စံးထီၣ်ပတြၢၤ 31 - Sgaw Karen Common Bible

တၢ်နာ်န့ၢ်ကစၢ်ယွၤအတၢ်ထုကဖၣ်

¹ ယွၤဧၢ, ယသန့ၤယသးလၢနၤလီၤ. မ်ယသုတမဲာ်ဆှးဘၣ်နီတဘျီတဂ့ၤ. လၢနတၢ်တီတၢ်လိၤအပူၤန့ၣ်, ကစၢ်ယွၤဧၢ မၤပူၤဖျဲးယၤတက့ၢ်.

² ဒိးနနၢ်လၢယၤ, မၤပူၤဖျဲးယၤခဲအံၤ, ကဲထီၣ်တၢ်အိၣ်သဒၢအလၢၢ်လၢယဂီၢ်, ယတၢ်တြီဆၢတၢ်လၢကမၤပူၤဖျဲးယၤန့ၣ်တက့ၢ်.

³ အဂ့ၢ်ဒ်အံၤ, နမ့ၢ်ယလၢၢ်ဒီးယတိာ်န့ၣ်လီၤ. ဆှၢယၤဒီးမိၤယၤလၢနမံၤအဃိဒ်နအၢၣ်လီၤ တ့ၢ်နဲအသိးန့ၣ်တက့ၢ်.

⁴ ထုးထီၣ်ကွံာ်ယၤလၢပှာ်လၢ အဘၣ်တၢ်ပာ်လီၤခူသူၣ်လၢယဂီၢ်တက့ၢ်. အဂ့ၢ်ဒ်အံၤ, နမ့ၢ်ယတၢ်ပူၤဖျဲးအလီၢ်လီၤ.

⁵ ယွၤ, ကစၢ်ယွၤလၢအမ့ၢ်အတီတဂၤဧၢ, ယဟ့ၣ်လီၤယသးလၢနစုပူၤလီၤ. အဂ့ၢ်ဒ်အံၤ, နပှ့ၤက့ၤလံယၤလံ.

⁶ နသးဟ့ပှၤလၢအဘူၣ်ထီၣ်ဘါထီၣ် တၢ်လီတၢ်ဝ့ၤအကစၢ်တဖၣ်, ဘၣ်ဆၣ်ယသန့ၤယသးလၢနၤလီၤ.

⁷ ယကသူၣ်ခုသးခုဒီးသူၣ်ဖှံသးညီ လၢနတၢ်အဲၣ်ဂၢၢ်ကျၢၤအဃိန့ၣ်လီၤ. နထံၣ်လံယတၢ်နးတၢ်ဖှီၣ်, ဒီးသ့ၣ်ညါယတၢ်ကိၢ်တၢ်ဂီၤလံ.

⁸ နတပျဲယဒုၣ်ယဒါသ့ၣ်တဖၣ်ဖီၣ်န့ၢ်ယၤဘၣ်. နဟ့ၣ်ယၤတၢ်သဘျ့လၢ ယကလဲၤဖဲယအဲၣ်ဒီးလဲၤဝဲအလီၢ်န့ၣ်လီၤ.

⁹ ယွၤဧၢ, သူၣ်ကညီၤသးကညီၤယၤတက့ၢ်. အဂ့ၢ်ဒ်အံၤ, ယအိၣ်လၢ တၢ်ကိၢ်တၢ်ဂီၤအပူၤလီၤ. ယမဲာ်ချံလီၤဘှံးဝဲလၢ တၢ်ဟီၣ်တၢ်ယၢၤနးမးအဃိ ဒီးယလီၤဘှံးလီၤတီၤလၢာ်လၢာ်ဆ့ဆ့လီၤ.

¹⁰ အဂ့ၢ်ဒ်အံၤ, ယသးသမူလၢာ်ကွံာ်ဝဲလၢတၢ်သူၣ်အုးသးအုး ဒီးယနံၣ်တဖၣ်လၢတၢ်ကအုကစွါအပူၤန့ၣ်လီၤ. ယဂံၢ်ယဘါစၢ်လီၤဝဲမ့ၢ်လၢ ယတၢ်သူၣ်ကိၢ်သးဂီၤအဃိဒီး ယဃံတဖၣ်ကျၣ်ကွံာ်ဝဲလီၤ.

¹¹ ယဒုၣ်ယဒါခဲလၢာ်, လီၤဆီဒၣ်တၢ်ပှၤလၢ ယဃၢၤတဖၣ်မၤယၤဒ်တၢ်လီၤသးဘၣ်အၢ, ပှၤလၢအသ့ၣ်ညါယၤတဖၣ်ပျံၤယၤ, တုၤအထံၣ်ယၤလၢကျဲဒီးဃ့ၢ်ကွံာ်ဝဲဒၣ်န့ၣ်လီၤ.

¹² ပှၤကိးဂၤဒဲးသးပ့ၤနီၣ်ယၤဒ်ယမ့ၢ် ပှၤသံတ့ၢ်တဂၤအသိး, ယလီၤဂာ်ဒ်တၢ်တမံၤလၢအဘၣ်တၢ် စူးကွံာ်အီၤန့ၣ်လီၤ.

¹³ ယနၢ်ဟူယဒုၣ်ယဒါအါဂၤကတိၤကသွံတၢ်, တၢ်လီၤပျံၤအိၣ်ဝးတရံးယၤလီၤ. အဝဲသ့ၣ်မၤထီၣ်တၢ်ကူၣ်တဖၣ်လၢအထီဒါယၤ, ကူၣ်ထီၣ်လၢကမၤသံယၤလီၤ.

¹⁴ ဘၣ်ဆၣ်ယတၢ်နာ်အံၤအိၣ်လၢနပူၤ, ယွၤဧၢ, နမ့ၢ်ယကစၢ်ယွၤလီၤ.

¹⁵ ထီဘိယအိၣ်လၢနတၢ်အိၣ်ပှိၤယၤအပူၤလီၤ, မၤပူၤဖျဲးယၤလၢယဒုၣ်ယဒါတဖၣ်, ပှၤလၢအမၤသံယၤတဖၣ်န့ၣ်တက့ၢ်.

¹⁶ ကွၢ်လီၤနခ့နပှၤလၢတၢ်သးကညီၤအပူၤတက့ၢ်, မၤပူၤမၤဖျဲးယၤလၢနတၢ်အဲၣ်ဂၢၢ်ကျၢၤ အပူၤန့ၣ်တက့ၢ်.

¹⁷ ယကိးထီၣ်နၤ, ယွၤဧၢ, ပျဲယဘၣ်တၢ်မဲာ်ဆှးတဂ့ၤ. မ်ပှၤအၢပှၤသီသ့ၣ်တဖၣ် ဘၣ်တၢ်မၤမဲာ်ဆှးအီၤတက့ၢ်. မ်အဝဲသ့ၣ်လဲၤလီၤဘှီၣ်ကလာ်ဆူ တၢ်သံအကီၢ်ပူၤန့ၣ်တက့ၢ်.

¹⁸ ပှၤလီတၢ်ဖိသ့ၣ်တဖၣ်လၢအပာ်ထီၣ်ထီအသး ဒီးအပာ်အသးကဖၢလၢ, လၢအကတိၤတရီတပါပှၤတီပှၤလိၤတဖၣ်န့ၣ်, မ်အနိးဖံးအိၣ်ဘှီၣ်ကလာ်တက့ၢ်.

¹⁹ နတၢ်ဂ့ၤလၢနပာ်ဖှိၣ်တ့ၢ်လၢ ပှၤလၢအပျံၤနၤအဂီၢ်, ဒီးလၢနကတဲာ်ကတီၤလၢ ပှၤလၢအသန့ၤအသးလၢနၤအဂီၢ် လၢပှၤကညီဖိအမဲာ်ညါန့ၣ်, မ့ၢ်အဒိၣ်ဆံးဒိၣ်လဲၣ်.

²⁰ နပာ်တဒၢအဝဲသ့ၣ်လၢတၢ်ပူၤဖျဲးအလီၢ်လၢနမဲာ်ညါ, လၢပှၤကညီအတၢ်ကူၣ်တဖၣ်, နပၢၤဃာ်အဝဲသ့ၣ်လၢနဒဲအပူၤ, လၢအဒုၣ်အဒါသ့ၣ်တဖၣ် အတၢ်ကတိၤဒုၣ်ဒွဲၣ်န့ၣ်လီၤ.

²¹ မ်ယွၤဘၣ်တၢ်စံးထီၣ်ပတြၢၤအီၤတက့ၢ်. အဂ့ၢ်ဒ်အံၤ, ဖဲယဘၣ်တၢ်ကဝီၤဃာ်ယၤလၢ ဝ့ၢ်ပူၤဒီးဘၣ်တၢ်ထီဒါယၤအခါန့ၣ်, အတၢ်အဲၣ်လၢအဒုးနဲၣ်ယၤအံၤ လီၤလးဆံးဒိၣ်လဲၣ်.

²² ယပျံၤတၢ်ဒီးယဆိကမိၣ်ယဲလၢ အဝဲဟီထီၣ်ကွံာ်ယၤလၢအမဲာ်ညါလံန့ၣ်လီၤ. ဘၣ်ဆၣ်တုၤယကိးထီၣ်အီၤလၢတၢ်မၤစၢၤအဂီၢ်န့ၣ်ဒီး နၢ်ဟူယတၢ်ကိးထီၣ်န့ၣ်လီၤ.

²³ အဲၣ်ယွၤ, အပှၤစီဆှံခဲလၢာ်သ့ၣ်ဧၢ, ယွၤအံးထွဲကွၢ်ထွဲပှၤလၢအသးတီဒီးအီၤ, ဘၣ်ဆၣ်ဟ့ၣ်ကၣ်ပှၤပာ်ထီၣ်ထီအသး အါအါကလဲာ်န့ၣ်လီၤ.

²⁴ ကယဲၢ်ပှၤလၢအမုၢ်လၢ်တၢ်လၢယွၤအပူၤ ခဲလၢာ်သ့ၣ်ဧၢ, ပာ်ဆူၣ်သုသး, ဒီးအိၣ်ဒီးတၢ်သူၣ်ဒူသးဒူတက့ၢ်.