စံးထီၣ်ပတြၢၤ 29 - Sgaw Karen Common Bible

ယွၤအကလုၢ်လၢကလံၤမုၢ်တွၤအပူၤ

¹ မူခိၣ်ဖိသ့ၣ်ဧၢ, စံးထီၣ်ပတြၢၤယွၤတက့ၢ်. စံးထီၣ်ပတြၢၤယွၤအလၤကပီၤ ဒီးအစိကမီၤန့ၣ်တက့ၢ်.

² ဟ့ၣ်ယွၤလၢတၢ်လၤတၢ်ကပီၤကြၢးဒီးအမံၤ, ဘါထီၣ်ယွၤလၢတၢ်စီဆှံအဃံအလၤန့ၣ်တက့ၢ်.

³ ယွၤအကလုၢ်ဘၣ်တၢ်နၢ်ဟူအီၤလၢပီၣ်လဲၣ်အဖီခိၣ်, တၢ်လၤကပီၤအကစၢ်မၤသီၣ်ထီၣ်အကလုၢ်ဒ် လီသီၣ်အသိး ဒီးအကလုၢ်သီၣ်ကဒါက့ၤလၢ ပီၣ်လဲၣ်မိၢ်ပှၢ်အဖီခိၣ်န့ၣ်လီၤ.

⁴ ယွၤအကလုၢ်အံၤအိၣ်ဒီးအစိအကမီၤ, ယွၤအကလုၢ်အံၤပှဲၤဝဲဒီးတၢ်ကဟုကညီၢ်န့ၣ်လီၤ.

⁵ ယွၤအကလုၢ်မၤကၢ်လီၤသ့ၣ်ဆှိအ့ရ့း, ယွၤမၤကၢ်လီၤလဘၤနိၣ်အသ့ၣ်ဆှိအ့ရ့းန့ၣ်လီၤ.

⁶ အဝဲဒုးစံၣ်လဘၤနိၣ်အကစၢၢ်ဒ်ဂီၤဖံးဖိအသိး ဒီးကစၢၢ်ဃ့ရမိၣ်ဒ်ဂီၤဖံးဖါလၢအရၢတဒုအသိးန့ၣ်လီၤ.

⁷ ယွၤအကလုၢ်ဒုးကပြ့ၢ်ထီၣ်လီဝၢ်ဒံး,

⁸ ယွၤအကလုၢ်မၤဟူးဝးပှၢ်မုၢ်ကနၢ, ယွၤမၤဟူးဝးကၤဒ့ၣ်အပှၢ်မုၢ်ကနၢန့ၣ်လီၤ.

⁹ ယွၤအကလုၢ်ဒုးဖှံလီၤတၤဟိမိၢ်တဖၣ် ဒီးမၤလီၤဆှုကွံာ်သ့ၣ်လၣ်ခဲလၢာ်လၢပှၢ်လၢ်ကျါ, ဒီးပှၤအိၣ်လၢအတၢ်လုၢ်ဟံၣ်အပူၤခဲလၢာ် ကိးထီၣ် “တၢ်လၤကပီၤမ်အဘၣ်ကစၢ်ယွၤ” န့ၣ်လီၤ.

¹⁰ ယွၤဆ့ၣ်နီၤပၢတၢ်လၢထံလုၣ်ဘၢတၢ်အဖီခိၣ်, ယွၤ, စီၤပၤလီၤထူလီၤယိာ်ဆ့ၣ်နီၤပၢတၢ်လီၤ.

¹¹ ယွၤဟ့ၣ်ဂံၢ်ဟ့ၣ်ဘါအပှၤဂီၢ်မုၢ်, ယွၤဆိၣ်ဂ့ၤအပှၤဂီၢ်မုၢ်လၢ တၢ်ဃူတၢ်ဖိးန့ၣ်လီၤ.