤလီၤ. ဒီးနဲဒၣ်ယွၤယကစၢ်ယွၤဧၢ, နကစံးဆၢတၢ်လၢယဂီၢ်လီၤ.

¹⁶ အဂ့ၢ်ဒ်အံၤ, ယဃ့တ့ၢ်ယဲ, “တဘၣ်ပျဲအဝဲသ့ၣ်သးခုလၢယဖီခိၣ်တဂ့ၤ, တုၤယခီၣ်လီၤတလံာ်ဒီး တဘၣ်ပျဲအဝဲသ့ၣ်ပာ်ကဖၢလၢအသးလၢယဖီခိၣ်တဂ့ၤ.”

¹⁷ အဂ့ၢ်ဒ်အံၤ, ဘူးလၢယကလီၤဃံၤ, ဒီးယတၢ်ဆူးတၢ်ဆါန့ၣ်အိၣ်ဒီးယၤတထံၣ်ဃီလီၤ.

¹⁸ ယတဲလီၤကျဲၤလီၤယတၢ်ကမၣ်, ဒီးယသးအုးလၢယတၢ်ဒဲးဘးအဃိလီၤ.

¹⁹ ယဒုၣ်ယဒါသ့ၣ်တဖၣ်အိၣ်ဆူၣ်အိၣ်ချ့ ဒီးအဂံၢ်ဆူၣ်ဘါဆူၣ်ဝဲ ဒီးလၢတၢ်ဂ့ၢ်တအိၣ်နီတမံၤဘၣ်အပူၤန့ၣ်, ပှၤလၢအသးဟ့ယၤအိၣ်အါဂၤလီၤ.

²⁰ ပှၤလၢအဟ့ၣ်ဆၢက့ၤယၤ တၢ်အၢလၢတၢ်ဂ့ၤအဂီၢ်တဖၣ်န့ၣ် ထီဒါယၤ, မ့ၢ်လၢယဂုာ်ကျဲးစၢးမၤတၢ်ဂ့ၤအဃိလီၤ.

²¹ ယွၤဧၢ, ညိကွံာ်ယၤတဂ့ၤ. အိၣ်ယံၤဒီးယၤတဂ့ၤယကစၢ်ယွၤဧၢ.

²² မၤချ့ချ့လၢနကဟဲမၤစၢၤယၤအဂီၢ်တက့ၢ်. တၢ်အုၣ်က့ၤခီၣ်က့ၤယၤယကစၢ်ဧၢ.