စံးထီၣ်ပတြၢၤ 33 - Sgaw Karen Common Bible

တၢ်စံးထီၣ်ပတြၢၤအတၢ်သးဝံၣ်

¹ သုဝဲပှၤတီပှၤလိၤခဲလၢာ်သ့ၣ်ဧၢ, သူၣ်ဖှံသးညီလၢယွၤအပူၤတက့ၢ်. တၢ်စံးထီၣ်ပတြၢၤန့ၣ်ဂ့ၤဝဲလၢပှၤလၢ အသူၣ်လိၤအသးဘျၢအဂီၢ်န့ၣ်လီၤ.

² စံးထီၣ်ပတြၢၤယွၤလၢတနၢ်, သးဝံၣ်ထီၣ်အီၤလၢသီတူၢ် အိၣ်ဒီးပျံၤဆံဆဲၣ်ဘိန့ၣ်တက့ၢ်.

³ သးဝံၣ်ထီၣ်အီၤလၢတၢ်သးဝံၣ်အသီ, ဒ့သီတူၢ်လၢတၢ်သ့တၢ်ဘၣ်အလၢာ် ဒီးကိးထီၣ်အီၤလၢတၢ်သးခုန့ၣ်တက့ၢ်.

⁴ အဂ့ၢ်ဒ်အံၤ, ယွၤအကလုၢ်ကထါန့ၣ် မ့ၢ်တၢ်တီတၢ်လိၤ, ဒီးအဝဲအကလုၢ်တီလၢ တၢ်လၢအမၤဝဲ ခဲလၢာ်အပူၤလီၤ.

⁵ ယွၤအဲၣ်တၢ်မ့ၢ်တၢ်တီဒီးတၢ်စံၣ်ညီၣ်တီ, အတၢ်အဲၣ်အဂၢၢ်အကျၢၤမၤပှဲၤဟီၣ်ခိၣ်လီၤ.

⁶ ယွၤတ့လီၤမူခိၣ်ခီဖျိအကလုၢ်, မုၢ်, လါ, ဒီးဆၣ်တဖၣ်လၢအတၢ်ကတိၤန့ၣ်လီၤ.

⁷ ပာ်ဖှိၣ်ပီၣ်လဲၣ်အထံခဲလၢာ်လၢတၢ်လီၢ်တပူၤဃီ ဒီးပာ်ပီၣ်လဲၣ်အထံယိာ်လၢ တၢ်ပာ်ဖှိၣ်အလီၢ်တဖၣ်န့ၣ်လီၤ.

⁸ ကယဲၢ်တၢ်အိၣ်လၢ ဟီၣ်ခိၣ်ချၢခဲလၢာ်သ့ၣ်ဧၢ, ဘူၣ်ထီၣ်ဘါထီၣ်ယွၤ, ပှၤဟီၣ်ခိၣ်ဖိခဲလၢာ်သ့ၣ်ဧၢ, ယူးယီၣ်ယွၤတက့ၢ်.

⁹ အဂ့ၢ်ဒ်အံၤ, တုၤအစံးတၢ်ဒီးတၢ်ကဲထီၣ်အသးလီၤ. တုၤအဟ့ၣ်လီၤအကလုၢ်ဒီး တၢ်ခဲလၢာ်အိၣ်ထီၣ်ဝဲလီၤ.

¹⁰ ယွၤမၤဟးဂီၤပှၤကလုာ်အဂၤတဖၣ် အတၢ်ကူၣ်ထီၣ်ဖးလီၤ, မၤတံာ်တာ်အတၢ်ပာ်လီၤအသးတဖၣ်န့ၣ်လီၤ.

¹¹ ဘၣ်ဆၣ်ယွၤအတၢ်ကူၣ်ထီၣ်ဖးလီၤတဖၣ် အိၣ်ဂၢၢ်ဆိးကျၢၤလီၤစိၤလီၤထီ ဒီးအတၢ်ပာ်လီၤအသး အိၣ်ဝဲအစိၤစိၤအဃၣ်ဃၣ်လီၤ.

¹² ပှၤကလုာ်လၢကစၢ်ယွၤမ့ၢ်အကစၢ်န့ၣ်ဘၣ်ဆိၣ်ဂ့ၤနီၢ်နီၢ် ဒီးပှၤဂီၢ်မုၢ်လၢကစၢ်ယွၤဃုထၢအီၤလၢ အတၢ်န့ၢ်သါအဂီၢ်ဒၣ်ဝဲန့ၣ် ဘၣ်ဆိၣ်ဂ့ၤနီၢ်နီၢ်လီၤ.

¹³ ယွၤကွၢ်လီၤတၢ်လၢမူခိၣ် ဒီးထံၣ်ကယဲၢ်ပှၤကညီခဲလၢာ်လီၤ.

¹⁴ ဖဲအဆ့ၣ်နီၤပၢတၢ်အလီၢ်န့ၣ် ကွၢ်လီၤဝဲပှၤအိၣ်လၢဟီၣ်ခိၣ်ချၢခဲလၢာ်န့ၣ်လီၤ.

¹⁵ အဝဲဒုးကဲထီၣ်အဝဲသ့ၣ်အသးအတၢ်ဆိကမိၣ်ခဲလၢာ်, ဒီးသ့ၣ်ညါတၢ်ခဲလၢာ်လၢအဝဲသ့ၣ်မၤဝဲန့ၣ်လီၤ.

¹⁶ စီၤပၤတဘၣ်တၢ်မၤပူၤဖျဲးအီၤလၢ အသုးမုၢ်ဂီၢ်မုၢ်ဖးဒိၣ်အဃိဘၣ်. ပှၤသုးဖိတဘၣ်တၢ်မၤပူၤဖျဲးအီၤလၢ အဂံၢ်ဆူၣ်ဘါဆူၣ်အဃိဘၣ်.

¹⁷ တၢ်ဒုးသုးအကသ့ၣ်မ့ၢ်တၢ်မုၢ်လၢ်ကလီကလီ လၢတၢ်မၤနၢၤအဂီၢ်လီၤ. ဒီးလၢအတၢ်ဂံၢ်ဆူၣ်ဘါဆူၣ်ဒၣ်ဝဲန့ၣ် မၤပူၤဖျဲးအသးတသ့ဘၣ်.

¹⁸ ယွၤကွၢ်လီၤပှၤလၢအယူးယီၣ်အီၤ, ပှၤလၢအနာ်အတၢ်အဲၣ်အဂၢၢ်အကျၢၤ,

¹⁹ ဒ်သိးကမၤပူၤဖျဲးအဝဲသ့ၣ်လၢတၢ်သံ ဒီးပာ်မူအဝဲသ့ၣ်ဖဲ တၢ်သၣ်ဝံၤလီၤဒိအကတီၢ်န့ၣ်လီၤ.

²⁰ ပသးမုၢ်လၢ်တၢ်လၢယွၤအပူၤ, အဝဲမ့ၢ်ပတၢ်မၤစၢၤဒီးပကတီၤလီၤ.

²¹ ပသးသူၣ်ခုသးခုလၢအပူၤ, အဂ့ၢ်မ့ၢ်လၢပနာ်အမံၤစီဆှံအဃိလီၤ.

²² ယွၤဧၢ, မ်နတၢ်အဲၣ်အဂၢၢ်အကျၢၤအိၣ်လၢပလိၤ ဒ်ပတၢ်မုၢ်လၢ်လၢအိၣ်လၢနပူၤအသိးန့ၣ်တက့ၢ်.